Read idoma OHÚTU 42 Bible Online

OHÚTU 42 - idoma bible

OHÚTU 42

¹Ɛpléeko nyā Ujékɔ̄pu le jé ka īkpɔ̄dā ɔ́ɔ yɔ̄ ajɛ kú Íjīpiti. Anɔ́ɔ ó da ayí nū nɔ̄nyīlɔ kahíníī, “Ɔdíyá nɛ̄ aá bá ī má iyī aá eyēēyī icííci ā?

²N pó ka īkpɔ̄dā yɔ̄ ajɛ kú Íjīpiti. Aá nyɔ̄ kú aá lɛ īkpɔ̄dā lá gé lɛ alɔ ŋmá abɔ́ɔ o yá kú ɛmiyɛ kóō ŋmó alɔ ga ɔlékwū ŋ́.”

³Anɔ́ɔ ayí kú Ujékɔ̄pu igwó ā le yɛ tá Íjīpiti gaá lá īkpɔ̄dā.

⁴Amáŋ, Ujékɔ̄pu í tū Ubɛ́njamīn, ɔyínɛ́ kú Ujósɛ̄fu abɔ̄ɔ̄bɔ̄yi nū ā ɛhɔ̄ nyɔ̄ mɛ́mla uwá ŋ́, ohígbū koó yɔ̄ gē yúúfi ka ɔdōbɔ̄bí éyi ɔ́ɔ lɔfú yá ɔ̄ glá.

⁵Ayí kú Ujékɔ̄pu wā mɛ́mla ācɛ ɔhá gaá lá igwu ā dúú, ohígbū ka ɔkpɛtā yɔ̄ ajɛ kú Ukénan dúú.

⁶Ujósɛ̄fu nōo wɛ igbómína kú ajɛ kú Íjīpiti ā gē je ɔ́lá lá lɛ odúúdú ācɛ kú ajɛ ā á. Anɔ́ɔ ayínɛ́ nū gā gaá túkpɛɛ́, leyī pīya kláajɛ iyɔ̄bū nū.

⁷Ujósɛ̄fu le ayínɛ́ nū ā jéjúuma, amáŋ ó yá mla uwá bɛ̄ɛka aúgbɔga ā. Ó du uwá ɔ̄kā lɔfú lɔfú kahíníī, “Iní nɛ̄ aá ŋmá?” Anɔ́ɔ é tóohi kahíníī, “Alɔ ŋmá ajɛ kú Ukénan wā gaá lá ɔdōlé.”

⁸Nááná nɛ̄ Ujósɛ̄fu le ayínɛ́ nū jéjúuma ā, é í jé ɔ̄ éjúuma ŋ́.

⁹Anɔ́ɔ Ujósɛ̄fu le blakwu ɔ̄na nōó nā lɛyíkwu uwá ā. Anɔ́ɔ ó da uwá kahíníī, “Aá wɛ ācobɔkwu ɔdā tayínū nɛ. Aá wā gaá má ahi kú ajɛ nyā nɛ.”

¹⁰Anɔ́ɔ é da ɔ́ kahíníī, “Ehée, ɔkpani ālɔ, alɔ wā gaá lá ɔdōlé ōfōōfūnū nɛ u.

¹¹Odúúdú alɔ wɛ ayí kú ɔ̄cɛ ékpónú, alɔ wɛ ācɛ ɔ̄kwɛ̄yi nɛ̄, alɔ í wɛ ācɛ o bɔkwu odée tayínū ŋ́.”

¹²Ujósɛ̄fu da uwá kahíníī, “Aá wā gaá má ɛ́ga nɛ̄ ajɛ ā tɔ́ɔtɛ́ ā nɛ.”

¹³Anɔ́ɔ é kahíníī, “Alɔ wɛ ayínɛ́ igwɛ́ɛpa, ɔkpani, ayínɔ̄nyīlɔ kú ɔ̄cɛ ékpónú ipú ajɛ kú Ukénan. Ɔyínɛ́ alɔ éyi gekwú ɛɛ́, ɛ̄nɛ̄ ō wɛ ɛnɛ̄ŋcɛ́ fíyɛ́ dúú ā yɔ̄ ɔlɛ́ mɛ́mla ádā alɔ.”

¹⁴Amáŋ Ujósɛ̄fu da uwá kahíníī, “Ó lɛ ɛ́gɛ́nɛ̄ n da aá ā nɛ, aá wɛ ācɛ obɔkwu ɔdā tayínū.”

