Read idoma OHÚTU 41 Bible Online

OHÚTU 41 - idoma bible

OHÚTU 41

¹Eko nɛ̄ iháyí ɛpa le yɛ ā, Uféro le ɔ̄na nā abɔ̄ ó háyī okónu ísu kú Unáyilu ā.

²Anɔ́ɔ ó má aɛ́na ahāapa, ojɔ̄kwū mlɔ́mlɔ́ ā le bɛ̄cɛ ŋmá ipú ísu kú Unáyilu ā, anɔ́ɔ é gbɔɔ́ ō lé ácí.

³Anɔ́ɔ aɛ́na ahāapa ɔhá le pɛ́ bɛ̄cɛ ŋmá ipú ísu ā. É le nyinyi gányá gányá ā. É gaá háyī pī aɛ́na ojɔ̄kwū ahāapa ā okónu ísu ā,

⁴anɔ́ɔ aɛ́na onyinyi gányá gányá ā, kwú aɛ́na ojɔ̄kwū ā ú kpó lé ŋmá ajɛ. Anɔ́ɔ ɔcɛ́ ā le héyī ŋmá iyɔ̄lā á.

⁵Anɔ́ɔ Uféro kwú iyɔ̄lā ī gbo kpɔ́, anɔ́ɔ ó le ɔ̄na ɔhá nā kpɔ́ á. Ipú ɔ̄na ā, ó má ɛyí kú igwu o cɛyí nɛ̄hi ahāapa bá ī jɛ̄ kwú ɔcí igwu ékpónú.

⁶Anɔ́ɔ ɛyí kú igwu ɔhá klla le bū wɛ̄ɛcɛ ɛgiyí uwā, owu kú ipú ígbíli cɛ̄ lɛ aɛ́nyā kwú pīya igbóngbō.

⁷Anɔ́ɔ ɛyí kú igwu nōo wɛ igbóngbō ā kwú ɛyí kú igwu o cɛyí nɛ̄hi ā í kpó mlɛ ŋmá ajɛ á. Uféro le héyī ŋmá iyɔ̄lā anɔ́ɔ ó le jé ka ɔ̄na nɛ̄ anúɔ hímáyī nā á.

⁸Ɔ̄cɔ̄ɔ̄cī ā, ɔtū nwula nwula yá ɔ̄ nɛ̄hi, anɔ́ɔ ó le ɛhɔ̄ tū fu odúúdú ācoyímabɔ̄ mɛ́mla odúúdú ācojēeyī kú ajɛ kú Íjīpiti á. Ó le ɔ̄na nōó nā ā kpó ka lɛ uwá. Amáŋ odóódu kú uwā í ka ɛyí ɔ̄na ā lɛ ɔ́ glá ŋ́.

⁹Anɔ́ɔ ɔ̄cɛ nōo gē je ejé lɛ ɔcɛ́ ā kahíníī, “N lɛ okónu cɛ̄ ɔdōbɔ̄bí kú um ícɛ.

¹⁰Eko nɛ̄ a cɔ̄nū kpó ami mɛ́mla otrɛ̄yí kú ācoyíigbō ā tū agbá ɔlɛ́ kú otrɛ̄yí kú ācogbāajɛ ā.

¹¹Alɔ nɔ̄na tɔ̄há otú ékpónú, ɔ̄na kú ɔnyɔɔnyɛ kē lɛyí ɛyɛ́ɛyɛ́yí.

¹²Ó le ɔyípóklóbīya kú Uhíbru éyi nōo yɔ̄ abɔ́ɔ mɛ́mla alɔ. Ó wɛ ɔ̄cocɛ̄hɔ̄ kú otrɛ̄yí kú ācogbāajɛ ā. Alɔ le ɔ̄na kú alɔ kpó ka lɛ ɔ́, anɔ́ɔ ó le ɛyí nū kpó ka lɛ alɔ á.

¹³Ɛ́gɛ́nɛ̄ ó ka ɛyí kú ɔ̄na ā lɛ alɔ lɛ ā, ɛ́gɔ́ɔmā nōó kē le yá kpɛ́mm á. A le um cīgbīhi wā āhɔ̄ kú um, anɔ́ɔ é kē le otrɛ̄yí kú ācōyíigbō ā tū olī á.”

¹⁴Anɔ́ɔ Uféro ā lɛ ɛhɔ̄ tū fu Ujósɛ̄fu, anɔ́ɔ é lɛ ɔ́ bī bɛ̄cɛ bōōbū ŋmá agbá. Eko nōó le ɔnwū agba plla klla le īlī kú nū pīyabɔ̄ ā, ó gā iyɔ̄bū kú Uféro.

