Read idoma OHÚTU 44 Bible Online

OHÚTU 44 - idoma bible

OHÚTU 44

¹Ujósɛ̄fu le ɔ́da je lɛ ɔ̄cocɛ̄hɔ̄ nōo ī leyīkwu ɔlɛ̄ nū ā kahíníī, “Lɛ ɛkpa kú ācɛ ā tū mu mla ɔdōlé ɛ́gɛ́nɛ̄ é bī lɛ glá ā. A í je ije kú ɔnyɔɔnyɛ ce ɛyí īkpɔ̄dā kú nū ipú ɛkpa kú nū.

²Ká ā kwú íkókwū kú oje nɛ̄hɛ́ kú um ā ú ce ɛyí īkpɔ̄dā okónu ɛkpa kú ɔyí nɛ̄ŋcɛ́ fíyɛ́ dúú kú uwā mɛ́mla ije kú nū nōó bī wā í lá īkpɔ̄dā ā.”

³Ɔ̄cɔ̄ɔ̄cī blibli ā, é le ācɛ ā bī tá ga ɔwɛ mɛ́mla aíjakī kú uwā.

⁴Eko nēé le yɛ ŋmá ipú ɔlɛ́ ā lígíí ā, Ujósɛ̄fu da ɔ̄cocɛ̄hɔ̄ kú nū kahíníī, “Páápá ká ā nyɔ̄ í lɛ ācɛ ā kwú. Eko nɛ̄ a lɛ uwá kwú ū, da uwá ɔ̄kā kahíníī, ‘Ɔdíyá nɛ̄ aá le obɔ̄bí cíla ulé kú olɔhi nɛ̄ n yá lɛ aá ā? Ɔdíyá nɛ̄ aá je íkókwū kú oje nɛ̄hɛ́ kú ɔkpani um ā a?

⁵Íkókwū nyā, nɛ̄ ɔkpani gē bī lɛ gwá ejé á. Ó klla gē lɛ ɔ́ má ācɛ ɛbɛ. Ɔdōōbɔ̄bí nɛ̄hi nɛ̄ aá yá yɔ̄ á n.’”

⁶Eko nōó lɛ uwā kwú ā, ó le ɛlā nyā kpó ka lɛ uwá.

⁷Anɔ́ɔ é da ɔ́ ɔ̄kā kahíníī, “Ɔdíyá nɛ̄ a kpɛ́lā ɛ́gɛ́nyā ce alɔ ā, ɔkpani? Alɔ gbɔkpá ka alɔ í yá ɔdā ɛ́gɛ́nyā glá ŋ́.

⁸A jé ka ije nɛ̄ alɔ má okónu ɛkpa kú alɔ ícílɔ ā, alɔ le ɔ́ kwúcē igbīhi wā gé lɛ uwɔ ŋmá ajɛ kú Ukénan. Abɔ̄ ó yā ɛ́ɛ́ nɛ̄ alɔ géē je oje nɛ̄hɛ́ ámāŋ oje ɔdɔ uwī ŋmá ɔlɛ́ ɔkpani alɔ ā a?

⁹Odóódu kú alɔ nēé í má íkókwū ā ɛgiyí nū ā, é í je ɔ́ ŋmó, cɛ́ɛ́ ācɛ ohile kú alɔ kwú pīya aɔ́fiyɛ kú uwɔ piyóó.”

¹⁰Anɔ́ɔ ɔ̄cocɛ̄hɔ̄ kú Ujósɛ̄fu ā kahíníī, “N cɛ̄, amáŋ ɔ̄cɛ nōo je íkókwū ā ōfōōfūnū géē je pīya ɔfiyɛ kú um á. Ācɛ ohile kú aá í lé ɛpɔ̄hi ŋ́.”

¹¹Anɔ́ɔ odúúdú uwā le ɛkpa kú uwā nwūla kpó.

