Read idoma OHÚTU 36 Bible Online

OHÚTU 36 - idoma bible

OHÚTU 36

¹Ɛ̄nyā wɛ ɔ̄kā kú ipɔ́ɔma kú Ísɔ nēé hī ka Ɛ́dɔm ā á.

²Ísɔ lɛ anyā ŋmá ipɔ́ɔma kú Ukénan. Uwá bá yɔ̄ á. Adá, ɔyínɔ̄nyā kú Ɛ́lɔ̄n, ɔ̄cɛ Uhɛ́ti mɛ́mla Oholibáma ɔyínɔ̄nyā kú Ána, nōo wɛ ɔyínɔ̄nyīlɔ [62] kú Usíbīyɔn, ɔ̄cɛ Uhám

³mɛ́mla Ubásɛmati, ɔyínɔ̄nyā kú Íssmɛ̄lu, ɔyínɛ́ nɔ̄nyā kú Unɛ́báyɔ̄tus

⁴Adá le Ɛlífāsi ma. Ubasɛmāti le Uréyūwɛlu ma.

⁵Oholibáma le Ujéyuss, Ujálam mɛ́mla Ukóra kpó ma. É ma odúúdú ayí nēe bá ā lɛ Ísɔ ajɛ kú Ukénan.

⁶Anɔ́ɔ Ísɔ le anyā nū, mɛ́mla ayí nū nɔ̄nyīlɔ mɛ́mla ayí nū nɔ̄nyā ā kpó, mɛ́mla odúúdú ācɛ ɔlɛ́ nū, mɛ́mla odúúdú aɛ́na, mɛ́mla odúúdú agbénú kú nū. Anɔ́ɔ ó nyɛ̄ɛ̄ ŋmá ɛgiyí ɔyínɛ́ nū, Ujékɔ̄pu gaá lā ajɛ ɔhá á.

⁷Ó nyɛ̄ɛ̄ ohígbū ka, ajɛ nɛ̄ anú mɛ́mla Ujékɔ̄pu lā a, í jɛ̄ uwā ŋ́. É lɛ aɔ́dāajɛ nɛ̄ɛ̄nɛ̄hi nōó tɔ́ɔtɛ́ lɛ uwá kéē bá tɔ̄há glá gɛ ŋ́.

⁸Anɔ́ɔ Ísɔ gaá lā ɛyí ɛfu kú Uséyɛ. Ísɔ lé ka Ɛ́dɔm á.

⁹Ācɛ nēe bá nyā ā wɛ ayááyí kú Ísɔ, ádā kú ācɛ kú Ɛ́dɔm nēe lā ɛyí ɛfu kú Usésyɛ ā.

¹⁰Adá, ɔnyā aflɛ́yí kú Ísɔ ā ma ɔyínɔ̄nyīlɔ éyi nōo lé ka Ɛlífāasi lɛ Ísɔ.

¹¹Ɛlífāasi ma ayínɔ̄nyīlɔ ɛhɔ̄. Uwá bá yɔ̄ á: Utéman, Ómaru, Usɛ́fɔ, Ugátam mɛ́mla Ukɛ́nāsi.

¹²Utímna, odiyɔ̄ kú Ɛlífāasi ā le Ámālɛki ma lɛ Ɛlífāasi, ɔyínɔ̄nyīlɔ kú Ísɔ. Aɔ́ɔmā wɛ ayí kú Adá, ɔnyā aflɛ́yí kú Ísɔ á.

¹³Ubásɛmāti, ɔnyā ɔ́mpa kú Ísɔ ā ma ɔyí éyi lɛ ɔ́. Ó lé ka, Uréyūwɛlu. Uréyūwɛlu ma ayí ɛnɛ. É wɛ, Unaháti, Usɛ́ra, Ussáma, mɛ́mla Umíssa.

¹⁴Ɔnyā ɔmɛɛtá kú Ísɔ nōo lé ka Oholibáma, ɔyínɔ̄nyā kú Ána, nōo wɛ ɔyínɔ̄nyīlɔ[63] kú Usíbīyɔn ā, ma ayí ɛtá lɛ Ísɔ. Iyē kú uwā lé ka Ujéyuss, Ujálam, mɛ́mla Ukóra.

¹⁵Ācɛ nēe bá nyā wɛ ācɛ kpɔ́cíkpɔ́cí kú ayááyí kú Ísɔ á. Ɔyí aflɛ́yí kú Ísɔ, Ɛlífāasi, wɛ ádā kú ayí nēe bá aā: Utéman, Ómaru, Usɛ́fɔ, Ukɛ́nāsi,

¹⁶Ukóra, Ugátam mɛ́mla Ámālɛki.

¹⁷Uréyūwɛlu wɛ ádā kú ayí kú ipɔ́ɔma kú Unáhāti, nēe bá aā: Usɛ́ra, Ussáma mɛ́mla Umíssa. Uwá ā wɛ ipɔ́ɔma nēe nyīla ŋmá iyē kú Ubásɛmati á.

¹⁸Aɛ́nyā wɛ ayí kú ipɔ́ɔma nēe nyīla ŋmá iyē kú Oholibáma, ɔyínɔ̄nyā kú Ána. É wɛ, Ujéyuss, Ujálam mɛ́mla Ukóra.

¹⁹Odúúdú aípɔ́ɔma nēe bá ā ŋmá iyē kú Ísɔ.

