Read idoma OHÚTU 50 Bible Online

OHÚTU 50 - idoma bible

OHÚTU 50

¹Ujósɛ̄fu má gbo klá ádā nū, yɔ̄ gē jikwū klá yɔ̄ ī le ɛyí nya ɔ́ ɛyí.

²Anɔ́ɔ Ujósɛ̄fu le ɔ́da je lɛ aóbócí ā kéē lɛ ɛcí nya okwū kú ádā nū iyē kóō bīya ŋ́ má.

³Ó je aóbócí ā ɛ̄cī ofɛpa kéē lɛ ɛcí nya okwū ā iyē cɛ́ɛ́ kóō híī bīya ŋ́. Ɛ̄nyā wɛ eko nōó gē je kéē lɛ ɛcí nya okwū iyē á. Ācɛ kú Íjīpiti yɔ̄ ekwu kú nū ɛ̄cī ofɛtá cigwó.

⁴Eko nɛ̄ ɛ̄cī ō bá inīkwu kú nū le gla ā, Ujósɛ̄fu da ācɛ ɔlɛ́ Uféro kahíníī, “Ɔ́dāŋ ka aá tá um abɔ̄ glá, aá lɛ ɛhɔ̄ nyā cɛ̄ lɛ Uféro gā um.

⁵Eko nɛ̄ ádā um le bá ō kwú ā, ó cɛ̄ gā um le ɔkpá gbo lɛ ɔ́ ka n géē nyi ɔ́ ipú únóji nōó tútū ajɛ kú Ukénan ā. Ohígbū ɔ́ɔmā lɛ ɛga je gā um ká n̄ nyɔ̄ gaá lɛ ádā um nyi, cɛ́ɛ́ n kwúce igbīhi wā.”

⁶Ɔcɛ́ ā tá ɔ̄ ohi kahíníī, “Nyɔ̄ ká ā gaá lɛ ádā uwɔ nyi ɛ́gɛ́nɛ̄ ā gbo ɔkpá lɛ ɔ́ lɛ ā.”

⁷Abɔ̄ Ujósɛ̄fu gbɔɔ́ ō nyɔ̄ gaá nyi ádā nū ā, odúúdú aígabɔ̄ kú Uféro, mɛ́mla anyākwɔ́cɛ kú ɔlɛ́ nū, mɛ́mla anyākwɔ́cɛ kú ajɛ kú Íjīpiti ā nyɔ̄ mɛ́mla anú.

⁸Ācɛ ɔlɛ́ Ujósɛ̄fu, mɛ́mla ayínɛ́ nū, mɛ́mla odúúdú ācɛ ɔlɛ́ ádā nū mɛ́mla ayí uwā le pɛ́ i yɛ mɛ́mla anú. Ayípɛ̄ ɔlɛ́ uwā, aɛ́na mɛ́mla aálá, aɛ́wū mɛ́mla aɔ́dāajɛ ohile ā ōfōōfū uwā bá ajɛ kú Ugóssɛn, nēé nyɔ̄ mɛ́mla uwá ŋ́ má.

⁹Ācɛ nēe ō ī pɛ́ úgbɔ́nyā mɛ́mla ācɛ nēe ce ɔnyā nyɔ̄ mɛ́mla uwá dúú. Ígwu kú ācɛ nēe nyɔ̄ ā nwuné nɛ̄hi.

¹⁰Eko nēé gāajɛ ɛga o wú īkpɔ̄dɛ̄hɔ̄ kú Átādi, nōo yɔ̄ ɛnɔ̄ɔ̄cī kú Ujɔ́dan ā, é bá gē yɔ́tūnōbí gē tɛ̄gíkwū klla jikwū nɛ̄hi. Ujósɛ̄fu klla yɔ̄ ekwū kú ádā nū abɔ́ɔ ɛ̄cī ahāapa.

¹¹Eko nɛ̄ ācɛ kú ajɛ abɔ́ɔ, nēe wɛ ācɛ Ukénan ā, le ācɛ nēe bá ī yúculo kú ɛyíkwū ipú ɛga o wú ikpɔ̄dɛ̄hɔ̄ kú Átādi má ā, é da iyī uwā kahíníī, “Ɔtūnōbí nɛ̄hi nɛ̄ ācɛ kú Íjīpiti bá gē yá yɔ̄ á.” Ɔ́ɔmā yá ɛ́ɛ́ nēé le iyē ce abɔ́ɔ ka Ébɛl Umisrém[71]

¹²Ayí kú Ujékɔ̄pu le yá lɛ ádā uwā ɛ́gɛ́nɛ̄ ó je ɔ́da lɛ uwá ā.

