Read idoma 2 USÁMUWƐ̄LU 13 Bible Online

2 USÁMUWƐ̄LU 13 - idoma bible

2 USÁMUWƐ̄LU 13

¹Ábsālɔm ɔyí kú Udéfīdi ā lɛ ɔyínɛ́ nɔ̄nyā éyi nōó lɛ ɔbá ɛ́ɛ́ ŋ́. Iyē kú nū lé ka Utáma. Utáma ā jɔ̄nnyā klla héyīfuú nɛ̄hi. Ɔyí ádā kú Utáma éyi kē yɔ̄. Iyē kú nū lé ka Ámnɔn. Utáma kē kwú he Ámnɔn ɔtū nɛ̄hi.

²Ámnɔn í má ɛga fu Utáma ŋ́ ohígbū ka abɔ̄ Utáma, ɔyí ádā nū ā, í jé ɔ̄cɛnyīlɔ jéjéē ɛ́ɛ́ ŋ́ mā, é kē cɛ̄ le ɔ̄cɛnyīlɔ dóódu túbla anú ŋ́. Ó gbɛlá nū gáágá nōó cɛ̄ lɛ ōcē gbɔɔ́ ō yá ɔ̄.

³Ámnɔn lɛ oklóbīya éyi, nɛ̄ iyē nū lé ka Ujónādāabu, ɔyí kú ɔyínɛ́ kú Udéfīdi, Ussáma. Ujónādāabu lɛ ula obɔ̄bí nɛ̄hi.

⁴Anɔ́ɔ Ujónādāabu le ɔ̄kā da Ámnɔn ka ɔdíyá nɛ̄ eyī kú ɔyí-ɔ́cɛ́ ɔ́ɔ le ŋúlóŋúló klla le kwányíhí ɔ̄cɔ̄ɔ̄cī dóódu ā mɛ́ɛ̄? Ámnɔn tá ɔ̄ ohi ka Utáma, ɔyíné kú ɔyí ádā anúɔ Ábsālɔm, ɔ́ɔ he anúɔ ɔtū nɛ̄hi.

⁵Anɔ́ɔ Ujónādāabu da ɔ́ koó lɛ ā, ɔ́ɔ lɛ ula yá ka anúɔ í doōcē, cɛ́ɛ́ ɔ́ɔ̄ nyɔ̄ í gwutá agōdō. Cɛ́ɛ́ eko nɛ̄ ɔcɛ́ wā gáā má ɔ̄ ā, ɔ́ɔ da Ágábáidu ka ɔ́ɔ̄ híī cɔ̄nū ŋ́, ɔ́ɔ cɛ̄ lɛ Utáma, ɔyínɛ́ anúɔ ka ɔ́ɔ̄ wā í lɛ ɔdōlé je lɛ anúɔ lé. Ɔ́ɔ ka anúɔ tíne ka ɔ́ɔ̄ wā í lɛ ɔdōlé ā yá ipééyī anúɔ cɛ́ɛ́ ɔ́ɔ klla lɛ ɔdōlé ā tū anúɔ okónu kú anúɔ lé.

⁶Anɔ́ɔ Ámnɔn lɛ ula yá ka anúɔ gē doōcē. Anɔ́ɔ ó gaá gwutá agōdō ɔkwɔ̄ɔ̄kwɛ̄yi, ɛ́gɛ́nɛ̄ é nwū ɔ̄ lɛ ā. Ádā nū, Ágábáidu, Udéfīdi, le yɛ nyɔ̄ gaá má ɔ̄, anɔ́ɔ ó da ɔ́ ka ɔ́ɔ̄ kóocōō ka ɔ́ɔ̄ cɛ̄ lɛ Utáma ka ɔ́ɔ̄ wā í lɛ ɔdōlé yá lɛ anúɔ ipéyī anúɔ, cɛ́ɛ́ ɔ́ɔ klla lɛ ɔdōlé ā tū anúɔ okónu abɔ̄yīnū.

⁷Anɔ́ɔ Udéfīdi lɛ ɛhɔ̄ tū fu Utáma ka ɔ́ɔ̄ nyɔ̄ ɔlɛ́ ɔyí ádā nū, Ámnɔn, ka ɔ́ɔ̄ le ɔdōlé yá lɛ ɔ́ á.

⁸Anɔ́ɔ Utáma le tá ɔlɛ́ ɔyínɛ́ nū, Ámnɔn, ɛga nōó gwutá agōdō ā. Anɔ́ɔ ó kwú umu ú anɔ́ɔ ó lɛ igbō yá ipéyī nū á.