¹⁵Uféro da Ujósɛ̄fu kahíníī, “N le ɔ̄na nā, ɔ̄cɛ dúúmā í kē yɔ̄ nōo lɔfú ka ɛyí nū gā um ŋ́. N pó ka, eko nēé lɛ ɔ̄na ka gā uwɔ, a gē ka ɛyí nū glá.”

¹⁶Anɔ́ɔ Ujósɛ̄fu tá Uféro ohi kahíníī, “Ó wɛ ami ŋ́, amáŋ Ɔwɔicō géē lɔfú ka ɛyí nū gā uwɔ á.”

¹⁷Anɔ́ɔ Uféro da Ujósɛ̄fu kahíníī, “Ipú ɔ̄na kú um ā, n háyī pī ísu kú Unáyilu,

¹⁸ɛ́ɛ́ nɛ̄ aɛ́na ahāapa nēe wɛ ojɔ̄kwū iyē mlɔ́mlɔ́ ā le pɛ́ bɛ̄cɛ ŋmá ipú ísu kú Unáyilu bá ī lé ácí.

¹⁹Anɔ́ɔ aɛ́na ahāapa ɔhá le pɛ́ bɛ̄cɛ. É le nyinyi gányá gányá ā, ɛdɔ ɛ̄nɛ̄ ń má ajɛ kú Íjīpiti jéjéē ɛ́ɛ́ ŋ́.

²⁰Anɔ́ɔ aɛ́na nēe nyinyi gányá gányá ā kwú aɛ́nɛ̄ e jɔ̄kwū mlɔ́mlɔ́ ahāapa kú aflɛ́yí ā ú kpó lé á.

²¹Amáŋ eko nɛ̄ é kwú uwā ú kpó lé ā, ɔ̄cɛ dóódu í lɔfú jé ka ɔdā dúúmā tá ipú kú uwā ŋ́, ohígbū keé le gányá gányá ɛ́gɛ́nɛ̄ é tɛtɛ lɛ ā. Anɔ́ɔ n le héyī á.

²²N klla nɔ̄na má ɛyí kú igwu o cɛyí nɛ̄hi ahāapa nēe yɔ̄ ī jɛ̄ ŋmá ɔcí igwu ékpónú.

²³N klla má ɛyí kú igwu ahāapa ɔhá, nɛ̄ owu kú ígbíli kwú uwā ú pīya igbóngbō.

²⁴Anɔ́ɔ ɛyí kú igwu nēe wɛ igbóngbō ā kwú ɛyí kú igwu nēe cɛyí nɛ̄hi ahāapa ā ú kpó mlɛ á. N le ka lɛ ācoyímabɔ̄ kú ɔlɛ́ um ā, amáŋ ɔ̄cɛ dúúmā kú uwā í yɔ̄ nōo lɔfú ka ɛyí ɔ̄na ā gā um glá ŋ́.”

²⁵Ujósɛ̄fu da Uféro kahíníī, “Ɛyí kú ɔ̄na ɛplɛ́ɛpa ā wɛ ékpónū. Ɔdā nɛ̄ Ɔwɔicō gáā yá ā nōó mafú á.

²⁶Aɛ́na ojɔ̄kwū ahāapa ā mɛ́mla ɛyí kú igwu o cɛyí nɛ̄hi ahāapa ā, wɛ iháyí ahāapa. Ɔnā ā le ɛyí ékpónú.

²⁷Aɛ́na onyinyi gányá gányá ahāapa ā mɛ́mla ɛyí kú igwu ahāapa nēé cɛyí ŋ́ mā, nɛ̄ owu kú ipú ígbíli je ɔ́ pīya igbóngbō ā wɛ iháyí ahāapa kú ɔkpɛtā.

²⁸Ɛ́gɛ́nɛ̄ n da uwɔ lɛ ā ka ɔdā nɛ̄ Ɔwɔicō gáā yá ā nōó mafú gā uwɔ á.

²⁹Iháyí ahāapa kú ɔdā kú ɛhɔ̄ ō cabá géē yɔ̄ odúúdú ajɛ kú Íjīpiti.

³⁰Amáŋ, igbīhi iháyí ɛ̄nyā ā, iháyí ahāapa kú ɔkpɛtā géē gbɔɔ́, nɛ̄ ācɛ géē je mlanyī odúúdú iháyí kú ɔdɛ̄hɔ̄ ō cabá ā ohígbū ka ɔkpɛtā ā géē je ajɛ kú Íjípiti yíífi.

³¹Ācɛ í je mlanyī eko kú ɔdɛ̄hɔ̄ ō cabá ā ipú ajɛ nyā, ohígbū ka ɔkpɛtā nōo gaá kwúcē eko ɔ́ɔmā ā géē bɔ̄bí nɛ̄hi.

