Read idoma OHÚTU 31 Bible Online

OHÚTU 31 - idoma bible

OHÚTU 31

¹Ujékɔ̄pu le pó ka ayí kú Ulában ɛ́ɛ yɔ̄ gē ka kahíníī, “Ujékɔ̄pu le odúúdú aɔ́dā nēe wɛ ákú ádā alɔ ā kpó ɛɛ́. Odúúdú agbénū kú nū ŋmá ɔdā nɛ̄ ádā alɔ lɛ ā.”

²Ujékɔ̄pu le má ka, Ulában ɔ́ɔ̄ gáā gbonɛnɛ lɛ anúɔ bɛ̄ɛka otɛtɛ ā ɛ́ɛ́ gɛ ŋ́.

³Anɔ́ɔ Óndú ā da Ujékɔ̄pu kahíníī, “Kwúcē gaajɛ kú ɔlɛ́ ádā uwɔ, ɛgiyí ācɛ ɔlɛ́ uwɔ. N géē yɔ̄ mla uwɔ.”

⁴Anɔ́ɔ Ujékɔ̄pu le Urécɛ̄lu mɛ́mla Ulɛ́ya hīgwú ga ipácí, ɛga nɛ̄ aálá kú nū bá ā.

⁵Anɔ́ɔ ó da uwá kahíníī, “N le má ka ádā aá í gbonɛnɛ gā um bɛ̄ɛka otɛtɛ ā ɛ́ɛ́ gɛ ŋ́. Amáŋ, Ɔwɔicō kú ádā um ā yɔ̄ mla um.

⁶Aá ɛpɛplɛ́pa jé ka n yúklɔ́ lɛ ádā aá ŋmá odúúdú ɔfú kú um.

⁷Nááná, ó le um pīyatū, le ulé kú um pīyabɔ̄ igbo igwó. Amáŋ Ɔwɔicō í je ɛga lɛ ɔ́ kóō yá um ɔdā dúúmā ŋ́.

⁸Eko dúúmā nɛ̄ Ulában le ka kahíníī, ‘Odúúdú aɛ́wū ohíkākā ā géē wɛ ulé kú uwɔ á’ nɛɛ, cɛ́ɛ́ odúúdú aɛ́wū ā gē ma ayí ohíkākā. Ɔ́dāŋ koó klla ka, ‘Aɛ́wū ōtína cílɛ́cílɛ́ géē wɛ ulé kú uwɔ á’ nɛɛ, odúúdú aɛ́wū ā kē í ma ayí otína cílɛ́cílɛ́.

⁹Ɔwɛ ɛ́gɛ́nyā nɛ̄ Ɔwɔicō le kpó aɔ́dāajɛ kú ádā aá ŋmá ɛgiyí nū, je kpó gā um á.

¹⁰Eko nɛ̄ aɔ́dāajɛ gē ce īyī uwā a, n le ɔ̄na nā anɔ́ɔ n le má ka aópī nēe bá ī ce aɛ́wū wɛ ohíkākā ɛyɛ́ɛ́yɛ́yí, mɛ́mla otína cílɛ́cílɛ́.

¹¹Alelékwū-ōtɛ̄hɔ̄ kú Ɔwɔicō ā kɛlā gā um ipú ɔ̄na kahíníī, ‘Ujékɔ̄pu!’ N tóóhi ka, ‘Ēē, ami yɔ̄ á.’

¹²Anɔ́ɔ ó kahíníī, ‘Je eyī gicō ká ā má ɔ̄, odúúdú aópī nēe bá ī ce aɛ́wū aā wɛ ohíkākā mɛ́mla otína cílɛ́cílɛ́ ā. Ohígbū ka n lɛ ɔdā nɛ̄ Ulában yɔ̄ ī yá uwɔ ā má ɛɛ́.

