Read idoma 2 USÁMUWƐ̄LU 12 Bible Online

2 USÁMUWƐ̄LU 12 - idoma bible

2 USÁMUWƐ̄LU 12

¹Ɛ̄cī éyi Óndú ā lɛ Unátan, ɔ̄comɛ́ɛbɛ ā tɛ̄hɔ̄ fu Udéfīdi, ɔcɛ́ ā. Anɔ́ɔ ó le tá ɛgiyí Udéfīdi gaá le ácīije nyā tá lɛ ɔ́ ka, ācɛ ɛpa éyi bá igelī ékpónú. Ɔ̄cɛ éyi kú uwā lɛ agbénú nɛ̄hi, ɔ̄cɛ ɔhá ā kē wɛ ogbɛhá

²Ó ka ɔ̄cɛ olɛ agbénú nɛ̄hi ā ɔ́ɔ lɛ aálá alɛwa nɛ̄hi.

³Amáŋ ogbɛhá ā ɔ́ɔ lɛ ɔdā dúúmā ŋ́, ayíka ɔyí álá ékpónú ōfōōfūnū nɛ̄ ɔ́ɔ lā ā. Ó kē lɛ ɔyí álá ā bī jɛ̄. Ɔyí álá ā jɛ̄ ɔlɛ́ nū mɛ́mla ayí nū. Ó gē je ɔdōlé kú anú abɔ̄yīnū lɛ álá ā lé. Álá ā klla ī gwá éŋkpɔ̄ ŋmá ikókwu kú ɔ̄cɛ ā abɔ̄yīnū. Ka ɔnyīlɔ ā ɔ́ɔ je álá ā bɛ̄ɛka ɔyínɔ̄nyā kú nū āa.

⁴Ka ɛ̄cī éyi ugbɔga éyi ɔ́ɔ gā ɔlɛ́ ɔ̄cɛ o lɛ agbénú nɛ̄hi ā. Ó kē lɔtū je álá éyi ŋmá ipú aálá alɛwa kú nū ā ka ɔ́ɔ̄ le ŋmó ka ɔ́ɔ̄ le yá ɔdōlé lɛ ugbɔga ā glá ŋ́. Amáŋ ɔ́ɔ gaá kwú álá ékpónú kú ɔ̄cɛ ogbɛhá ā ú. Anɔ́ɔ ó le ɔ́ ŋmó lɛ ɔdōlé yá lɛ ugbɔga nōo wā ɔlɛ́ nū ā á.

⁵Udéfīdi kwú cɔ̄nū nɛ̄hi ohígbū ucē nɛ̄ ɔ̄cɛ o lɛ agbénú nɛ̄hi ā yá ā á. Anɔ́ɔ ó da Unátan, ɔ̄comɛ́ɛbɛ ā, ka anúɔ gbo Ɔwɔicō ka ɔ̄cɛ nɛ̄ ɔ́ɔ yá ɔdā ɛ́gɔ́ɔmā ā cíkā ō gekwú.

⁶Ó klla ka ɔ̄cɛ ɔ́ɔmā ɔ́ɔ cíkā ō lɛ ulé kú álá ā cílá ɛga ɛnɛ, ohígbū ɔdā nɛ̄ ɔ́ɔ yá nɛ̄ ɔ́ɔ méyīnyinyi ɔ̄cɛ ā ŋ́ mā.

⁷Ɔkwɔɔkwu ɔ́ɔmā, Unátan da Udéfīdi ka anú ɔ́ɔ wɛ ɔ̄cɛ o lɛ agbénú nɛ̄ anúɔ húmáyī kɛlā lɛyíkwu ɔ́ ā á. Óndú ā, nɛ̄ ɔ́ɔ wɛ Ɔwɔicō kú Ísrɛ̄lu ɔ́ɔ ka anúɔ le anɔ̄ tū ɔ̄ɔ̄ ɛyí cɛ́ɛ́ kú ɔ́ɔ kwú pīya ɔcɛ́ kú Ísrɛ̄lu. Ka ɔ́ɔ klla ka anúɔ le ɔ́ hɛ́tá ŋmá abɔ̄ kú Usɔ́ɔlu.

