Read idoma 2 USÁMUWƐ̄LU 14 Bible Online

2 USÁMUWƐ̄LU 14 - idoma bible

2 USÁMUWƐ̄LU 14

¹Ujówābu le jé ka abɔ̄ Ábsālɔm ɔ́ɔ kwú Ágábáidu, Udéfīdi, ɔcɛ́ ā nɛ̄ɛ̄nɛ̄hi.

²Anɔ́ɔ Ujówābu le ɛhɔ̄ tū ga Utekówa gaá le ɔnyā ojéeyī nɛ̄hi éyi bī ŋmá abɔ́ɔ á. Eko nɛ̄ ɔnyā ā gā ā, ó da ɔ́ ka ɔ́ɔ lɛ ula yá bɔ̄ɔ̄dā nɛ̄ ɔ́ɔ yēekwu ā. Cɛ́ɛ́ ɔ́ɔ kwú úwé ekwu í wiyē. Ɔ́ɔ klla lɛ anɔ̄ nya iyē ŋ́, ɛ́ nɛ̄ ɔ́ɔ klla ī yá ɛyí kú nū ŋ́. Ó klla da ɔ́ ka ɔ́ɔ̄ yá bɔ̄ɔdā nɛ̄ ɔ́ɔ yɔ̄ ī yēekwu ɔ̄cɛ éyi nōo gekwú ā.

³Anɔ́ɔ ó da ɔnyā ka ɔ́ɔ nyɔ̄ gaá lɛ ɛlā nɛ̄ anúɔ í ka lɛ ɔ́ ā da Ágábáidu, ɔcɛ́ ā. Anɔ́ɔ Ujówābu le ɛlā nɛ̄ ɔnyā ā géē ka ā nwū ɔ̄ á.

⁴Eko nɛ̄ ɔnyā kú Utekówa ā ga ɛgiyí Udéfīdi, ɔcɛ́ ā, ó gaá gbo klāajɛ iyɔ̄bū nū, anɔ́ɔ ó le ágbá tá ɔ́ á. Anɔ́ɔ ó kahíníī, “Ágábáidu, tá um abɔ̄.”

⁵Anɔ́ɔ Udéfīdi, ɔcɛ́ ā da ɔ́ ɔ̄kā ka ɔdí ɔ́ɔ wɛ unwalu kú nū āa? Ɔnyā ā da ɔ́ ka ɔ́ɔ má ɔ̄ ka anúɔ wɛ ɔnyōkwū, ka ɔbá anúɔ ɔ́ɔ gekwú ɛɛ́.

⁶Ɔnyā ā da ɔ́ ka anúɔ lɛ ayínɔ̄nyīlɔ ɛpa. Anɔ́ɔ ɛ́ɛ le ikpɛ́lā yá tū īyī ūwā ipácí. Ɔ̄cɛ dúúmā ɔ́ɔ yɔ̄ nɛ̄ ɔ́ɔ gē kɔ̄ uwá ŋ́ mā, éyi kú uwā ɔ́ɔ le odée fíyɛ́ ɔ́mpānū le ɔ́ ŋmó.

⁷Anɔ́ɔ odúúdú ācɛ ɔlɛ́ ádā uwá ɛ́ɛ le kpó da anúɔ ka anúɔ kwú ɔyínɔ̄nyīlɔ kú anúɔ nɛ̄ ɔ́ɔ ŋmó ɔ́mpānū ā ú tɛ́ɛcɛ lɛ aá, cɛ́ɛ́ kú aá lɛ ɔ́ ŋmó kwɛyí ɔ́mpānū nɛ̄ ɔ́ɔ ŋmó ā. Ɔnyā klla da ɔcɛ́ ā ka ɔ́dāŋ ka ɛ́ɛ lɛ ɔdā nɛ̄ ɛ́ɛ tíne ā yá, ɛɛ́mba ɛfɔ́ɔ́lá ékpónú kú anúɔ nɛ̄ ɔ́ɔ yēeyī ā nɛ̄ ɛ́ɛ je nyí á. Ó ka ɔ̄cɛ dúúmā ɔ́ɔ klla gáā hile nɛ̄ ɔ́ɔ géē lé iyē kú ádā uwā ɛɛ́ gɛ ŋ́. Ka ācɛ ɛ́ɛ́ klla gáā blakwu ɔbá anúɔ ipú ɛcɛ ā ɛ́ɛ́ gɛ ŋ́.