¹³Ami wɛ Ɔwɔicō nōo wā ɛgiyí uwɔ Ubɛ́tɛlu, ɛga nɛ̄ a le anɔ̄ tū ɛcɔ̄ ɛyí, klla cokónu gā um ā. Abālɔbányā, cāŋjɛ ká ā nyɛ̄ɛ̄ ŋmá ajɛ nyā, ká ā kwúcē ga ajɛ ɛga nēé ma uwɔ ā.’”

¹⁴Anɔ́ɔ Urécɛ̄lu mɛ́mla Ulɛ́ya tá Ujékɔ̄pu ohi kahíníī, “Alɔ í lɛ ukpɛ̄ dúú ɔlɛ́ ádā alɔ gɛ ŋ́.

¹⁵Ó je alɔ bɛ̄ɛka aílɔ́wā āa. Ó kwú alɔ ī kpó lá, abālɔbányā ó kē kwú ije nēé kpó tū alɔ ā í kpó ŋmó ŋmá ajɛ ɛɛ́.

¹⁶Odúúdú agbénú nyā nɛ̄ Ɔwɔicō kpó ŋmá ɛgiyí ádā alɔ ā, wɛ ákú alɔ mɛ́mla ayípɛ́ ɔlɛ́ alɔ mɛ́ɛ́nɛ. Yá ɔdā dúúmā nɛ̄ Ɔwɔicō da uwɔ ā mɛ́ɛ́nɛ.”

¹⁷Anɔ́ɔ Ujékɔ̄pu cāŋjɛ le ayí nū mɛ́mla anyā ɔlɛ́ nū kpó ce ɛyí aínyankwūlūmī.

¹⁸Anɔ́ɔ ó le odúúdú aɛ́wū kú nū mɛ́mla odúúdú aɔ́dāajɛ ɔhá nōó lɛ ā, mɛ́mla odúúdú agbénú kú nū nōó lɛ Umɛsopotámīya ā, kpó kóō gā ajɛ Ukénan, ɛgiyí ádā nū, Áyísīki á.

¹⁹Ulában le yɛ gaá wá aálá kú nū ɔnwū, anɔ́ɔ Urécɛ̄lu kwú ɛka ocɛyí kú ɔlɛ́ ádā nū ú uwī á.

²⁰Ujékɔ̄pu le Ulában, ɔ̄cɛ Áram ā plla abɔ̄ ó cɛ̄ lɛ ɔ́ jé ka anúɔ gáā nyɛ̄ɛ̄ ŋ́ mā.

²¹Anɔ́ɔ ó le kwu mɛ́mla odúúdú aɔ́dā nōó lɛ ā. Ó le hɛ́ Ísu nēé hī ka Uyúfrētīisi ā bēhé, lɛyíkwu ɛyí ɛfu kú Ugílɛ̄di.

²²Eko nēé le da Ulában ɛ̄cī ɔ́mɛtā ka Ujékɔ̄pu ɔ́ɔ le kwu ā,

²³ó lɛ ācɛ ɔlɛ́ nū kpó, anɔ́ɔ ó nū Ujékɔ̄pu ɛ̄cī ahāapa jāā gbéeko nēé le ɔ́ kwú ɛfu kú Ugílɛ̄di.

²⁴Amáŋ Ɔwɔicō gā ɛgiyí Ulában, ɔ̄cɛ Áram ā ipú ɔ̄na otú gbɔbū kóō gaajɛ ɛgiyí Ujékɔ̄pu ā, anɔ́ɔ ó da ɔ́ kahíníī, “Le ɛlá kwu ɔ́ ka ā híī fu ɔ́ ɔnū ɔwɛ dóódu fúlufúlu ŋ́.

²⁵Ujékɔ̄pu le áklɔ̄kpɛ kú nū cē kwu ɛyí ɛfu éyi, Ulában mɛ́mla aɔ́máapú nū kē le ákú uwā cē kwu ɔlɛ́ ɛfu kú Ugílɛ̄di.

