Read idoma OHÚTU 37 Bible Online

OHÚTU 37 - idoma bible

OHÚTU 37

¹Ujékɔ̄pu lā ajɛ kú Ukénan ɛga nɛ̄ ádā nū tɛtɛ lā ā kpɔ́.

²Ɛ̄nyā wɛ ɔ̄kā kú ipɔ́nū kú Ujékɔ̄pu. Ujósɛ̄fu eko nōó wɛ iháyí igwáahāapa ā, anú mɛ́mla ayínɛ́ nū nēe wɛ ayínɔ̄nyīlɔ kú Ubílha mɛ́mla Usílpa ā gē leyīkwu aálá mɛ́mla aɛ́wu kú ádā uwā. Ó gē kpɛ́pɔ̄ kú odōōbɔ̄bí nɛ̄ ayínɛ́ nū bá ī yá ā lɛ ádā nū.

³Ujékɔ̄pu yíihɔtū tú Ujósɛ̄fu fíyɛ́ odúúdú ayípɛ̄ ɔlɛ́ nū ɔhá āa, ohígbū keé ma ɔ́ lɛ ɔ́ eko nōó le hīla ā. Ó le úwé olɔhi olabɔ̄līkpō gɔ́ lɛ ɔ́.

⁴Eko nɛ̄ ayínɛ́ nū ohile ā le má ka ádā aá ɔ́ɔ yíhɔtū tú Ujósɛ̄fu fíyɛ́ aá ā, é gbɔɔ́ ō wɔ́tū ɔyínɛ́ uwā nɛ̄ɛ̄nɛ̄hi, nōo yá kéē gbɔɔ́ ō tū Ujósɛ̄fu eyījii nɛ̄hi. É klla kɛlā lɛ ɔ́ ɔkɔ ogbonɛnɛ ɛ́ɛ́ gɛ ŋ́ má.

⁵Otú ɛ̄cī éyi, Ujósɛ̄fu le ɔ̄na nā. Eko nōó le ɔnā ā ka lɛ ayínɛ́ nū ā, é wɔ́tū nū fíyɛ́.

⁶Ó da uwá kahíníī, “Aá jāhɔ̄ lɛ ɔ̄na nɛ̄ n nā āa.

⁷Odúúdú alɔ bá ɛhɔ̄ yɔ̄ ī gbō ɛ̄wɛ̄ igwu, anɔ́ɔ ɛ̄wɛ̄ igwu kú um, cāŋjɛ háyicō kpaakpa, anɔ́ɔ ɛ̄wɛ̄ igwu ká aá le yɛ ɔ́ jīla tá, klla le túkpɛɛ́ lɛ ákú um á.”

⁸Anɔ́ɔ ayínɛ́ nū da ɔ́ ɔ̄kā kahíníī, “A gbɛlá ka anúɔ géē wɛ ɔcɛ́ cɛ́ɛ́ ká ā gbō alɔ kɛ̄ɛ?” Anɔ́ɔ é klla wɔ́tū nū fíyɛ́ ohígbū ɔ̄na kú nū ā, mɛ́mla ɛlā nōó ka lɛyíkwu uwā ā.

⁹Ujósɛ̄fu klla le ɔ̄na ɔhá nā kpɔ́. Ó klla le da ayínɛ́ nū kahíníī, “N le ɔ̄na ɔhá nā, nɛ̄ n má ɛnɔ mɛ́mla ɔyā mɛ́mla aínyílɔ́wɔ igwóléyi bá ī túkpɛɛ́ gā um.”

¹⁰Ó le ɔ̄na ā ka lɛ ádā nū dúú, anɔ́ɔ ádā nū le ɛgba dɛ̄ tū ɔ̄, da ɔ́ ɔ̄kā ka. “Ɛdɔ ɔ̄na nyá yɔ̄ ā dúú? A gbɛlá ka ami, ɛ́nɛ́ uwɔ, mɛ́mla ayínɛ́ uwɔ géē wā í lɛyī kwu ajɛ gā uwɔ nɛɛ?”

¹¹Anɔ́ɔ ayínɛ́ kú Ujósɛ̄fu gbɔɔ́ ō mímálānyī nū fíyɛ́, amáŋ ádā nū yɔ̄ gē gbɛlá odúúdú ɛlā nēe bá ā.