⁸Anɔ́ɔ Ágábáidu, ɔcɛ́ da ɔnyā ā ka ɔ́ɔ nyɔ̄ ga ɔlɛ́ nū mɛ́ɛ́nɛ. Ka anúɔ géē yá odée lɛyíkwu unwalu kú nū ā.

⁹Anɔ́ɔ ɔnyā kú Utekówa da Ágábáidu, ɔcɛ́ ka ɛfiyɛ kú ɔdā dúúmā nɛ̄ ɔ́ɔ géē yá ā ká ɔ̄ ce anúɔ mɛ́mla ipɔ́ɔ́nū kú ɔlɛ́ anúɔ ɛyí. Ka ipɔ́nū kú ɔlɛ́ Ágábáidu ɔcɛ́, í gáā lɛ́pɔ̄bí kú ɔdā dúúmā ŋ́.

¹⁰Ágábáidu ɔcɛ́, Udéfīdi da ɔnyā ka ɔ́dāŋ ka ɔ̄cɛ dúúmā ɔ́ɔ le unwalu je lɛ ɔ́, ɔ́ɔ̄ lɛ ɔ̄cɛ ɔ́ɔmā bī wā gé lɛ anúɔ, anúɔ ɔ́ɔ kē í yá nɛ̄ ɔ̄cɛ ɔ́ɔmā ɔ́ɔ klla gáā junwalu lɛ ɔ́ igbɔhá ɛ́ɛ́ ŋ́.

¹¹Anɔ́ɔ ɔnyā ā le ɔkɔ gbā lɛ ɔcɛ́ ā ka ɔ́ɔ̄ lɛ Ɔwɔicō gbo lɛ anúɔ, ka ɔ́ɔ̄ gáā cɛ̄ lɛ ɔmáapú aá nōo cíkā ō gwɔ̄ɔ́ci ā kóō gwō ɔyí anúɔ ɔhá nóō yēeyī ā ɔ́ci, je ɔ́ ŋmó gɛ ŋ́. Anɔ́ɔ Ágábáidu ɔcɛ́, le okónu ce lɛ ɔ́ klla le ɔkpá gbo ka īnyīlɛyí ékpónú kú ɔyínɔ̄nyīlɔ kú nū ɔ́ɔ gáā wāajɛ ŋmá ɛyí kú nū ŋ́.

¹²Anɔ́ɔ ɔnyā ā da ɔ́ kā anúɔ klla lɛ ɛlā ékpónú ka lɛ Ágábáidu ɔcɛ́ kpɔ́ ɛ́ɛ́. Ɔcɛ́ da ɔ́ ka ɔ́ɔ̄ ka nyɔ̄ n̄.

¹³Anɔ́ɔ ɔnyā ā da ɔ́ ɔ̄kā ka ɔdíyá nɛ̄ ɔ́ɔ yɔ̄ ī yá ācɛ Ísrɛ̄lu ɔdōbɔ̄bí ɛdɔ ɛ́gɔ́ɔmā āa? Ó klla da ɔ́ ka ɔdā nōo yá ɛ́ɛ́ nɛ̄ ɔ́ɔ cɛ̄ lɛ ɔyí nū kwúcē wā ɔlɛ́ ŋmá ɛga nōó kwu nyɔ̄ ŋ́ mā, Ágábáidu ɔcɛ́, ɔ́ɔ lɛ́pɔ̄bí ŋmó iyī nū ŋmá lɛ ɛpɔ̄hi nɛ̄ ɔ́ɔ hɛ́ lɛ anúɔ ā ɛ́ɛ́.