²⁶Anɔ́ɔ Ulában da Ujékɔ̄pu ɔ̄kā kahíníī, “Ɔdíyá nɛ̄ a le um plla le ayínɔ̄nyā kú um kpó kwu bɛ̄ɛka ācɛnyā nēé kwú eko ɛfú ā a?

²⁷Ɔdíyá nɛ̄ a le um plla le kwu wɛɛlɛ, nɛ̄ á ka gā um ŋ́ mā ā? Ɔ́dāŋ ka á yá ɔdā nɛ̄ a yá nyā ŋ́ nɛɛ, ń géē yɛ í lɛ uwɔ bītá mɛ́mla uce mɛ́mla ijā ō he nɛ̄hi. É kē í yɛ í lɛ uba mɛ́mla íyōyō gwō tá aá ɔkwu.

²⁸Ɔdīyá nɛ̄ á jɛga gā um ká n̄ lɛ ayááyí um mɛ́mla ayí um nɔ̄nyá kwú bɔ́tū ŋ́ mā? Ucē kú olíla nɛ̄ a yá yɔ̄ á!

²⁹N lɛ ɔfú nɛ̄ n gē yá uwɔ odée glá, amáŋ Ɔwɔicō kú ádā uwɔ pi um ahɔ̄ ka n̄ híī fu uwɔ ɔnū ɔwɛ dóódu ŋ́.

³⁰N jé ka a le kwu ohígbū ka ɔtū nwula nwula ká ā cīgbīhi ga ɔlɛ́ yá uwɔ nɛ̄hi. Amáŋ ɔdíyá nɛ̄ a je ɛka ocɛyí kú um uwī ā?”

³¹Ujékɔ̄pu tá Ulában ohi kahíníī, “Ohígbū ka n yúufi ka a géē mīyɛ ayínɔ̄nyā kú ɔlɛ́ uwɔ ŋmá abɔ̄ um.

³²Ɔ̄cɛ dóódu nɛ̄ a í má ɛka ocɛyí kú uwɔ ɛgiyí nū ā, é géē je ɔ̄cɛ ɔ́ɔmā ŋmó. Ācɛ ɔlɛ́ alɔ nēe bá nyā ā wɛ ijáalí. Tíne ɔdā dóódu nēe wɛ ákú uwɔ ā, cɛ́ɛ́ kú ā kwú kpó.” Ujékɔ̄pu í kē jé ka Urécɛ̄lu ɔ́ɔ je ɛka ocɛyí kú Ulában uwī ŋ́.

³³Anɔ́ɔ Ulában le tá ipú áklɔ̄kpɛ kú Ujékɔ̄pu, anɔ́ɔ ó le yɛ tá ipú áklɔ̄kpɛ kú Ulɛ́ya, mɛ́mla ákú aɔ́fiyɛ nɔ̄nyā ɛpa ā. Amáŋ ó má ɛka ocɛyí kú nū ā ŋ́. Anɔ́ɔ ó le tá ipú áklɔ̄kpɛ kú Urécɛ̄lu.

³⁴Urécɛ̄lu kwú ɛka ocɛyí ā ú, anɔ́ɔ ó kwú ɔ̄ ú tá ipú ɛkpa kú ɔdōcīce o cɛyí inyankwūlūmī nōó cīce ɛyí nū āa. Ulában le odúúdú ipú áklɔ̄kpɛ ā jila amáŋ ó má ɔ̄ ŋ́.

³⁵Urécɛ̄lu da ádā nū ka, a híī cɔ̄nū mla um ŋ́, ohígbū ka ń cāŋjɛ iyɔ̄bū uwɔ glá ɛ́ɛ́ ŋ́. N yɔ̄ eko ɔ̄yā kú um.” Ulában le ɛga dóódu tíne ɛka ocɛyí kú nū ā, amáŋ ó má ɔ̄ ŋ́.

