Read idoma OHÚTU 7 Bible Online

OHÚTU 7 - idoma bible

OHÚTU 7

¹Anɔ́ɔ Óndú ā da Unówa kahíníī, “Nyɔ̄ ipú ɔwū ā, awɔ mɛ́mla aíkonó kú ɔlɛ́ uwɔ. Ohígbū ka n le má ka awɔ ōfōōfū uwɔ wɛ ɔ̄cɛ nōo gē yá ɔdā nōo lɛ kpaakpa ipú odúúdú ɛcɛ ipéyī um eko nyā á.

²Lɛ ígwu kú aɛ́bɛ́ nēe le yēŋēē ā ɛpɛɛpa ɔbá mɛ́mla ɔnyā ɛga ahāapa kpó. Amáŋ a géē kpó ɔbá mɛ́mla ɔnyā ígwu ékpónú kú aɛ́bɛ́ nēé le yēŋēē ŋ́ mā ā.

³A kē ī kpó ígwu ɛpɛɛpa ɛga ahāapa kú aígbáanɔ, ɔbá mɛ́mla ɔnyā cɛ́ɛ́ kú ɛdɔ kú uwā kóō yēeyī ipú ɛcɛ ā kpɔ́.

⁴Ohígbū ka ɔmahāapa ŋmá ícɛ, n géē tū ɔwɔ ɛhɔ̄ gaá yā klá ɛcɛ. Ó ī yā ɛ̄cī ofɛpa, kwu otú mɛ́mla ɛnɔ. Ɔdā oyēeyī dóódu nɛ̄ n yá ā, kē géē je kpó yíífi ŋmá ipú ɛcɛ.”

⁵Unówa lɛ ɔdā dóódu nɛ̄ Ɔwɔicō da ɔ́ ā kpó yá.

⁶Unówa wɛ iháyí úlā ce ofigwó (600) eko nɛ̄ éŋkpɔ̄ nɛ̄hi ā cēenyi klá ɛcɛ ā.

⁷Unówa mɛ́mla ayí nū, mɛ́mla ɔnyā nū, mɛ́mla anyā ayí nū le pɛ́ ga ipú ɔwú ā, cɛ́ɛ́ kéē lɛ pɛ́ kwu ŋmá ipú ífi kú éŋkpɔ̄ o cēenyi nɛ̄hi ā.

⁸Anú mɛ́mla ɔbá mɛ́mla ɔnyā kú ɛdɔ ɛyɛ́ɛyɛ́yí kú aɛ́bɛ́ mɛ́mla aígbáanɔ nēe le yēŋēē mɛ́mla aɛ́nɛ̄ é le yēŋēē ŋ́ le pɛ́ ga ipú úgbéenyi á.

⁹Aɛ́bɛ́ ā ɛpɛɛpa, ɔbá mɛ́mla ɔnyā, le pɛ́ tá ipú úgbéenyi ā mɛ́mla Unówa, ɛ́gɛ́nɛ̄ Ɔwɔicō je ɔ́da lɛ ɔ́ ā.

¹⁰Anɔ́ɔ ɛ̄cī ɔ́mahāapa igbīhi ɛ̄nyā ā, éŋkpɔ̄ nɛ̄hi ā le cēnyi klá ɛcɛ á.

¹¹Eko nɛ̄ Unówa wɛ iháyí úlā ce ofigwó ā. Ipú ɛ̄cī igwáahāapa kú ɔyā ɛpa kú iháyí ɔ́ɔmā, enyi gbɔɔ́ ō ca klɛ́ɛcɛ ŋmá ɛbɛɛbɛ. Ɔkpáncō kē le nwūla ka ɔwɔ kóō yā

¹²Anɔ́ɔ ɔwɔ pɛ́ wāajɛ ŋmá ɔkpáncō tū ipú ɛcɛ bɛ̄ɛka ɔdā nēé nwūla ɔwɛ lɛ ɔ́ ā jāā gbō ɛ̄cī ofɛpa, kwu otú kwu ɛnɔ.

¹³Ɛ̄cī ɔ́ɔmā piíí ā, Unówa mla ɔnyā nū le pɛ́ tá ipú úgbéenyi ā, mla ayípɛ̄ ɔlɛ́ nū ɛtá ā, Ussɛ́m, Uhám, Ujáfɛ̄ti, mla anyā ūwā.

¹⁴Ɛdɔ kú aɛ́bɛ́ ɛyɛ́ɛyɛ́yí dóódu, ɛbɛ́ nēe yēeyī ā, ɛbɛ́ ɔlɛ́ mla ɛbɛ́ ipú ácí, ɛnɛ̄hi mla ɛnɛŋcɛ́, mɛ́mla ɛdɔ kú aígbáanɔ dóódu le pɛ́ ga ipú úgbéenyi mla Unówa.

¹⁵Ɔbá mla ɔnyā kú ɛdɔ kú ɛbɛ́ éyééye le pɛ́ tá ipú úgbéenyi ā mla Unówa.

¹⁶É kē pɛ́ ga ipú úgbéenyi ā ɔbá mla ɔnyā ɛ́gɛ́nɛ̄ Ɔwɔicō da Unówa ā. Anɔ́ɔ Ɔwɔicō lɛ ɔwɛ kú ɔwú ā gwū á.

¹⁷Éŋkpɔ̄ ā cēenyi ɛ̄cī ofɛpa, anɔ́ɔ éŋkpɔ̄ ā le nwuné nɛ̄hi, cɛ̄ lɛ úgbéenyi ā kóō má ceyī nū á.

¹⁸Éŋkpɔ̄ ā le ipú tū ɔ̄ fíyɛ́, anɔ́ɔ ɔwú ā ce eyī nū dēē á.

¹⁹Anɔ́ɔ éŋkpɔ̄ ā cēenyi jāā gbéeko nōó kwú aɛ́fu nɛ̄hi fíyɛ́ dúú, nēe bá ipú ɛcɛ ā í kpó mule á.

²⁰Ó lɛ ipú, kwú aɛ́fu ā í mulɛ bɛ̄ɛka ikpó ofucɛhɔ̄ ā.

²¹Alɛɛcɛ dúúdú mɛ́mla aɛ́bɛ́, mɛ́mla aígbáanɔ mɛ́mla odúúdú aɔ́dā ō yēeyī nōo kē yɔ̄ ɛcɛ ā le pɛ́ gekwú.

²²Ɔdā dóódu nōo yɔ̄ ajɛ, nōo gē fu owu kú oyēeyī ā le pɛ́ gekwú.

²³Óndú ā le ɔ̄dā dóodu nēe yēeyī ā kpó yíífi ŋmá ipú kú ɛcɛ. Kwu alɛɛcɛ mɛ́mla aɛ́bɛ́ mɛ́mla aɔ́dā ō piyajɛ mɛ́mla aígbáanɔ nōo ī wu icō ā. Unówa ōfōōfūnū mɛ́mla ācɛ nēe bá mɛ́mla anú ipú úgbéenyi ā hile á.

²⁴Éŋkpɔ̄ ā í tú wāajɛ ŋ́ jāā ɛ̄cī ofahāapa ce igwó.