Read idoma OHÚTU 27 Bible Online

OHÚTU 27 - idoma bible

OHÚTU 27

¹Eko nɛ̄ Áyísīki le hīlókplícī nōó mɛ́ɛbɛ gɛ ŋ́ mā, ó le ɛhɔ̄ tū kéē lɛ Ísɔ, ɔyí nū ɔnyākwɔ́cɛ ā hīgwú. Anɔ́ɔ ó da ɔ́ kahíníī, “Ɔyí um!” Anɔ́ɔ ó tá ɔ̄ ohi kahíníī, “Ami yɔ̄ á.”

²Áyísīki da ɔ́ kahíníī, “N le hīla ɛɛ́, n lɔfú kwú eko dóódu glá.

³Kwú ɔyī mɛ́mla ɔtā kú uwɔ̄ ú abālɔbányā, ká ā ga ipácí, gaá lɛ ɛbɛ́ ŋmó gé um.

⁴Ká ā lɛ ɛga olɔnyɛ kú ɛbɛ́ ā nōo he um ɔtū ā he gé um, ká n̄ le lé. Cɛ́ɛ́ n lɛ ɔhā hɛ́ ce uwɔ ɛ́ɛ́ ká n̄ kwú.”

⁵Urebéka yɔ̄ ī jāhɔ̄, eko nɛ̄ Áyísīki yɔ̄ ī kɛlā lɛ Ísɔ, ɔyí nū ā. Eko nɛ̄ Ísɔ le tá ipácí, gáā tɔ́ɔ́tɛ́ kóō ŋmó ɛbɛ́ ā,

⁶Urebɛ́ka da ɔyí nū, Ujékɔ̄pu, kahíníī, “N pó abɔ̄ ádā uwɔ yɔ̄ ī kɛlā lɛ ɔyínɛ́ uwɔ, Ísɔ kahíníī,

⁷‘Lɛ ɛbɛ́ ŋmó cɛ́ɛ́ ká ā lɛ ɔ́ he lɔnyɛ gé um, ká n̄ le ɔhá hɛ́ ce uwɔ ipéyī Ɔwɔicō ɛ́ɛ́ ká n̄ géē kwú.’

⁸Abālɔbányā ā, ɔyí um jāhɔ̄ ká ā lɛ ɛlā nɛ̄ n gáā da uwɔ nyā pó.

⁹Nyɔ̄ ga ipú aɔ́dāajɛ ā, ká ā lɛ ɛdrɔ́ kú ɛwū ɛpa bī wā. Ká n̄ lɛ ɛdɔ ɔdōlé, nōo he ádā uwɔ̄ ɔtū ā yá.

¹⁰Cɛ́ɛ́ ká ā le bī gé lɛ ɔ́, kóō le lé, cɛ́ɛ́ kóō lɛ ɔhá hɛ́ ce uwɔ ɛ́ɛ́ kóō géē kwú.”

¹¹Amáŋ Ujékɔ̄pu da ɛ́nɛ́ nū kahíníī, “Ísɔ, ɔyínɛ um, bū ɔnwū nɛ̄hi, ń kē bū ɔnwū nwuné ŋ́.

¹²Ekohi ŋ́, ádā um géē lɛ abɔ̄ ma um iyē, ɔ́dāŋ nōó le má ka amíyɔ̄ gē plla anúɔ, ó géē tokónu gā um. Ó kē gáā wɛ o hɔ́hā ce um gɛ ŋ́.”

¹³Ɛ́nɛ́ nū da ɔ́ kahíníī, “Okónu nōó í tá gā uwɔ ā kóō lɛ um kwú. Lɛ ɛlā nɛ̄ n da uwɔ ā bī yúklɔ́ ōfōōfūnū, ká ā nyɔ̄ í lɛ ɛbɛ́ ā bī gé um.”

¹⁴Ó nyɔ̄ í lɛ ɛbɛ́ ā bī gé lɛ ɛ́nɛ́ nū, anɔ́ɔ ɛ́nɛ́ nū le ɛdɔ ɔdōlé nōo ī he ádā nū ɔtū ā yá lɛ ɔ́ á.