⁹Ó kwú igbō ā ú kpó lɛ Ámnɔn ka ɔ́ɔ̄ lé, amáŋ ó tá kóō lé igbō ā. Anɔ́ɔ ó da Utáma ka ɔ́ɔ̄ lɛ ɛjɛ̄ɛ̄jī ācɛ ɔhá dóódu kpó nū ŋmá ipú inu ā, anɔ́ɔ ācɛ ā le pɛ́ nyɛ̄ɛ̄ á.

¹⁰Anɔ́ɔ ó da ɔ́ ka ɔ́ɔ̄ lɛ igbō ā bī gē lɛ anúɔ ɛgiyí agōdō kú anúɔ, cɛ́ɛ́ ka ɔ́ɔ̄ le tá anúɔ okónu abɔ̄yīnū. Anɔ́ɔ Utáma kwú igbō ú le tá ɛgiyí nū á.

¹¹Amáŋ, eko nōó tá igbō ā blla okónu kú Ámnɔn ā, ó kpákli bī ɔ̄, anɔ́ɔ ó da ɔ́ ka ɔ́ɔ̄ wā í gwutá mɛ́mla anúɔ á.

¹²Anɔ́ɔ Utáma tá klla da ɔ́ ka ɔ́ɔ pi anúɔ abɔ̄fú cɛ́ɛ́ ka anúɔ yá ɔdā uwēyī ɛ́gɔ́ɔmā ŋ́. Ó klla da ɔ́ ka ɔ̄cɛ dúúmā í yá ɔdā ɛ́gɔ́ɔmā ipú ajɛ kú Ísrɛ̄lu jéjeé ɛ́ɛ́ ŋ́. Ó ka ɔ́ɔ híī yá ucē kú olíla ɛ́gɔ́ɔmā ŋ́.

¹³Utáma da ɔ́ ka anúɔ ā, ɔwɛ nyá nɛ̄ anúɔ í leyīkwu ācɛ eyī glá ā ohígbū uwēyī āa? Ó klla da ɔ́ ka anú ā bɛ́ɛ, ka ācɛ Ísrɛ̄lu ɛ́ɛ géē kpó okllúu tá ɔ̄. Ó ka anúɔ gbɔ̄ɔkɔ lɛ ɔ́ ka ɔ́ɔ̄ nyɔ̄ í lɛ ɛlā ka lɛ Ágábáidu ɔcɛ́, ka anúɔ jé ka ɔ́ɔ géē je anúɔ lɛ ɔ́ lɛ ɔnyā.

¹⁴Amáŋ Ámnɔn í jāhɔ̄ lɛ ɔ́ ŋ́. Abɔ̄ ó le lɔfú fíyɛ́ Utáma ā, anɔ́ɔ ó lɛ ɔ́ hɛ́ báajɛ le ikpónū ce abɔ̄fú á.

¹⁵Anɔ́ɔ Ámnɔn gbɔɔ́ ō wɔ́ɔtū Utáma nɛ̄ɛ̄nɛ̄hi á. Íwɔ́tū kú eko ɔ́ɔmā ā klla nwuné fíyɛ́ ɛ́gɛ́nɛ̄ ó kōō ka anúɔ ɔ́ɔ yíhɔtū nū eko aflɛ́yí ā á. Anɔ́ɔ ó da ɔ́ kóō le bɛ̄cɛ ŋmá inu ɔlɛ́ anúɔ á.

¹⁶Anɔ́ɔ Utáma da ɔ́ ka ehée, ɔyínɛ́ anúɔ, ka ɛ̄nɛ̄ ɔ́ɔ gē nū anúɔ bɛ̄cɛ ā ɔ́ɔ klla bɔ̄bí fíyɛ́ ɔdā nɛ̄ ɔ́ɔ yá anúɔ ā á. Amáŋ Ámnɔn í jāhɔ̄ lɛ ɔ́ ŋ́.

¹⁷Ikɔkɔ ɔ́ɔmā, ó le ɔ̄cocɛ̄hɔ̄ kú nū hīīgwú anɔ́ɔ ó da ɔ́ ka ɔ́ lɛ ɔnyā ā pi tá ɛcɛ ŋmá eyī kú anúɔ cɛ́ɛ́ ka ɔ́ɔ̄ lɛ ɔwɛ kú ɔlɛ́ anúɔ gwū.

¹⁸Anɔ́ɔ ɔ̄cocɛ̄hɔ̄ kú nū ā lɛ Utáma pi tá ɛcɛ lɛ ɔwɛ gwū á. Utáma le awulú okwajɛ wulu nōo lɛ abɔ̄ ō líkpō wiiyē. Ɛ̄nyā wɛ ɔdōwiīyē kú ɔyí-ɔ́cɛ́ nɔ̄nyā nōó lɛ ɔbá ɛ́ɛ́ ŋ́ kú eko ɔ́ɔmā á.