³²Ɔdā nōo yá ɛ́ɛ́ nɛ̄ a nɔ̄na igbɛpa gboce iyī uwā ā wɛ ka Ɔwɔicō le ɔdānyā miya táajɛ gbɔbū ɛɛ́, ó kē í má kóō le yá piíí ɛ̄cɔ̄bū nōó ligbó ŋ́.

³³Ɛlā kú um abālɔbányā wɛ ka Uféro kóō lɛ ɔ̄cojééyī nɛ̄hi éyi fu, kóō leyīkwu ajɛ kú Íjīpiti.

³⁴A í fu aígabɔ̄ ɔhá nēe leyīkwu ajɛ ā, é kē í mīyɛ ɛga eyí ŋmá ɛga ɛhɔ̄ kú ɔdɛ̄hɔ̄ dóódu nōo í yá ɛplá iháyí ahāapa kú ɔdɛ̄hɔ̄ ō cabá ā.

³⁵Da uwá kéē le ɔdōlé kú aíháyí olɔhi nēe yɔ̄ ī wā ā kpó, a klla í je íkwú lɛ uwá kéē lɛ ɔdɛ̄hīcō kpó tū ipú inu ipú aígelī cɛ́ɛ́ kéē gbō ɔ̄.

³⁶Ɔdōlé ɔ́ɔmā géē wɛ ɔdōlé ō gbɛ̄yí kú ajɛ ā ohígbū iháyí ahāapa kú ɔkpɛtā nēe géē wā ipú ajɛ kú Íjīpiti, cɛ́ɛ́ kú ɔkpɛtā kóō je ācɛ ā kpó yíífi ŋ́.”

³⁷Ufēro mɛ́mla odúúdú aígabɔ̄ kú ɔlɛ́ nū ā, cɛ̄ ka ɛlā kú Ujósɛ̄fu ɔ́ɔ lɔhi.

³⁸Anɔ́ɔ Uféro da aígabɔ̄ kú ɔlɛ́ nū ā kahíníī, “Alɔ í gáā má ɔ̄cɛ ɔhá dúú fíyɛ́ ɔ̄cɛ ā nɛ̄ alelékwū kú Ɔwɔicō yɔ̄ ipú nū ā glá ŋ́”

³⁹Uféro da Ujósɛ̄fu kahíníī, “Abɔ̄ Ɔwɔicō le odúúdú ɔdā nēe bá ā mafú gā uwɔ ā, ɔ̄cɛ dúúmā ɔhá í yɔ̄ nōo lɔhi klla jíjéeyī bɛ̄ɛka awɔ ā ɛ́ɛ́ gɛ ŋ́.

⁴⁰N géē je uwɔ pīya otrɛ̄yí kú ajɛ ɔlɛ́ um. Odúúdú ācɛ ɔlɛ́ um géē mīyɛ ɔ́da ŋmá abɔ̄ kú uwɔ. O ka n ce akpa kú ɔcɛ́ ā nɛ̄ n bī le fíyɛ́ uwɔ á.

⁴¹Anɔ́ɔ Uféro da Ujósɛ̄fu kahíníī, “N kwú uwɔ ú yá igbómína kú odúúdú ajɛ kú Íjīpiti.”

⁴²Uféro kwú eliká nōo ī bī le bá ɔkpá ā ú plla ŋmá abɔ̄ kú nū, anɔ́ɔ ó kwú ɔ̄ ú wu Ujósɛ̄fu abɔ̄, klla kwú awulú ahilíki ú wu ɔ́ iyē, kwú agbá kú oje ɔdɔ (ugóolu) ú tū ɔ̄ ɔkɔ.

⁴³Ó kwú úgbɔ́ɔnya kú ɔlɛ́ ɔcɛ́ ɔ́mpa ā ú lɛ ɔ́, anɔ́ɔ ācɛ nēe gē gbō ɔ̄ le gbɔbū lɛ ɔ́, bá gē dɛ̄gba kahíníī, “Aá lɛ ɔwɛ tá lɛ ɔ́!” Anɔ́ɔ Ujósɛ̄fu kwú pīya igbómína kú Íjīpiti á.

⁴⁴Uféro da Ujósɛ̄fu kahíníī, “Ami wɛ Uféro á, ɔ̄cɛ dúú í yɔ̄ ipú odúúdú ajɛ kú Íjīpiti nōo í je abɔ̄ ámāŋ ka ikpó gicō nōó gáā mīyɛ ɛga ŋmá abɔ̄ kú uwɔ gbɔbū ŋ́ nɛɛ ŋ́.”

