Read idoma OHÚTU 46 Bible Online

OHÚTU 46 - idoma bible

OHÚTU 46

¹Ujékɔ̄pu le odúúdú ɔdā nōó lɛ kpɛ́mm ā gwó. Anɔ́ɔ ó le tá Ubiyɛssɛ́ba, gaá lɛ ɛya gwó lɛ Ɔwɔicō kú ádā nū, Áyísīki á.

²Ɔwɔicō le ɛlā ka lɛ ɔ́ otú ipú ɔ̄na kahíníī, “Ujékɔ̄pu, Ujékɔ̄pu!” Anɔ́ɔ ó tóohi kahíníī, “Ēēē, ami yɔ̄ á!”

³Anɔ́ɔ ó kahíníī, “Ami wɛ Ɔwɔicō, Ɔwɔicō kú ádā uwɔ̄ á. Ā híī yúúfi ō ga Íjīpiti ŋ́. Ohígbū ka n géē yá ká ipɔ́ɔma kú uwɔ kéē kwú pīya éwo nɛ̄hi abɔ́ɔ.

⁴N géē ga Íjīpiti mɛ́mla uwɔ, n kē í bī ipɔ́ɔma kú uwɔ cīgbīhi wā ipú ajɛ nyā. Ujósɛ̄fu géē yɔ̄ mɛ́mla uwɔ eko nɛ̄ ā í kwú ā.”

⁵Ujékɔ̄pu gbɔɔ́ ŋmá Ubiyɛssɛ́ba. Ayí nū le anú, ayípɛ̄ ɔlɛ́ uwā mɛ́mla anyā uwā kpó tū ipú ugbɔ́ɔnya nɛ̄ Uféro tɛ̄hɔ̄ ŋmá Íjīpiti wā ā.

⁶É lɛ aɛ́na mɛ́mla aálá mɛ́mla ɔdā dóódu nēé lɛ ajɛ kú Ukénan ā kpó, anɔ́ɔ é le pɛ́ tá Íjīpiti á. Ujékɔ̄pu le odúúdú ayááyí nū nēe bá mɛ́mla anú ā kpó ga Íjīpiti

⁷Ayí nū nɔ̄nyīlɔ, mɛ́mla ayí kú ayí nū nɔ̄nyīlɔ, ayí nū nɔ̄nyā mla ayínɔ̄nyā kú ayí nū, nōo wɛ odúúdú aíkonó kú ɔlɛ́ nū nōó kpó wā Íjīpiti á.

⁸Aɛ́nyā wɛ ācɛ ɔlɛ́ Ujékɔ̄pu nēe wā Íjīpiti mɛ́mla anú ā. Urúbɛn, ɔ́kplá kú nū.

⁹Ayí kú Urúbɛn wɛ: Uhánɔ̄ku, Upállu, Uhɛ́srɔn mɛ́mla Ukámi.

¹⁰Ayí kú Usímiyɔn ā wɛ: Ujemúwɛ̄lu, Ujamín, Ohádi, Ujakín, Usóha, mɛ́mla Ussáwulu, ɔyí ɔnyā kú Ukénan éyi.

¹¹Ayí kú Ulífāyi ā wɛ: Ugɛ́ssɔn, Ukɔháti mɛ́mla Umerári.

¹²Ayínɔ̄nyīlɔ kú Ujúda wɛ: Ɛ́ri, Ónan, Ussɛ́la, Upéresi mɛ́mla Uséra (amáŋ, Ɛ́ri mɛ́mla Ónan gekwú ajɛ kú Ukénan). Ayí kú Upéresi wɛ: Uhɛ́srɔn mɛ́mla Uhámulu.

¹³Ayínɔ̄nyīlɔ kú Ísāka ā wɛ: Utóla, Upúfa, Íyōbu, mɛ́mla Ussímrɔn.

¹⁴Ayínɔ̄nyīlɔ kú Usɛ́būlɔn ā wɛ: Usɛ́rēdi, Ɛ́lɔ̄n mɛ́mla Ujalīīlu.

¹⁵Aɔ́ɔmā wɛ ayí nɛ̄ Ulīya ma lɛ Ujékɔ̄pu ajɛ kú Umɛsopotámīya mɛ́mla ɔyí nū nɔ̄nyā, Udáyína ā. Ayí ā tɔ̄há mɛ́mla ɔyínɛ́ uwā nɔ̄nyā ā wɛ ofu cigwɛ́ɛtá.

¹⁶Ayínɔ̄nyīlɔ kú Ugádi wɛ: Usífiyɔn, Uhági, Ussúni, Ésbɔn, Ɛ́ri, Árɔ̄di mɛ́mla Arɛ́li.

¹⁷Ayínɔ̄nyīlɔ kú Ássa wɛ: Ímna, Íssfa, Íssfi, Ubɛríya mɛ́mla Uséra, ɔyínɛ́ uwā nɔ̄nyā. Ayí kú Ubɛríya wɛ Uhɛ́ba mɛ́mla Umálkīyɛlu.

