Read idoma OHÚTU 28 Bible Online

OHÚTU 28 - idoma bible

OHÚTU 28

¹Áyísīki le Ujékɔ̄pu hīgwú, ó le ɔhā hɛ́ ce ɔ́, anɔ́ɔ ó kahíníī, “A híī lɛ ɔnyā ŋmá ipú ayínɔ̄nyā kú Ukénan ā ŋ́.

²Cāŋjɛ ká ā ga Umɛsopotámīya, ɔlɛ́ kú Ubɛ́tūwɛlu, ádā ɛ́nɛ́ uwɔ. Cɛ́ɛ́ kú ā gaá lɛ eyī kú ayínɔ̄nyā kú Ulában, ɔyínɛ́ ɛ́nɛ́ uwɔ ā lɛ.

³Ɔwɔicō nōo lɔfú fíyɛ́ dúú ā, kóō hɔ́hā ce uwɔ, kóō yá kú ā nyīla, cɛ́ɛ́ ka ā le pīya ádā ka aéwo alɛwa.

⁴Ɔwɔicō kóō lɛ ɔhā hé ce awɔ mɛ́mla ayááyí kú uwɔ ɛ́gɛ́nɛ̄ ó hɛ́ ce Ébrahām ā. Cɛ́ɛ́ ká ā mīyɛ ajɛ nyā, nɛ̄ Ɔwɔicō je lɛ Ébrahām ā. A lā anú bɛ̄ɛka ugbɔga abālɔbányā.”

⁵Áyísīki le Ujékɔ̄pu tɛ̄hɔ̄ nyɔ̄ ga ajɛ kú Umɛsopotámīya ɛgiyí Ulában, ɔyí kú Ubɛ́tūwɛlu, nōo wɛ ɔ̄cɛ Áram, klla wɛ ɔyínɛ́ kú Urebéka, ɛ́nɛ́ kú Ujékɔ̄pu mɛ́mla Ísɔ.

⁶Abɔ̄ Ísɔ le jé ka Áyísīki ɔ́ɔ le ɔhā hɛ́ ce Ujékɔ̄pu klla lɛ ɔ́ɔ tū nyɔ̄ ga Umɛsopotámīya kóō gaá lɛ ɔnyā lɛ ā. Ó klla le jé ka eko nɛ̄ Áyísīki hɔ́hā ce ɔ́ ā, ó le ukɔ́ tū ɔ̄ kóō lɛ ɔnyā ŋmá ŋmá Ukénan ŋ́.

⁷Ó klla le jé ka Ujékɔ̄pu lɛyítáajɛ lɛ ádā nū mɛ́mla ɛ́nɛ́ nū, anɔ́ɔ ó le tá Umɛsopotámīya á.

⁸Abɔ̄ Ísɔ le má ka ācɛnyā kú Ukénan í he Áyísīki ɔtū ŋ́ mā ā,

⁹Ísɔ le tá ɛgiyí Íssmɛ̄lu, ɔyí kú Ébrahām, gaá le ɔyínɔ̄nyā kú nū, Umahálati, nōo wɛ ɔyínɛ́ nɔ̄nyā kú Unɛ́báyɔ̄tu lɛ ɔnyā ɔhá ce aɛ́nɛ̄ ó tɛtɛ lɛ ā.

¹⁰Ujékɔ̄pu nyɛ̄ɛ̄ ŋmá Ubiyɛssɛ́ba, yɛ lɛyíkwu Uháran.

¹¹Ó gā ɛga otīhɔ éyi eko nɛ̄ ɛnɔ le táajɛ ā. Anɔ́ɔ ó le gbo abɔ́ɔ á. Ó má gwutá kwú ɛyí ú ce ɛcɔ̄ kóō gbɔlā.