³⁶Anɔ́ɔ Ujékɔ̄pu kwú cɔ̄nū á. Anɔ́ɔ ó dɔɔ̄ka kahíníī, “Ɔdōōbɔ̄bí nyá nɛ̄ n yá āa? Ɔdí wɛ íne nɛ̄ n bīya ɛ́ɛ́ nɛ̄ a gē nū um inya ká ā lɛ um kwú āa?

³⁷A lɛ odúúdú iyó kú um kpó jila ɛɛ́, ɔdí kú ɔlɛ́ uwɔ nɛ̄ a má ā? Kwú ɔ̄ ú tá iyɔ̄bū ācɛ ɔlɛ́ um mɛ́mla ācɛ ɔlɛ́ uwɔ, kéē lɛ ɛpɔ̄ kú ami mɛ́mla awɔ hɛ́.

³⁸Iháyí ofu yɔ̄ mɛ́ɛ̄ á, nɛ̄ n hímáyī yɔ̄ pī uwɔ, aálá kú uwɔ mɛ́mla aɛ́wū kú uwɔ í plla ɔyí ŋ́. Ń kē lé ɛbɛ́ omlede kú uwɔ dúúmā ŋ́.

³⁹Eko dóódu nɛ̄ ɛbɛ́ obɔ̄bí le álá ŋmó nɛɛ, n géē mīyɛ ufu ā ce iyī um ɛyí. Ń gē je uwá gé lɛ uwɔ gē kɔkɔ ka ń jé ɔkwu kú ikwū kú uwā ŋ́ nɛɛ ŋ́. A le ukɔ́ tū ka ɔdā dóódu nēé kwú uwī otú mɛ́mla ɛnɔ, amíyɔ̄ lɛ ulé nū cílá.

⁴⁰Ɛ́gɔ́ɔmā nɛ̄ āhɔ̄ kú um lɛ ā yɔ̄ abɔ́ɔ á. Ɛnɔ gē cɛ̄ um ɔlɛ́ɛnɔ, ofū kē ī ŋmó um otú. N kē ī gbiyɔ̄lā glá ŋ́.

⁴¹Ɛ́gɔ́ɔmā nōó hímáyī lɛ iháyí ofu dúúdú nɛ̄ n yɔ̄ mla uwɔ ā á. N yúklɔ́ gā uwɔ iháyí igwɛ́ɛnɛ ká n lɛ ayí uwɔ nɔ̄nyā ɛpa ā kpó lɛ. N klla kē yúklɔ́ iháyí ɛhīlī ohígbū aɔ́dāajɛ kú uwɔ. Nááná a pīya ulé kú um abɔ̄ igbigwó.

⁴²Ɔ́dāŋ ka Ɔwɔicō kú ádā um, Ɔwɔicō kú Ébrahām mɛ́mla Áyísīki í yɛce um ŋ́ nɛɛ, ɔkwɔɔkwɛyi á géē yɛ í lɛ um nū ŋmá ɛgiyí uwɔ abɔ̄ áncā. Ɔwɔicō le ōwē mɛ́mla úklɔ́ kú abɔ̄ kú um má, ohígbū ɔ́ɔmā nōó ŋmó uwɔ ɛpɔ̄bí otú ɛ́nɛ̄ á.”

⁴³Anɔ́ɔ Ulában tá Ujékɔ̄pu ohi kahíníī, “Ayínɔ̄nyā nēe bá nyā wɛ ayí um, ayí nēé ma ā wɛ ayí um, aɔ́dāajɛ ā wɛ ákú um, odúúdú aɔ́dā nɛ̄ a má amānyā ā wɛ ákú um. Amáŋ ícɛ nyā ó lɛ ɔdā dúú nɛ̄ n yá glá nōo í bī ayínɔ̄nyā kú um mɛ́mla ayí kláajɛ glá gɛ ŋ́.

