Read idoma OHÚTU 29 Bible Online

OHÚTU 29 - idoma bible

OHÚTU 29

¹Ujékɔ̄pu le yɛ gɔbū ipú iyāwu kú nū ā, anɔ́ɔ ó ga ajɛ kú ācɛ ɛnɔ̄ɔ̄cī ā á.

²Ó gaá fu obugā éyi nɛ̄ ígwu kú aálá ɛtá gwutá pī ɔ̄ ajɛ abɔ́ɔ. Abɔ́ɔ nēé gē kpó éŋkpɔ̄ lɛ aálá ā gwá á. É le ɛcɔ̄ nɛ̄hi éyi gwū okónu obugā ā.

³Eko dúú nɛ̄ odúúdú aálá ā gaá le túbá abɔ́ɔ, ācogbāálá ā gē míya ɛcɔ̄ ā ŋmá okónu obugā ā kéē lɛ éŋkpɔ̄ kpó lɛ aálá ā gwá. Ācogbāálá ā gē je ígbɛ́cɔ̄ ā míya ce okónu obugā cīgbīhi ɛgiyí nū.

⁴Ujékɔ̄pu le ɔ̄kā da ācogbāálá ā kahíníī, “Aóklóbīya um, iní nɛ̄ aá ŋmá āa?” Anɔ́ɔ é tóohi kahíníī, “Alɔ ŋmá Uháran.”

⁵Ó da uwá ɔ̄kā kahíníī, “Aá jé Ulában, ɔyɔ́ɔ́yí kú Unáhɔ?” É tá ɔ̄ ohi kahíníī, “Alɔ jé ɔ̄.”

⁶Ó da uwá ɔ̄kā kahíníī, “Ó yɔ̄ lɔhi?” É tá ɔ̄ ohi kahíníī, “Ó yɔ̄ lɔhi. Kōō má Urécɛ̄lu, ɔyí nū nɔ̄nyā éyi yɔ̄ ī wā mɛ́mla aálá abɔ́ɔ ā.”

⁷Ujékɔ̄pu da uwá kahíníī, “Ɛnɔ kwu icō nɛ̄hi kpɔ́ ɛ́ɛ́, eko nēé ī tú aálá bá ā í yá ɛ́ɛ́ ŋ́, aá lɛ éŋkpɔ̄ kpó lɛ aálá ā gwá kú aá lɛ uwá kpó nyɔ̄ í lé ácí.”

⁸Amáŋ, é tóohi kahíníī, “Alɔ í yá lɛ ā glá ŋ́, n táafu ŋ́, eko nɛ̄ odúúdú aálá ā le túbá tɔ̄há nēé lɛ ɛcɔ̄ ā míya ŋmá okónu kú obugā ā, ɛ́ɛ́ nɛ̄ alɔ lɔfú kpó éŋkpɔ̄ lɛ aálá ā gwá glá á.”

⁹Abɔ̄ Ujékɔ̄pu yɔ̄ ī kɛlā mla uwá ā, Urécɛ̄lu, nōo gē gbō aálá kú ádā nū ā gā mla aálá āa.

¹⁰Eko nɛ̄ Ujékɔ̄pu le Urécɛ̄lu, ɔyínɔ̄nyā kú Ulában, ɔyínɛ́ ɛ́nɛ́ nū ā, má mla aálá kú Ulában ā, ó gaá le ɛcɔ̄ ā míya ŋmá okónu obugā ā, klla le éŋkpɔ̄ kpó lɛ aálá kú Ulában le gwá.

¹¹Ujékɔ̄pu le Urécɛ̄lu kwú bɔ́ɔ́tū, yɔ̄ ī jikwū kú éeyē gbōmgbōm.

¹²Ujékɔ̄pu da Urécɛ̄lu ka anúɔ wɛ ɔmáapú ádā nū. Ó ka anúɔ klla wɛ ɔyí Urebéka. Anɔ́ɔ Urécɛ̄lu le inya kwu gaá le ka lɛ ádā nū á.