¹²Ó le ɔ̄na nā, anɔ́ɔ ó má agidigbé nōo ŋmá ajɛ ga ɔkpáncō. Ó má aálelékwū-ōtɛ̄hɔ̄ bá ī gbo agidigbé gicō klla bá ī gbo ɔ́ wāajɛ

¹³Óndú ā háyī ɛhícō kú agidigbé ā[36] Anɔ́ɔ ó kahíníī, “Ami wɛ Óndú ā, nōo wɛ Ɔwɔicō kú Ébrahām, ádáádā uwɔ, mɛ́mla Áyísīki, ádā uwɔ á. N géē je ajɛ nɛ̄ a gwutá anú nyā gā uwɔ mɛ́mla ayááyí kú uwɔ

¹⁴Ipɔ́ɔma kú uwɔ géē lɛwa bɛ̄ɛka īkpō úmlá kú ipú ɛcɛ ā. É géē nyīla ga ɛnɔ̄ɔ̄cī mɛ́mla ɛnɔ̄ɔ̄nɛ̄, ɛhícō mɛ́mla ɛháajɛ. Oŋmá ɛgiyí ayááyí kú uwɔ ā nēé géē hɔ́hā ce odúúdú aéwo kú ɛcɛ á. [37]

¹⁵Mɔ́ɔ̄, n géē yɔ̄ mɛ́mla uwɔ, n géē lɛ uwɔ tū ɛga dóódu nɛ̄ a ī nyɔ̄. N géē je uwɔ kwúcē wāajɛ nyā. Ń gáā nyɛ̄ɛ̄ hī uwɔ tá ŋ́ jāā gbéeko nɛ̄ n le odúúdú ɔdā nɛ̄ n cokónu ka n géē yá gā uwɔ ā yá.”

¹⁶Ujékɔ̄pu le héyī ŋmá iyɔ̄lā ā, anɔ́ɔ ó kahíníī, “Ɔkwɔ̄ɔ̄kwɛ̄yi, Óndú ā yɔ̄ amānyā, anɔ́ɔ ń jé ŋ́ má.”

¹⁷Ó gbɔɔ́ ō yúúfi, anɔ́ɔ ó kahíníī, “Má ɛ́gɛ́nɛ̄ amānyā tūufi lɛ ā! Amānyā í wɛ ɛga dúú ɔhá gwō inu kú Ɔwɔicō tá ŋ́. Amānyā wɛ ɔwɛ kú ɔkpáncō á.”

¹⁸Ujékɔ̄pu cāŋjɛ ɔ̄cɔ̄ɔ̄cī, anɔ́ɔ ó kwú ɛcɔ̄ nōó le ɛyí ce ɔ́ ā ú, anɔ́ɔ ó kwú ɔ̄ ú kwaajɛ kóō lɛ pīya ɔdā oblatū. Anɔ́ɔ ó le anɔ̄ pīya klá anú ɛyí á.

¹⁹Ó hī iyē kú abɔ́ɔ ka Ubɛ́tɛlu. [38] Iyē kú igelī ā ɔ́ɔmā tɛtɛ wɛ Ulɔ́si.

²⁰Anɔ́ɔ Ujékɔ̄pu lɛ okónu ce lɛ Óndú ā kahíníī, “Ɔ́dāŋ ka awɔ nōo wɛ Ɔwɔicō géē yɔ̄ mla um, nɛ̄ a lɛ um gbō ga iyāwu kú um nyā ɛbɔ́, nɛ̄ a géē je ɔdōlé mɛ́mla īlī gā um,

²¹ɔ́dāŋ ka n le cīgbīhi wā ɔlɛ́ ádā um ɛbɔ́, eko ɔ́ɔmā awɔ nōo wɛ Óndú ā géē wɛ Ɔwɔicō kú um piyóó.

²²Ɛcɔ̄ kú oblatū nɛ̄ n le kwaajɛ nyā géē wɛ ɛga nēé géē gbō uwɔ ɛ̄gbā. N kē géē je éyi ŋmá ipú igwó kú ɛjɛ̄ɛ̄jī ɔdā nɛ̄ a kpó gā um ā gā uwɔ.”