Read idoma 2 USÁMUWƐ̄LU 11 Bible Online

2 USÁMUWƐ̄LU 11 - idoma bible

2 USÁMUWƐ̄LU 11

¹Ɛ̄cī éyi lé ka ɛ̄cī éyi, eko nɛ̄ ɔwɔ aflɛ́yí ī yā ā. Eko nyā nɛ̄ aɔ́cɛ́ gē nyɔ̄ ī kpɛ́fú á. Anɔ́ɔ Udéfīdi le Ujówābu mɛ́mla aótrɛ̄yí kú aícɔ́ɔja mɛ́mla aícɔ́ɔja kú uwā tū nyɔ̄ í kpɛ́fú tá ācɛ ɔhá á. É kpɛ́fú tá ācɛ kú Ámɔn, le uwá yálé. Anɔ́ɔ é klla le íbɔm cē tū igelī nɛ̄hi nēé hī ka Urábba ā á. Amáŋ Udéfīdi abɔ̄yī nū klá Ujerúsālɛm.

²Anɔ́ɔ ɔ̄nɔ̄ɔ̄nɛ̄ ɛ̄cī éyi, Udéfīdi le héyī ŋmá iyɔ̄lā. Anɔ́ɔ ó le tá icō kú agbla kú ɔlɛ́ ɔcɛ́ kú nū. Abɔ̄ ó yɔ̄ gē yɛ icō abɔ́ɔ ā, ó lɛ ɔnyā éyi má tóohɛ́ɛwa yɔ̄ í gwīīyē. Ɔnyā ā lɔhi nɛ̄hi.

³Anɔ́ɔ Udéfīdi lɛ ɛhɔ̄ tū gaá lɛ ɔ̄kā da bá ɔnyā ā iyē. Anɔ́ɔ é wā í le da ɔ́ ka ɔnyā ɔ́ɔ wɛ Ubatissɛ́ba, ɔyínɔ̄nyā kú Ɛlíyam, nōo wɛ ɔnyā kú Uríya, ɔ̄cɛ kú Uhɛ́ti ā nɛ.

⁴Udéfīdi lɛ ɛhɔ̄ tū gaá lɛ ɔ́ hīgwú. Anɔ́ɔ é le ɔ́ bī wā gé lɛ ɔ́. Anɔ́ɔ Udéfīdi lɛ ikpō nū ce á. (Ɔnyā ā nyɛ̄ɛ̄ ŋmá oōnyílá bōōbū.) Anɔ́ɔ ɔnyā ā kwúcē le tá ɔlɛ́ nū á.

⁵Eko kpií ā, ɔyā le gla ɔnyā ā ɛyí. Anɔ́ɔ ó le ɛhɔ̄ tū fu Udéfīdi ka anúɔ yīipú á.

⁶Anɔ́ɔ Udéfīdi lɛ ɛhɔ̄ tū fu Ujówābu ka ɔ́ɔ̄ lɛ Uríya, ɔ̄cɛ Uhɛ́ti ā tɛ̄hɔ̄ fu anúɔ. Anɔ́ɔ Ujówābu lɛ Uríya tɛ̄hɔ̄ fu Udéfīdi á.

⁷Eko nɛ̄ Uríya gā ā, Udéfīdi le ɔ̄kā ɛ́gɛ́nɛ̄ Ujówābu mɛ́mla ācɛ kú Ísrɛ̄lu bá í yá ɔgbɛ́fú lɛ ā da ɔ́.

⁸Anɔ́ɔ Udéfīdi da Uríya ka ɔ́ɔ̄ nyɔ̄ ga ɔlɛ́ nū nyɔ̄ í lɛ owu túwāajɛ lígíi ɛɛ́. Uríya nyɛ̄ɛ̄ ŋmá ɛgiyí Udéfīdi. Anɔ́ɔ Udéfīdi lɛ ɔdā ɛhi éyi tɛ̄hɔ̄ ga ɔlɛ́ nū á.

⁹Amáŋ Uríya í ga ɔlɛ́ ŋ́. Anɔ́ɔ ó le gbo mɛ́mla ācɛ nōo gē gbō ɔwɛ kú okómpīinu kú ɔlɛ́ ɔcɛ́ ā.

¹⁰Eko nɛ̄ Udéfīdi le pó ka Uríya ɔ́ɔ ga ɔlɛ́ ŋ́ mā. Ó lɛ ɔ́ hīgwú da ɔ́ ɔ̄kā ka ɔ́ɔ wɛ iyáwu nɛ̄ ɔ́ɔ ŋmá ā ŋ́ nɛɛ? Ɔdíyá nɛ̄ ɔ́ɔ ga ajɛ ɔlɛ́ nū ŋ́ mā ā?