⁸Óndú ā ɔ́ɔ klla kahíníī, “N kwú ɔlɛ́ ɔkpáni uwɔ ú gā uwɔ. Klla kwú anyā kú ɔkpani uwɔ ú kpó bá uwɔ ɔtū. N klla kwú ɔlɛ́ kú Ujúda mɛ́mla Ísrɛ̄lu ú gā uwɔ. Ɔ́dāŋ́ ka ɛ̄nyā í jē uwɔ ŋ́ nɛɛ, á géē yɛ í le da um ká n̄ le kpó blá ɔ́ gā uwɔ fíyɛ́.

⁹Ɔdíyá nɛ̄ á le eyī gwū ɛlā kú ami nōo wɛ Óndú ā bónū, nɛ̄ a gaá yá ɔdōbɔ̄bí ɛ́gɛ́nyā ipéyī um āa? A jégēdēē cɛ̄ lɛ uwá le Uríya, ɔ̄cɛ Uhɛ́ti ā ŋmó ɔgbɛ́fú. A cɛ̄ le ācɛ Ámɔn lɛ ɔ́ ŋmó, anɔ́ɔ a kwú ɔnyā nū ú á.”

¹⁰Óndú ā klla da ɔ́ kahíníī, “Abɔ̄ a tá ō lɛyítáajɛ gā um, anɔ́ɔ a kwú ɔnyā kú Uríya ú pīya ɔnyā uwɔ á, ikwū ɔ́lɔ́ɔ́lá géē yɔ̄ ī ŋmó ācɛ ɔlɛ́ uwɔ piyóó.

¹¹Óndú ā klla da ɔ́ kahíníī, “N géē cɛ̄ lɛ ɔ̄cɛ éyi kú ipɔ́nū kú ɔlɛ́ uwɔ pií kóō bɛyíkwu uwɔ, kóō bī unwalu gé lɛ uwɔ. Ipéeyī uwɔ, n géē kpó anyā ɔlɛ́ uwɔ lɛ ɔ̄cɛnyīlɔ ɔhá. Ɔnyīlɔ ɔ́ɔmā géē cikpó uwā ɔlɛ́ɛnɔ gēdēē

¹²Óndú ā klla da Udéfīdi kpɔ́ kahíníī, “A yá ɔdōbɔ̄bí nyā tayínū, amáŋ ami ā, n géē yá kú ɔdōbɔ̄bí mɛ́mla ɔdūwēyī nyā kóō yá du uwɔ ɔlɛ́ɛnɔ gēdēē, cɛ́ɛ́ kú odúúdú Ísrɛ̄lu kéē má ɔ̄.”

¹³Udéfīdi da Unátan ka anúɔ le óbíipú nɛ̄hi bī tū Óndú ā ɛɛ́. Anɔ́ɔ Unátan, ɔ̄comɛ́ɛbɛ ā, da ɔ́ ka Óndú ā ɔ́ɔ kwú ɔ́bíipú nɛ̄ ɔ́ bī ā í yá ɔ̄ ɛhi ɛɛ́, ohígbū ɔ́ɔmā ɔ́ gáā kwú ɛ́ɛ́ gɛ ŋ́.

¹⁴Unátan da Udéfīdi ka amáŋ, abɔ̄ ɔ́ɔ kwú eyī í gwū Óndú ā bónū nɛ̄ɛ̄nɛ̄hi ŋmá lɛ ɔdā nɛ̄ ɔ́ɔ yá ā, ɔyínɔ̄nyīlɔ kú nū nɛ̄ ɔnyā ɔ́ɔ ma ā ɔ́ɔ géē kwú.

¹⁵Anɔ́ɔ Unátan, ɔ̄comɛ́ɛbɛ ā, kwúcē le tá ɔlɛ́ nū á. Óndú ā, cɛ̄ lɛ ɔyínɔ̄nyīlɔ nɛ̄ Ubatissɛ́ba, ɔnyā kú Uríya ma lɛ Udéfīdi ā, kóō gbɔɔ́ ō doōcē nɛ̄ɛ̄nɛ̄hi.

¹⁶Udéfīdi le ɔkɔ gbā lɛ Ɔwɔicō cɛ́ɛ́ kú ōcē kú ɔyí nɛ̄ŋcɛ́ ā kóō mɛ. Ó gwōkónu klla nyɔ̄ ī gwutá ajɛ pɛtɛɛ otú gbɔ́ɔ̄cī.

