Read idoma 2 USÁMUWƐ̄LU 10 Bible Online

2 USÁMUWƐ̄LU 10 - idoma bible

2 USÁMUWƐ̄LU 10

¹Eko lígíí le glla, Unáhāsi, ɔcɛ́ kú ācɛ Ámɔn gekwú. Anɔ́ɔ ɔyí nū Uhánɔn lɛ ɔcɛ́ lé á.

²Anɔ́ɔ Udéfīdi da ācɛ nēe bá mla anú ā ka anúɔ géē ma ucē kú oklóbīya ɔcɛ́ fú lɛ Uhánɔn ɛ́gɛ́nɛ̄ ádā nū Unáhāsi mafú lɛ anúɔ ā. Anɔ́ɔ Udéfīdi le ācotɛ̄hɔ̄ kú nū tɛ̄hɔ̄ kéē nyɔ̄ í ce ɔ́ abīyē kú ikwu kú ádā nū á. Eko nēé gāajɛ kú ācɛ Ámɔn ā,

³aígabɔ̄ kú ācɛ Ámɔn da Uhánɔn, ɔcɛ́ ā, ka ɔ́ɔ gbɛlá ka ohígbū ojīlīmā kú ádā nū nɛ̄ Udéfīdi ɔ́ɔ tū ācɛ ɛhɔ̄ wā í ce ɔɔ́ abīyē á nóó. É ka amáŋ ɔ́ɔ tū uwā ɛhɔ̄ wā í jila igelī nɛ̄hi kú ɔlɛ́ uwā lɔɔlɔhi, cɛ́ɛ́ ka ɔ́ɔ̄ géē wā í lɛ aá kpó ŋmó cɛ́ɛ́ ka ɔ́ɔ̄ klla mīya ajɛ kú ɔlɛ́ aá.

⁴Anɔ́ɔ Uhánɔn lɛ ācɛ nɛ̄ Udéfīdi tɛ̄hɔ̄ ā kpó kwú, klla lɛ uwá āyā éyi kú ɔnwāagba kú éyééye kú wā kpó wā, klla lɛ īlī híla tū uwā iyē. Anɔ́ɔ ó lɛ uwá nū ŋmá ajɛ ɔlɛ́ nū á.

⁵Uwēyī í kōō cɛ̄ lɛ ācɛ nēé tɛ̄hɔ̄ ā wā ajɛ ɔlɛ́ glá ŋ́. Eko nɛ̄ Udéfīdi le ɔdā nōo yá ā pó ā, ó lɛ ɛhɔ̄ tū fu uwá kéē bá Ujérīko jāā gbéeko nɛ̄ ɔnwāagba kú uwá ɔ́ɔ̄ le bū.

⁶Abɔ̄ ācɛ kú Ámɔn ā le jé ka aá ɔ́ɔ kwú Udéfīdi í pīya olɛlā kú uwā ɛɛ́ mā, é le yɛ gaá le aícɔ́ɔja kú Usiríya úlā ofɛpa cigwó (20,000) plla ŋmá Ubɛ́trēhobu mɛ́mla Usóba. É klla gaá lɛ aícɔ́ɔja úlā ofuciigwó (12,000) plla ŋmá Utóbu. É klla plla aícɔ́ɔja úlā ɛpa cofigwó (1,000) ŋmá ɛga ɔcɛ́ kú Umáaka.

⁷Eko nɛ̄ Udéfīdi le ɔdā nēé yá nyā pó ā, ó lɛ Ujówābu mɛ́mla odúúdú aícɔ́ɔja kú nū kpó tɛ̄hɔ nyɔ̄ í kpɛ́fú tá ācɛ kú Ámɔn.

⁸Ācɛ Ámɔn le bɛ̄cɛ wā í kwāajɛ ɛfú pī okónɔɔwɛ kú Urábba, igelī nɛ̄hi nōo wɛ ɔlɛ́ ɔtāhɛ̄ kú uwá ā. Anɔ́ɔ ācɛ ohile kú Usiríya mɛ́mla Utóbu mɛ́mla Umáaka ā kē má kwāajɛ ipácí á.

⁹Abɔ̄ Ujówābu le má ka aícɔ́ɔja kú aólɛlā ā ɛ́ɛ má kwāajɛ kú ɛ́ɛ̄ kpɛ́fú tū aá ŋmá iyɔ̄bū mɛ́mla igbīhi ā. Anɔ́ɔ ó le aícɔ́ɔja nēe lɔtū fíyɛ́ dúú ā kpó nyɔ̄ í lɛ eyī pīya kwu ācɛ Usiríya ā.

¹⁰Ó kwú aícɔ́ɔja kú nū ohile ā ú kpó tū Abíssāyi, ɔyínɛ́ nū ā abɔ̄. Anɔ́ɔ Abíssayi kwú uwá eyī ú pīya kwu ācɛ Ámɔn á.