¹²Ɛ̄cī éyi, ayínɛ́ kú Ujósɛ̄fu le yɛ tá Ussɛ́kɛm gaá gbō álá kú ádā uwā.

¹³Anɔ́ɔ Ujékɔ̄pu da Ujósɛ̄fu ka “N dɔɔ̄kā ká ā ga Ussɛ́kɛm, ɛga nɛ̄ ayínɛ́ uwɔ bá gē gbāálá ā.” Anɔ́ɔ Ujósɛ̄fu cɛ̄ á.

¹⁴Ádā nū da ɔ́ kahíníī, “Nyɔ̄ ká ā gaá lɛ ayínɛ́ uwɔ mɛ́mla aálá ā kpó jila, ɔ́dāŋ keé bá lɔhi. Cɛ́ɛ́ a lɛ ohi kpó gé um.” Anɔ́ɔ ádā nū lɛ ɔ́ tɛ̄hɔ̄ ŋmá ɔpɛ́ kú Uhɛ́brɔn. Ujósɛ̄fu gāajɛ Ussɛ́kɛm,

¹⁵anɔ́ɔ ó yɔ̄ ī gicō gaajɛ ipácí ɛ́ɛ́ nɛ̄ ɔ̄cɛ éyi le ɔ́ má á. Anɔ́ɔ ó da ɔ́ ɔ̄kā kahíníī, “Ɔdí nɛ̄ a yɔ̄ ī tíne āa?”

¹⁶Ujósɛ̄fu tóohi kahíníī, “N yɔ̄ ī tíne ayínɛ́ um nēe bá ī gbāálá amānyā ā. A lɔfú da um ɛga nēé bá ā?”

¹⁷Anɔ́ɔ ɔ̄cɛ ā da Ujósɛ̄fu kahíníī, “É nyɛ̄ɛ̄ ɛɛ́, n pó abɔ̄ uwá bá ī ka ka aá géē ga Udɔ́tan.” Anɔ́ɔ Ujósɛ̄fu nū ɔgwu ayínɛ́ nū ga Udɔ́tan, anɔ́ɔ ó le uwá má abɔ́ɔ á.

¹⁸Eko nɛ̄ ayínɛ́ kú Ujósɛ̄fu le ɔ́ má yɔ̄ ī wā ɛcɛɛcɛ ā, gbɔbū ɛ́ɛ́ kóō géē wāajɛ uwā ā, é le ujɔ̄ tū, le miya kéē lɛ ɔ́ ŋmó.

¹⁹É da īyī wā kahíníī, “Onɔ̄ɔ̄na kú ɔlɛ́ alɔ ā ī wā ɛɛ́.

²⁰Aá wā, ká ālɔ̄ lɛ ɔ́ ŋmó, ká ālɔ̄ kwú okwū kú nū ú tá ga ipú obugā ōŋmó nyā. Alɔ géē ka lɛ ádā alɔ ka ɛbɛ́ obɔ̄bí je ɔ́ ŋmó á. Cɛ́ɛ́ ká ālɔ̄ má ɛ́gɛ́nɛ̄ ɔna kú nū í cɛ lɛ ā.”

²¹Anɔ́ɔ Urúbɛn le ɛlā nēé ka ā pó, anɔ́ɔ ó lɔfú tīyē kóō lɛ Ujósɛ̄fu nyatá. Anɔ́ɔ ó da uwá kahíníī, “Ālɔ̄ híī ŋmó ɔ̄ ŋ́.

²²Ālɔ̄ kwú ɔ̄ ú tá ga ipú obugā kú ígbílí nyā, ká ālɔ̄ híī yá ɔ̄ ɔdā dúúmā ŋ́.” Ó ka ɛ̄nyā ipú ojuju nōó yɔ̄ ī yá cɛ́ɛ́ kóō kwú ɔ̄ ú kwúcē gé lɛ ádā nū.

²³Eko nɛ̄ Ujósɛ̄fu gā ɛgiyí ayínɛ́ nū ā, é le ɔ́ úwé olɔhi olabɔ̄līkpō ā plla[64]

²⁴É kwú ɔ̄ tá tū obugā éyi nōo le ŋmó.

