Read idoma OHÚTU 9 Bible Online

OHÚTU 9 - idoma bible

OHÚTU 9

¹Ɔwɔicō lɛ ɔhā hɛ́ ce Unówa mɛ́mla ayí kú ɔlɛ́ nū, anɔ́ɔ ó da uwā kahíníī, “Áā ma ayí lɛwa kú aá nyīla ga odúúdú ɛcɛ ā.

²Aɛ́bɛ́ dúúdú mɛ́mla aígbáanɔ mɛ́mla aɛ́béenyi mɛ́mla aɔ́dā ō lɛ ipú piyajɛ géē yúúfi kú aá. N le uwá kpó bá ɛháajɛ ɔfú kú aá.

³Ɔdā dóódu nōo yēeyī ā géē wɛ ɔdōlé kú aá ɛ́gɛ́nɛ̄ ēpū mɛ́mla ɔdɛ̄hɔ̄ dóódu wɛ ɔdōlé kú aá ā.

⁴Ɔdā nɛ̄ aá í gaá lé ŋ́ ōfōōfūnū ā wɛ ɛbɛ́ nēé ŋmó nēé fu oyī kú nū bónū ɛ́ɛ́ ŋ́. N lɛ ɛ̄nyā ci ohígbū ka oyī wɛ oyēeyī á.

⁵Ɔ̄cɛ dúúmā nōo lɛ ɔ̄cɛ ŋmó, n géē gwō ɔ̄ ɔ́ci. Ɛbɛ́ dóódu nōo lɛ ɔ̄cɛ ŋmó, n géē je ɔ́ ŋmó.

⁶N yá ɔ̄cɛ gbla ami nōo wɛ Ɔwɔicō ā, ohígbū ɔ́ɔmā ā, ɔ̄cɛ nōo lɛ ɔ̄cɛ ŋmó, ɔ̄cɛ ɔhá géē je ɔ̄cɛ ɔ́ɔmā ŋmó.

⁷Aá ā, aá ma ayí alɛwa, cɛ́ɛ́ kú ayááyí kú aá kéē mīyɛ ɛga dóódu kú ɛcɛ tābɔ̄.

⁸Anɔ́ɔ Ɔwɔicō da Unówa, mɛ́mla ayí nū kahíníī,

⁹“Áá mɔ́ɔ̄, n yɔ̄ gē cokónu mɛ́mla aá mɛ́mla ayááyí aá,

¹⁰klla mɛ́mla odúúdú ɔdā ōyēeyī nēe bá pi aá ā, kwu aígbáanɔ mɛ́mla aɛ́na mɛ́mla aɛ́bɛ́ kú ipácí, nēe bá pi aá ā, ɛjɛ̄ɛ̄jī aɛ́nɛ̄ e bɛ̄cɛ ŋmá ipú úgbéenyi mɛ́mla aá ā.

¹¹N lɛ okónu ce mla aá ka, éŋkpɔ̄ í gaá je odúúdú aɔ́dā oyēēyī ā yíífi igbohá ɛ́ɛ́ gɛ ŋ́. Éŋkpɔ̄ í gáā je ɛcɛ ā yíífi igbohá gbóógbóō ɛ́ɛ́ gɛ ŋ́.”

¹²Anɔ́ɔ Ɔwɔicō kahíníī, “Ɛ̄nyā géē wɛ ɔdā nōo géē cābɔ̄ kú okónu opiyóó nɛ̄ n ce mla aá mɛ́mla ɔdā dóódu nēe yēeyī ā á.

¹³N géē je ɔwɔ ohɔ́gwā kwu ipú ojuja, anɔ́ɔ ó í wɛ ɔdōcābɔ̄ kú okónu nɛ̄ n ce mla ɛcɛ ā á.

