Read idoma OHÚTU 8 Bible Online

OHÚTU 8 - idoma bible

OHÚTU 8

¹Ɔwɔicō í je mlanyī Unówa mɛ́mla odúúdú aɛ́bɛ́ mɛ́mla aígbáanɔ nēe bá mɛ́mla anú ipú ɔwú ā ŋ́. Ó le yá kú owu nɛ̄hi kóō tá, anɔ́ɔ éŋkpɔ̄ ā gbo ɔ́ ō wúla á.

²Éŋkpɔ̄ nōo pɛ́ ŋmá ipú ajɛ ā le gwū, ɔwɔ nōo yā ŋmá ɔkpáncō ā kē le hɛ́ í yā ɛ́ɛ́ gɛ ŋ́.

³Éŋkpɔ̄ ā wúla wāajɛ ɛmɛɛma jāā ɛ̄cī ofahāapa ce igwó, anɔ́ɔ ó kwú wúla gaajɛ ɛyínɛ̄hi á.

⁴Ɛ̄cī igwáahāapa kú ɔyā ahāapa ā, úgbéenyi ā gaá cɛyí aɛ́fu kú Árārati.

⁵Éŋkpɔ̄ ā yɔ̄ ī wúla jāā gbó ɔyā igwó. Ɛ̄cī aflɛ́yí kú ɔyā igwó ā, īkpɛ̄yí kú aɛ́fu ā gbɔɔ́ ō kwɛɛcɛ.

⁶Oŋmɛ́yí kú ɛ̄cī ofɛpa ā, Unówa le ɔwɛ kú úgbéenyi ā nwūla.

⁷Anɔ́ɔ ó le ígbáanɔ nēé hī ka ɔtágláma ā tɛ̄hɔ̄ ga ɛcɛ á. Ó cīgbīhi wā gɛ ŋ́, ó yɔ̄ ī wu gaajɛ gicō jāā gbéeko nɛ̄ éŋkpɔ̄ ā le ŋmó ŋmá ajɛ.

⁸Anɔ́ɔ ó klla le okóohō tɛ̄hɔ̄ ga ɛcɛ kóō má ɔ́dāŋ ka éŋkpɔ̄ ā le ŋmó ŋmá ajɛ ɛɛ́.

⁹Amáŋ abɔ̄ éŋkpɔ̄ ā yɔ̄ ajɛ kpɔ́ ɛ́ɛ́ mā, okóohō ā í má ɛga ō lɛ ikpó kwaajɛ ŋ́. Anɔ́ɔ ó le wu cīgbīhi ga ɛgiyí úgbéenyi ā. Unówa le abɔ̄ nā ga ɛcɛ, mīyɛ ɔ́ wā ipú úgbéenyi ā.

¹⁰Unówa gbēyī ɛ̄cī ahāapa ɔhá kpɔ́, anɔ́ɔ ó le okóohō ā tɛhɔ̄ ga ɛcɛ igbɔhá kpɔ́.

¹¹Anɔ́ɔ okóohō ā pīyɛyí wā ɛgiyí Unówa ɔ̄nɔ̄ɔ̄nɛ̄, le ēpū ɛ̄mɛ̄ɛ̄mɛ̄ kú ɔcí nēé hī ólifu ā kwu ɔkɔ́ á. Unówa le jé ka éŋkpɔ̄ ā ɔ́ɔ le ŋmó ŋmá ajɛ ɛɛ́.

¹²Anɔ́ɔ ó klla gbēyī ɛ̄cī ahāapa ɔhā kpɔɔ́, anɔ́ɔ ó lɛ okóohō ā tɛ̄hɔ̄ ga ɛcɛ kpɔ́ á. Igbɛ́nyā, ó pīyɛyí wā ɛgiyí nū ɛ́ɛ́ gɛ ŋ́.

¹³Eko nɛ Unówa wɛ iháyí úlā ce ofigwó ce éyi ā, ɛ̄cī aflɛ́yí kú ɔyā éyi ā, Unówa lɛ ɔwú ā nwūla, ó le eyī pīya má ajɛ, anɔ́ɔ ó le má ka ajɛ ɔ́ɔ le ŋmó ɛɛ́ á.

¹⁴Ɛ̄cī ofu ce ahāapa kú ɔyā ɛpa ā, ajɛ le ŋmó dúúdú.

¹⁵Ɔwɔicō da Unówa kahíníī,

¹⁶“Nyɔ̄ gɛcɛ ŋmá ipū úgbéenyi ā mɛ́ɛ́nɛ, awɔ mɛ́mla ɔnyā uwɔ mɛ́mla ayí uwɔ mɛ́mla anyā ūwā.

¹⁷Kwú odúúdú aígbáanɔ mɛ́mla aɛ́bɛ́ ā ú kpó kéē gɛcɛ mɛ́mla awɔ dúú. Cɛ́ɛ́ kéē ma ayí kéē nyīla ga ɛga dóódu kú ɛcɛ.”

¹⁸Anɔ́ɔ Unówa le bɛ̄cɛ ŋmá ipū ɔwú ā mɛ́mla ɔnyā nū mɛ́mla ayí nū, mɛ́mla anyā ayí nū á.

¹⁹Odúúdú aɛ́bɛ́ mɛ́mla aígbáanɔ mɛ́mla aɔ́dā ō lɛ ipú piyajɛ ā, le pɛ́ bɛ̄cɛ ŋmá ipú ɔwú ā, ígwíígwu kú uwā ɛ́gɛ́nɛ̄ ɛdɔ kú uwā lɛ ā.

²⁰Unówa le ede gwó lɛ Óndú ā, anɔ́ɔ ó kwú éyééye kú aɛ́bɛ́ mɛ́mla aígbáanɔ nēe le yēŋēē ā ú, kwú uwā ú gwɛ́ɛya oyi ɔlá dúúdú lɛ Ɔwɔicō ɛyí ede ā á.

²¹Eko nɛ̄ Ɔwɔicō le ocu kú ɛya oyi ɔlá dúúdú nyā pó ā, ó he ɔ́ ɔtū nɛ̄hi, anɔ́ɔ ó ka ipú ɔtū kú nū kahíníī, “Ń gaá tá okónu lɛ ɛcɛ ohígbū alɛɛcɛ igbɔhá gbóógbóō ɛ́ɛ́ gɛ ŋ́. Ohígbū ka n jé ka ɛlá obɔ̄bí nēé gē gbo ipú ɔtū kú uwā ā eko dóódu ŋmá eko ɔyípɛ̄ kú uwā á. Ń gaá je ɔdā oyēeyī yíífi igbɔhá ɛ́gɛ́nɛ̄ n yá eko nyā ā ɛ́ɛ́ gɛ ŋ́.

²²Ɛ́gɛ́nɛ̄ ɛcɛ géē yɔ̄ í kwu lɛ ā, eko nēé ī nyi ɔdɛ̄hɔ̄ géē yɔ̄, eko nēé géē cē ɔdɛ̄hɔ̄ kē í yɔ̄. Eko ofū mɛ́mla eko iye okwulá géē yɔ̄, ɔgwā mɛ́mla ɔnɔ̄ kē géē yɔ̄. Ɔlɛ́ɛnɔ mɛ́mla otú kē géē yɔ̄.”