¹⁹Anɔ́ɔ ó lɛ ewo wu klá ɛyí, klla le awulú kú nū ā híla tū iyī nū iyē. Anɔ́ɔ ó kwú abɔ̄ ú pīya klá eyī ipú uwēyī, anɔ́ɔ ó gbɔɔ́ ō jikwū lɛyíkwu ɔlɛ́ á.

²⁰Eko nɛ̄ ɔyínɛ́ nū, Ábsālɔm, lɛ ɔ́ má ā, ó le ɔ̄kā da ɔ́ ka Ámnɔn, ɔyí ádā nū, ɔ́ɔ lɛ ɔ́ hɛ́báajɛ kɛ̄ɛ? Anɔ́ɔ ó klla da ɔ́ ka ɔ́ɔ̄ mā ikwū mɛ́ɛ́nɛ, ka ɔ́ɔ̄ kwú ɔtū ú ŋmá anú. Ka ɔyí ádā nū nɛ̄ ɔ́ɔ wɛ kpɔ́ á, ohígbū ɔ́ɔmā ka ɔ́ɔ̄ híī da ɔ̄cɛ dúúmā ɔdā dúú lɛyíkwu ɔ́ ŋ́. Anɔ́ɔ Utáma má lā ɔlɛ́ Ábsālɔm, ɔyínɛ́ nū á. Amáŋ ó yɔ̄ ōfōōfūnū ipú ɔtūnōbí nɛ̄hi.

²¹Eko nɛ̄ Ágábáidu, Udéfīdi, le ɔdā nōo yá ā pó ā, ó kwú cɔ̄nū nɛ̄hi.

²²Ábsālɔm í ka ɔdā dúúmā lɛ Amnɔn ŋ́. Amáŋ ó wɔ́tū Ámnɔn nɛ̄ɛ̄nɛ̄hi ohígbū Utáma, ɔyínɛ́ nū nɔ̄nyā, nɛ̄ Ámnɔn hɛ́báajɛ ā.

²³Iháyí ɛpa wā í le gla, anɔ́ɔ Ábsālɔm yɔ̄ í wā ɔnwū kú aálá kú nū, Ubaalu Uhásɔ nōo kwu Ɛfrēm ajaajɛ ā. Anɔ́ɔ ó le odúúdú ayí-ɔ́cɛ́ nɔ̄nyīlɔ kpó hīgwú wā abɔ́ɔ á.

²⁴Ábsālɔm le tá ɛgiyí ádā nū, anɔ́ɔ ó da Ágábáidu ɔcɛ́ ka ɛ́ɛ bá ī wá aálá kú ɔlɛ́ anúɔ ɔnwū. Ó ka anú mɛ́mla aígabɔ̄ kú ɔlɛ́ nū, ɛ́ɛ́ wā í lé ucɛ mɛ́mla anúɔ glá āa?

²⁵Udéfīdi da ɔ́ kahíníī, “Ɔyí um, odúúdú alɔ í gáā nyɔ̄ glá ŋ́, ohígbū nōó géē je pīya iyó wu ɔ̄ ɔkɔ.” Ábsālɔm í cɛ̄ ŋ́, nááná ā, ɔcɛ́ í kē cɛ̄ ŋ́ dúú. Amáŋ ɔcɛ́ da ɔ́ ka ɔ́ɔ nyɔ̄ í lé ucɛ ā ɛbɔ́, anɔ́ɔ ó da Ábsālɔm kóō nyɔ̄ á.

²⁶Amáŋ Ábsālɔm klla da Ágábáidu ɔcɛ́ ā ka ɔ́ɔ̄ géē cɛ̄ ka ɔyínɛ́ anúɔ, Ámnɔn ka ɔ́ɔ̄ nyɔ̄ mɛ́mla aá āā? Anɔ́ɔ ɔcɛ́ ā da ɔ́ ɔ̄kā ka ɔdí ɔ́ɔ yá ɛ́ɛ́ nɛ̄ ɔ́ɔ cíkā ō nyɔ̄ mɛ́mla uwá āa?

²⁷Amáŋ Ábsālɔm yɔ̄ ī kɛlā lɛ Ágábáidu ɔcɛ́ ā, jāā gbéeko nɛ̄ ɔcɛ́ cɛ̄ kú Ámnɔn ka ɔ́ɔ̄ nyɔ̄ mɛ́mla ayí anúɔ ohile ā mɛ́ɛ́nɛ. Anɔ́ɔ Ábsālɔm lɛ ucɛ nōo cíkā lɛ ɔcɛ́ ā yá lɛ uwá á.

