Read idoma OHÚTU 30 Bible Online

OHÚTU 30 - idoma bible

OHÚTU 30

¹Eko nɛ̄ Urécɛ̄lu le jé ka anúɔ ɔ́ í mɔyí dúúmā lɛ Ujékɔ̄pu ŋ́ mā, ó gbɔɔ́ ō má ɔyínɛ́ nū ímálānyī. Anɔ́ɔ ó da Ujékɔ̄pu kahíníī, “Yá ká n lɛ ipú yɔ̄ ká n lɛ ɔyí ma, ámāŋ n géē kwú.”

²Ujékɔ̄pu le cɔ̄nū mla Urécɛ̄lu, anɔ́ɔ ó kahíníī, “Ń wɛ Ɔwɔicō ŋ́. Ɔwɔicō yá nɛ̄ á ma ɔyí ɛ́ɛ́ ŋ́ má.

³Anɔ́ɔ Urécɛ̄lu kahíníī, “Má ɔ̄cocɛ̄hɔ̄ nɔ̄nyā kú um, Ubílha yɔ̄ á, le gbo mla anú, cɛ́ɛ́ kóō lɛ ɔyí éyi ma ga um, ká n lɛ ɔyí lɛ ŋmá ɛgiyí nū.”

⁴Anɔ́ɔ ó kwú Ubílha ú lɛ ɔbá nū, anɔ́ɔ Ujékɔ̄pu le gbo mla anú á.

⁵Ubílha le ipú yɔ̄ le ɔyínɔ̄nyīlɔ éyi ma lɛ Ujékɔ̄pu.

⁶Anɔ́ɔ Urécɛ̄lu kahíníī, “Ɔwɔicō le ɛpɔ̄hi hɛ́ gā um ɛɛ́. Ó le ɔkɔ nɛ̄ n gba ā pó, le ɔyínɔ̄nyīlɔ je gā um.” Ohígbū ɔ́ɔmā ó hī iyē kú nū ka Udáni.[43]

⁷Ɔ̄cocɛ̄hɔ̄ kú Urécɛ̄lu, Ubílha klla le ipú yɔ̄ igbɔhá kpɔ́, anɔ́ɔ ó le ɔyínɔ̄nyīlɔ ɔ́mpa ma lɛ Ujékɔ̄pu.

⁸Anɔ́ɔ Urécɛ̄lu kahíníī, “N le unu nɛ̄hi nu mla ɔyínɛ́ um, n kē le yálé ɛɛ́.” Anɔ́ɔ ó hi iyē kú ɔyí ā ka Unáfutāli.[44]

⁹Eko nɛ̄ Ulɛ́ya le má ka anúɔ í ma ɔyí ɛ́ɛ́ gɛ ŋ́ mā, ó kwú ɔfiyɛ nɔ̄nyā kú nū nū, Usílpa ú lɛ Ujékɔ̄pu ɔbá nū kóō lɛ pīya ɔnyā nū.

¹⁰Ujékɔ̄pu le gbo mla anú, anɔ́ɔ ó le ipú yɔ̄ le ɔyínɔ̄nyīlɔ éyi ma lɛ Ujékɔ̄pu.

¹¹Anɔ́ɔ Ulɛ́ya kahíníī, “Ɛyí um lɔhi.” Anɔ́ɔ ó hī iyē kú ɔyí ā ka Ugádi. [45]

¹²Usílpa klla le ɔyí ɔ̄cɛnyīlɔ ɔhá ma lɛ Ujékɔ̄pu.

