Read idoma OHÚTU 47 Bible Online

OHÚTU 47 - idoma bible

OHÚTU 47

¹Ujósɛ̄fu le ayínɛ́ nū ɛhɔ̄ kpó, anɔ́ɔ ó le tá ɛgiyí Uféro á. Ó da ɔ́ kahíníī, “Ádā um mɛ́mla ayínɛ́ um mɛ́mla aálá mɛ́mla aɛ́na kú uwā mɛ́mla ɔdā dóódu nēé lɛ ā gā ɛgiyí um ŋmá Ukénan ɛɛ́. É bá Ugóssɛn abālɔbányā.”

²Anɔ́ɔ ó lɛ ayínɛ́ nū ɛhɔ̄ nēe nyɔ̄ mɛ́mla anú ā mafú lɛ Uféro á.

³Uféro da uwá ɔ̄kā kahíníī, “Ɔdí wɛ úklɔ́ kú aá āa?” É da Uféro kahíníī, “Alɔ nēe wɛ ācocɛ̄hɔ̄ kú uwɔ ā, wɛ ācogbāálá, ɔkpani, ɛ́gɛ́nɛ̄ aádáádā alɔ wɛ ā.

⁴Alɔ wā gaá lā ajɛ nyā, ohígbū ka ɔkpɛtā ā nwuné nɛ̄hi ajɛ kú Ukénan, ácí í yɔ̄ nɛ̄ aɔ́dāajɛ kú alɔ ī lé ŋ́. kóocōō, lɛ ɛga je lɛ alɔ kú alɔ̄ lā ajɛ kú Ugóssɛn.”

⁵Anɔ́ɔ Uféro da Ujósɛ̄fu kahíníī, “Ádā uwɔ mɛ́mla ayínɛ́ uwɔ gā ɛgiyí uwɔ ɛɛ́.

⁶Ajɛ kú Íjīpiti tá kpátáá abɔ́ɔ á. Lɛ ádā uwɔ mɛ́mla ayínɛ́ uwɔ kpó gaá lā ɛga olɔhi fíyɛ́ dúu kú ajɛ ā, nōo wɛ ajɛ kú Ugóssɛn ā. Ɔ́dāŋ ka ɔ̄cɛ dúúmā yɔ̄ ipú uwā nōo jé ō leyīkwu aɔ́dāajɛ lɔɔlɔhi, kwú ɔ̄ ú yá ɔ̄cɛ nōo géē leyīkwu aɔ́dāajɛ kú um.”

⁷Ujósɛ̄fu le ádā nū, Ujékɔ̄pu bī wā iyɔ̄bū Uféro, anɔ́ɔ Ujékɔ̄pu le ɔhā hɛ́ ce Uféro á.

⁸Uféro da Ujékɔ̄pu ɔ̄kā kahíníī, “A wɛ iháyí ɛmulá?”

⁹Anɔ́ɔ Ujékɔ̄pu da Uféro kahíníī, “N wɛ iháyí ofɛɛhīlī cigwō. Aíháyí ā í lɛwā ŋ́, klla le mu mla ɔdōbɔ̄bí. Ó gaajɛ iháyí nɛ̄ aádáádā um yēeyī ā ɛ́ɛ́ ŋ́.”

¹⁰Ujékɔ̄pu le ɔhā hɛ́ ce Uféro, anɔ́ɔ ó nyɛ̄ɛ̄ bɛ̄cɛ ŋmá iyɔ̄bū nū á.

¹¹Anɔ́ɔ Ujósɛ̄fu le ádā nū mɛ́mla ayínɛ́ nū kpó gaá lā ɛga nōo lɔhi fíyɛ́ dúú ipú ajɛ kú Íjīpiti ā. Abɔ́ɔ kwu igelī nēé hī ka Urámēsses ā ajaajɛ ɛ́gɛ́nɛ̄ Uféro je ɔ́da lɛ ā ā.

¹²Ujósɛ̄fu je ɔdōlé lɛ ádā nū mɛ́mla ayínɛ́ nū, mɛ́mla odúúdú aíkonó kú uwā ɛ́gɛ́nɛ̄ áluka kú uwā lɛ ā.