²⁸Anɔ́ɔ Ábsālɔm le da ācocɛ̄hɔ̄ kú nū ka ɛ́ɛ̄ leyī táajɛ eko nɛ̄ Ámnɔn ɔ́ɔ lɛ ejé gwá nɛ̄hi. Ó le lɛ ā eko nɛ̄ anúɔ lɛ ɔ́da je, ka ɛ́ɛ̄ lɛ ɔ́ ŋmó. Ó da uwá ka ɛ́ɛ̄ híī yúúfi ŋ́, ka anúɔ ɔ́ɔ lɛ ɛfiyɛ kú nū á.

²⁹Anɔ́ɔ ācocɛ̄hɔ̄ kú Ábsālɔm ā yɛce ɔdā nōó da uwá ā, anɔ́ɔ é le Ámnɔn ŋmó á. Ayí kú Udéfīdi ohile ā le icō aɔ́nya kú uwá kpó tū anɔ́ɔ é le pɛ́ kwu á.

³⁰Eko nɛ̄ uwá bá í nyɔ̄ ɔlɛ́ ā, ɔ̄kā gaá le kā Udéfīdi ka Ábsālɔm ɔ́ɔ le odúúdú ayí nū kpó ŋmó. É da ɔ́ ka odúúmā kú uwá ɔ́ɔ hile ŋ́.

³¹Udéfīdi cāŋjɛ le īlī kú nū híla ipú ɔtūnōbí klla lɛ īyī nū tá fīyɛ̄ ajɛ. Ācocɛ̄hɔ̄ kú ɔlɛ́ nū nēé bá abɔ́ɔ mɛ́mla anú ā le īlī kú uwá híla tū īyī uwā iyē dúú.

³²Amáŋ Ujónādāabu, ɔyí kú ɔyínɛ́ kú Udéfīdi ā, da ɔ́ ka Ágábáidu, ɔ́ɔ wɛ odúúdú ayí nū nɛ̄ ɛ́ɛ kpó ŋmó ā ŋ́. Ka Ámnɔn ōfōōfūnū ɔ́ɔ kwú á. Ó da ɔ́ ka ɔ́dāŋ nɛ̄ ɔ̄cɛ ɔ́ɔ má īkpéyī kú Ábsālɔm, ɔ́ɔ lɔfú jé ka ɔ́ɔ le ɔtū kú nū yéékpó kóō yá ɔdā nɛ̄ ɔ́ɔ yá ā oŋmífī nɛ̄ Ámnɔn hɛ́ Utáma, ɔyínɛ́ nū, báajɛ ā.

³³Ujónādāabu klla da ɔ́ ka ɔ́ɔ híī kpɔ́tūce ɔ̄kā nēé kā ɔ̄ ka odúúdú ayí nū ɛ́ɛ le pɛ́ gekwú ā ŋ́. Ó ka Ámnɔn ōfōōfūnū nɛ̄ ɛ́ɛ ŋmó á.

³⁴Eko ɔ́ɔmā Ábsālɔm le kwu ɛɛ́. Ícɔ́ɔ́ja nōo gē gbāajɛ ā le ɛwa nɛ̄hi kú ācɛ má bá ī wúlatū wā ajɛ ŋmá ɛfu kú Uhoronéyim ā. Anɔ́ɔ ícɔ́ɔja ā le tá ɛgiyí Udéfīdi gaá le ɔdā nōó má ā ka lɛ ɔ́ á.

³⁵Ujónādāabu da Udéfīdi ka ayí nū ɛ́ɛ bá gē wā ɔlɛ́ á, ɛ́gɛ́nɛ̄ anúɔ tɛtɛ da ɔ́ ā.

³⁶Abɔ̄ ó le ɛ̄nyā ka bōōbū ā, ayí kú Udéfīdi kwú pɛ́ wā ɔlɛ́. Anɔ́ɔ é gbɔɔ́ ō jikwú. Udéfīdi mɛ́mla aígabɔ̄ kú ɔlɛ́ nū klla gbɔɔ́ ō jikwú gbōmgbōm mɛ́mla uwá.

³⁷Amáŋ Ábsālɔm le kwu le tá ɛgiyí Utálmāyi, ɔyí kú Ammíhūdu, ɔcɛ́ kú Ugɛ́ssɔ. Udéfīdi yēkwu kú Ámnɔn, ɔyí nū ā, gbojī nɛ̄hi.

³⁸Anɔ́ɔ Ábsɔ̄lɔm le kwu ga Ugéssɔ, ó kē klá abɔ́ɔ iháyí ɛtá

³⁹Amáŋ eko nɛ̄ Ágábáidu Udéfīdi, le ekwu kú Ámnɔn gwā ā, eyī kú Ábsālɔm klla gbɔɔ́ ō ce ɔ́.