¹⁵Ɔwɛ nɛ̄ n géē bī le jé ɛdɔ kú ɔ̄cɛ nɛ̄ aá wɛ ā yɔ̄ á. “Oŋmá lɛ oyēeyī kú Uféro ā, aá gaá bɛ̄cɛ ŋmá amānyā ŋ́, jāā gbéeko nɛ̄ aá lɛ ɛnɛ̄ŋcɛ́ fíyɛ́ dúú ámōōmɛ kú aá bī wā amānyā.

¹⁶Aá lɛ ɔ̄cɛ éyi kú aá tɛ̄hɔ̄, koó gaá lɛ ɔyínɛ́ aá ā bī wā. Ācɛ ohile kú aá ā géē bá agbá amānyā, cɛ́ɛ́ ká n lɛ ɔ̄kwɛ̄yi kú ɛdɔ̄ kú ācɛ nɛ̄ aá wɛ ā jé. Oŋma lɛ oyēeyī kú Uféro ā, ɔ̄kwɔ̄ɔ̄kwɛ̄yi, aá wɛ ācɛ obɔkwu ɔdā tayínū nɛ.”

¹⁷Anɔ́ɔ ó le odúúdú uwā kpó bá agbá ɛ̄cī ɛtá.

¹⁸Ɛ̄cī ɔ́mɛtá ā, Ujósɛ̄fu da uwá kahíníī, “N wɛ ɔ̄cɛ nōo gē yúúfi Ɔwɔicō, n géē mabɔ̄ aá tá ɔ́dāŋ ka aá lɛ ɔdā nɛ̄ n gáā ka nyā yá.

¹⁹O yá ɛ́ɛ́ kú n jé ka aá wɛ ācɛ ɔkwɛ̄yi ā, ɔ̄cɛ éyi kú aá géē yɔ̄ agbá nēé kpó aá bá tɛtɛ ā. Ācɛ ohile kú aá kéē le īkpɔ̄dā bī gé lɛ ācɛ ɔlɛ́ nɛ̄ ɔkpɛtā yɔ̄ ī ŋmó ā.

²⁰Cɛ́ɛ́ aá lɛ ɔyínɛ́ aá nɛ̄ŋcɛ́ ā bī gé um, kú n lɛ ɛlā ɔkwɛ̄yi kú aá jé, cɛ́ɛ́ ń gáā ŋmó aá gɛ ŋ́.”

²¹Anɔ́ɔ é da īyī uwā kahíníī, “Ɔ̄kwɔ̄ɔ̄kwɛ̄yī, alɔ lɛ ɛpɔ̄bí kú ōwē nɛ̄ alɔ je lɛ ɔyínɛ̄ alɔ ā lé. Eko nōó yɔ̄ ī gbɔ̄ɔkɔ le alɔ nāānā ā, alɔ ī méyīnyinyi kú nū ŋ́, ɛ́ɛ́ nɛ̄ alɔ ī pō ŋ́. Ōwē kú nū nɛ̄ alɔ bā ī mā yɔ̄ ā.” É cɛ̄ ɛlā nōó ka nyā.

²²Urúbɛn da uwá kahíníī, “N da aá ka aá híī yá ɔyínɔ̄nyīlɔ ɔ́ɔmā ɔdā dóódu ŋ́, amáŋ aá tá ō pó ɛlā kú um. Abālɔbányā, ulé kú oyī kú nū gā ɛɛ́.”

²³Ujósɛ̄fu le ɛyí ɛlā nēé ka ā jé, amáŋ é kē jé lɛ ā ŋ́, ohígbū ka ɔ̄cɛ éyi yɔ̄ ī cɛ̄ ɔwɔ lɛ anú mɛ́mla uwá.

²⁴Ujósɛ̄fu nyɛ̄ɛ̄ ŋmá ɛgiyí uwā gaá gbɔɔ́ ō jikwū, eko nōó lɔfú kɛlā igbɔhá glá ā, ó le cīgbīhi wā ɛgiyí uwā, ó kwú Usímīyɔn ú, le ɔ́ abɔ̄ gbō ipéyī uwā.

²⁵Anɔ́ɔ Ujósɛ̄fu le ɔ́da je lɛ ācɛ kú ɔlɛ́ nū kéē lɛ īkpɔ̄dā tū ɛkpa kú uwā omōōmu yíílí, kéē kwú ije kú ɔnyɔɔnyɛ ú tá ipú ɛkpa kú nū, cɛ́ɛ́ kéē le ɔdōlé nɛ̄ uwā ɔ́ɔ í lé ɔwɛ ā je lɛ uwá. É le yá lɛ ā.

²⁶Ayínɛ́ nū ā le iyó kú uwā kpó ce aíjakī kú uwā, anɔ́ɔ é nyɛ̄ɛ̄ á.

²⁷Eko nɛ̄ éyi kú uwā le ɛkpa kú nū nwūla kóō je ɔdōlé lɛ ijakī kú nū otú ā, ɛga nēé gbo ā, ó le ije kú nū má ce ɛyí īkpɔ̄dā ipú ɛkpa kú nū.

