Read idoma OHÚTU 3 Bible Online

OHÚTU 3 - idoma bible

OHÚTU 3

¹Ɛgwā kē jé ula fíyɛ́ aɛ́bɛ́ dóódu nɛ̄ Óndú ā Ɔwɔicō yá ā á. Anɔ́ɔ ɛ̄cɛ̄ éyi ó da ɔ̄cɛnyā ā ɔ̄kā kahíníī, “Ɔ́wɔicō da aá ka aá kóō híī lé īkpō kú ɔcí dúúmā kú ɛhɔ̄ nyā ŋ́ ɔkwɔ̄ɔ̄kwɛ̄yi nɛɛ?”

²Ɔnyā ā tá ɔ̄ ohi kahíníī, “Alɔ lɔfú lé īkpō kú ɔcí dóódu kú ipú ɛhɔ̄ ā glá,

³amáŋ Ɔwɔicō ka ālɔ̄ híī lé īkpō kú ɔcí nōo kwu ɔtāhɛ̄ kú ɛhɔ̄ ā ŋ́. Ó klla da alɔ ka ālɔ̄ kōō híī lɛ iyē kwu ɔ́ ŋ́ o yá ka alɔ híī kwú ŋ́.”

⁴Ɛgwā tá ɔ̄ ohi kahíníī, “Ó wɛ ɔkwɛ̄yi ŋ́, aá í gáā kwú ŋ́.

⁵Ɔwɔicō jē ka eko nɛ̄ aá lɛ īkpō kú ɔcí ɔ́ɔmā ā lé, eyī kú aá géē jē nwūla nɛ̄ aá géē lɛbɛ̄ɛka Ɔwɔicō ā, nɛ̄ aá géē jē ɔdā olɔhi mɛ́mla obɔ̄bí dóódu[5] Anú yá nōó da aá ka aá híī lé ŋ́ má.”

⁶Anɔ́ɔ, ɔ̄cɛ̄nyā le má ka īkpō ɔcí ā héyīfuú klla ī ŋmúnwū kú ɔ̄cɛ kóō lé á. Ó má ɔ̄ ka ó klla wɛ ɔdā nēe gē je íjéeyī lɛ ɔ́ glá. Anɔ́ɔ ó le hɛ́ le lé á. Ɔnyā ā klla le je le ɔbá nū, anɔ́ɔ ó le lé dúú á.

⁷Abɔ̄ é le lé ā, ɔkwɔɔkwu ɔ́ɔmā eyī kú uwā kwú nwūla. Anɔ́ɔ é le jé ka aá ɔ́ɔ tóohɛ́ɛwa á. É le ēpū kú ɔcī nēé hī ufígi ā hɛ́ lɛ ɔ́ gɔ́ kwɔhá, anɔ́ɔ é kwú ú tū ohí á.

⁸Ɛplá ɔ̄nɔ̄ɔ̄nɛ̄ pɛtɛɛ ā, é le úcɛ́ kú Ɔwɔicō pó abɔ̄ ó yɔ̄ ī yɛ ipú ɛhɔ̄ kú Ídɛn ā. Anɔ́ɔ ɔ̄cɛnyīlɔ ā mɛ́mla ɔnyā le pɛ́ kwu í tayínū igbīhi aɔ́cí, o yá ɛ́ɛ́ kú Ɔwɔicō kóō híī má uwā ŋ́ má.

⁹Amáŋ Óndú ā, nōo wɛ Ɔwɔicō ā, hī ɔ̄cɛnyīlɔ ā igwú da ɔ́ ɔ̄kā kahíníī, “Iní nɛ̄ a yɔ̄ āa?”

¹⁰Anɔ́ɔ ɔlɛɛcɛ ā tóohi kahíníī, “N le úcɛ́ kú uwɔ pó ipū ɛhɔ̄ ā, ufi le um kwú, abɔ̄ n tóohɛ́ɛwa ā. Anɔ́ɔ n le kwu tayínū á.”

¹¹Anɔ́ɔ Óndú ā, nōo wɛ Ɔwɔicō ā, da ɔ́ ɔ̄kā kahíníī, “Ɔ̄nyɛ da uwɔ ka awɔ ɔ́ɔ tóohɛ́ɛwa āa? A lɛ īkpō ɔcí nɛ̄ n da uwɔ ka ā híī lé ŋ́ má lé nɛɛ?”

¹²Ɔ̄cɛ ā tá ɔ̄ ohi kahíníī, “Ɔ̄cɛnyā nɛ̄ a je gā um kóō yɔ̄ mla um ā je īkpō ɔcī ā gā um, nɛ̄ n lé á.”

¹³Anɔ́ɔ Óndú ā, nōo wɛ Ɔwɔicō ā, da ɔ̄cɛ̄nyā ā ɔ̄kā kahíníī, “Ɔdíyá ɛ́ɛ́ nɛ̄ a yá ɛ̄nyā āa?” Anɔ́ɔ ɔ̄cɛnyā ā kahíníī, “Ɛgwā ā plla um tū ɔ̄ nɛ̄ n lé á.”

