Read idoma OHÚTU 35 Bible Online

OHÚTU 35 - idoma bible

OHÚTU 35

¹Anɔ́ɔ Ɔwɔicō da Ujékɔ̄pu kahíníī, “Cāŋjɛ ká ā gā Ubɛ́tɛlu, ká ā gaá lā abɔ́ɔ. Cɛ́ɛ́ ā lɛ ede nɛ̄ a í gwɛ́ɛya ɛyí nū gwó lɛ ami, nōo wɛ Ɔwɔicō nōo wā ɛgiyí uwɔ, eko nɛ̄ a kwu ŋmá ɛgiyí ɔyínɛ́ uwɔ, Ísɔ ā.”

²Anɔ́ɔ Ujékɔ̄pu le da odúúdú ipɔ́ɔ́nū kú nū ā, mɛ́mla ācɛ nēe bá mla anú ā kahíníī, “Aá le ɔwɔ kú aéwɔhá nɛ̄ aá bī ā kpó bónū ŋmá ɛgiyí aá, cɛ́ɛ́ kú aá lɛ īyī aá iyē gwu yēŋēē. Cɛ́ɛ́ aá le īlī oyēŋēē kú aá kpó wiyē.

³Alɔ gáā nyɛ̄ɛ̄ ŋmá amānyā ga Ubɛ́tɛlu, ɛga nɛ̄ n géē gwó ede lɛ Ɔwɔicō nōo tú um abɔ̄ eko kú unwalu kú um ā. Anú klla hímáyī yɔ̄ mla um ɛga dúú nɛ̄ n nyɔ̄ á.”

⁴Anɔ́ɔ é kwú odúúdú aɔ́wɔ kú aéwɔhá nēé lɛ ā mɛ́mla aɔ́dōplahɔ̄ nēé le playi uwá ahɔ̄ ā ú kpó lɛ Ujékɔ̄pu. Anɔ́ɔ Ujékɔ̄pu kwú uwā í kpó tayínū ɔkwu ɔcí nēé hī ka óoku, nōo kwu Ussɛ́kɛm ajaajɛ ā.

⁵Abɔ̄ é bā ī nyɔ̄ āa, Ɔwɔicō le ufi tū ɛjɛ̄ɛ̄jī ācɛ kú ipú aígelī nɛ̄hi nēe kwu abɔ́ɔ ajaajɛ ā, anɔ́ɔ é nū uwā inya glá ŋ́ má.

⁶Ujékɔ̄pu mɛ́mla odúúdú ācɛ nēe bá mla anú ā gā ajɛ Ulús nēé gē hī ka Ubɛ́tɛlu abālɔbányā, nōo yɔ̄ ipú ajɛ kú Ukénan ā.

⁷Anɔ́ɔ ó le ede gwó abɔ́ɔ, kwú iyē ú ce abɔ́ɔ ka, “Ɛl-bɛ́tɛlu,” ohígbū ka abɔ́ɔ ā, nɛ̄ Ɔwɔicō ma īyīnū fú lɛ ɔ́ eko nōó yɔ̄ ī kwu ŋmá ɛgiyí ɔyínɛ́ nū, Ísɔ á.

⁸Udɛbɔ́ra, ɔ̄cocɛ̄hɔ̄ kú Urebéka gekwú abɔ́ɔ, anɔ́ɔ é le ɔ́ nyi ɔkwu ɔcí óoku, ɛháajɛ kú Ubɛ́tɛlu ā. Anɔ́ɔ é kwú iyē í ce abɔ́ɔ ka “ɔcí óoku kú ikwū ō je.”[59]

⁹Eko nɛ̄ Ujékɔ̄pu kwúcē ŋmá Umɛsopotámīya ā, Ɔwɔicō gā ɛgiyí nū igbɔhá, anɔ́ɔ ó le ɔhā hɛ́ ce ɔ́ á.

¹⁰Ɔwɔicō da ɔ́ kahíníī, “Iyē kú uwɔ lé ka Ujékɔ̄pu, amáŋ é gáā hī iyē kú uwɔ̄ ka Ujékɔ̄pu ɛ́ɛ́ gɛ ŋ́. O ŋmá abālɔbányā gɔbū iyē kú uwɔ géē lé ka Ísrɛ̄lu.” Anɔ́ɔ Ɔwɔicō kwú Ísrɛ̄lu í ce ɔ́ á.

¹¹Anɔ́ɔ Ɔwɔicō da ɔ́ kahíníī, “Ami wɛ Ɔwɔicō nōo fíyɛ́ dúú ā á. Ma ayí alɛwa ká ā nyīla, aéwo alɛwa géē ŋmá ɛgiyí uwɔ. Ayááyí uwɔ alɛwa géē lé ɔcɛ́

¹²Ajɛ nɛ̄ n je lɛ Ébrahām mɛ́mla Áyísīki ā, n géē je ɔ́ gā uwɔ, n klla géē je ajɛ ā lɛ ipɔ́ɔma kú uwɔ nēe ī wā igbīhi uwɔ ā.”

