Read idoma OHÚTU 32 Bible Online

OHÚTU 32 - idoma bible

OHÚTU 32

¹Abɔ̄ Ujékɔ̄pu gbo iyāwu kú nū ŋmá abɔ́ɔ ā, aálelékwū-ōtɛ̄hɔ̄ kú Ɔwɔicō jīla ɔ́ ɔwɛ.

²Eko nɛ̄ Ujékɔ̄pu le uwá má ā, anɔ́ɔ ó le ɔkɔ cɛyí dɛ̄gba kahíníī, “Amānyā wɛ áklɔ̄kpɛ ɛfú kú aícɔ́ɔja kú Ɔwɔicō á.” Anɔ́ɔ ó hī iyē kú abɔ́ɔ ā ka Umahāném.[56]

³Ujékɔ̄pu le ācocɛ̄hɔ̄ ɛpa tɛ̄hɔ̄ gɔbū ga ɛgiyí Ísɔ, ɔyínɛ́ nū, ajɛ kú Uséyɛ, ipú ajɛ kú Ɛ́dɔm.

⁴Ó le ukɔ́ tū uwā kahíníī, “N tíne ká aá lɛ olɛhɔ̄ nyā cɛ̄ lɛ Ísɔ ɔkpanī um. Ami Ujékɔ̄pu ɔfiyɛ kú uwɔ yɔ̄ ī pīyɛyí wā ɔlɛ́ kllɔ́dɔ́ɔ́ ɛɛ́. N hímáyī lā mla Ulában jāā kwu abālɔbányā.

⁵N lɛ aɛ́na, aɔ́nya, aɛ́wū, aínyankwūlūmī, aálá, aíjakī, aɔ́fiyɛ nɔ̄nyīlɔ mɛ́mla aɔ́fiyɛ nɔ̄nyā. N tɛ̄hɔ̄ fu uwɔ̄ ɔkpani um o yá ɛ́ɛ́ kú ɔtū kú uwɔ kóó gaajɛ lɛyíkwu um.

⁶Ācocɛ̄hɔ̄ ā pīyɛyí wā ɛgiyí Ujékɔ̄pu, anɔ́ɔ é da ɔ́ kahíníī, “Alɔ le tá ɛgiyí Ísɔ, ɔyínɛ́ uwɔ. Anú mla ācɛ ūlā, nēe bá pī ɔ́ ā, bá ī wā gaá jīla uwɔ ɔwɛ.”

⁷Ujékɔ̄pu gbɔɔ́ ō yúúfi nɛ̄hi, klla kwú ɔtū í plicō. Ó le ācɛ nēe bá mla anú mɛ́mla aálá, aɛ́wū, aɛ́na mɛ́mla aínyankwūlūmī ā kpó kɔ́ ígwu ɛpa.

⁸Ó gbɛlá kahíníī, “Ɔ́dāŋ ka Ísɔ kwú ígwu éyi ú kpó yíífi, ígwu ɔhá nōo hile ā lɔfú kwu glá.”

⁹Anɔ́ɔ Ujékɔ̄pu le ɔkɔ gbā lɛ Ɔwɔicō kahíníī, “Ɔwɔicō kú ádáádā um, Ébrahām, mɛ́mla ádā um, Áyísīki, pó ɔkɔ kú um! Awɔ da um ká n̄ kwúcē ga ɔlɛ́ ádā um mɛ́mla ɛgiyí aɔ́máapú um á. A kē ka ka anúɔ géē yá um lɔhi.

¹⁰Ń cíkā ɔwɛ dúúmā lɛ odúúdú ogbonɛnɛ mɛ́mla ɛlā ɔkwɔ̄ɔ̄kwɛ̄yi kú uwɔ nɛ̄ a mafú lɛ ami nōo wɛ ɔ̄cocɛ̄hɔ̄ kú uwɔ ā ŋ́. Ohígbū ka, okwutɛ kú um ōfōofūnū, nɛ̄ n bī hɛ́ ísu kú Ujɔ́dan nyā igbó á. Abālɔbányā ā n le pīya ígwu ɛpa ɛɛ́.