⁴⁴N le tútū ká n̄ cokónu mla uwɔ ɛɛ́. Alɔ lɛ ɛcɔ̄ túbá ɛgiyí éékpó kóō tá alɔ ɛlá kwu okónu nɛ̄ alɔ í ce āa.”

⁴⁵Anɔ́ɔ Ujékɔ̄pu kwú ɛcɔ̄ éyi ú anɔ́ɔ ó kwú ɔ̄ ú kwaajɛ kóō lɛ pīya ɔdōblatū á.

⁴⁶Anɔ́ɔ Ujékɔ̄pu da ācɛ ɔlɛ́ nū kahíníī, “Aá lɛ ɛcɔ̄ túbá,” Anɔ́ɔ é le ɛcɔ̄ tīkwū bá á. Anɔ́ɔ é le ɔdōlé lé, ɛga nēé tú ɛcɔ̄ bá āa.

⁴⁷Ulāban hī iyē kú abɔ́ɔ ā ka Ujɛga-sahadúta, [52] Amáŋ Ujékɔ̄pu hī ɔ̄ ka Ugálīīdi[53]

⁴⁸Ulában da Ujékɔ̄pu kahíníī, “Ɛcɔ̄ nēé tīkwū bá nyā géē wɛ ɔdōblatū alɔ ɛplɛ́ɛpa.” Ɔ́ɔmā yá ɛ́ɛ́ nēé hī iyē kú abɔ́ɔ ka Ugáliid á.

⁴⁹Ulában klla kahíníī, “Ká Óndú ā kóō leyīkwu alɔ eko nɛ̄ alɔ le fō gwiyī alɔ tá ā.” Anɔ́ɔ é hī abɔ́ɔ ka Umíspa. [54]

⁵⁰Ulában kɛlā kpɔ́ ka, Ɔ́dāŋ ka a lɛ ōwē yá ayí um nɔ̄nyā ámāŋ ka a lɛ anyā ɔhá lɛ, nááná nɛ̄ ń má uwɔ glá ŋ́ mā, bla ka Ɔwɔicō yɔ̄ ī má alɔ.

⁵¹Ɛcɔ̄ nɛ̄ n tīkwu bá ɔtāhɛ̄ alɔ mɛ́mla ɛcɔ̄ kú oblatū ā bá yɔ̄ á.

⁵²Ɛcɔ̄ ōtīkwū bá nyā mɛ́mla ɛcɔ̄ kú oblatū nyā wɛ ijáalí kú alɔ. Ń gáā gla ɛcɔ̄ ō tīkwū bá ámāŋ ka ɛcɔ̄ ō blatū nyā gaá kpɔ́fú kwu uwɔ ŋ́. Á kē gáā gla uwá gaá kpɔ́fú kwu um glá ŋ́.

⁵³Ɔwɔicō kú Ébrahām mɛ́mla ákú Unáhɔ[55] géē kɛpɔ̄ kú ami mɛ́mla awɔ á.” Anɔ́ɔ Ujékɔ̄pu bī iyē kú Ɔwɔicō kú Áyísīki le ɔkpá gbo á.

⁵⁴Ujékɔ̄pu le ɔdāajɛ kú nū éyi ŋmó anɔ́ɔ ó kwú ɔ̄ ú gwɛ́ɛya ɛyi ɛfu ā, anɔ́ɔ ó le ācɛ ɔlɛ́ nū hīgwú kéē wā gaá lé ɔdōlé. Eko nēé le lé kwɛyí ā, é le gbo ɛyí ɛfu ā otú ɔ́ɔmā.

⁵⁵Ɔ̄cɔ̄ɔ̄cī blibli kú oŋmɔ́ɔ̄cī nū ā, Ulában cāŋjɛ, le ayí nū nɔ̄nyā mɛ́mla ayááyí nū kwú bɔ́tū anɔ́ɔ ó le ŋ́ŋmóō tú uwā á. Anɔ́ɔ ó nyɛ̄ɛ̄ gbɔɔ́ ō ga ɔlɛ́ nū á.