Read idoma OHÚTU 33 Bible Online

OHÚTU 33 - idoma bible

OHÚTU 33

¹Ujékɔ̄pu je eyī gicō, anɔ́ɔ ó mā Ísɔ yɔ̄ ī wā mɛ́mla ācɛ úlā nēe bá mla anú ā. Anɔ́ɔ ó le ayípɛ̄ ɔlɛ́ nū kɔ̄ lɛ Urécɛ̄lu, Ulɛ́ya mɛ́mla anyā ōcɛ̄hɔ̄ ɛpa kú ɔlɛ́ nū ā.

²Ó kwú anyā ōcɛ̄hɔ̄ mɛ́mla ayípɛ̄ ɔlɛ́ uwā ā ú kpó bá ɔbū. Ulɛ́ya mɛ́mla ayípɛ̄ ɔlɛ́ nū kwúcē uwá, Urécɛ̄lu mɛ́mla Ujósɛ̄fu tá ámōōmɛ á.

³Ujékɔ̄pu abɔ̄yī nū gbɔbū lɛ uwa. Ó túkpɛɛ́ igbo ahāapa abɔ̄ ó yɔ̄ ī túbla ɔyínɛ́ nū, Ísɔ ajaajɛ ā.

⁴Amáŋ Ísɔ le inya kwu gaá jīla anú ɔwɛ, lɛ ɔ́ kwú bɔ́tū. Anɔ́ɔ uwá ɛpɛlɛ́ɛpa gbɔɔ́ ō jikwū á.

⁵Eko nɛ̄ Ísɔ pīyeyī le ācɛnyā mɛ́mla ayí ā má ā, ó da ɔ́ ɔ̄kā kahíníī, “Ānyɛ bá mɛ́mla uwɔ yɔ̄ ā?” Ujékɔ̄pu tóohi kahíníī, “Ɔkpani, ayí nɛ̄ Ɔwɔicō méyīnyinyi um kpó gā um ā bá abɔ́ɔ á.”

⁶Anɔ́ɔ anyā ōcɛ̄hɔ̄ ā mɛ́mla ayí uwā le pɛ́ wā ajaajɛ, anɔ́ɔ é le túkpɛɛ́ lɛ Ísɔ á.

⁷Ulɛ́ya mɛ́mla ayí nū le pɛ́ wā ajaajɛ klla túkpɛɛ́ lɛ ɔ́ dúú. Ācɛ ámōōmɛ ā wɛ Ujékɔ̄pu mɛ́mla Urécɛ̄lu. É le pɛ́ wā ajaajɛ klla le túkpɛɛ́ lɛ ɔ́ dúú.

⁸Ísɔ dɔɔ̄kā kahíníī, “Ɔdí nɛ̄ a bī ɔtū ɛ́ɛ́ nɛ̄ a tū ācocɛ̄hɔ̄ mɛ́mla aɛ́bɛ́ ā ɛhɔ̄ fu um ā?” Ujékɔ̄pu tá ɔ́ɔ̄ ohi kahíníī, “O yá ɛ́ɛ́ kú ɔtū kú uwɔ kóō gāajɛ nɛ̄.”

⁹Amáŋ, Ísɔ kahíníī, “N le lɛ jɛ̄ iyī um ɛɛ́, ɔyínɛ́ um. Lɛ ɔdā nɛ̄ a lɛ ā kpó tū lɛ iyí uwɔ.”

¹⁰Anɔ́ɔ Ujékɔ̄pu kahíníī, “Ehée, ɔ́dāŋ ka ɔtū kú uwɔ gāajɛ ɛgiyí um ɔkwɛ̄yi, mīyɛ ɛhi kú um ŋmá abɔ̄ um. Eyī kú uwɔ nɛ̄ n má ícɛ nyā lɛbɛ̄ɛka eyī kú Ɔwɔicō nɛ̄ n má ɔkwɔ̄ɔ̄kwɛ̄yi ā. Ofíyɛ́ dúú, ɛ́gɛ́nɛ̄ a mīya um lɔɔlɔhi lɛ ā.