¹¹Lɛ um hɛ́tá ŋmá abɔ̄ kú ɔyínɛ́ um, Ísɔ. N gē yúúfi koó yɔ̄ ī wā gaá kpɔ́fú kwu alɔ kóō kpó odúúdú alɔ yíífi, kwu aɛ́nɛ́ mɛ́mla ayí dúú.

¹²Amáŋ, awɔ cokónu ka, anúɔ géē yá kú ɔdā dóódu kóō yɛ lɔhi gā um má. A klla ka anúɔ géē yá kú ipɔ́ɔma kú um kéē lɛwa bɛ̄ɛka ikpɔ̄ɔjɛ kú okónu ísu, nɛ̄ ɔ̄cɛ dóódu í lɔfú gbo uwá áluka glá ŋ́ má.”

¹³Anɔ́ɔ ó le gbo abɔ́ɔ gbɔ́ɔ̄cī á, ó le ɔdā kú ɛhi kú aɔ́dāajɛ kpó ŋmá ipú aɔ́dāajɛ kú nū kóō kpó yá Ísɔ, ɔyínɛ́ nū ɛhi.

¹⁴Aɔ́dā kú ɛhi ā bá yɔ̄ á. Anyā ɛwū ofigwó mɛ́mla opī ofu, aálá ofigwó mɛ́mla omlede ofu,

¹⁵anyā inyankwūlūmī ofu cigwó nēe bá ī je amɛ̄ lɛ ayí uwā, aɛ́na ofɛpa, mɛ́mla aɔ́bá ɛna igwó, anya ijakī ofu mɛ́mla aɔ́bá ijakī igwó.

¹⁶Ó le uwá kpó kɔ̄ igwíígwu anɔ́ɔ́ ó kwú ɔ̄cocɛ̄hɔ̄ éyééye í yá otrɛ̄yí kú aígwu éyééye. Anɔ́ɔ ó da uwá kahíníī, “Áá beē nyɔ̄ gɔbū gā um, amáŋ aá lɛ ɛpá tá ɔtāhɛ̄ kú ígwu éyééye ā.”

¹⁷Anɔ́ɔ ó da ɔ̄cocɛ̄hɔ̄ nōo gbɔbū ā kahíníī, “Eko nɛ̄ ɔyínɛ́ um, Ísɔ le gbɛyí mla awɔ ɔwɛ, nōó dɔɔ̄kā ka, ‘Ɔ̄nyɛ wɛ ɔkpani uwɔ ā? Iní nɛ̄ a yɔ̄ ī nyɔ̄ ā? Ɔ̄nyɛ lɛ aɛ́bɛ́ nēe bá iyɔ̄bū uwɔ nyā ā?’

¹⁸A í da ɔ́ kahíníī, ‘É wɛ ákú ɔ̄cotɛ̄hɔ̄ kú uwɔ̄, Ujékɔ̄pu nɛ. Ó kpó uwā wā kéē wɛ ɔdā kú ɛhi nōó kpó gé lɛ ɔkpani nū, Ísɔ. Ujékɔ̄pu abɔ̄yīnū yɔ̄ ī wā igbīhi alɔ.’”

¹⁹Ɔ́da ékpónú nyā nōó je lɛ ɔ̄cɛ ɔ́mpa, ɔ́mɛɛtá mɛ́mla odúúdú ācɛ nēe leyīkwu aɔ́dāajɛ kú nū ā á. “Ɔdā nɛ̄ aá í da Ísɔ eko nɛ̄ aá jīla anú ɔwɛ ā yɔ̄ á.

²⁰Aá í da ɔ́ kahíníī, ‘Ɔ̄cocɛ̄hɔ̄ kú uwɔ, Ujékɔ̄pu yɔ̄ ī wā igbīhi alɔ.’” Ujékɔ̄pu yɔ̄ ī gbɛlá kahíníī, “Ɛhi nɛ̄ n kpó gé lɛ ɔ́ nyā géē yá kú ɔtū kú nū kóō gbo. Ɔ̄cɛ í jé ŋ́ eko nɛ̄ n lɛ ɔ́ má ɛɛ́, ó géē je ɔdā nɛ̄ n yá ɔ̄ ā yá um ɛhi.”