¹⁵Urebéka kwú úwé kú Ísɔ olɔɔlɔhi, nōo yɔ̄ inu ɔlɛ́ nū ā ú wu Ujékɔ̄pu, ɔyí nū nɛ̄ŋcɛ́ ā, iyē.

¹⁶Ó klla kwú ɔkpɛ́bɛ́ ú wu ɔ́ abɔ̄, mɛ́mla ɛga omlɛ́mlɛ́ kú ɔkɔ kú nū ā.

¹⁷Anɔ́ɔ ó kwú ɔdōlé olɔnyɛ, mɛ́mla igbō nōó yá ā ú kpó lɛ ɔyí nū, Ujékɔ̄pu á.

¹⁸Anɔ́ɔ Ujékɔ̄pu le tá inu ɛgiyí ádā nū, anɔ́ɔ ó da ɔ́ kahíníī, “Ádā um.” Anɔ́ɔ ádā nū kahíníī, “Ami yɔ̄ á. A wɛ ɔ̄nyɛ nɛ, ɔyí um?”

¹⁹Ujékɔ̄pu da ádā nū kahíníī, “N wɛ Ísɔ, ɔyí aflɛ́yí kú uwɔ ā nɛ. Ɔdā nɛ̄ a da um ā, n le ɔ́ yá ɛ́ɛ́.”

²⁰Amáŋ Áyísīki da ɔyí nū kahíníī, “Abɔ̄ ó yá lɛ ɛ́ɛ́ nɛ̄ a má ɛbɛ́ ā ŋmó fíyaa lɛ āa, ɔyí um?” Anɔ́ɔ Ujékɔ̄pu tóóhi kahíníī, “Ohígbū ka Óndú ā, nōo wɛ Ɔwɔicō kú uwɔ ā, bī ɛbɛ́ gé um á.”

²¹Anɔ́ɔ Áyísīki da Ujékɔ̄pu kahíníī, “Túblá um, ká n̄ lɛ abɔ̄ ma uwɔ iyē, ɔyí um. Cɛ́ɛ́ ká n̄ jé ɔ́dāŋ ka a wɛ ɔyí um, Ísɔ, ɔkwɔ̄ɔ̄kwɛ̄yi.”

²²Ujékɔ̄pu le tūblā Áyísīki ádā nū ajaajɛ. Anɔ́ɔ ádā nū le abɔ̄ ma ɔ́ iyē, anɔ́ɔ ó kahíníī, “Ɔkɛ̄lā ā wɛ ákú Ujékɔ̄pu, amáŋ, abɔ̄ ā wɛ ákú Ísɔ.”

²³Ó jé Ujékɔ̄pu éjúuma ŋ́, ohígbū ka abɔ̄ kú nū wɛ ɔnwɔ̄ɔ̄nwū bɛ̄ɛka ákú Ísɔ, ɔyīnɛ̄ nū ā. Abɔ̄ ó gáā hɔ́hā ce ɔ́ ā.

²⁴Amáŋ ó le ɔ̄kā da kpɔ́ kahíníī, “A wɛ Ísɔ, ɔyí um, ɔkwɛ̄yi ii?” Anɔ́ɔ ó tá ohi kahíníī, “N wɛ ɔyí uwɔ Ísɔ nɛ.”

²⁵Anɔ́ɔ Áyísīki kahíníī, “Lɛ ɛbɛ́ mɛ́mla ɔdōlé ā bī gé um ká um lé. Eko nɛ̄ n lɛ lé kwɛyí, cɛ́ɛ́ n lɛ ɔhā hɛ́ ce uwɔ.” Anɔ́ɔ Ujékɔ̄pu le ɛbɛ́ mɛ́mla ɔdōlé ā bī gé lɛ ɔ́, klla le ejé bī gé lɛ ɔ́ kóō gwá dúú á.

²⁶Anɔ́ɔ ádā nū, Áyísīki, da ɔ́ kahíníī, “Túblá um ká ā lɛ ɔtū má um ɔtū, ɔyí um.”