¹³Anɔ́ɔ Ɔwɔicō nyɛ̄ɛ̄ ŋmá ɛgiyí nū le tá ɔkpancō ŋmá ɛga nōó kɛlā lɛ ɔ́ aā.

¹⁴Ujékɔ̄pu kwú ɛcɔ̄ éyi ú kwu ajɛ ɛga nɛ̄ Ɔwɔicō kɛlā lɛ ɔ́ ā, anɔ́ɔ ó le ejé mɛ́mla anɔ̄ kú ólīifu cē klá ɔ́ ɛyí kwú ɔ̄ ú tīihɔ á.

¹⁵Ujékɔ̄pu kwú iyē í ce ɛga nɛ̄ Ɔwɔicō kɛlā lɛ ɔɔ́ ā ka Ubɛ́tɛlu.

¹⁶Eko nēé nyɛ̄ɛ̄ ŋmá Ubɛ́tɛlu, nēé kē dēē ligbó ŋmá Ɛ́frāti ā, ɔma le Urécɛ̄lu kwú. Unwalu nɛ̄ɛ̄nɛ̄hi kē tá ɔma ā ɔkwu.

¹⁷Eko nɛ̄ ɔnɔ kú ɔma kwú nwuné nɛ̄ɛ̄nɛ̄hi ā, ɔnyōkɔ́ma ā da ɔ́ kahíníī, “Ā yúúfi ŋ́, Urécɛ̄lu, ɔyí ɔ̄cɛnyīlɔ ɔhá nɛ̄ a gáā ma kpɔ́ á.”

¹⁸Abɔ̄ Urécɛ̄lu yɔ̄ ī mā owu ā, ó kwú iyē ú ce ɔyí ā ka Ubɛnóni[60] Amáŋ, ádā nū hī iyē kú nū ka Ubɛ́njamīn.

¹⁹Abɔ̄ Urécɛ̄lu gekwú ā, é kwú ɔ̄ ú nyi ɔwɛ nōo yɛ ga Ɛ́frāti, nēé hī ka Ubɛ́tlɛhɛ̄m abālɔbányā ā.

²⁰Anɔ́ɔ Ujékɔ̄pu kwú ɛcɔ̄ ú kwaajɛ ɛyí únóji kú Urécɛ̄lu kéē bī lɛ blakwu ɔ́ á. Ɛcɔ̄ ā kē kwu unóji kú nū jāā kwu eko nēé tɔ́kpá ā.

²¹Ujékɔ̄pu le fu ŋmá abɔ́ɔ yɔ̄ ī yɛ gɔbū, anɔ́ɔ ó le áklɔ̄kpɛ kú nū cē kwu ābɔ̄ ɔhá kú inɔ̄ɔda kú Ɛ́da,[61]

²²Abɔ̄ Ujékɔ̄pu lā ajɛ abɔ́ɔ ā, Urúbɛn gaá le ikpó Ubílha ce. Ubilha wɛ ɔ̄cocɛ̄hɔ̄ nɔ̄nyā kú Urécɛ̄lu, nōo ma ayí lɛ Ujékɔ̄pu ā. Eko nɛ̄ Ujékɔ̄pu le jé ā, anɔ́ɔ ó kwú cɔ̄nū nɛ̄hi á. Ayí kú Ujékɔ̄pu wɛ igwɛ́ɛpa eko nyā.

²³Ayínɔ̄nyīlɔ kú Ulɛ́ya wɛ, Urúbɛn, Usímīyɔn, Ulífāyi, Ujúda, Ísāka mɛ́mla Usébūlɔn.

²⁴Ayí kú Urécɛ̄lu wɛ Ujósɛ̄fu mɛ́mla Ubɛ́njamīn.

²⁵Ayí kú Ubílha, ɔ̄cotɛ̄hɔ̄ kú Urécɛ̄lu ā wɛ Udáni mɛ́mla Unáfutāli.

²⁶Ayí kú Usílpa, ɔ̄cotɛ̄hɔ̄ nɔ̄nyā kú Ulɛ́ya ā wɛ Ugádi mɛ́mla Ássa. É ma ayí mbáā lɛ Ujékɔ̄pu ajɛ kú Umɛsopotámīya.

²⁷Ujékɔ̄pu gā ɛgiyí ádā nū Áyísīki, Umámre ámāŋ Ukiriyatába nōo lé ka Uhɛ́brɔn dúú ā. Abɔ́ɔ nɛ̄ Ébrahām mɛ́mla Áyísīki lā ā.

²⁸Áyísīki yēeyī iháyí ofahāanɛ.

²⁹Abɔ̄ Áyísīki gekwú ā, anɔ́ɔ ayí nū Ísɔ mɛ́mla Ujékɔ̄pu lɛ ɔ́ nyi á.