¹⁴Eko dóódu, nɛ̄ n kwú ojuja ú klá ɛcɛ nɛ̄ ɔwɔ le hɔ́gwā,

¹⁵n géē blakwu okónu nɛ̄ n ce mla awɔ mɛ́mla odúúdú ɔdā oyēeyī ā. Éŋkpɔ̄ í kē gáā cēenyi gáā je ɛcɛ yíífi igbohá ɛ́ɛ́ gɛ ŋ́.

¹⁶Eko dúú nɛ̄ ɔwɔ le hɔ́gwā ipū ɔkpáncō, n géē má ɔ̄ klla í blakwu okónu opiyóó nɛ̄ n ce mla odúúdú aɔ́dā oyēeyī, nōo yɔ̄ ɛcɛ ā.”

¹⁷Anɔ́ɔ Ɔwɔicō da Unówa kahíníī, “Ɛ̄nyā wɛ ɔdōcābɔ̄ kú okónu nɛ̄ n ce mla odúúdú aɔ́dā oyēēyī, nēe lā ɛcɛ ā á.”

¹⁸Ayínɔ̄nyīlɔ kú Unówa, nēe wɛ̄ɛcɛ ŋmá ipú úgbéenyi mla anú ā wɛ Ussɛ́m, Uhám mɛ́mla Ujáfɛ̄ti. Uhám wɛ ádā kú Ukénan.

¹⁹Ayínɔ̄nyīlɔ kú Unówa ɛtá ā wɛ aádáádā kú odúúdú ācɛ kú ɛcɛ á.

²⁰Unówa, nōo wɛ ɔglɛ́ɛjí ā wɛ ɔ̄cɛ aflɛ́yí nōo hɛ́ɛ́hɔ̄ kú ufáyin á.

²¹Anɔ́ɔ ó le ejé ɔcí nēé hī ka ufáyin ā gwá á. Ejé ā le ɔ́ kwú, anɔ́ɔ ó mā tóohɛ́ɛwa gwutá ipú áklɔ̄kpɛ kú nū á.

²²Eko nɛ̄ Uhám nōo wɛ ádā kú Ukénan ā má ka ádā anúɔ ɔ́ɔ tóohɛ́ɛwa ā, ó le tɛ́ɛcɛ gaá le da ayínɛ́ nū.

²³Anɔ́ɔ Ussɛ́m mɛ́mla Ujáfɛ̄ti lɛ īlī kpó, kwú īlī á ú pīya klla ɔkɔ kú uwā ɛpɛlɛ́ɛpa. Anɔ́ɔ é yāwu igbīīgbīhi gaá le īlī ā pīya klá ádā uwā iyē á. É le eyī kú uwā pīya tá ɛga ɔhá kéē má ohɛ́ɛwa kú ádā uwā ŋ́.

²⁴Eko nɛ̄ Unówa le héyī, nɛ̄ ejé le cá ŋmá ɔ̄ eyī, ó klla le ɔdā nɛ̄ ɔyí nū nɛ̄ŋ́cɛ́ ā yá ā jé.

²⁵Anɔ́ɔ ó kahíníī, “N le okónu tá lɛ Ukénan! Ó géē wɛ ɔfīyɛ kú ayínɛ́ nū.

²⁶Ó klla kahíníī, Óndú ā, nōo wɛ Ɔwɔicō kú um ā, kóō hɔ́hā ce Ussɛ́m! Ukénan kóō wɛ ɔfiyɛ kú nū.

²⁷Ɔwɔicō kóō yá kú Ujáfɛ̄ti[15] kóō nyīla. Ipɔ́ɔma kú nū kóō lā ɔlɛ́ Ussɛ́m. Ukénan géē wɛ ɔfiyɛ kú Ujáfɛ̄ti.”

²⁸Igbīhi kú éŋkpɔ̄ nōo kpó ɛcɛ ā, Unówa lā iháyí ofigwáahāapa ce igwó,

²⁹eko nōó le pīya iháyí úlā ɛpa ce ofahāapa ce igwó ā, ó gekwú.