²⁷Abɔ̄ ó túblá anú kóō lɛ ɔtū má ɔ̄ ɔtū ā, anɔ́ɔ ó le ípī kú úwé kú nū pó á. Anɔ́ɔ ó le ɔhā hɛ́ ce ɔ́ á. Ó kahíníī, “Okpóocu olɔhi kú ɔyí um lɛbɛ̄ɛka ocu kú ɛhɔ̄ nɛ̄ Óndú ā le ɔhā hɛ́ ce ɔ́ ā.

²⁸Ɔwɔicō kóō ce ébú kú ɔkpāncō kú nū klá ajɛ ɛhɔ̄ kú uwɔ kóō le pīya ajɛ olɔhi! Kóō lɛ īkpō kú ɔdɛ̄hɔ̄ mɛ́mla ejé kpó gā uwɔ!

²⁹Ká aéwo kéē wɛ ācocɛ̄hɔ̄ kú uwɔ, cɛ́ɛ́ ká ā wɛ ɔkpani ayínɛ́ uwɔ. Ayínɛ́ uwɔ kéē tú wāajɛ gā uwɔ. É géē tókónu lɛ ɔ̄cɛ dóódu nōo tókónu gā uwɔ. É géē hɔ́hā ce ɔ̄cɛ dóódu nōo hɔ́hā ce uwɔ ā.”

³⁰Abɔ̄ Áyísīki le ɔhā hɛ́ ce Ujékɔ̄pu kwɛyí ā, nɛ̄ Ujékɔ̄pu yɔ̄ ī nyɛ̄ɛ̄ bōōbū ā, Ísɔ, ɔyínɛ́ nū ā, fajɛ ŋmá ɔtɛ́.

³¹Ó le ɛdɔ ɔdōlé nōo ī he ádā nū ɔtū ā yá, anɔ́ɔ ó le bī wā gé lɛ ádā nū á. Ó kahíníī, “Ádā um, cāŋjɛ ká ā lé ɛbɛ́ nɛ̄ ŋmó wā, cɛ́ɛ́ ká ā lɛ ɔhā hɛ́ ce um mɛ́ɛnɛ.”

³²Ádā nū, Áyísīki, da ɔ́ ɔ̄kā kahíníī, “A wɛ ɔ̄nyɛ nɛ?” Anɔ́ɔ ó tóohi kahíníī, “N wɛ ɔyí aflɛ́yí kú uwɔ, Ísɔ nɛ.”

³³Anɔ́ɔ Áyísīki gbɔɔ́ ō fīyégbúlú nɛ̄hi, anɔ́ɔ ó kahíníī, “Ɔ̄nyɛ kē tɔ́ɔtɛ́ ŋmó ɛbɛ́ je bī gé um ígbée āa? O lé kú um kwɛyí bōōbū ā nɛ̄ ā wā yɔ̄ á. N kwú ɔhā kú um ámōōmɛ ā í hɛ́ ce ɔ̄cɛ ɔ́ɔmā ɛɛ́. Ó kē í wɛ ákú nū piyóó.”

³⁴Eko nɛ Ísɔ lɛ ɛlā kú ádā nū pó ā, ɔtū kwú bīya lɛ ɔ́, anɔ́ɔ ó gbɔɔ́ ō tɛ́gíkwū nɛ̄hi á. Ó klla da ádā nū kahíníī, “Kóocō, lɛ ɔhā hɛ́ ce ami ā dúú, ádā um!”

³⁵Áyísīki tóohi da ɔ́ kahíníī, “Ɔyīnɛ uwɔ ā bī ula wā gaá mīyɛ ɔhā kú uwɔ ɛɛ́.”

³⁶Ísɔ kahíníī, “Ɛ̄nyā wɛ igbɔɔ́mpa nōó pīya um tū yɔ̄ mɛ́ɛ̄ á. Ó yéyījii ŋ́, iyē kú nū lé ka Ujékɔ̄pu ŋ́ nɛɛ? [34] Ó mīyɛ um ɔnyākwɔ́cɛ, anɔ́ɔ abālɔbányā, ó klla mīyɛ ɔhā kú um yɔ̄ á.” Anɔ́ɔ ó da ádā nū ɔ̄kā kahíníī, “Á lɛ ɔhā dúúmā nɛ̄ a gē hɛ́ ce um gɛ ŋ́ nɛɛ?”