¹¹Anɔ́ɔ Uríya tá Udéfīdi ohi ka ikpáti kú ɛka kú Óndú ā mɛ́mla ācɛ Ísrɛ̄lu mɛ́mla ācɛ Ujúda ɛ́ɛ bá ipú áklɔ̄kpɛ kú ɛfú ipácí. Ó ka ɔkpani anúɔ, Ujówābu mɛ́mla aícɔ́ɔja kú nū ā, ɛ́ɛ kē gbo bá ɛcɛ ipácí. Ɔ́ɔ lɛ ā, ɔwɛ nyá nɛ̄ anúɔ í ga ɔlɛ́ anúɔ cɛ́ɛ́ ká anúɔ gaá gwá, ká anúɔ lé klla gwutá mɛ́mla ɔnyā anúɔ ā? Anɔ́ɔ ó le ɔkpá gbo ka anúɔ í gáā yá ɔdā ɛ́gɔ́ɔmā glá ŋ́ á.

¹²Anɔ́ɔ Udéfīdi da ɔ́ ka ɔ́ɔ̄ klá abɔ́ɔ ɛ̄cī ɔ́ɔmā mɛ́mla oŋmɔ́ɔ̄cī kú nū mɛ́ɛnɛ. Anɔ́ɔ Uríya má klá Ujerúsālɛm ɛ̄cī ɔ́ɔmā mɛ́mla oŋmɔ́ɔ̄cī nū á.

¹³Udéfīdi lɛ ɔ́ hīgwú wā í le ɔdōlé lé klla le ejé gwá mɛ́mla anú. Anɔ́ɔ ejé lɛ ɔ́ kwú á. Ó klla le yɛ tɛ́ɛcɛ nyɔ̄ gaá le gbo mɛ́mla ācɛ nēe gbō ɔwɛ kú ɔlɛ́ ɔcɛ́ ā ikɔɔkɔ o nyɔ̄ í gbo ɔlɛ́ nū ā.

¹⁴Ɔ̄cɔ̄ɔ̄cī ā, Udéfīdi lɛ ɔkpá tá, anɔ́ɔ ó kwú ɔ̄ ú tū Uríya ɛhɔ̄ fu Ujówābu ɔgbɛ́fú á.

¹⁵Udéfīdi le tá tū ipú ɔkpá ā ka Ujówābu ka ɔ́ɔ̄ kwú Uríya ú kwāajɛ ɛga nɛ̄ ɛfú lɔfú nɛ̄hi fíyɛ́ dúú ā, cɛ́ɛ́ ɔ́ɔ le yɛ ɔkwɔɔkwu hɛ̄ ɔ̄ tá, cɛ́ɛ́ kéē lɛ ɔ́ ŋmó.

¹⁶Anɔ́ɔ abɔ̄ Ujówābu yɔ̄ í cīíbɔm tū igelī nɛ̄hi ā, ó kwú Uríya ú tá ɛga nōó jé ka ācɛ o lɔfú fíyɛ́ dúú kú aólɛlā ā bá ā.

¹⁷Ɔkwɔ̄ɔ̄kwɛ̄yi, aícɔ́ɔja kú aólɛlā ā le pɛ́ wɛ̄ɛcɛ ŋmá ipú igelī nɛ̄hi ā. Anɔ́ɔ é kpɛ́fú tá aícɔ́ɔja kú Ujówābu á. É le aícɔ́ɔja kú ɔlɛ́ Udéfīdi ōhī kpó ŋmó. Uríya wɛ éyi kú ācɛ nēé ŋmó ā dúú.

¹⁸Anɔ́ɔ Ujówābu lɛ ɛhɔ̄ tū fu Udéfīdi, lɛ ɔ̄kā kú ɔdā nēe yá ɔgbɛ́fú ā kpó kā lɛ ɔ́ kpɛ́mm á.

¹⁹Ó klla da ɔ̄cɛ nōó tɛ̄hɔ̄ fu ɔcɛ́ ā ka eko nɛ̄ ɔ́ɔ lɛ ɔ̄kā kú ɔdā nɛ̄ ɔ́ɔ yá ɔgbɛ́fú ā kā ɔcɛ́ kwɛyí,

²⁰ka ɔcɛ́ ɔ́ɔ gē lɔfú cɔ̄nū, í dɔɔ̄kā ka ɔdíyá nɛ̄ ɛ́ɛ túblá igelī nɛ̄hi ā ajaajɛ lɛ āa? Ó ka ɔ́ɔ klla í ka ka ɛ́ɛ jé ka aícɔ́ɔja kú aólɛlā ā ī tá ɔyī ŋmá ɛyí ɔdɔ ā ŋ́ nɛɛ?