¹⁴Anɔ́ɔ Óndú ā, nōo wɛ Ɔwɔicō ā, da ɛgwā ā kahíníī, “Ohígbū ɔdā nɛ̄ a yá nyā, n le okónu tá lɛ awɔ ofōōfū uwɔ ŋmá ipú aɛ́bɛ́ dóódu ɛɛ́. Ókónu ō tá ā wɛ ka o ŋmá abālɔbányā gɔbū a géē lɛ ɔtū mɛ́mla ipú kú uwɔ pi ajɛ, úmúlá kē géē wɛ ɔdōlé kú uwɔ piyóó, ipū oyēeyī kú uwɔ á.

¹⁵Awɔ mɛ́mla ɔ̄cɛnyā ā géē wɛ olɛlā kú īyī aá. Ɔyí kú nū mɛ́mla ákú uwɔ klla í wɛ olɛlā kú īyī ūwā. Ɔyí kú nū ā géē ca uwɔ ɛyí tāajɛ piyóó, a kē géē kwú ɔ́ ayīnu amīyɛ ikpó.”

¹⁶Ɔwɔicō da ɔ̄cɛnyā ā kahíniī, “N géē yá uwɔ ōwē nɛ̄hi eko nɛ̄ a yipú, a klla í jɔ́ɔnɔ nɛ̄ɛ̄nɛ̄hi eko nɛ̄ a í mɔyí. Nááná a ɔbá uwɔ géē he uwɔ ɔtū nɛ̄hi, ó kē í wɛ ɔkpani uwɔ.

¹⁷Ɔwɔicō da ɔ̄cɛnyīlɔ nɛ̄ iyē kú lé ka Ádām ā kahíníī, “Abɔ̄ ā cɛ̄, le ɔdā nɛ̄ ɔnyā awɔ da uwɔ ā yá ā. Nɛ̄ a kē le īkpɔ̄cí nɛ̄ n ka ā híī lé ŋ́ mā lé ā. N le okónu tá lɛ ajɛ ohígbū uwɔ ɛ́ɛ́. A géē yúklɔ́ nɛ̄hi ɛjɛ̄ɛ̄jī oyēeyī kú uwɔ ɛ́ɛ́ kú ā má ɔdōlé lé ŋmá anú.

¹⁸Ɔcí ujē mɛ́mlā ácí ujē ɛyɛ́ɛyɛ́yí géē bū ŋmá ajɛ ga uwɔ á. Ɔdɛ̄hɔ̄ nōo bū ŋmá ajɛ nɛ̄ a gáā lé á.

¹⁹A géē lɛ abɔ̄ kla ahɛ ŋmá údɔ̄bū kú uwɔ ɛ́ɛ́ nɛ̄ a géē má ɔdōlé lé á, jāā gbéeko nēé je uwɔ cīgbīhi ga ipú ajɛ. Ohígbū ka ipú ajɛ nēé yá uwɔ ŋmá á. Ipú ajɛ ā nɛ̄ a kē í kwúcē nyɔ̄ á.

²⁰Ádām,[6] ɔ̄cɛnyīlɔ̄ ā kwú iyē ú ce ɔnyā nū ka Íifu,[7] ohígbū ka anú wɛ ɛ́nɛ́ kú odúúdú alɛɛcɛ á.

²¹Anɔ́ɔ Óndú ā, nōo wɛ Ɔwɔicō ā, le īlī kú ɔkpɛ́bɛ́ yá lɛ Ádām mɛ́mla Íifu, ɔnyā Ádam ā.

²²Óndú ā, nōo wɛ Ɔwɔicō ā, kahíníī, “Mɔ́ɔ̄, ɔ̄cɛ kwú lɛbɛ̄ɛka alɔ ā ɛɛ́. Ó le ɔdɔ̄lɔhi mɛ́mla ɔdōbɔ̄bí jé ɛɛ́[8] A yá ó lɛ ɛga má fu īkpō kú ɔcí nōo gē je oyēeyī opiyóó ā, je le lé, cɛ́ɛ́ kóō yēeyī piyóó.”

²³Ohígbū ɔ́ɔmā, Óndú ā, nōo wɛ Ɔwɔicō ā, le ɔ́ nū bɛ̄cɛ ŋmá ipú ɛhɔ̄ kú Ídɛn ā, kóō gaá hí ajɛ nēé yá ɔ̄ ŋmá āa.

²⁴Abɔ̄ Ɔwɔicō le ācɛ ā nu bɛ̄cɛ ā, ó le aálelékwū ōtɛ̄hɔ̄ kú nū kpóā fu kwāajɛ ɛnɔ̄ɔ̄cī kú Ídɛn. Ó kwū ɔkpacāŋgelī ō cɔ̄lá nōo ī pīyeyī ga ɛga dóódu ā ú gbo ɔwɛ kóō cɛ̄ lɛ ɔ̄cɛ dóódu ga ɛgiyí ɔcí nōo ī je oyēeyī opiyóó ā ŋ́.