¹¹Kóocōō mīyɛ ɛhi nɛ̄ n bī gé lɛ uwɔ ā. Ɔwɔicō le eyīnyinyi um má nɛ̄hi anɔ́ɔ ó kpó ɛjɛ̄ɛ̄jī aɔ́dā nēe ce um ɛgbá kpɛ́mm ā ga um má.” Abɔ̄ ó gbɔ̄ɔkɔ lɛ ɔ̄ yɛɛ ā, anɔ́ɔ Ísɔ mīyɛ á.

¹²Anɔ́ɔ Ísɔ kahíníī, “Ālɔ̄ tíkpó nyɔ̄ mɛ́ɛ́nɛ.”

¹³Amáŋ Ujékɔ̄pu tóohi kahíníī, “Óndú um, a jé ka ayípɛ̄ ā í lɔfú iyē lɛ ā ŋ́, n klla kē ī gbɛlá kwu aálá, mɛ́mla aɛ́na mɛ́mla ayí uwā nɛ̄ŋcɛ́ ā. Ɔ́dāŋ ka ɔ̄cɛ lɛ uwá pikpaa kú iyāwu ō yɛ ligbó ɛcī ékpónú ōfōōfūnū, ɛjɛ̄ɛ̄jī aɛ́bɛ́ ā géē je pɛ́kwú.

¹⁴Kóocōō ɔkpani um, gbɔbū ká ā bēē nyɔ̄ mɛ́ɛ́nɛ. Cɛ́ɛ́ n tá uwɔ ɔkwu ɛmɛɛma, ɛ́gɛ́nɛ̄ ɔfú bī ami mɛ́mla ayípɛ̄ mɛ́mla aɛ́bɛ́ ā lɛ glá ā, jāā gbéeko nɛ̄ alɔ gaá le jīla tɔ̄há ajɛ kú Ɛ́dɔm.”

¹⁵Ísɔ kahíníī, “Ká n mabɔ̄ ācɛ ɔlɛ́um ōhī nēe bá nyā tá, kéē bá pī uwɔ.” Amáŋ Ujékɔ̄pu tóohi kahíníī, “Ó cɛgbá gɛ ŋ́. N tíne kú ɔtū kú uwɔ kóō gāajɛ ōfōōfūnū nɛ, ɔkpani um.”

¹⁶Ísɔ gbɔɔ́ ō pīyɛyí ícíícɛ ɔ́ɔmā gā Uséyɛ, ajɛ kú Ɛ́dɔm.

¹⁷Amáŋ Ujékɔ̄pu le tá Usúkɔ̄tu, anɔ́ɔ ó lɛ inu gwó lɛ iyī nū klla le ɛga o kpó aɛ́bɛ́ kú nū tū gwó á. Ohígbū ɔ́ɔmā nēé hī abɔ́ɔ ka Usúkɔ̄tu á.

¹⁸Abɔ̄ Ujékɔ̄pu pīyɛyí ŋmá Umɛsopotámīya ɛbɔ́ wā igelī kú Ussɛ́kɛm ajɛ kú Ukénan ā, anɔ́ɔ ó le áklɔ̄kpɛ kú nū cē kwu ipú ajɛ nōo kwu igelī ā ajaajɛ ā.

¹⁹Ó le ajɛ ɔ́ɔmā piíí ā lá ŋmá abɔ̄ kú ayí kú Uhámɔ, nōo wɛ ádā kú Ussɛ́kɛm ā, īkpō kú ije nɛ̄hɛ́ ofɛhɔ̄.

²⁰Ó le ede nōó géē gwɛ́ɛya ɛyí nū ā gwó abɔ́ɔ, anɔ́ɔ ó hī ɔ̄ kahíníī, ‘Ɛ́l-Ɛ́lōhi Ísrɛ̄lu.’ nɛ̄ ɛyí nū wɛ, “Ɔwɔicō nōo wɛ Ɔwɔicō nɛ̄ Ísrɛ̄lu ī gbā ā.”