²⁰Ācɛ nēe wɛ ayí óndú ajɛ kú Ɛ́dɔm abɔ̄yī nū ā wɛ aípɔ́ɔma ɛpa. É ka ɛma kú uwā í kwu ipɔ́ɔma nēe bá ajɛ kú Uséyɛ, ācɛ Uhɔ́ru. Ulótan, Ussóbalu, Usíbīyɔn, Ána,

²¹Udíssɔn, Ésa mɛ́mla Udíssan.

²²Ulótan wɛ ádā kú ipɔ́ɔma kú Uhɔ́ri mɛ́mla Uhɛ́man á. (Ulótan lɛ ɔyínɛ́ nɔ̄nyā éyi nōo lé ka Utímna)

²³Ussóbalu wɛ ádā kú ipɔ́ɔma kú Álfan, Umánāhati, Ébalu, Ussɛ́fo mɛ́mla Ɔ́nam á.

²⁴Usíbīyɔn lɛ ayínɔ̄nyīlɔ ɛpa: Áya mɛ́mla Ána. Ána nyā pīyɛ njɔlɔ kú éŋkpɔ̄ ō kwɔ́lá eko nōó yɔ̄ ī gbō aíjakī kú ádā nū, ipú ígbílí ā á.

²⁵Ayí kú Ána wɛ Udíssɔn mɛ́mla Oholībáma.

²⁶Ayí kú Udíssɔn wɛ Uhɛ́mdan, Éssban, Itrán mɛ́mla Ukɛ́ran.

²⁷Ésa wɛ ádā kú ipɔ́ɔma kú Ubílhan, Usááfan, mɛ́mla Ákan á.

²⁸Udíssan wɛ ádā kú ayí kú ipɔ́ɔma kú Úsi mɛ́mla Áran á.

²⁹Aɛ́nyā wɛ aípɔ́ɔma kú Uhɔ́ri, nēe lā ajɛ kú Ɛ́dɔm ā á. É wɛ Ulótan, Ussɔ́balu, Usíbīyɔn, Ána,

³⁰Udíssɔn, Ésa mɛ́mla Udíssan. Aɛ́nyā wɛ aɔ́cɛ́ kú ayí kú Uhɔ́ri ɛ́gɛ́nɛ̄ ipɔ́ɔma kú uwā lɛ ajɛ kú Uséyɛ ā (ajɛ kú Ɛ́dɔm).

³¹Gbɔbū kú ɔ̄cɛ dóódu kóō gbāajɛ kú Ísrɛ̄lu ā, ācɛ nēe bá ā gbɔɔ́ ō gbāajɛ kú Ɛ́dɔm gbo ce iyī ūwā á.

³²Ubɛ́la, ɔyí kú Ubéyɔ cɔcɛ́ Ɛ́dɔm. Iyē kú igelī nɛ̄hi nōó cɔcɛ́ ā lé ka Udinhába.

³³Ubɛ́la gekwú, Ujóbābu, ɔyí kú Usɛ́ra ŋmá ajɛ kú Ubósra mīyɛ ɔkwu nū.

³⁴Ujóbābu gekwú, Uhússam ŋmá ajɛ kú Utéman má cɔcɛ́ kwɛyí nū.

³⁵Uhɔ́ssan gekwú anɔ́ɔ Uhádādi, ɔyí kú Ubɛ́dādi, nōo yá ācɛ kú Umídiya lé, ajɛ kú Umówābu ā, mīyɛ ɔkwū nū. Anɔ́ɔ é hī ajɛ kú abɔ́ɔ ā ka Áfīti.

³⁶Uhádād gekwú, Usámla ŋmá ajɛ kú Umásrɛ̄ka mīyɛ ɔkwu nū.

³⁷Usámla gekwú anɔ́ɔ Ússɔlu ŋmá ajɛ kú Urɛ́hɔ̄bɔtu kú Uyúfrētīisi ā lɛ ɔcɛ́ lé á.

³⁸Ussɔ́lu gekwú anɔ́ɔ Ubaalhánan, ɔyí kú Ácībɔ mīyɛ ɔkwu nū.

³⁹Ubaalhánan ɔyí kú Ácībɔ gekwú anɔ́ɔ Uháda kwú pīya ɔcɛ́ kwɛyí nū. Iyē kú igelī nɛ̄hi ā kwú pīya Upɔ́wu. Iyē kú ɔnyā nū lé ka Umehɛtābɛ́lu, ɔyínɔ̄nyā kú Umátrēdi, ɔyí kú ɔyínɔ̄nyā kú Umésahābus.

⁴⁰Aɛ́nyā wɛ iyē kú ayí kú Ísɔ nēe wɛ aɔ́cɛ́ ā ɛ́gɛ́nɛ̄ ipɔ́ɔ́nū kú uwā lɛ ā mɛ́mla iyē nɛ̄ ɛga nēé lā lé kwu uwá āa. Aɔ́cɛ́ kú uwā ā wɛ: Utímna, Álfa, Ujɛ́tɛ̄ti.

⁴¹Oholibáma, Ɛ́la, Upínɔn,

⁴²Ukɛ́nāsi, Utɛ́man Umíbsa,

⁴³Umāgdíyɛ̄lu mɛ́mla Íram. Ɛga nɛ̄ ɔnyɔɔnyɛ kú aípɔ́ɔma nēe bá nyā lā ā lé iyē kwu ipɔ́ɔma āa.