¹²Ɔ̄cocɛ̄hɔ̄ kú Ujósɛ̄fu gbɔɔ́ ō dɔɔ̄kā nū lɔɔlɔhi, ó gbɔɔ́ ŋmá ɔnyākwɔ́cɛ ga ɔyípɛ̄ nɛ̄ŋcɛ́ fíyɛ́ dúú ámōōmɛ ā, anɔ́ɔ ó le íkókwū ā pīyɛ̄ ipú ɛkpa kú Ubɛ́njamīn á.

¹³Ɔtū le bīya lɛ ayínɛ́ ohile ā, anɔ́ɔ é kwú úwé kú uwā í kpó híla ipú ɔtūnōbí, le iyó kú uwá kpó ce ɛyí ijakī, kwúcē ga ipú igelī kú Íjīpiti ā á.

¹⁴Eko nɛ̄ Ujúda mɛ́mla ayínɛ́ nū wā ɔlɛ́ Ujósɛ̄fu ā, ó yɔ̄ inu kpɔ́, anɔ́ɔ é lɛ eyī pīya klá ajɛ iyɔ̄bū nū,

¹⁵anɔ́ɔ Ujósɛ̄fu da uwá ɔ̄kā kahíníī, “Ucē nyá nɛ̄ aá yá yɔ̄ ā? Aá jé ka ɔ̄cɛ nōo yɔ̄ āyā kú um nyā lɛ ɔwɛ nōó gē bī lɛ jé ɔdā ō tayínū ŋ́ nɛɛ?

¹⁶Anɔ́ɔ Ujúda tá ɔ̄ ohi kahíníī, “Ɔdí nɛ̄ alɔ géē ka gā uwɔ ā, ɔkpani ūm? Ɔwɛ nyá nɛ̄ alɔ í kɔɔkɔ lɛ ā ā? Ɔwɛ nyá nɛ̄ alɔ í ŋmla iyī alɔ ŋmá ɛ̄nyā ā? Ɔwɔicō kwú ɔkwu ālɔ í ca klɛ́ɛcɛ ícɛ ɛɛ́. Odúúdú alɔ kwú pīya aɔ́fiyɛ kú uwɔ ɛɛ́, ó gáā wɛ ɔ̄cɛ nēé má íkókwū kú uwɔ ipú ɛkpa kú nū ā ōfōōfūnū ŋ́.”

¹⁷Amáŋ ó da uwá kahíníī, “Ehé! Ɔ̄cɛ nēé má íkókwū ā abɔ̄ nū ōfōōfūnū ā géē wɛ ɔfīyɛ kú um á, amáŋ, aá ā, aá nyɔ̄ ɛbɔ́ ga ɛgiyí ádā ā.”

¹⁸Ujúda le tíicō ɛgiyí nū, anɔ́ɔ ó kahíníī, “Woó, ɔkpani um, cɛ̄ kā n̄ lɛ ɛlā éyi ka gā uwɔ. Ɔtū kóō híī wú uwɔ lɛyíkwu um ŋ́, ohígbū ka a lɛbɛ̄ɛka Uféro ā abɔ̄yī nū nɛ.

¹⁹Ɔkpani, a tɛtɛ da alɔ ɔ̄kā kahíníī, “Aá lɛ ádā ámāŋ ka ɔyínɛ́ ɔhá ɛ́ɛ̄?

²⁰Alɔ tá uwɔ ohi kahíníī, ‘Alɔ lɛ ádā nōo le hīlókplícī mɛ́mla ɔyínɛ́ nɔ̄nyīlɔ nēé ma lɛ ɔ́ eko kú ókplícī kú nū. Ɔyínɛ́ kú ɔyí ā gekwú, anú ōfōōfūnū yēeyī ŋmá inu kú ɛ́nɛ́ nū mɛ́ɛ̄ á. Ó kē he ádā nū ɔtū nɛ̄hi.’

²¹Ɔkpani, a kē da alɔ ka alɔ lɛ ɔ́ bī wā amānyā, cɛ́ɛ́ ká ā lɛ ɔ́ má,

²²anɔ́ɔ alɔ kē tá uwɔ ohi ka ɔyípɔ̄nɔ̄nyīlɔ ā í habɔ̄ ádā nū tá wā glá ŋ́, ɔ́dāŋ koó le yá lɛ ā, ádā nū í kwú.

