Read idoma OHÚTU 34 Bible Online

OHÚTU 34 - idoma bible

OHÚTU 34

¹Ɛ̄cī éyi Udáyína, ɔyínɔ̄nyā kú Ujékɔ̄pu mɛ́mla Ulɛ́ya, le yɛ nyɔ̄ gaá má ācɛnyā kú Ukénan.

²Anɔ́ɔ eko nɛ̄ Ussɛ́kɛm, nōo wɛ ɔyí Uhámɔ, ɔcɛ́ kú Uhám ā, le Udáyína má á. Ó le ɔ́ kwú, anɔ́ɔ ó le ɔ́ hɛ́báajɛ le ikpó nū ce ā.

³Amáŋ ó le má ka ɔyípɔ̄nɔ̄nyā ɔ́ɔ héyīfuú nɛ̄hi. Anɔ́ɔ ó kwú ihɔtū kú nū ú bōōbū, anɔ́ɔ ó bī ɔkɔ olɔnyɛ le ɛlā da ɔ́ á.

⁴Ó da ádā nū, Ussɛ́kɛm kóō lɛ Udáyína lɛ lɛ anúɔ.

⁵Ujékɔ̄pu le pó keé le adá kú anúɔ iyē nyílá klla le uwēyī je lɛ ɔ́. Amáŋ ohígbū ka ayínɔ̄nyīlɔ kú nū bá ipácí mɛ́mla aɔ́dāajɛ ā, ó tíne ō ka ɔdā dúúmā ŋ́ jāā gbéeko nēé le pīyɛyí wā ɔlɛ́.

⁶Anɔ́ɔ Uhámɔ, ádā kú Ussɛ́kɛm le tá ɛgiyí Ujékɔ̄pu gaá yɔ̄ ī kɛlā Leɔ́ á.

⁷Abɔ̄ ó bī ɛlā okónu yɔ̄ ī ka ā ayínɔ̄nyīlɔ kú Ujékɔ̄pu yɔ̄ ī pīyɛyí ŋmá ipácí. Eko nēé le ɔdā nōo yá pó ā, ó le húúwā ohí nɛ̄hi klla wú uwā ɔtū nɛ̄ɛ̄nɛ̄hi. O ka ka Ussɛ́kɛm ɔ́ɔ le ɔyínɔ̄nyā kú Ujékɔ̄pu hɛ́báajɛ ā, ɛcá nōó cá ācɛ Ísrɛ̄lu á. É cíkā ō yá ɔyí kú Ísrɛ̄lu ɔdā ɛ́gɛ́nyā ŋ́.

⁸Amáŋ, Uhámɔ le ɛlā ka lɛ uwá kahíníī, “Ussɛ́kɛm, ɔyí um, kwú ihɔtū kú ɔyínɔ̄nyā kú uwɔ ɛɛ́. kóocōō kóō lɛ ɔ́ lɛ.

⁹Ālɔ̄ lɛ okónu ce nōo cɛ̄ lɛ ācɛ ɔlɛ́ alɔ kéē lɛ ācɛ ɔlɛ́ aá, cɛ́ɛ́ ācɛ ɔlɛ́ aá kē í lɛ ācɛ ɔlɛ́ alɔ.

¹⁰Cɛ́ɛ́ aá géē lā amānyā mla alɔ, aá lɔfú lā ɛga dóódu nōo he aá ɔtū. Aá géē yíliyētá, í tɔ́ɔ́hí klla í gbagbénú.”

¹¹Ussɛ́kɛm da ádā mɛ́mla ayínɛ́ kú Udáyína kahíníī, “Aá kóocōō ká n̄ má eyī olɔhi kú aá, ɔdā dóódu nɛ̄ aá ka gā um, n géē je lɛ aá.

¹²Aá hɛ́ ɔdā dóódu mɛ́mla ɔdā nɛ̄ ɔ̄cɛ gē je yá ɔnyā ɛhi dóódu ā gā um, n géē je ɛ́gɛ́nɛ̄ aá ka lɛ ā ā.”

¹³Ayí kú Ujékɔ̄pu, bī ula le tá Ussɛ́kɛm mɛ́mla ádā nū Uhámɔ, ohi ohígbū keé le ɔyínɛ́ uwā nɔ̄nyā, Udáyína iyē nyílá.

¹⁴Anɔ́ɔ ē da uwā kahíníī, “Alɔ í gáā je ɔyínɛ́ alɔ lɛ ɔ̄cɛ nōó hɛ́ apī ŋ́ mā ŋ́. Ohígbū ka ɔ́ɔmā ā géē wɛ ɔdā uwēyī lɛ alɔ nɛ.

¹⁵Alɔ géē cɛ̄, ɔ́dāŋ ka aá géē je pīyeyī wā ɔwɛ kú alɔ, o ŋmá lɛ o hɛ́ odúúdú ācɛnyīlɔ kú ɔlɛ́ aá apī.

¹⁶Eko ɔ́ɔmā ā, alɔ géē je ayí alɔ nɔ̄nyā lɛ aá, alɔ kē í lɛ ayí aá nɔ̄nyā. Alɔ géē lā mla aá, kú ālɔ̄ kwú pīya ācɛ ékpónú.

¹⁷Amáŋ, ɔ́dāŋ ka aá mīyɛ ɛlā kú alɔ ŋ́, alɔ géē je ɔyínɛ́ alɔ nɔ̄nyā cɛ́ɛ́ alɔ nyɛ̄ɛ̄.”