¹⁸(Aɔ́ɔmā wɛ ayí kú Usílpa nɛ̄ Ulában je lɛ Ulɛ́ya, adá kú nū ā, nōó ma lɛ Ujékɔ̄pu ā. É wɛ ācɛ igwɛ́ɛhīlī.)

¹⁹Ayí kú Urécɛ̄lu, ɔnyā kú Ujékɔ̄pu ā wɛ: Ujósɛ̄fu mɛ́mla Ubɛ́njamīn.

²⁰Ayí nɛ̄ Ásɛ̄nati, ɔyínɔ̄nyā kú Upɔtifɛ́ra, ɔ̄cogwɛ́ɛya kú Uhiliyɔpɔ́lisi ā, ma lɛ Ujósɛ̄fu, ajɛ kú Íjīpiti ā wɛ: Umanásɛ mɛ́mla Ɛ́frem.

²¹Ayínɔ̄nyīlɔ kú Ubɛ́njamīn ā wɛ: Ubéla, Ubɛ́ka, Ássbɛlu, Ugéra, Unaáman, Éhi, Uróssi, Umɔ́pim, Uhupím mɛ́mla Áādi.

²²Aɔ́ɔmā ā wɛ ayí nɛ̄ Urécɛ̄lu ma lɛ Ujékɔ̄pu á. É wɛ ācɛ igwɛ́ɛnɛ.

²³Ɔyínɔ̄nyīlɔ kú Udáni wɛ Uhɔ́ssim.

²⁴Ayínɔ̄nyīlɔ kú Unáfutāli wɛ Ujásīilu, Ugúni, Ujésa, mɛ́mla Ussilém.

²⁵Aɔ́ɔmā wɛ ayí kú Ubílha nɛ̄ Ulában je lɛ Urécɛ̄lu, ɔyí nū nɔ̄nyā ā á. É wɛ ācɛ ahāapa.

²⁶Odúúdú ayí mɛ́mla ayááyí kú ɔlɛ̄ Ujékɔ̄pu nēe wā ajɛ Íjīpiti mɛ́mla anú ā wɛ ofɛtá ce ɛhīlī. Anyā kú ayí nū í wɛ uwá ŋ́.

²⁷Ayí ɛpa nēé ma lɛ Ujósɛ̄fu Íjīpiti ā le pīyatɔ̄há mɛ́mla ayí kú Ujékɔ̄pu nēe wā Íjīpiti ā, é wɛ ofɛtá cigwó.

²⁸Ujékɔ̄pu le Ujúda tɛ̄hɔ̄ nyɔ̄ ɔbū ga ɛgiyí Ujósɛ̄fu kóō da Ujósɛ̄fu ká ɔ́ɔ wā í jīla anúɔ ɔwɛ Ugóssɛn. Eko nēé gāajɛ kú Ugóssɛn ā,

²⁹Ujósɛ̄fu le tá ipú úgbɔ́ɔ́nya kú nū kóō gaá jīla ádā nū ɔwɛ Ugóssɛn. Eko nēé le jīla ā, Ujósɛ̄fu le ádā nū kwú bɔ́tū le abɔ̄ kpó ce ɔ́ ɔkɔ, jikwu gbojī ajɛ nɛ̄hi.

³⁰Ujékɔ̄pu da ɔ́ kahíníī, “N lɛ tútū ō kwú ɛɛ́, ícɛ nyā nɛ̄ n le uwɔ má kē jé ka a yēeyī āa.”

³¹Anɔ́ɔ Ujósɛ̄fu da ayínɛ́ nū mɛ́mla ádā nū kahíníī, “N géē ga ɛgiyí Uféro, ká n̄ gaá da ɔ́ kahíníī, ‘Ayínɛ́ um mɛ́mla ádā um mɛ́mla aíkonó kú ɔlɛ́ ádā um nēe bá ajɛ kú Ukénan ā gā ɛgiyí um ɛ́ɛ́’.

³²N géē da ɔ́ ka aá wɛ ācogbāálá nēe gé leyīkwu aɔ́dāajɛ ka aá kē le aɔ́dāajɛ ká aá mɛ́mla ɛjɛ̄ɛ̄jī ɔdā dóódu nēe wɛ ákú aá.

³³Eko nɛ̄ Uféro lɛ aá hīgwú, nōó lɛ ɔ̄kā da aá ka, ‘Ɔdí wɛ úklɔ́ kú aá āa?’

³⁴Aá da ɔ́ kahíníī, ‘Alɔ nōo wɛ ācocɛ̄hɔ̄ kú uwɔ, húmáyī wɛ ācogbāálá ŋmá eko ayípɛ̄ kú alɔ jāā kwu ícɛ nyā, ɛ́gɛ́nɛ̄ aádáádā alɔ wɛ ā’. Ɔwɛ nyā géē yá ɛ́ɛ́ nōó gáā cɛ̄ lɛ aá bá ajɛ kú Ugóssɛn á.” Ujósɛ̄fu kɛlā nyā ohígbū ka ācogbāálá dóódu wɛ ɔdēelihɔ lɛ ācɛ kú Íjīpiti.”