¹⁷Aígabɔ̄ kú ɔlɛ́ nū háyi pī ɔ̄ gē céyītīkwū ī kɛlā lɛ ɔ́ cɛ́ɛ́ ka ɔ́ɔ̄ cāŋjɛ ŋmá ajɛ. Amáŋ Udéfīdi tá. Ó klla cɛ̄ lé ɔdōlé mɛ́mla uwá ŋ́.

¹⁸Ɛ̄cī ɔ́mahāapa ā, ɔyí ā gekwú. Anɔ́ɔ ufi í cɛ̄ lɛ aígabɔ̄ kú ɔlɛ́ Udéfīdi ka lɛ ɔ́ ka ɔyí ā gekwú ŋ́ má. Ohígbū keé da iyī uwā ka eko nɛ̄ ɔyí ā ɔ́ɔ yēeyī kpɔ́ ɛɛ́ mā, aá ɔ́ɔ le ɛlā ka lɛ Ágábáidu, amáŋ ɔ́ɔ tá aá ohi ŋ́. Abɔ̄ nɛ̄ ɔ́ɔ le lɛ ā, ɔwɛ nyá nɛ̄ aá ɔ́ɔ géē lɔfú ka ɔdā nōo yá ā lɛ ɔ́ glá ā gɛ? É ka ɔ́ɔ lɔfú yá īyī nū odée glá ɔ́dāŋ ka ɔ́ɔ le jé.

¹⁹Amáŋ eko nɛ̄ Udéfīdi má abɔ̄ aígabɔ̄ kú ɔlɛ́ nū bá ī le ahɔ̄ bá iyī uwā ahɔ̄ ā, iyē le ɛlā ka lɛ ɔ́ ka ɔyí ā ɔ́ɔ gekwú ɛɛ́. Anɔ́ɔ ó le ɔ̄kā da uwá ka ɔyí ā ɔ́ɔ gekwú ɛɛ́ nɛɛ? Anɔ́ɔ é cɛ̄ ka ɔyí ā gekwú ɔkwɛ̄yi.

²⁰Udéfīdi cāŋjɛ ŋmá ajɛ, lɛ iyē gwá, lɛ anɔ̄ nya iyē, le ɛyí fíyɛ́, anɔ́ɔ ó klla le úwé ɔhá kpó wiiyē á. Anɔ́ɔ ó le tá ɛga ō gbā Óndú ā ɛ̄gbā, anɔ́ɔ ó gáā le ɛ̄gbā gbā Óndú ā á. Eko nōó pīyɛyí wā ipú agbla ɔcɛ́ ā, ó le ɔ̄kā ɔdōlé da, anɔ́ɔ ó kwú lé ɔkwɔɔkwu nēé le bī gē lɛ ɔ́ ā á.

²¹Anɔ́ɔ aígabɔ̄ kú ɔlɛ́ nū ā le ɔ̄kā da ɔ́ ka aá ɔ́ɔ jɛ́yí ka ɔdā nɛ̄ ɔ́ɔ yá ā ŋ́. Ohígbū ka eko nɛ̄ ɔyí nū ā ɔ́ɔ yēeyī ɛɛ́ mā, ɔ́ɔ jikwū klla gwōkónu ohígbū nū, amáŋ eko nɛ̄ ɔyí ā ɔ́ɔ gekwú ā, ɔ́ɔ cāŋjɛ klla le ɔdōlé lé.

²²Anɔ́ɔ Udéfīdi da uwá ka eko nɛ̄ ɔyí ā ɔ́ɔ yēeyī ɛɛ́ mā, anúɔ gwōkónu klla jikwū ohígbū ka anúɔ ka ɔ̄cɛ í jé ŋ́, Óndú ā ɔ́ɔ lɔfú méyīnyīnyi anúɔ cɛ́ɛ́ ka ɔyí ā kóō híī kwú ŋ́.