²⁵Abɔ̄ é bá ī lé ɔdōlé ā, ɔkwɔɔkwu ɔ́ɔmā ā, é le ígwu kú ācɛ kú Íssmɛ̄lu nēe ŋmá Ugílɛ̄di bá ī yɛ ga Íjīpiti ā má. Aínyankwūlūmī kú uwā bī iyó kú anɔ̄ mɛ́mla aɔ́dā ɔhá.

²⁶Ujúda da ayínɛ́ nū ā ɔ̄kā kahíníī, “Ɔdī wɛ itene nɛ̄ alɔ géē lɛ ɔ́dāŋ ka alɔ lɛ ɔyínɛ́ alɔ ŋmó kwú tayínū āa?

²⁷Ālɔ̄ kwú ɔ̄ ú lá lɛ ācɛ Íssmɛ̄lu nēe bá ā, cɛ́ɛ́ kú ālɔ̄ yá ɔ̄ ágbe ŋ́. Ó kē wɛ ayínɛ́ alɔ, klla wɛ ɔkpíyē mɛ́mla oyī ékpó mɛ́mla alɔ nɛ.” Anɔ́ɔ ayínɛ́ nū ā cɛ̄ á.

²⁸Eko nɛ̄ ācōtɔ́hi kú Umídiya ā gāajɛ uwā ā, ayínɛ́ nū le ɔ́ pi wɛ̄ɛcɛ ŋmá ipú obugā ā. Anɔ́ɔ é kwú ɔ̄ ú lá īkpō ije nɛ̄hɛ́ ofu lɛ ācɛ kú Íssmɛ̄lu. Anɔ́ɔ é kwú ɔ̄ ú ga ajɛ Íjīpiti á.

²⁹Eko nɛ̄ Urúbɛn le cīgbīhi wā ɛgiyí obugā ā, nōó má Ujósɛ̄fu ipú nū gɛ ŋ́ mā, ó le īlī kú nū hīla ohígbū ɔtū nōo bīya lɛ ɔ́ ā.

³⁰Ó kwúcē wā ɛgiyí ayínɛ́ nū, anɔ́ɔ ó da uwá ɔ̄kā kahíníī, “Ɔyí ā í yɔ̄ abɔ́ɔ gɛ ŋ́! Ɔdí nɛ̄ n gaá yá ā?”

³¹Anɔ́ɔ é le ɛwū éyi ŋmó, anɔ́ɔ é kwú úwé kú Ujósɛ̄fu í wu oyī kú nū á.

³²É kwú úwé ā ú bī gé lɛ ádā uwā, anɔ́ɔ é da ádā uwā kahíníī, “Alɔ pīyɛ úwé nyā ŋmá ɔwɛ. Má ɔ̄ káá, ó wɛ ákú Ujósɛ̄fu, ɔyí uwɔ ā glá ā?”

³³Abɔ̄ ádā uwā le úwé ā jééjúuma ā, anɔ́ɔ ó kahíníī, “Īī úwé kú Ujósɛ̄fu nɛ, ɛbɛ́ obɔ̄bí le ɔyí um ŋmó ɛɛ́. É le ɔyí um Ujósɛ̄fu híla cɛkɛcɛkɛ ɛɛ́.”

³⁴Ujékɔ̄pu le īlī kú nū híla, ipú ɔtūnōbí, klla kwú īlī ekwu ú tá klá iyē. Anɔ́ɔ ó yēkwu kú ɔyí nū ligbó ajɛ nɛ̄hi á.

³⁵Odúúdú ayí nū nɔ̄nyīlɔ mɛ́mla ayínɔ̄nyā ā wā kéē tá ɔ̄ ɔtūlé, amáŋ ó tá koó mīyɛ ɔtū o túlé. Anɔ́ɔ ó kahíníī, “N géē kwú ipú ekwu nɛ̄ n yɔ̄ ipú ɔtūnōbí kú ɔyí ūm ā.” Anɔ́ɔ ó yēkwu ipú ɔtūnōbí kú ɔyí nū Ujósɛ̄fu ā gɔbū kpɔ́ á.

³⁶Eko nēé le tá Íjīpiti ā, ācɛ Umídīya ā, kwú Ujósɛ̄fu ú lá lɛ Upɔ́tīfa, otrɛ̄yí kú ipɔ́ɔ́nū kú ɔlɛ́ ɔcɛ́ kú Íjīpiti.