¹³Anɔ́ɔ Ulɛ́ya kahíníī, “N gwéeyē ohígbū ka ācɛnyā géē hī um ka éeyē.” Anɔ́ɔ ó hī iyē kú ɔyí ā ka Ássa.[46]

¹⁴Eko nēé gē cē īkpɔ̄dɛ̄hɔ̄ ā, Urúbɛn le tá ɛhɔ̄ gaá le ɔcí nēé hī ka umándrēki pīyɛ̄,[47] anɔ́ɔ ó le bī gé lɛ ɛ́nɛ́ nū, Ulɛ́ya á. Anɔ́ɔ Urécɛ̄lu da Ulɛ́ya kahíníī, “Kóocō, lɛ umándrēk ōhī kú ɔyí uwɔ je gā um káá.”

¹⁵Anɔ́ɔ Ulɛ́ya da ɔ́ kahíníī, “Ɔbá um nɛ̄ a mīyɛ ŋmá abɔ̄ um ā í jɛ̄ uwɔ ɛ́ɛ́ ŋ́ nɛɛ? Abālɔbányā, a klla yɔ̄ ī tíne ō mīyɛ umándrēki kú ɔyí um ŋmá abɔ̄ nū.” Urécɛ̄lu da ɔ́ kahíníī, “Ɔ́dāŋ ka a kwú umándrēk kú ɔyí uwɔ ā ú gā um, a lɔfú gbo mla Ujékɔ̄pu otú mā glá.”

¹⁶Eko nɛ̄ Ujékɔ̄pu pīyɛyí ŋmá ipácí ɔ̄nɔ̄ɔ̄nɛ̄ ā, Ulɛ́ya le inya kwu gaá jīla anú ɔwɛ. Anɔ́ɔ ó kahíníī, “A géē gwutá mla um otú mā, ohígbū ka n le ulé nū cíla mla umándrēk kú ɔyí um ā ɛɛ́.” Anɔ́ɔ Ujékɔ̄pu le gwutá mla anú otú ɔ́ɔmā á.

¹⁷Ɔwɔicō le ɔkɔ nɛ̄ Ulɛ́ya gbā ā pó á. Anɔ́ɔ ó le ipú yɔ̄ klla le ɔyí ɔ̄cɛnyīlɔ ɔ́mɛɛhɔ̄ ma lɛ Ujékɔ̄pu á.

¹⁸Ulɛ́ya kahíníī, “Ɔwɔicō le ulé kú um cíla um ɛɛ́, ohígbū ka n kwú ɔfiyɛ kú um lɛ Ujékɔ̄pu.” Anɔ́ɔ ó hī iyē kú ɔyí nū ā ka Ísāka[48]

¹⁹Ulɛ́ya klla le ipú yɔ̄ igbɔhá le ɔyínɔ̄nyīlɔ ɔ́mɛhīlī ma lɛ Ujékɔ̄pu.

²⁰Anɔ́ɔ Ulɛ́ya kahíníī, “Ɔwɔicō le ɛhi olɔhi je gā um ɛɛ́. Abālɔbányā ā ɔbá um géē lɛ ojīlīmā ce um, ohígbū ka n le ayínɔ̄nyīlɔ ɛhīlī ma lɛ ɔ́ ɛɛ́.” Anɔ́ɔ ó hī iyē nū ka Usɛ́būlɔn[49]

²¹Igbīhāajɛ ā, ó le ɔyínɔ̄nyā éyi ma, anɔ́ɔ ó hī iyē nū ka Udáyína.

²²Anɔ́ɔ Ɔwɔicō le blakwu Urécɛ̄lu, klla lɛ ɔkɔ nōó gbā ā pó, anɔ́ɔ ó le ɔ́ ɔ̄gɔ̄ɔ̄ma nwūla á.

²³Ó le ipú yɔ̄ le ɔyí ɔ̄cɛnyīlɔ éyi ma. Anɔ́ɔ ó kahíníī, “Ɔwɔicō kwú uwēyī ú ŋmá um ɛyí o ŋmá ō je ɔyínɔ̄nyīlɔ gā um.”

