Read idoma OHÚTU 40 Bible Online

OHÚTU 40 - idoma bible

OHÚTU 40

¹Eko kpiī le yɛ ɔ̄cɛ nōo gē je ejé lɛ ɔcɛ́ kú Íjīpiti mɛ́mla otrɛ̄yí kú ācɛ nēe gē yá igbō lɛ ɔcɛ́ ā, le ɔdā iwɔ́tū yá ɔcɛ́ kú Íjīpiti ā.

²Uféro, ɔcɛ́ ā le cɔ̄nū mla ɔ̄cɛ nōo geē je ejé lɛ ɔ́ ā mɛ́mla ɔ̄coyíigbō ā.

³Anɔ́ɔ ó kwú uwā ú kpó tū agbá ɔlɛ́ kú otrɛ̄yí kú ācogbājɛ ā, ɛga ékpónú nɛ̄ Ujósɛ̄fu yɔ̄ ā.

⁴É bá agbá gbojī ajɛ nɛ̄hi, anɔ́ɔ otrɛ̄yí kú ɔ̄cogbāajɛ ā kwú uwā ú kpó tū Ujósɛ̄fu abɔ̄ á.

⁵Otu éyi, ɔ̄cɛ nōo gē je ejé lɛ ɔcɛ́ ā, mɛ́mla otrɛ̄yí kú ācoyíigbō ā, le ɔ̄na ɛyɛ́ɛyɛ́yí nā. Amáŋ ɛyí kú ɔ̄na kú uwā ā kē wɛ ɛyɛ́ɛyɛ́yí.

⁶Eko nɛ̄ Ujósɛ̄fu wā ɛgiyí uwā gaá jila uwá ɔ̄cɔ̄ɔ̄cī ā, ó má ka ɔtū kú uwā le wuklícō.

⁷Anɔ́ɔ ó da uwá ɔ̄kā kahíníī, “Ɔdíyá nɛ̄ aá kwú eyī flla ā a?”

⁸Anɔ́ɔ é da ɔ́ kahíníī, “Alɔ nā ɔ̄na otū, ɔ̄cɛ dúúmā í kē yɔ̄ nōo géē ka ɛyí ɔ̄na ā lɛ alɔ ŋ́.” Anɔ́ɔ Ujósɛ̄fu da uwá ɔ̄kā kahíníī, “Ɛyí kú ɔ̄na ō ka wɛ ákú Ɔwɔicō nɛɛ n. Aá da um ɔ̄na kú aá ā mɛ́ɛnɛ.”

⁹Anɔ́ɔ ɔ̄cɛ nōo gē je ejé lɛ ɔcɛ́ ā kahíníī, “N nɔ̄na má ɔcí kú ufáyin éyi kwu iyɔ̄bū um.

¹⁰Ó kwū ābɔ̄ ɛtá. Ɔkwɔɔkwu nɛ̄ ēpū kú nū le lū ā, ohépu kú nū gɛ̄ɛcɛ. Anɔ́ɔ ó le gwá klla le pīya á.

¹¹N bī íkókwū kú ɔcɛ́ ā abɔ̄, anɔ́ɔ n kwú īkpō kú ufáyin ā ú, le ɔ́ pí tū ipú íkókwū ā klla kwú ɔ̄ ú lɛ Uféro, ɔcɛ́ ā á.”

¹²Anɔ́ɔ Ujósɛ̄fu kahíníī, “Ɛ̄nyā wɛ ɛyí ɔ̄na kú uwɔ á. Ābɔ̄ ɛtá kú ɔcí nɛ̄ a má ā wɛ ɛ̄cī ɛtá.

¹³Ipú ɛ̄cī ɛtá nēe bá ā, Uféro géē je odōōbɔ̄bí kú uwɔ yá uwɔ ɛhi. Cɛ́ɛ́ ó kwú uwɔ ú wɛ̄ɛcɛ ŋmá agbá, klla kwú uwɔ̄ ú ce āhɔ̄ kú uwɔ tɛtɛ ā ɔlɛ́ nū. A géē yɔ̄ ī je ejé lɛ ɔ́ ɛ́gɛ́nɛ̄ ā tɛtɛ gē yá ā.

¹⁴Amáŋ, blakwu um, eko nōó le lɔhi ga uwɔ. Kócōō ā mlanyī ká ā kɛlā kú um lɛ ɔcɛ́ nóó. Cɛ́ɛ́ ká ā tá um abɔ̄ kéē kwú um bɛ̄cɛ ŋmá ipú agbá amānyā.

¹⁵Ami, nááná ā, é kwú um abɔ̄fú ŋmá ajɛ ɔlɛ́ um nɛ n. Íjípiti amānyā nááná ā, ń yá ɔdā dúúmā nēé cíkā ō je um tá agbá ŋ́.”

¹⁶Eko nɛ̄ otrɛ̄yí kú ācoyíigbō kú ɔlɛ́ ɔcɛ́ ā le má ka ɛyí ɔ̄na kú ɔ̄cɛ nōo ī je ejé lɛ ɔcɛ́ gwá ā, ɔ́ɔ le lɔhi ā, anɔ́ɔ ó da Ujósɛ̄fu kahíníī, “N nɔ̄na dúú. Ɔ̄na kú um ā kē yɔ̄ á. N bī aómbilí ɛtá kú igbō cɛyí.

¹⁷Ɛdɔ kú ɔdōlé ō bɔ́lá ɛyɛ́ɛyɛ́yí kú ɔcɛ́ bá ipú ómbilí ɔ́mɛtá ā, anɔ́ɔ aígbáanɔ yɔ̄ ī lé ɔdōlé ā á.”

¹⁸Ujósɛ̄fu tá ɔ̄ ohi kahíníī, “Ɛyí kú ɔ̄na kú uwɔ ā yɔ̄ á. Aómbilí ɛtá ā wɛ ɛ̄cī ɛtá.

¹⁹Ipú ɛ̄cī ɛtá nēe ī wā ā, Uféro géē je uwɔ īkpɛ̄yí hɛ́, klla géē je okwū kú uwɔ playi ɔcí. Aígbáanɔ géē je ɛbɛ́ uwɔ wá lé.”

²⁰Oŋmá ɛ̄cī ɔmɛtá nōo wɛ ɛ̄cī kú oblatū kú ɛ̄cī nēé ma Uféro ā, ó le ucɛ yá nɛ̄hi lɛ aígabɔ̄ kú ɔlɛ́ nū. Ó le ɔ̄cɛ nōo gē je ejé lɛ ɔ́ ā mɛ́mla otrɛ̄yí kú ācoyíigbō ā kpó wɛ̄ɛcɛ ŋmá agbá, anɔ́ɔ ó le uwá kpó wā iyɔ̄bū kú aótrɛ̄yí kú ɔlɛ́ nū á.

²¹Ó kwú ɔ̄cɛ nōo gē je ejé lɛ ɔ́ ā ú kwúcē wā āhɔ̄ kú nū kóō je ejé lɛ ɔ́ kpɔ́.

²²Amáŋ, ó le ɔ̄cɛ nōo wɛ otrɛ̄yí kú ācoyíigbō kú ɔlɛ́ nū ā ikpɛ̄yí hɛ́, kwú okwū kú nū ú playi ɔcí ɛ́gɛ́nɛ̄ Ujósɛ̄fu ka ā.

²³Amáŋ ɔ̄cɛ nōo ī je ejé lɛ ɔcɛ́ ā í blakwu Ujósɛ̄fu gɛ ŋ́. Ó kwú mlanyī nū dúúdú.