Read idoma OHÚTU 38 Bible Online

OHÚTU 38 - idoma bible

OHÚTU 38

¹Ɛpléeko ɔ́ɔmā Ujúda nyɛ̄ɛ̄ ŋmá ɛgiyí ayínɛ́ nū, anɔ́ɔ ó nyɔ̄ gaá lā mla ɔ̄cɛ éyi nɛ̄ iyē kú nū lé ka Uhíra, nōo ŋmá igēlī nēé hī ka Adulám ā.

²Abɔ́ɔ ā, Ujúda le ɔyípɔ̄nɔ̄nyā kú Ukénan éyi nɛ̄ iye kú ádā nū lé ka Ussúwa má. Anɔ́ɔ ó le ɔ́ lɛ á.

³Ɔnyā ā lɛ ipú yɔ̄, le ɔyínɔ̄nyīlɔ éyi ma lɛ ɔ́. Anɔ́ɔ ó hī iyē kú ɔyí ā ka Ɛ́ri.

⁴Ó klla le ipú yɔ̄ igɔhá le ɔyínɔ̄nyīlɔ ɔhá ma lɛ ɔ́. Anɔ́ɔ ó hī iyē kú ɔyí ā ka Ónan.

⁵Igbɔhá kpɔ́ ó klla le ipú yɔ̄, le ɔyínɔ̄nyīlɔ ɔhá ma lɛ ɔ́. Anɔ́ɔ ó hī iyē nū ka Usséla. Ujúda yɔ̄ Áksību eko nēé ma ayí nēe bá ā.

⁶Ujúda le ɔnyā lɛ lɛ ɔ́kplá kú nū, Ɛ́ri. Iyē ɔnyā ā lé ka Utáma.

⁷Amáŋ ucē kú Ɛ́ri í lɔhi ɛgiyí Óndú ā ŋ́, anɔ́ɔ Óndú á le ɔ́ ŋmó á.

⁸Anɔ́ɔ Ujúda da Ónan, ɔyínɛ̄ kú Ɛ́ri ā kahíníī, “Nyɔ̄ gaá le gwutá mɛ́mla ɔnyōkwu kú ɔyínɛ́ uwɔ. Kwú ɔ̄ ú ɔnyōkwū cɛ́ɛ́ kú aá ma ayí lɛ okwūmā ɔyínɛ́ uwɔ, cɛ́ɛ́ kú iyē kú nū kóō híī bí ŋ́.

⁹Amáŋ Ónan le jé ka ɔyí ā í gáā wɛ ákú anúɔ ŋ́. Anɔ́ɔ eko dúúmā nōó le gwutá mɛ́mla ɔnyōkwū kú ɔyínɛ́ nɛɛ, ó cɛ̄ le iyē nōó gē tá ā kóō lɛ pɛ́ wāajɛ. Ó yá ɛ̄nyā ó yá ɛ́ɛ́ kóō ma ɔyí dúúma lɛ ɔyínɛ́ nū ŋ́.

¹⁰Ɔdā nōó yɔ̄ ī yá nyā í he Óndú ā ɔtū ŋ́, anɔ́ɔ Óndú ā le ɔ́ ŋmó á.

¹¹Anɔ́ɔ Ujúda da Utáma, ɔnyā ɔyí nū kahíníī, “Kwúcē ga ɔlɛ́ ádā uwɔ cɛ́ɛ́ ká ā wɛ ɔnyōkwū jāā gbéeko nɛ̄ ɔyí um, Usséla le jɛ̄.” Ohígbū ka Ujúda yɔ̄ ī yúúfi, ohígbū nɛ̄ Usséla géē kwú ɛ́gɛ́nɛ̄ ayínɛ́ nū kwú ā. Anɔ́ɔ Utáma kwúcē le tá ɔlɛ́ ádā nū á.