¹³Ɔkpɛtā le nwuné klla le bɔ̄bí nɛ̄hi, ɔdōlé í yɔ̄ ɛga dóódu, ajɛ kú Íjīpiti mɛ́mla Ukénan ŋ́. Ɛmiyɛ cɛ̄ le abɔ̄ lɛ hɛ́ ācɛ kú ajɛ kú Íjīpiti mɛ́mla ajɛ kú Ukénan ā iyē.

¹⁴Ujósɛ̄fu le odúúdú ije nɛ̄ ācɛ bī wā ī le lá īkpɔ̄dɛ̄hɔ̄ ā túbá. Anɔ́ɔ ó kwú odúúdú nū ú kpó ga agbla kú Uféro á.

¹⁵Eko nɛ̄ ācɛ kú Íjīpiti mɛ́mla ācɛ kú Ukénan kwú odúúdú ije kú uwā ú lá ɔdōlé ŋmá ajɛ ā, ācɛ kú Íjīpiti gā ɛgiyí Ujósɛ̄fu. Anɔ́ɔ é da ɔ́ kahíníī, “Ije kú alɔ mɛ ɛɛ́. Je ɔdōlé lɛ alɔ! Ā cɛ̄ lɛ alɔ kwú ɛmiyɛ ŋ́.

¹⁶Anɔ́ɔ Ujósɛ̄fu da uwā kahíníī, “Aá lɛ aɔ́dāajɛ kú aá kpó wā, cɛ́ɛ́ ká n̄ géē je ɔdōlé kwɛyí nū lɛ aá.”

¹⁷Anɔ́ɔ é le aɔ́dāajɛ kú uwā kpó gé lɛ Ujósɛ̄fu á. Ó kē le ɔdōlé kpó lɛ uwá iháyí ɔ́ɔmā kwɛyí aɔ́nya, aálá, aɛ́wu, aɛ́na mɛ́mla aíjakī kú uwā.

¹⁸Iháyí nōo gboce ɔ́ɔmā ā, é le pɛ́ wā ɛgiyí Ujósɛ̄fu kpɔ́. Anɔ́ɔ é da ɔ́ kahíníī, “Alɔ í gáā je ɛ̄nyā tayínū ŋmá ɛgiyí uwɔ gɛ ŋ́, ɔkpani ālɔ. Odúúdú ije kú alɔ mɛ ɛ́ɛ́, odúúdú aɔ́dāajɛ kú alɔ kē wɛ ákú uwɔ. Ɔdā dúúmā í yɔ̄ nɛ̄ alɔ géē je gā uwɔ ɛ́ɛ́ gɛ ŋ́ ayíka ɔkpíyē mɛ́mla ajɛ kú alɔ mɛ́ɛ́nɛ.

¹⁹Ā cɛ̄ lɛ alɔ le pɛ́ gekwú ajɛ kú ɔlɛ́ alɔ ŋ́, lɛ alɔ mɛ́mla ajɛ kú alɔ lá kóō wɛ omafula kú ɔdōlé lɛ alɔ. Alɔ géē je pīya aɔ́fiyɛ kú Uféro, ó kē í je pīya óndú ajɛ kú alɔ. Lɛ īkpɔ̄dɛ̄hɔ̄ je lɛ alɔ ká ālɔ̄ lé o yá ká ālɔ̄ yēeyī. Cɛ́ɛ́ ká ālɔ̄ nyi īkpɔ̄dɛ̄hɔ̄ ká alɔ tū ɛhɔ̄ kú alɔ, kú ajɛ kú alɔ kóō táncā ŋ́.”

²⁰Ujósɛ̄fu le odúúdú ajɛ kú Íjīpiti ā lá lɛ Uféro. Ɔkpɛtā cɛ̄ le ɛjɛ̄ɛ̄jī ācɛ kú Íjīpiti kéē kwú ajɛ kú uwā ú lá, ohígbū ka ɔkpɛtā ā nwuné klla bɔ̄bí nɛ̄hi. Anɔ́ɔ ajɛ ā kwú pīya agbénū kú Uféro, ɔ̄cɛ́ ā á.