¹³É le ɔ́ bī ga ajɛ kú Ukénan, le ɔ́ nyi únóji kú Umakpéla, ɛnɔ̄ɔ̄cī kú Umámre, ajɛ nɛ́ Ébrahām lá ŋmá abɔ̄ kú Éfrɔn, ɔ̄cɛ Uhɛ́ti ā, koó wɛ ajɛ nēé ī nyi okwū ā.

¹⁴Eko nɛ̄ Ujósɛ̄fu le ádā nū nyi kwɛyí ā, ó pīyɛyí wā Íjīpiti mɛ́mla ayínɛ́ nū mɛ́mla odúúdú ācɛ nēe nyɔ̄ ɛyíkwū kú ádā nū mɛ́mla anú ā.

¹⁵Eko nɛ̄ ádā uwā gekwú ā, ayínɛ́ kú Ujósɛ̄fu ka, “Ujósɛ̄fu lɔfú yɔ̄ ī wɔ́tū alɔ kpɔ́, kē tíne ō lɛ óluma cíla alɔ ohígbū ɔdā nɛ̄ alɔ yá ɔ̄ ā.

¹⁶Anɔ́ɔ é le ɛhɔ̄ tū fu Ujósɛ̄fu kahíníī, “Ádā uwɔ le ɛlā nyā ka gbɔbū ɛ́ɛ́ nōó kwú á.

¹⁷Ó kahíníī, ‘N gbɔ̄ɔkɔ gā uwɔ, kwú ɛjɛ̄ɛ̄jī ɔdōbɔ̄bí nɛ̄ ayínɛ́ uwɔ yá uwɔ ā í yá uwā ɛhi.’ Abālɔbányā kóocōō kwú ɔdōbɔ̄bí nɛ̄ alɔ, nēe wɛ ācocɛ̄hɔ̄ kú Ɔwɔicō kú ádā uwɔ ā, í yá alɔ ɛhi.” Ujósɛ̄fu le ikwū je eko nōó mīyɛ olɛhɔ̄ nyā ā.

¹⁸Ayínɛ́ nū wā í gbo klá ajɛ iyɔ̄bū nū, anɔ́ɔ é kahíníī, “Alɔ nēe wɛ aɔ́fiyɛ kú uwɔ ā bá iyɔ̄bū uwɔ amānyā yɔ̄ á.”

¹⁹Amáŋ, Ujósɛ̄fu da uwá kahíníī, “Áá híī yúúfi ŋ́, n gáā je iyī um kwɛyí Ɔwɔicō glá ŋ́.”

²⁰Aá le ujɔ̄ ōbɔ̄bí tū lɛyíkwu um, amáŋ Ɔwɔicō kwú ɔ̄ ú pīya olɔhi gā um. Ó yá lɛ ā, o yá ká n̄ lɛ oyēeyī kú ācɛ alɛwa nēe yēeyī ícɛ nyā tū.

²¹Aá híī yúúfi ŋ́, n géē je ɔdōlé lɛ aá mɛ́mla ayí aá. Anɔ́ɔ ó bī ɛlā ō gbɔtūnɛɛ ɛ́gɛ́nyā le uwá ɔtū tú kwɔtū á.

²²Ujósɛ̄fu lā ajɛ kú Íjīpiti mɛ́mla ācɛ ɔlɛ́ ádā nū. Ujósɛ̄fu wɛ iháyí ofɛhɔ̄ cigwó.

²³Ujósɛ̄fu yēeyī le ayááyí kú Ɛ́frem, ɔyí nū má. É klla ma ayí kú Umákīyɛ, ɔyínɔ̄nyīlɔ kú Umanásɛ tū ɔ̄ abɔ̄.

²⁴Ujósɛ̄fu da ayínɛ́ nū kahíníī, “N gaá kwú ɛɛ́, amáŋ Ɔwɔicō géē leyīkwu aá. Ó kē í kpó aá bɛ̄cɛ ŋmá ajɛ nyā, ga ajɛ nōó cokónu ō je lɛ Ébrahām mɛ́mla Áyísīki mɛ́mla Ujékɔ̄pu piíí ā.”

²⁵Anɔ́ɔ Ujósɛ̄fu da ācɛ ɔlɛ́ nū kéē lɛ ɔkpá gbo. “Aá lɛ okónu ce gā um ka eko nɛ̄ Ɔwɔicō lɛ aá bī ga ajɛ ɔ́ɔmā, aá géē je okwū kú um nyɔ̄ mla aá.”

²⁶Anɔ́ɔ Ujósɛ̄fu gekwú, eko nōó wɛ iháyí ofɛhɔ̄ cigwó ā á. Anɔ́ɔ é le ɛcí nya okwū kú nū ā, le ɔ́ tū lɔɔlɔhi cɛ́ɛ́ kóō híī wa ŋ́. Anɔ́ɔ é kwú ɔ̄ ú tá ipú ikpati á.