⁴⁵Uféro kwú iyē kú ācɛ Íjīpiti éyi ce ɔ́, nōo lé ka Usafénāt Upanéya. Ó klla kwú Asɛ́nāt, ɔyínɔ̄nyā kú Upɔtiféra, nōo wɛ ɔ̄cogwɛ́ɛya ipú igelī kú Uheliyopólisi ā ú lɛ ɔ́ kóō wɛ ɔnyā nū.

⁴⁶Ujósɛ̄fu wɛ iháyí ofucigwó eko nōó gbɔɔ́ ō cɛ̄ Uféro kú Íjīpiti ɛhɔ́ ā. Ó nyɛ̄ɛ̄ ŋmá agbla kú ɔcɛ́, anɔ́ɔ ó le odúúdú ajɛ kú Íjīpiti ā kpó jila bilíbilí á.

⁴⁷Eko kú iháyí ahāapa kú ɔdōlé ō cabá nɛ̄hi ā, ajɛ ā yá ɔdɛ̄hɔ̄ nɛ̄hi.

⁴⁸Ujósɛ̄fu le odúúdú ɔdōlé dóódu kú iháyí ahāapa ɔ́ɔmā ā, kpō tū ipú inu ipú aígelī. Ipú igelī dóódu ó le ɔdōlé nōo yɔ̄ ā kpó tū ipú inu ŋmá ɛhɔ̄ nōo yɛ abɔ́ɔ jīlatá biílí ā.

⁴⁹Ujósɛ̄fu le igwu ā tīkwū bá nɛ̄ɛ̄nɛ̄hi bɛ̄ɛka ɔjɛ kú okónū ísu ā. Ó kpótū jāā gbéeko nōó tōō miya igbīhāajɛ ā gɛ ŋ́.

⁵⁰Gbɔbū ɛ́ɛ́ kú iháyí kú ɔkpɛtā ā kóō wā ā, Ujósɛ̄fu lɛ ayínɔ̄nyīlɔ ɛpa, nɛ̄ ɔnyā nū, Asɛ́nāt, ɔyínɔ̄nyā kú Upɔtifɛ́ra, ɔ̄cogwɛ́ɛya kú Uhɛliyopɔ́lis ā ma lɛ ɔ́ ā.

⁵¹Ujósɛ̄fu hī iyē kú ɔ́kplá nū ā ka, Umanásɛ, ohígbū kóó kahíníī, “Ɔwɔicō le yá kú n̄ kwú mlanyī odúúdú ōwē kú um, mɛ́mla ákú ɔlɛ́ ádā um ɛɛ́,”

⁵²Ó hī iyē kú ɔyí nū ɔ́mpa ā ka, Ɛ́frem, “Ohígbū ka Ɔwɔicō cɛ̄ gā um le ma nyīla ajɛ kú ōwē kú um.”

⁵³Iháyí ahāapa kú ɔdɛ̄hɔ̄ ō cabá ā le ŋmɛ́yí ajɛ kú Íjīpiti.

⁵⁴Anɔ́ɔ iháyí ahāapa kú ɔkpɛtā gbɔɔ́ ɛ́gɛ́nɛ̄ Ujósɛ̄fu ka ā. Ɔkpɛtā ā yɔ̄ ajɛ dóódu, amáŋ ɔdōlé yɔ̄ ajɛ kú Íjīpiti ā.

⁵⁵Eko nɛ̄ ɔkpɛtā ā gbɔɔ́ ō ŋmó ajɛ kú Íjīpiti ā, ācɛ ā le ikwū je klá Uféro ohígbū ɔdōlé. Anɔ́ɔ Uféro da odúúdú ācɛ kú Íjīpiti ā kahíníī, “Aá nyɔ̄ ɛgiyí Ujósɛ̄fu, ɔdā dóódu nōó ka lɛ aá, aá yá ɔ̄.”

⁵⁶Eko nɛ̄ ɔkpɛtā ā le nyīla ga ɛga dóódu ā, Ujósɛ̄fu lɛ ɔwɛ kú inū nēé kpó ɔdōlé tū ā nwūla, anɔ́ɔ ó gbɔɔ́ ō je ɔdōlé lá lɛ ācɛ kú Íjīpiti ohígbū ka ɔkpɛtā le nwuné nɛ̄hi ajɛ abɔ́ɔ.

⁵⁷Ofíyɛ́ dúú ā, odúúdú āce kú ɛcɛ gē wā ajɛ kú Íjīpiti, ɛgiyí Ujósɛ̄fu gaá lá igwu, ohígbū ka ɔkpɛtā ā yɔ̄ odúúdú ɛcɛ.