²¹Ujósɛ̄fu kwú odúúdú ācɛ ā ú pīya aɔ́fiyɛ ipú ɛjɛ̄ɛ̄jī ajɛ kú Íjīpiti.

²²Ajɛ kú ācogwɛ́ɛya ōfōōfūnū nōó lá ŋ́ má. Ohígbū ka ācogwɛ́ɛya ā le ulé kú ɔdōlé nɛ̄ Uféro gē gbā lɛ uwá. Ɔ́ɔmā yá nēé je ajɛ kú uwā lá ŋ́ má.

²³Ujósɛ̄fu da ācɛ ā kahíníī, “N lɛ aá mɛ́mla ajɛ kú aá lá lɛ Uféro ɛɛ́. Īkpɔ̄dɛ̄hɔ̄ yɔ̄ á, aá mīyɛ kú aá nyɔ̄ í nyi ajɛ ā.

²⁴Eko nɛ̄ aá í cē ɔdɛ̄hɔ̄ ā, aá géē je éyi ŋmá ipú ɛhɔ̄ kú nū lɛ Uféro. Aá lɔfú bī ɛga nōo hile ā kóō wɛ ɛdɔ nɛ̄ aá í nyi igbɔhá. Ó klla í wɛ ɔdōlé kú aá mɛ́mla aíkonó kú aá.”

²⁵Anɔ́ɔ ācɛ ā tóohi kahíníī, “A le oyēeyī kú alɔ nyatá ɛɛ́. Ɔ́dāŋ koó he ɔkpani ɔtū, alɔ géē wɛ aɔ́fiyɛ kú Uféro.”

²⁶Anɔ́ɔ Ujósɛ̄fu le íne tá ohígbū ajɛ kú Íjīpiti ā kahíníī, “Oŋmá ícɛ nyā Uféro lɛ éyi ŋmá ipú ɛhɔ̄ kú ɔdɛ̄hɔ̄ dóódu nɛ̄ aá géē cē ā á.” É ī lɛ íne nyā tū jāā kwu eko nēé tɔ́kpá nyā ā. Ajɛ ɛhɔ̄ kú ācogwɛ́ɛya ā ōfōōfūnū í yɔ̄ ɛháajɛ kú Uféro gɛ ŋ́ má.”

²⁷Ayí kú Ísrɛ̄lu lā Ugóssɛn, ajɛ kú Íjīpiti ā. É kē le gbagbénú nɛ̄hi klla ma ayí alɛwa abɔ́ɔ.

²⁸Ujékɔ̄pu lā ajɛ kú Íjīpiti iháyí īgwáahāapa. Anɔ́ɔ o pīyatɔ̄há kú iháyí kú nū kē wɛ iháyí ofahāapa cahāapa á.

²⁹Eko nɛ̄ eko kú ikwū kú nū le bá āa, ó le ɛhɔ̄ tū fu Ujósɛ̄fu, ɔyínɔ̄nyīlɔ kú nū. Anɔ́ɔ ó da ɔ́ kahíníī, “Kwú abɔ̄ í wu um agada[68] ká ā lɛ okónu ce gā um ka á gáā je um nyi ajɛ kú Íjīpiti ŋ́.

³⁰N tíne ká ā kwú um ŋmá Íjīpiti cɛ́ɛ́ ká ā kwú um í nyi ɛga o nyi okwu kú aádáádā um. Ká n̄ gwutá mɛ́mla uwá abɔ́ɔ.” Ujósɛ̄fu tá ɔ̄ ohi kahíníī, “N géē yá ɛ́gɛ́nɛ̄ ā ka lɛ ā.”

³¹Anɔ́ɔ Ujékɔ̄pu da ɔɔ́ kahíníī, “Lɛ ɛka gbo gā um,” Anɔ́ɔ ó le ɛka gbo lɛ ɔ́ á. Anɔ́ɔ Ujékɔ̄pu tɛyí kpɛɛ́ le ahínyá tá Ɔwɔicō á.