¹⁸Ɛlā kú uwā ā le he Uhámɔ mɛ́mla ɔyí nū, Ussɛ́kɛm ā ɔtū.

¹⁹Anɔ́ɔ oklobīya ā í kpó eko bónū ŋ́, ó le ɔdā nɛ̄ é ka ā yá, ohígbū ka ɔyínɔ̄nyā kú Ujékɔ̄pu ā he ɔ́ ɔtū. Anú ā kē wɛ ɔ̄cɛ nēé gē lɛ ojīlīmā ce ɔ́ fíyɛ́ kpɛ́mm ipú odúúdú ipɔ́ɔ́nū kú uwā á.

²⁰Uhámɔ mɛ́mla ɔyí nū, Ussɛ́kɛm le tá okónɔɔwɛ kú ipú igelī ā, gaá le ɛlā ā kpó ka lɛ ācɛ kú abɔ́ɔ ā kahíníī,

²¹“Ācɛ nēe bá ā, gbonɛnɛ lɛ alɔ, kéē lā ajɛ ā kéē tá ɔ́hí ipú nū, ohígbū ka ajɛ ā jɛ̄ uwā. Ālɔ̄ lɛ ayí uwā nɔ̄nyā, ká ālɔ̄ je ayí alɔ nɔ̄nyā lɛ uwá kéē lɛ.

²²Ɔwɛ ɛnyā ōfōōfūnū nɛ̄ ācɛ ā géē cɛ̄ lā mɛ́mla alɔ, kéē géē jē pīya ācɛ ékpónú mɛ́mla alɔ á. Kú ɔ̄cɛnyīlɔ kú alɔ dóódu kóō lɛ apī hɛ́ ɛ́gɛ́nɛ̄ uwá ī hɛ apī ā.

²³Aɛ́na kú uwā mɛ́mla aɛ́bɛ́ ɔlɛ́ ɔhá kú uwā mɛ́mla agbénú kú uwā í gáā je pīya ákú alɔ ŋ́ nɛɛ? Ká ālɔ̄ cɛ̄ mla uwā ōfōōfūnū, cɛ́ɛ́ kú é kéē lā mla alɔ.”

²⁴Odúúdú ācɛ kú igelī nɛ̄hi ā cɛ̄ ɛlā nɛ̄ Uhámɔ mɛ́mla Ussɛ́kɛm bī wā ā, anɔ́ɔ é le odúúdú ācɛnyīlɔ kú ɔlɛ́ uwā apī kpó hɛ́ á.

²⁵Ɛ̄cī ɔ́mɛɛtá, nɛ̄ ágbe kú apī kú uwā wɛ ɛ̄mɛ̄ɛ̄mɛ̄ kpɔ́ ɛ́ɛ́ mā, ayínɔ̄nyīlɔ kú Ujékɔ̄pu ɛpa, Usímīyɔn mɛ́mla Ulífāyi, ayínɛ́ kú Udáyína nɔ̄nyīlɔ, kwú ɔkpacaŋgelī ú kpó, le pɛ́ tá ipú igelī nɛ̄hi ā, ɔwɛ nɛ̄ ɔ̄cɛ dóódu í leyī ce ŋ́ mā, anɔ́ɔ é le odúúdú ācɛnyīlɔ ā kpó ŋmó á.

²⁶É le Uhámɔ mɛ́mla ɔyí nū, Ussɛ́kɛm ā kpó ŋmó. Anɔ́ɔ é kwú Udáyína, ɔyínɛ́ uwā ú ŋmá ɔlɛ́ Ussɛ́kɛm, anɔ́ɔ é nyɛ̄ɛ̄ á.

²⁷Eko nēé le ācɛ ā kpó ŋmó ā, ayínɔ̄nyīlɔ kú Ujékɔ̄pu ohile ā gaá le igelī ā kpó wu kwɛyí ɔyínɛ́ uwā nēé je uwēyī lɛ ɔ́ ā.

²⁸É le aálá, aɛ́na, aíjakī mɛ́mla ɔdā dóódu nēe bá ipú igelī nɛ̄hi ā mɛ́mla ipú ɛhɔ̄ ā kpó wu.

²⁹É le odúúdú aɔ́dā nɛ̄ tīile ā, odúúdú ācɛnyā mɛ́mla ayípɛ̄ ā kpó kwú, klla le ɛjɛ̄ɛ̄jī iyó kú ipú aínu kú ɔlɛ́ uwā kpó nyɔ̄.

³⁰Ujékɔ̄pu da Ulífāyi mɛ́mla Usímīyɔn kahíníī, “Aá lɛ unwalu hɛ́ gē um ɛɛ́ n. Abālɔbányā ācɛ Ukénan, ācɛ Upɛ́ris mɛ́mla ɛjɛ̄ɛ̄jī ācɛ ɔhá dóódu géē wɔ́tū um. Ń kē lɛ ācɛnyīlɔ alɛwa ŋ́. Ɔ́dāŋ ka é lɛ ujɔ̄ tū lɛ ɔfú kpó kwu um, é géē je odúúdú ipɔ́ɔ́nū kú um kpó yíífi glá.”

³¹Amáŋ, é tá ádā uwā ohi kahíníī, “Alɔ í gáā leyīkwu kpɔ́ kéē yá ɔyínɛ́ alɔ odée bɛ̄ɛka akwuna ā glá ŋ́.