¹²Eko le yɛ lígíí, ɔnyā kú Ujúda, ɔyínɔ̄nyā kú Ussúwa ā gekwú. Eko nōó le ekwu kú ɔnyā nū yɔ̄ kwɛyí ā, anú mɛ́mla oklóbīya nū, Uhíra kú Adúlam ā le tá ajɛ kú Utímna, ɛga nɛ̄ uwá bá ī wá aálá kú Ujúda ɔnwū ā.

¹³Ɔ̄cɛ éyi le da Utáma kahíníī, “Ádā ɔbá uwɔ yɔ̄ ī nyɔ̄ ajɛ kú Utímna gáā wā aálá kú nū ɔnwū.”

¹⁴Anɔ́ɔ ó kwú īlī ɔnyōkwū kú nū ú plla ŋmá iyē, kwú īlī ɔhá ú wiyē, klla kwú īlī ú pīya klá eyī. Anɔ́ɔ ó gaá cīce ɔwɛ kú Ɛ́nēm, ɔlɛ́ nōo yɔ̄ ɔwɛ nɛ̄ Ujúda gaá yɛ ga Utímna ā. Ɔyí kú Ujúda Usséla ā le jɛ̄ ɛɛ́, amáŋ é je Utáma ɔnyōkwū ā lɛ ɔ́ ɔnyā ɛ́ɛ́ ŋ́.

¹⁵Eko nɛ̄ Ujúda le ɔ́ má ā, ó gbɛlá ka ɔ́ɔ wɛ akwuna éyi nɛ̄, ohígbū ka ó le īlī pīya klá eyī.

¹⁶Ujúda le tá ɛgiyí nū, ābɔ̄ ɔhá kú ɔwɛ ā, anɔ́ɔ ó da ɔ́ kahíníī, “Wā ka n gwutá mɛ́mla uwɔ.” Ó jé ka ɔ́ɔ wɛ ɔnyā kú ɔyí anúɔ ŋ́. Anɔ́ɔ ó tá ɔ̄ ohi kahíníī, “Ɔdí nɛ̄ a géē je gā um ɛ́ɛ́ ká n̄ gwutá mɛ́mla uwɔ āa?”

¹⁷Ujúda tá ɔ̄ ohi kahíníī, “N géē je ɔyí ɛwū éyi gā uwɔ.” Anɔ́ɔ ɔnyā cɛ̄, klla kahíníī, “A géē je odée gā um ká n̄ lɛ abɔ̄ bī ɔ̄ bɛ̄ɛka ɔdā kú okónu ō ce āa, jāā gbéeko nɛ̄ a lɛ ɔyí ɛwū ā bī wā.”

¹⁸Anɔ́ɔ Ujúda da ɔ́ ɔ̄kā kahíníī, “Ɔdí nɛ̄ n géē je gā uwɔ bɛ̄ɛka ɔdōcabɔ̄ āa?” Anɔ́ɔ ó kahíníī, “Ɔdā ō plɔkɔ nɛ̄ iyē kú uwɔ yɔ̄ anú mɛ́mla ɔ́ngbá kú nū, mɛ́mla okwutɛ kú uwɔ nɛ̄ a bī ā.” Anɔ́ɔ Ujúda le aɔ́dā ā kpó lɛ ɔ́ á. Anɔ́ɔ ó má gwutá mɛ́mla anú á, anɔ́ɔ Utáma le ipú yɔ̄ á.

¹⁹Utáma le cīgbīhi ga ɔlɛ́ gaá kwú īlī ā ú kpó ŋmá eyī, klla kwú īlī ɔ̄nyōkwū kú nū ú wiyē.

²⁰Eko nɛ̄ Ujúda le oklóbīya nū Uhíra tɛ̄hɔ̄ mla ɔyí ɛwū ā gé lɛ ɔnyā ā, cɛ́ɛ́ kóō mīyɛ ɔdōcabɔ̄ nōó je lɛ ɔ́ āa, Uhíra í má ɔnyā ā ɛ́ɛ́ gɛ ŋ́.