²³Amáŋ ɔyí ā kē gekwú ɛɛ́. Ó lɛ ā ɔdíyá nɛ̄ anúɔ cíkā ō gwōkónu kpɔ́ ɛ́ɛ́ mā? Ka anúɔ í lɔfú je ɔ́ héyī ŋmá ɔlékwū glá gɛ ŋ́. Ó ka anúɔ gáā ga ɛgiyí nū ɛ̄cī éyi mɛ́ɛ̄ á, amáŋ ɔyí ā ɔ́ɔ́ gáā kwúcē wā ɛgiyí anúɔ gbógbóō glá gɛ ŋ́.

²⁴Anɔ́ɔ Udéfīdi lɛ ɔnyā nū ɔtū túlé á. Ó le gwutá mɛ́mla ɔnyā nū, anɔ́ɔ ó klla le ipú yɔ̄ igbɔhá le ɔyínɔ̄nyīlɔ ma á. Udéfīdi kwú iyē í ce ɔ́ ka Usólómɔ̄n. Ɔyí ā he Óndú ā ɔtū nɛ̄hi.

²⁵Anɔ́ɔ ó lɛ Unátan, ɔ̄comɛ́ɛbɛ, ā tɛ̄hɔ̄ kóō kwú iyē í ce ɔyí ā ka Ujedidíya,[1] ohígbū koó he Óndú ā ɔtū.

²⁶Ɛpléeko ɔ́ɔmā Ujówābu yɔ̄ ī kpɛ́fú tú Urábba, igelī nɛ̄hi nōo wɛ ɔlɛ́ ɔtāhɛ̄ kú ācɛ Ámɔn ā gɔbū kpɔ́. Anɔ́ɔ ó mīyɛ igelī nɛ̄hi ā abɔ̄fú.

²⁷Anɔ́ɔ Ujówābu lɛ ɛhɔ̄ tū fu Udéfīdi ka anúɔ le ɛfú kpó tú Urábba, anúɔ kē mīyɛ ɛga nɛ̄ ācɛ igelī nɛ̄hi ā gē hɛ́ éŋkpɔ̄ ŋmá āa ɛɛ́ ā.

²⁸Ujówābu ka abɔ̄ ɔ́ɔ le lɛ ā, Ágábáidú ɔcɛ́ ā, ka ɔ́ɔ̄ lɛ aícɔ́ɔja ohile kú nū kpó, cɛ́ɛ́ ka ɛ́ɛ̄ wā í kpɛ́fú tú igelī nɛ̄hi ā, cɛ́ɛ́ ka ɔ́ɔ̄ mīyɛ ɔ́ abɔ̄yīnū. Ohígbū ka anúɔ í tíne ka ācɛ ka ɛ́ɛ̄ ka ka anúɔ ɔ́ɔ mīyɛ igelī ā ŋ́.

²⁹Anɔ́ɔ Udéfīdi le aícɔ́ɔja kú nū nēe hile ā túbá, anɔ́ɔ é le tá Urábba gaá le ɛfú kpó tú igelī nɛ̄hi ā. Anɔ́ɔ é mīyɛ ɔ́ tɔ̄ɔkwu á.

³⁰Anɔ́ɔ ó kwú ɔfulā kú ɔcɛ́ nōo kwu ojibó kú Umólɛ̄ki ɛyí ā í fu ŋmá ɔ́ ɛyí[2] Ogbɛnú kú ɔfulā ā wɛ ukílōgram ofuciigwɛ́ɛhɔ̄. Ɛcɔ̄ ōgbɔɔlá nɛ̄hi éyi yɔ̄ anú dúú. Udéfīdi kwú ɛcɔ̄ ō gbɔɔ́lá nɛ̄hi ā, anɔ́ɔ ó kwú ɔ̄ ú kwu ɔfulā kú nū á. Ó klla kpó iyó mɛ́mla ije nɛ̄hi ŋmá igelī ā dúú.

³¹Udéfīdi le ācɛ kú ipú igelī nɛ̄hi ā pi abɔ̄fú ka ɛ́ɛ̄ bī ɔdu mɛ́mla āgā mɛ́mla usɔ́ɔ kéē le yúklɔ́ kú ublɔ́kwu ō mā. Ɔdā éékpó ɔ́ɔmā nōó yá mla odúúdú ācɛ kú ipú aígelī nɛ̄hi ohile kú ācɛ Ámɔn á. Anɔ́ɔ anú mɛ́mla ācɛ ɔlɛ́ nū kwúcē le tá Ujerúsālɛm á.