²¹Ó le aɔ́dā kú ɛhi ā kpó tɛ̄hɔ̄ gbɔbū, anɔ́ɔ ó le gbo ipú áklɔ̄kpɛ ā otú ɔ́ɔmā á.

²²Otú ɔ̄ɔmā piíí ā, Ujékɔ̄pu cāŋjɛ, kwú anyā nū ɛpa ā ú, aɔ́fiyɛ nɔ̄nyā kú nū ɛpa ā, mɛ́mla ayí nū igwóléyi ā ú kpó. Anɔ́ɔ é le hɛ́ ɔkpá kú Ujábɔ̄ku ā bēhé á.

²³Ó le uwá mɛ́mla ɔdā dóódu nōó lɛ ā kpó bēhé ɔkpá ā.

²⁴Amáŋ Ujékɔ̄pu ōfōōfūnū klá igbīhi gbɔ́ɔcī mɛ́ɛ̄ á. Anɔ́ɔ ɔ̄cɛ éyi wā í nunu tú ɔ̄ jāā gbéeko nɛ̄ eyī hile líígí kóō nyā.

²⁵Eko nɛ̄ ɔ̄cɛ ā le má ka anúɔ í yá Ujékɔ̄pu lé glá ŋ́ mā ā, ó le abɔ̄ kwu ikpokwú ákwúta kú Ujékɔ̄pu, anɔ́ɔ ɔ́kwu ā kwú hīlií á.

²⁶Anɔ́ɔ ō kahíníī, “Mā um tá, ká n nyɔ̄, eyī gē nyā ɛɛ́.” Amáŋ Ujékɔ̄pu da ɔ́ kahíníī, “N gaá cɛ̄ gā uwɔ nyɔ̄ ŋ́, ń táafu ŋ́, a lɛ ɔhā hɛ́ ce um.”

²⁷Anɔ́ɔ ó da ɔ̄ ɔ̄kā kahíníī, “Ɔdī wɛ iyē kú uwɔ ā?” Anɔ́ɔ ó kahíníī, “Ujékɔ̄pu.”

²⁸Anɔ́ɔ ɔ̄cɛ ā da ɔ́ kahíníī, “Iyē kú uwɔ í gáā lé ka Ujékɔ̄pu ɛ́ɛ́ gɛ ŋ́, amáŋ Ísrɛ̄lu nɛ̄ ó wɛ méɛ̄ á.”[57] Ohígbū ka a le unu nu tú Ɔwɔicō mɛ́mla ācɛ, a kē le yálé.”

²⁹Anɔ́ɔ Ujékɔ̄pu da ɔ́ ɔ̄kā kahíníī, “Lɛ iyē kú uwɔ hī gā um.” Amáŋ ó tóohi kahíníī, “Ɔdíyá nɛ̄ a tíne ō jé iyē kú um ā a?” Anɔ́ɔ ó le ɔhā hɛ́ ce ɔ́ á.

³⁰Anɔ́ɔ Ujékɔ̄pu kahíníī, “N le Ɔwɔicō má ikpēyī abɔ̄yī um, anɔ́ɔ n yēeyī kpɔ́ áā.” anɔ́ɔ ó kwú iyē ú ce abɔ́ɔ ka “Upɛ́nīyɛl”. [58]

³¹Ɛnɔ le bɛ̄cɛ abɔ̄ Ujékɔ̄pu yɔ̄ ī nyɛ̄ ŋmá Upɛ́nīyɛlɛ̄ ā, ó yɔ̄ ī túkeŋgé ohígbū ɔ́kwu kú nū ā.

³²Ó kōō wɛ o jāā kwu ícɛ nyā ācɛ kú Ísrɛ̄lu í gē lé ícɛ̄bɛ́ nōo yɔ̄ ɛgiyí ákwúta kú ɛbɛ́ ŋ́, ohígbū ka abɔ́ɔ nēé lɛ abɔ̄ kwu Ujékɔ̄pu á.