²⁴Anɔ́ɔ ó hī iyē kú nū ka Ujósɛ̄fu,[50]

²⁵Eko nɛ̄ Urécɛ̄lu le Ujósɛ̄fu ma lɛ Ujékɔ̄pu ā, anɔ́ɔ Ujékɔ̄pu da Ulában kahíníī, “Mā um tá ká n̄ nyɔ̄ ajɛ ɔlɛ́ um mɛ́ɛ̄.

²⁶Le anyā um mɛ́mla ayí um, nɛ̄ n kwɛ̄hɔ̄cī ohígbū uwā gā uwɔ ā kpó gā um, cɛ́ɛ́ ká n nyɛ̄ɛ̄. A jé ɛ́gɛ́nɛ̄ n yúklɔ́ lɔɔlɔhi gā uwɔ lɛ ā.”

²⁷Ulában da ɔ́ kahíníī, “Ká n̄ lɛ ɛlā nyā ka ɛ́ɛ́. N le jé ŋmá ɔdā nɛ̄ n hímáyī má ā ka, Óndú ā le ɔhā hɛ́ ce um ohígbū uwɔ.

²⁸Le ɔdā nōo wɛ ulé kú uwɔ ā ka gā um ká n̄ le cíla uwɔ.

²⁹Anɔ́ɔ Ujékɔ̄pu da ɔ́ kahíníī, “Awɔ abɔ̄yī uwɔ jé ɛ́gɛ́nɛ̄ n yúklɔ́ gā uwɔ lɛ ā, ɛ́gɛ́nɛ̄ aɔ́dāajɛ kú uwɔ nyīla ɛgiyí um lɛ āa.

³⁰Aɔ́dāajɛ kú uwɔ nōó lɛwa eko nɛ̄ n wā ŋ́ mā, kwú nyīla nɛ̄hi ɛ́ɛ́. Anɔ́ɔ Óndú ā kē le ɔhā hɛ́ ce uwɔ, ɔwɛ dóódu nɛ̄ n pīya nyɔ̄ ā[51] Abālɔbányā ā, n cíkā ō gbɔɔ́ ō tíne ɔdā abɔ̄yī um lɛ ācɛ ɔlɛ́ um mɛ́ɛnɛ.”

³¹Anɔ́ɔ Ulában da ɔ́ ɔ̄kā kahíníī, “Ɔdí nɛ̄ n géē je ga uwɔ āa?” Ujékɔ̄pu da ɔ́ kahíníī, “A gáā gbā ulé dúúmā gā um ŋ́. N géē yɔ̄ ī leyīkwu aɔ́dāajɛ kú uwɔ kpɔ́ ɔ́dāŋ ka a í cɛ̄ ɛlā nɛ̄ n gáā ka nyā ā.

³²Ká n̄ le yɛ ipú aɔ́dāajɛ kú uwɔ ícɛ, ká n̄ le odúúdú aɛ́nɛ̄ e wɛ ohíkākā mɛ́mla aómlede nóbī, mɛ́mla aɛ́wū, nōo wɛ ohíkākā ā kpó yā ŋmá anú. Ɔ́ɔmā gáā wɛ ulé kú um á.

³³Cɛ́ɛ́ ekɔ̄bū, a géē jé ka n wɛ ɔ̄cɛ ɔkwɛ̄yi. Eko nɛ̄ a géē wā í jila ulé kú um āa, ɔ́dāŋ ka n lɛ ɛwū dúúmā nōó híkākā ŋ́ ámāŋ álá nōó wɛ onōbí ŋ́, a géē jé keé wɛ ɛ̄nɛ̄ um kpó uwī.”

³⁴Anɔ́ɔ Ulában tá ɔ̄ ohi kahíníī, “N cɛ̄, n géē yá ɛ́gɛ́nɛ̄ a ka lɛ ā.”