²³Anɔ́ɔ a da alɔ ka ɔ́dāŋ ka ɔyínɛ́ alɔ nɛ̄ŋcɛ́ ā ɔ́ wā mla alɔ ŋ́, alɔ ɔ́ gaá má eyī olɔhi kú anúɔ igbɔhá gɛ ŋ́.

²⁴Eko nɛ̄ alɔ kwúcē ga ɛgiyí ádā alɔ ā, alɔ le odúúdú ɛlā nɛ̄ a ka ā kpó da ɔ́.

²⁵Anɔ́ɔ ó da alɔ ka alɔ̄ kwúce nyɔ̄ í lɛ ɔdōlé lígíí lā wā.

²⁶Alɔ tá ɔ̄ ohi ka, ‘Alɔ í nyɔ̄ glá ŋ́, ó gáā cɛ̄ lɛ alɔ bēhé wā ɛgiyí nū ŋ́, ɔdāŋ nɛ̄ ɔyínɛ́ alɔ nɛ̄ŋcɛ́ ā í nyɔ̄ mɛ́mla alɔ ŋ́.’

²⁷Anɔ́ɔ ádā alɔ da alɔ kahíníī, ‘Aá jé ka ɔnyā um ā ma ayínɔ̄nyīlɔ ɛpa gā um.

²⁸Éyi nyɛ̄ɛ̄ ŋmá ɛgiyí um. Ɛbɛ́ obɔ̄bí le ɔ́ híla nyɛŋɛnyɛŋɛ lé, ohígbū ka oŋmífī nōó ŋmá ɔlɛ́ ɔ́ɔmā, ń má ɔ̄ ɛ́ɛ́ gɛ ŋ́.

²⁹Ɔ́dāŋ ka a kwú ɛ̄nyā ú ŋmá ɛgiyí um nɛ̄ ɔdōbɔ̄bí dóódu ɔhá le yá ɔ̄, ɔtūnōbí nɛ̄ a í bī gé um ā í je um ŋmó, abɔ̄ n le hīla ɛɛ́ mā.”

³⁰Abālɔbányā, ɔkpani, ɔ́dāŋ ka n kwúce ga ɛgiyí ádā um nɛ̄ n bī ɔyí ā nyɔ̄ ŋ́, ɔkwɔɔkwu nōó le jé ka ɔyí ā í yɔ̄ mɛ́mla um ŋ́, ó géē kwú.

³¹Ó le lɛ ā, alɔ nēe wɛ ɔ̄cocɛ̄hɔ̄ kú uwɔ ā gáā yá kú ádā alɔ kóō kwú ipú ɔtūnōbí mɛ́ɛ̄ á, ohígbū ka oyēeyī kú ádā ā gbolóce oyēeyī kú ɔyí ā.

³²Ami, ɔ̄cocɛ̄hɔ̄ kú uwɔ ā kwú iyī um ú kwɛyí ɔyínɔ̄nyīlɔ nɛ̄ŋcɛ́ ā. Ɔ́dāŋ ka ń bī ɔyínɔ̄nyīlɔ nɛ̄ŋcɛ́ ā wā ɔlɛ́ ŋ́, n géē bī ɛpɔ̄bí nēé í ŋmó um ā ɛyí ɛjɛ̄ɛ̄jī oyēeyī kú um.

³³Abālɔbányā, ɔkpani, n géē klá amānyā kú n̄ cɔ̄ɔ̄fiyɛ kwɛyí ɔyínɔ̄nyīlɔ ā. Cɛ́ɛ́ kóō nyɔ̄ mɛ́mla ayínɛ́ nū.

³⁴Ɔwɛ nyá nɛ̄ n géē kwúce ga ɛgiyí ádā um ɔ́dāŋ ka ɔyínɔ̄nyīlɔ ā í wā mɛ́mla um ŋ́ mā? Ń kōō leyīkwu ádā um eyī glá ŋ́, ohígbū ɔkpɔkplɔ nōo í wā í klá ádā um ā.”