²¹Anɔ́ɔ ó da ācɛnyīlɔ kú Ɛ́nēm ɔ̄kā kahíníī, “Iní nɛ̄ akwuna nōo ī cīce ɔwɛ amānyā ā yɔ̄ ā?” Anɔ́ɔ é tá ɔ̄ ohi kahíníī, “Akwuna dóódu ī yɔ̄ amānyā ŋ́.”

²²Ó kwúcē le tá ɛgiyí Ujúda, anɔ́ɔ da ɔ́ kahíníī, “Ń má ɔnyā ā ŋ́. Ācɛnyīlɔ kú abɔ́ɔ ka akwuna dóódu í lā abɔ́ɔ ŋ́.”

²³Anɔ́ɔ Ujúda kahíníī, “Ká ɔnyā ā kóō bī aɔ́dā ā kéē kwú pīya ákú nū mɛ́ɛnɛ. Ń dɔ̄ɔ̄ka kú ācɛ amānyā kéē yɛhɛ tū alɔ ŋ́. N tíne ká n̄ lɛ ulé cíla ɔ́ amáŋ á kē má ɔ̄ ŋ́.”

²⁴Ó lɛbɛ̄ɛka ɔyā ɛtá le gla ā, ɔ̄cɛ éyi da Ujúda kahíníī, “Utáma, ɔnyā ɔyí uwɔ le ajā gbo ɛɛ́. Ofíyɛ́ dúú ā, ó kē le ipú kú ajā yɔ̄.” Anɔ́ɔ Ujúda kahíníī, “Aá lɛ ɔ́ bī wɛ̄ɛcɛ kéē lɛ ɔ́ tɔ̄ɔ̄lá.”

²⁵Abɔ̄ é bá ī bī ɔ̄ wɛ̄ɛcɛ ā, ó le ɛhɔ̄ tū fu ádā ɔbá nū kahíníī, “Ɔ̄cɛ nɛ̄ aɔ́dā nēe bá nyā wɛ ákú nū ā, anú nɛ̄ n yīipú lɛ ɔ́ á. Aá má ɔ̄ káá, ɔnyɛ nɛ̄ ɔdā ō plɔkɔ nɛ̄ iyē kú ɔ̄cɛ yɔ̄ anú mɛ́mla ɔ́ngbá kú nū mɛ́mla okwutɛ nēe bá ā wɛ ákú nū āa?”

²⁶Abɔ̄ Ujúda le ɔdōcabɔ̄ ā jé á, anɔ́ɔ ó kahíníī, “Ó le um ɛpɔ̄hi lé nwuné nwuné, ɛ́gɛ́nɛ̄ ń je ɔyí um, Usséla lɛ ɔ́ kóō wɛ ɔbá nū ŋ́ mā.” Anɔ́ɔ Ujúda í klla cikpó nū igbɔhá ɛ́ɛ́ gɛ ŋ́ má.

²⁷Eko nɛ̄ eko nɛ̄ Utáma í mɔyí ā le yá ā, ó le áplɛ́ ma.

²⁸Eko nōó yɔ̄ ī yá ɔma ā, ɔyí éyi kwú abɔ̄ kú nū ú kwɛɛcɛ, anɔ́ɔ ɔnyōkɔ́ma ā, kwú owú nɔ̄wá ú gbō ɔyí ā abɔ̄, ka anú ɔ́ɔ wɛ̄ɛcɛ gbɔbū á.

²⁹Amáŋ, ɔyí ā kwú abɔ̄ ā ú pi ga ipú, anɔ́ɔ ɔyínɛ́ nū gā ɛcɛ á. Anɔ́ɔ ɔnyōkɔ́ma ā kahíníī, “Má ɛ́gɛ́nɛ̄ a tū wɛ̄ɛcɛ lɛ ā.” Anɔ́ɔ ó hi iyē kú nū lé ka, Upéresi[65]

³⁰Igbīhāajɛ ā, ɔyínɛ̄ nū ā gāajɛ lɛ owú nɔ̄wá kwábɔ̄, anɔ́ɔ ó hī iyē kú nū ka Uséra.[66]