³⁵Amáŋ, ɛ̄cī ɔ́ɔmā Ulában kwú aópī mɛ́mla aɔ́nyɛ̄wū nēe híkaka ā mɛ́mla odúúdú aɛ́nɛ̄ ɛnɛ̄hɛ́ kwu uwá iyē ā, mɛ́mla odúúdú aálá nōbí ā í kpó ŋmá ipú aɔ́dāajɛ kú nū. Ó kwú uwā í kpó lɛ ayí nū kéē leyīkwu uwá lɛ ɔ́.

³⁶Anɔ́ɔ ó nyɛ̄ɛ̄ ŋmá ɛgiyí Ujékɔ̄pu ga ɛga nōo lɛbɛ̄ɛka iyāwu kú ɛ̄cī ɛtá ā. Ujékɔ̄pu kē leyīkwu aɔ́dāajɛ ohile kú Ulában ā kpɔ́.

³⁷Anɔ́ɔ Ujékɔ̄pu kwú ogbló ɛ̄mɛ̄ɛ̄mɛ̄ kú aɔ́cí nēé hī ka upɔ́pla mɛ́mla álmɔ̄ndi mɛ́mla uplén ā ú í, le uwa gwāpū. Anɔ́ɔ ɛga óhī kú uwā wɛ ɛnɛ̄hɛ́, ɛga ɔhá kē wɛ onōbí.

³⁸Ó kwú ɔcí ā ú tá iyɔ̄bū kú aɔ́dāajɛ ā ɛga nēé gē gwá éŋkpɔ̄ ā. Ó le aógbló kú ɔcí ā kpó bá abɔ́ɔ, ohígbū ka abɔ́ɔ nɛ̄ aɔ́dāajɛ á gē ce iyī ūwā eko nēé ī wā ī gwá éŋkpɔ̄ á.

³⁹Cɛ́ɛ́ eko nɛ̄ aɛ́wū ā le iyī ūwā ce iyɔ̄bū kú ogbló kú ɔcí ā nɛɛ, é gē ma ayí nēe tína cílɛ́cílɛ́ mɛ́mla aɛ́nɛ̄ e híkākā ɛdɔ ɛyɛ́ɛ́yɛ́yí.

⁴⁰Ujékɔ̄pu le aálá ā kɔ̄ ŋmá ɛgiyí aɛ́wū ā. Eko nēé gáā ce iyī ūwā, ó gē cɛ̄ lɛ uwá le eyī pīya kwu ɛga nɛ̄ aɔ́dāajɛ nēe tína cílɛ́cílɛ́ mɛ́mla aɛ́nɛ̄ e híkākā ɛyɛ́ɛ́yɛ́yí kú ɔlɛ́ Ulában bá ā. Ɔwɛ ɛ́gɛ́nyā nōó yá nɛ̄ aɔ́dāajɛ kú nū je nyīla nɛ̄hi á. Anɔ́ɔ ó lɛ uwá kpó bá ɛga ɛyɛ́ɛyí hɛ̄ ákú Ulában tá á.

⁴¹Eko dóódu nɛ̄ aɛ́bɛ́ o lɔfú ā bá ī ce uwā nɛɛ, Ujékɔ̄pu gē kpó aógbló bá iyɔ́bū ūwā ɛga nēe ī gwá éŋkpɔ̄ ā, cɛ́ɛ́ é gē ce iyí ūwā ɛplá aógbló ā.

⁴²Amáŋ, ó gē je aógbló kú ɔcí ā tá iyɔ̄bū kú aɛ́nɛ̄ é lɔfū ŋ́ mā ŋ́. Eko kpií Ulában lɛ odúúdú ɔdāajɛ nēé lɔfú ŋ́ mā mɛ́ɛ̄ á, anɔ́ɔ Ujékɔ̄pu kē lɛ aɛ́nɛ̄ e lɔfú āa.

⁴³Ɔwɛ nyā nɛ̄ Ujékɔ̄pu bī lɛ gbo agbénú á. Ó lɛ aɔ́dāajɛ alɛwa, mɛ́mla aɔ́fiyɛ mɛ́mla aínyākwūlūmī mɛ́mla aíjakī.