²⁸Anɔ́ɔ ó da ayínɛ́ nū ɔhá ā kahíníī, “É kwú ije kú um í cīgbīhi ga um, anú ce ɛyí īkpɔ̄dā ipú ɛkpa kú um yɔ̄ á.” Eko nēé le ɔ́ má ā, ɔtū kú uwā kwú gbenyi, anɔ́ɔ uwā le eyī pīya tá iyī uwā anɔ́ɔ é ka ipú ufi kahíníī, “Ɔdí nɛ̄ Ɔwɔicō yá alɔ yɔ̄ ā a?”

²⁹Eko nɛ̄ é gā ɔlɛ́ ɛgiyí ádā uwā, Ujékɔ̄pu, ajɛ kú Ukénan ā, é lɛ ɔdā dóódu nōo yá uwā ā kpó ka lɛ ɔ́.

³⁰“Igbómína kú Íjīpiti kɛlā lɔfú lɔfú lɛ alɔ, ó klla le ɛlā kpó ce alɔ ka alɔ ɔ́ɔ wɛ ācɛ ō bɔkwu kú ajɛ tayínū.

³¹Amáŋ, alɔ da ɔ́ kahíníī, “Alɔ wɛ ācɛ ɔkwɛ̄yi, alɔ í wɛ ācɛ o bɔkwu ajɛ tayínū ŋ́.

³²Alɔ wɛ ayínɛ́ igwɛ́ɛpa, ayínɔ̄nyīlɔ kú ádā ékpónú, éyi kú alɔ gekwú ɛɛ́, ɛnɛ̄ŋcɛ́ fíyɛ́ dúú ámōōmɛ ā yɔ̄ mɛ́mla ádā alɔ ícɛ nyā ajɛ kú Ukénan.

³³Anɔ́ɔ ɔ̄cɛ ā, óndú kú ajɛ ɔ́ɔmā ā, da alɔ kahíníī, “Ɔwɛ nɛ̄ n géē bī le jé ka aá wɛ ācɛ ɔkwɛ̄yi ā yɔ̄ á. Ɔ̄cɛ éyi kú aá géē yɔ̄ mɛ́mla um. Ācɛ ohile kú aá í bī īkpɔ̄dā gé lɛ ācɛ ɔlɛ́ aá nɛ̄ ɔkpɛtā yɔ̄ ī ŋmó ā.

³⁴Aá lɛ ɔyínɛ́ aá nɛ̄ŋcɛ́ ámōōmɛ ā bī gé um. Eko ɔ́ɔmā nɛ̄ n géē je ka aá wɛ ācɛ o bɔkwu ajɛ tayínū ŋ́, amáŋ ka aá wɛ ācɛ ɔkwɛ̄yi. Cɛ́ɛ́ n kwú ɔyínɛ́ aá ú tɛ́ɛcɛ lɛ aá, cɛ́ɛ́ aá lɔfú tɔ́hí ipú ajɛ ā glá.”

³⁵Eko nēé le ɛkpa kú uwā nwūla ā, ɔnyɔɔnyɛ le ɛkpa kú ije kú nū pīyɛ̄. Eko nēé le ije ā má ā, ufi le uwá mɛ́mla ádā uwā kwú.

³⁶Anɔ́ɔ Ujékɔ̄pu, ádā uwā ā da uwá kahíníī, “Aá le odúúdú ayí um kpó ŋmá ɔtū kú um ɛɛ́. Ujósɛ̄fu le yɛ ɛɛ́, Usímīyɔn le yɛ ɛɛ́. Abālɔbányā aá tíne kú aá je Ubɛ́njamīn nyɔ̄. Ami wɛ ō móōwe á!”

³⁷Urúbɛn da ádā nū kahíníī, “Ɔ́dāŋ ka ń bī Ubɛ́njamīm cīgbīhi wā gé lɛ uwɔ ŋ́, a lɔfú lɛ ayí um ɛpa ā kpó ŋmó. Kwú ɔ̄ ú tū um abɔ̄, n géē je ɔ̄ cīgbīhi gé lɛ uwɔ.”

³⁸Amáŋ Ujékɔ̄pu da uwá kahíníī, “Ɔyí um í gaá nyɔ̄ mɛ́mla aá ŋ́. Ɔyínɛ́ nū gekwú ɛɛ́. Anú ōfōōfūnū hile mɛ́ɛ̄ ā. Odée lɔfú yá ɔ̄ ɔwɛ glá. N le hīla ɛɛ́, ɔtūnɔ̄bí nɛ̄ aá géē bī gé um ā géē ŋmó um.