³⁷Áyísīki da Ísɔ kahíníī, “N kwú ɔ̄ ú pīya óndú uwɔ ɛɛ́. N klla kē kwú odúúdú ayínɛ́ nū ā ú kpó pīya ācocɛ̄hɔ̄ kú nū ɛɛ́. N klla kē le īkpɔ̄dɛ̄hɔ̄ mɛ́mla ejé kpó lɛ ɔ́ ɛɛ́. Ɔdí ɔhá hile nɛ̄ n géē yá gā uwɔ ɛ́ɛ́ mā, ɔyí um?”

³⁸Ísɔ da ádā nū kahíníī, “Á lɛ ɔhā ékpónú gɛɛ ŋ́ n̄, ádā um? Lɛ ɔhā hɛ́ ce um dúú, ádā um.” Anɔ́ɔ Ísɔ je ɔkɔ gicō gbɔɔ́ ō jikwū á.

³⁹Anɔ́ɔ Áyísīki ádā nū tóohi kahíníī, “Ébú dúú í gáā ŋmá ɔkpáncō wā ɛgiyí uwɔ ŋ́. Ajɛ kú uwɔ í gáā yá ɔdɛ̄hɔ̄ gā uwɔ ŋ́.

⁴⁰A géē yēeyī o ŋmá lɛ ō kpɛ́fú tú ācɛ, cɛ́ɛ́ ká ā wu agbénú kú uwā. A géē cɛ̄ ɔyínɛ́ uwɔ ɛhɔ̄. Amáŋ eko nɛ̄ a tá ɛlā kú nū, [35] a géē hɛ́ īyī uwɔ tá ŋmá abɔ̄ kú nū.”

⁴¹Ísɔ wɔ́tū Ujékɔ̄pu nɛ̄hi, ohígbū ka ádā nū kwú ɔhā ú hɛ́ ce Ujékɔ̄pu. Ísɔ ka ipú ɔtū kú nū kahíníī, “Ádā um géē kwú ānāānā, é kē í bá inīkwū nū. Eko ɔ́ɔmā ā, n géē ŋmó ɔyínɛ́ um, Ujékɔ̄pu.”

⁴²Amáŋ Urebéka le ojuju kú Ísɔ, ɔyí nū ɔnyākwɔ́cɛ ā, jé. Anɔ́ɔ ó le ɛhɔ̄ tū fu Ujékɔ̄pu kóō ga, anɔ́ɔ ó kahíníī, “Ɔyínɛ́ uwɔ, Ísɔ yɔ̄ ī yá ojuju kóō lɛ uwɔ ŋmó cɛ́ɛ́ kóō lɛ ɔ́ci gwō.

⁴³Abālɔbányā, ɔyí um, lɛ ɛlā kú um nyā pó. Cāŋjɛ, ká ā le kwu ga ɛgiyí Ulában, ɔyínɛ́ um nɔ̄nyīlɔ nōo yɔ̄ Uháran ā.

⁴⁴Cɛ́ɛ́ ká ā yɔ̄ pī ɔ́ yɛɛ, gbéeko nɛ̄ ɔtū kú ɔyínɛ́ uwɔ ā gāajɛ,

⁴⁵nōó kwú mlanyí ɔdā nɛ̄ a yá ɔ̄ ā. Cɛ́ɛ́ n lɛ ɔ̄cɛ éyi tɛ̄hɔ̄ gaá lɛ uwɔ bī wā ɔlɛ́. Ɔdíyá ɛ́ɛ́ nɛ̄ n géē leyīkwu kpɔ́ kú ayínɔ̄nyīlɔ kú um ɛpɛplɛ́ɛpa kéē lɛ pɛ́ gekwú ɛ̄cī ékpónú ā?”

⁴⁶Anɔ́ɔ Urebéka da Áyísīki kahíníī, “Ɛ̄jɛ̄ kú anyā kú ācɛ Uhɛ́ti nɛ̄ Ísɔ lɛ le jɛ̄ um ɛɛ́. Ɔ́dāŋ ka Ujékɔ̄pu lɛ éyi kú ayípɔ̄nɔ̄nyā kú ācɛ Uhɛ́ti ɔhá lɛ gɛɛ, ayíka n géē kwú.”