¹³Eko nɛ̄ Ulában le ɔ̄kā kú Ujékɔ̄pu, ɔyí kú ɔyínɛ́ nū nɔ̄nyā ā pó ā, ó le inya kwu gaá jīla ɔ́ ɔwɛ, le ɔ́ kwú bá ɔtū. Anɔ́ɔ ó le ɔ́ bī wā ɔlɛ́ nū á. Ujékɔ̄pu le ɔdā dóódu nōo yá ā kpó ka lɛ Ulában.

¹⁴Anɔ́ɔ Ulában da ɔ́ kahíníī, “Īī, ɔkwɔ̄ɔ̄kwɛ̄yi ami mɛ́mla awɔ wɛ oyī ékpónú nɛ.” Anɔ́ɔ Ujékɔ̄pu yɔ̄ abɔ́ɔ mla anú ɔyā éyi á.

¹⁵Anɔ́ɔ Ulában da Ujékɔ̄pu kahíníī, “Á gáā yúklɔ́ ga um icííci abɔ̄ a wɛ ɔyí kú ɔyínɛ́ um ā ŋ́. Da um ɔdā nōo géē wɛ ulé kú uwɔ ā?”

¹⁶Ulában lɛ ayínɔ̄nyā ɛpa. Iyē kú ɔnyākwɔ́cɛ ā lé ka Ulɛ́ya, iyē kú ɛnɛ̄ŋcɛ́ ā lé ka Urécɛ̄lu.

¹⁷Ulɛ́ya lɔhi īkpēyī, amáŋ Urécɛ̄lu lɔhi klla jɛ ɔ́ncɛ́nyā fíyɛ́ á.

¹⁸Urécɛ̄lu le he Ujékɔ̄pu ɔtū, anɔ́ɔ ó kahíníī, “N géē kwɛ̄hɔ̄cī gā uwɔ iháyí ahāapa ohígbū Urécɛ̄lu kóō kwú pīya ɔnyā um.”

¹⁹Ulában tá ɔ̄ ohi kahíníī, “Ó lɔhi ká n je ɔ́ gā uwɔ fíyɛ́ ɛ̄nɛ̄ n géē je ɔ́ lɛ ɔ̄cɛ ɔhá. N cɛ̄ lɛ ā, klá mla um mɛ́ɛnɛ.”

²⁰Anɔ́ɔ Ujékɔ̄pu le úklɔ́ yá iháyí ahāapa ohígbū Urécɛ̄lu á. Amáŋ ó wɛ eko kpií tū ɔ̄, ohígbū ka Urécɛ̄lu le he ɔ́ ɔtū.

²¹Ujékɔ̄pu da Ulában kahíníī, “Kwú ɔnyā um, Urécɛ̄lu ú gā um mɛ́ n, ká n gbo mɛ́mla anú. Ohígbū ka ɛ̄cī nɛ̄ a tū um ā le jīla ɛɛ́.”

²²Anɔ́ɔ Ulában le odúúdú ācɛ kú abɔ́ɔ túbá lɛ ucɛ yá lɛ uwá á.

²³Amáŋ, ɔ̄nɔ̄ɔ̄nɛ̄ kú ícíícɛ ɔ́ɔmā, ikɔɔkɔ nōó í bī Urécɛ̄lu gé lɛ Ujékɔ̄pu ā, ó gbēyī kú ajɛ kóō kwú dobū kpó, anɔ́ɔ ó kwú Ulɛ́ya ú bī gé lɛ ɔ́ á.

²⁴(Ulában kwú ɔfiyɛ nɔ̄nyā kú nū, Usílpa ú lɛ adá nū, Ulɛ́ya kóō cɛ̄ ɔ̄ ɛhɔ̄).

²⁵Ɔ̄cɔ̄ɔ̄cī ā, Ujékɔ̄pu le má ka Ulɛ́ya nōó je lɛ anúɔ á, anɔ́ɔ Ujékɔ̄pu da Ulában ɔ̄kā kahíníī, “Ɔdí nɛ̄ a yá um yɔ̄ ā? Ń yúklɔ́ gā uwɔ ohígbū Urécɛ̄lu ŋ́ nɛɛ? Ɔdíyā ɛ́ɛ́ nɛ̄ a plla um āa?”