²¹Ó da ɔ̄cɛ ā ka ɔcɛ́ ɔ́ɔ í dɔ̄ɔka ka ɔ́ɔ́ blakwu ɛ́gɛ́nɛ̄ ɛ́ɛ ŋmó Ahímɛ́lɛ̄kii ɔyí kú Ujerúbēssɛ̄ti lɛ ā ŋ́ nɛɛ? Ó ka ɔ́ɔ í da ɔ́ ka ɔnyā éyi ɔ́ɔ tá ɛgɔ̄ o gbɔ̄dā kpó ŋmá ɛyí ɔdɔ kú Utébēs wāajɛ wā í ŋmó ɔ̄ á. Ó ka ɔcɛ́ ɔ́ɔ klla í ka kpɔ́ ka ɔdíyá nɛ̄ ɛ́ɛ túblá ɔdɔ ā lɛ āa? Ujówābu klla da ɔ́ ka eko ɔ́ɔmā ɛɛ́, cɛ́ɛ́ ɔ́ɔ le da ɔcɛ́ ā ka ɛfú ɔ́ɔ le ɔ̄cocɛ̄hɔ̄ kú nū Uríya, ɔ̄cɛ Uhɛ́ti ā lé dúú.

²²Anɔ́ɔ ɔ̄cɛ ā le yɛ gaá lɛ odúúdú ɛhɔ̄ nɛ̄ Ujówābu tū fu Udéfīdi, ɔcɛ́ ā, cɛ̄ lɛ ɔ́ á.

²³Ó da Udéfīdi ka aólɛlā kú aá le lɔfú fíyɛ́ aá. Anɔ́ɔ ɛ́ɛ le bɛ̄cɛ ŋmá ipú igelī nɛ̄hi ā wā í le unu nu tá aá ɛcɛ péee á. Ó ka amáŋ aá le uwá nū nyɔ̄ ga okónɔɔwɛ kú igelī nɛ̄hi ā.

²⁴Ɔ̄cɛ ā da ɔcɛ́ ka anɔ́ɔ ɛ́ɛ gbɔɔ́ ō tá ɔyī lɛ aá ŋmá ɛyí ɔdɔ á. Anɔ́ɔ ɛ́ɛ le ācɛ ōhī kú ɔlɛ́ ɔcɛ́ kpó ŋmó á. Ó klla da ɔ́ ka Uríya, ɔ̄cɛ Uhɛ́ti ā ɔ́ɔ wɛ ipú ācɛ nɛ̄ ɛ́ɛ ŋmó ā dúú.

²⁵Anɔ́ɔ Udéfīdi da ɔ̄cɛ nɛ̄ Ujówābu tɛ̄hɔ̄ wā fu ɔ́ ā ka ɔ́ɔ̄ nyɔ̄ í tá Ujówābu ɔtū kwɔtū cɛ́ɛ́ kú ɔtū kú nū ka ɔ́ɔ̄ híī wu klíicō ŋ́. Ohígbū ka ɔ̄cɛ dúú ɔ́ɔ jé ɔ̄cɛ nɛ̄ ɛfú ɔ́ɔ ī lé ā ŋ́. Ó ka ɔ́ɔ̄ da Ujówābu ka ɔ́ɔ lɛ ɔfú kpó kwu igelī ā nɛ̄ɛ̄nɛ̄hi cɛ́ɛ́ ka ɔ́ɔ̄ mīyɛ ɔ́ tɔ̄ɔkwu.

²⁶Eko nɛ̄ Ubatissɛ́ba le pó ka ɔbá anúɔ ɔ́ɔ gekwú ā, ó jikwū nū klla yēkwu kú nū.

²⁷Eko nōó le ekwu kú nū gwā ā, Udéfīdi lɛ ɛhɔ̄ tū fu ɔɔ́, kwú ɔ̄ ú bī wā ipú agblɔ̄cɛ́ kú nú. Anɔ́ɔ ó kwú ɔ̄ ú pīya ɔnyā nū á. Anɔ́ɔ ó lɛ ɔyí éyi ma lɛ Udéfīdi, ɔcɛ́ ā, á. Amáŋ ɔdā nɛ̄ Udéfīdi yá ā í he Óndú ā ɔtū ŋ́.