¹¹Ujówābu da ɔ́ ka ɔ́dāŋ ka ɔ́ɔ má ka ācɛ Usiríya ā ɛ́ɛ gbɔɔ́ ō yá anúɔ lé nɛ, ɔ́ɔ wā í tá anúɔ abɔ̄. Ɔ́dāŋ ka anúɔ kē má ka ācɛ Ámɔn ā gbɔɔ́ ō yá ɔ̄ lé nɛ, anúɔ géē wā í tá ɔ̄ abɔ̄.

¹²Ujówābu da ɔ́ ka ɔ́ɔ̄ lɛ ɔfú tīīyē ka ɔ́ɔ̄ klla lɔtū. Cɛ́ɛ́ kú aá le ɛfú kpó lɛ ācɛ ɔlɛ́ aá mɛ́mla igelī nɛ̄hi kú Ɔwɔicō kú aá. Ká ɔdā nōo he Óndú ā ɔtū ā, ka ɔ́ɔ̄ le yá.

¹³Abɔ̄ Ujówābu mɛ́mla ācɛ ɔlɛ́ nū gbɔɔ́ ō wā í kpɛ́fú ā, ācɛ Usiríya ā kwú pɛ́ kwu ŋmá ɔgbɛ́fú.

¹⁴Anɔ́ɔ eko nɛ̄ ācɛ Ámɔn ā, le má ka ācɛ Usiríya yɔ̄ ī kwinya ŋmá ɔgbɛ́fú ā, uwá abɔ̄yī uwā le pɛ́ kwu ŋmá ɛga nɛ̄ Abíssāyi kwāajɛ ɛfú ā. É kwúcē ga ipú igelī nɛ̄hi kú uwā ā. Anɔ́ɔ Ujówābu kwúcē ŋmá ɔnɛ́fú o kpó tú ācɛ Ámɔn ā, anɔ́ɔ ó le tá Ujerúsālɛm á.

¹⁵Eko nɛ̄ Usiríya má ka Ísrɛ̄lu ɔ́ɔ le aá yálé ā, é lɛ aícɔ́ɔja kú uwá kpó hīgwú tɔ̄há.

¹⁶Anɔ́ɔ Uhádādēsa, ɔcɛ́ ā, lɛ ɛhɔ̄ tū fu ācɛ Usiríya nēe bá ɛnɔ̄ɔ̄cī kú ísu kú Uyúfrētīisi ā, anɔ́ɔ é le aícɔ́ɔja kú uwā kpó wā í le jīla Uhélamá. Ussóbāki, otrɛ̄yí kú aícɔ́ɔja kú Uhádādēsa, ɔcɛ́ kú Usóba, kpó uwā trɛ̄yí á.

¹⁷Eko nɛ̄ Udéfīdi le ɔdā nɛ̄ aícɔ́ɔja kú Usiríya yɔ̄ ī yá ā pó ā, ó lɛ aícɔ́ɔja kú Ísrɛ̄lu túbá. Anɔ́ɔ é le bēhé isú kú Ujɔ́dan á. É yɛ le tá Uhálem, ɛga nɛ̄ aícɔ́ɔja kú Usiríya kwāajɛ ā. Anɔ́ɔ ɛfú ā gbɔɔ́ á.

¹⁸Amáŋ aícɔ́ɔja kú ācɛ Usiríya klla le pɛ́ kwu ŋmá ɔgbɛ́fú hilo ācɛ Ísrɛ̄lu igbɔhá kpɔ́. Udéfīdi mɛ́mla ācɛ ɔlɛ́ nū, ŋmó ācɛ nēe ī pɛ́ úgbɔ́ɔ́nya kú Usiríya ā, úlā ce ofu igwɛ́ɛhɔ̄ (700). É klla ŋmó ācocɔnya kpɛ́fú kú uwā, úlā ofɛhɔ̄ (40,000). É klla lɛ otrɛ̄yí kú aícɔ́ɔja kú uwā, Ussóbāki ā yá ágbe, anɔ́ɔ ó gekwú ɔgbɛ́fú á.

¹⁹Eko nɛ̄ aɔ́cɛ́ nēe bá ɛháajɛ kú Uhádādēsa ā le má ka Ísrɛ̄lu ɔ́ɔ lɛ aá kpó yálé ā, anɔ́ɔ é nyɔ̄ í le ɛbɔ́ yá mɛ́mla Ísrɛ̄lu á. É klla má bá ɛháajɛ ɔcɛ́ kú Ísrɛ̄lu, klla gbɔɔ́ ō da ije ɔlɛ́ lɛ ācɛ Ísrɛ̄lu. Anɔ́ɔ ācɛ kú Usiríya í lɛ ɔtū nyɔ̄ í tá ācɛ kú Ámɔn abɔ̄ igbɔhá glá ɛɛ́ gɛ ŋ́ má.