²⁶Ulában tóohi kahíníī, “Ó wɛ ucē kú alɔ amānyā kú ɔyínɔ̄nyā nɛ̄ŋcɛ́ kóō lɛ ɔbá gbɔbū lɛ ɔnyākwɔ́cɛ kú nū ŋ́.

²⁷Lɛ aláadi éyi kú uculo kú ɔnyā ō lɛ yá mla ɛ̄nyā ɛ́ɛ́. Cɛ́ɛ́ a klla kwɛ̄hɔ̄cī iháyí ahāapa ɔhá, cɛ́ɛ́ n kwú Urécɛ̄lu ú gā uwɔ dúú.”

²⁸Ujékɔ̄pu cɛ̄, abɔ̄ ó lɛ aláadi kú ogwéeyē kú ɔnyā ō lɛ ā yá āa, anɔ́ɔ Ulában kwú Urécɛ̄lu ú lɛ ɔ́ kóō wɛ ɔnyā nū.

²⁹(Ulábān kwū ɔfiyɛ nɔ̄nyā kú nū, Ubílha ú lɛ Urécɛ̄lu kóō cɛ̄ ɔ̄ ɛhɔ̄.)

³⁰Anɔ́ɔ Ujékɔ̄pu le gbo mla Urécɛ̄lu dúú á. Ihɔtū nōó lɛ lɛ Urécɛ̄lu ā fíyɛ́ ɛ̄nɛ̄ ó lɛ lɛ Ulɛ́ya á. Anɔ́ɔ ó klla kwɛ̄hɔ̄cī lɛ Ulában iháyí ahāapa ɔhá á.

³¹Eko nɛ̄ Óndú ā má ka Ujékɔ̄pu í lɛ ihɔtū lɛ Ulɛ́ya bɛ̄ɛka Urécɛ̄lu ā ŋ́ mā, ó le ɔ́ yá tɔ́ɔtɛ́ lɛ Ulɛ́ya kóō ma ɔyí, amáŋ Urécɛ̄lu wɛ ɔdɔma.

³²Ulɛ́ya le ipú yɔ̄ le ɔyínɔ̄nyīlɔ ma. Ó kahíníī, “Óndú ā le unwalu kú um má ɛɛ́. Abālɔbányā ɔbá um géē yíhɔtū tá um mɛ́ɛnɛ.” Anɔ́ɔ ó hī iyē nū ka Urúbɛn[39]

³³Ó klla le ipú yɔ̄ kpɔ́ anɔ́ɔ ó klla le ɔyí ɔ̄cɛnyīlɔ ɔhá ma á. Anɔ́ɔ ó kahíníī, “Óndú ā klla kwú ɛ̄nyā ú gā dúú, ohígbū koó le pó ka ɔbá um í yá ihɔtu tá um ŋ́.” Anɔ́ɔ ó hī iyē nū ka Usímīyɔn[40]

³⁴Ó klla le ipú yɔ̄ igbɔ́hɔ́ le ɔyí ɔ̄cɛnyīlɔ ɔhá ma, anɔ́ɔ ó kahíníī, “Ɛ̄nyā géē gbō ami mɛ́mla ɔbá um bɔ́há ká mɛ́ɛnɛ, ohígbū ka n le ayí nɔ̄nyilɔ ɛtá ma lɛ ɔ́ ɛ́ɛ́.” Anɔ́ɔ ó hī iyē nū ka Ulífāyi[41]

³⁵Anɔ́ɔ ó klla le ipú yɔ̄ kpɔ́, le ɔyí ɔ̄cɛnyīlɔ ɔhá ma. Anɔ́ɔ ó kahíníī, “Igbɛ́ɛ̄nyā ā n géē cɛ̄tra Óndú ā.” Anɔ́ɔ ó hī iyē nū ka Ujúda[42] Anɔ́ɔ ó klla ma ɔyí ɔhá gɛ ŋ́ má.