¹⁴Ó klla da Ágábáidu ɔcɛ́, ka odúúdú ācɛ ɛ́ɛ géē pɛ́ kwú ɛ̄cī éyi pií. Ɔnyā ā ka ɛ́gɛ́nɛ̄ éŋkpɔ̄ nɛ̄ ɔ́ɔ le pīya klá ajɛ, ɔ́ɔ klla tōō kpó ŋmá ajɛ glá gɛ ŋ́ mā, ka ɛ́gɔ́ɔmā nɛ̄ ɔlɛɛcɛ nɛ̄ ɔ́ɔ gekwú ɔ́ɔ lɛ ā á. Ó ka nááná nɛ̄ Ɔwɔicō ɔ́ gē je okwū héyī ŋmá ɔlékwū ŋ́ mā, amáŋ ɔ́ɔ gē yá ɔwɛ ká ɔ́ɔ̄ je ɔ̄cɛ nɛ̄ ɔ́ɔ kwu ŋmá ɛgiyí nū ā kwúcē wā ɔlɛ́ ɛgiyí nū.

¹⁵Ɔnyā ā ka anúɔ wā í ka unwalu kú anúɔ ā lɛ Ágábáidu ɔcɛ́, ohígbū ka anúɔ yɔ̄ ī yúufi ɔdā nɛ̄ ācɛ ā ɛ́ɛ gē yá anúɔ ā. Anɔ́ɔ anúɔ da iyī anúɔ ka anúɔ géē kɛlā lɛ Ágábáidu ɔcɛ́ ā ipú eyīyōce ka ɔ́ɔ géē yá ɔdā nɛ̄ anúɔ dɔɔ̄kā ā glá.

¹⁶Ó ka anúɔ gbɛlá ka Ágábáidu ɔcɛ́, ɔ́ɔ géē pó ɔkɔ kú anúɔ cɛ́ɛ́ ɔ́ɔ lɛ anúɔ nyatá ŋmá ipú abɔ̄ kú ācɛ nēe tíne ka ɛ́ɛ̄ lɛ anúɔ mɛ́mla ɔyínɔ̄nyīlɔ kú ɔlɛ́ anúɔ kpó ŋmó ŋmá ipú ajɛ nɛ̄ Ɔwɔicō ɔ́ɔ je lɛ ācɛ ɔlɛ́ nū āa.

¹⁷Ɔnyā ā ka anúɔ klla gbɛlá ipú odo kú anúɔ ka okónu nɛ̄ ɔ́ɔ ce ā ɔ́ɔ í cɛ̄ lɛ odo kú anúɔ í wāajɛ, ohígbū ka anú nɛ̄ ɔ́ɔ wɛ̄ Ágábáidu ɔcɛ́ ā ɔ́ɔ lɛbɛ̄ɛka alelékwū ōtɛ̄hɔ̄ kú Ɔwɔicō ā nɛ̄ ɔ́ɔ lɔfú jé ɛyɛ́ɛyɛ́yí kú ɔdōbɔ̄bí ŋmá ɔdā olɔhi glá ā.

¹⁸Anɔ́ɔ Ágábáidu ɔcɛ́ ā da ɔnyā ā ka anúɔ gáā da ɔ́ ɔ̄kā éyi, ɔ́ɔ kē í da anúɔ odúúdú ɛlā ɔkwɛ̄yi kú ɛlā piií. Anɔ́ɔ ɔnyā tá Ágábáidu ɔcɛ́ ohi ka ɔ́ɔ da anúɔ ɛdɔ ɔ̄kā dóódu nɛ̄ ɔ́ɔ he ɔ́ ɔtū ā mɛ́ɛnɛ.

¹⁹Anɔ́ɔ Ágábáidu ɔcɛ́, Udéfīdi da ɔ́ ɔ̄kā ka Ujówābu ɔ́ɔ lɛ abɔ̄ ipú iyāwu kú nū ā nɛɛ? Anɔ́ɔ ɔnyā ā ka ákú ɔkwɔ̄ɔ̄kwɛ̄yi ohígbū nū ā, ka ɛ́gɛ́nɛ̄ ɔ́ɔ ka ā nɛ̄ ɔ́ɔ wɛ á. Ka Ujówābu, otrɛ̄yí kú aícɔ́ɔja kú ɔlɛ́ nū ɔ́ɔ cē ɛlā tū anúɔ ipú kú anúɔ ka ɔdā nɛ̄ anúɔ ka ā á.

²⁰Ka amáŋ ɔdā nōo yá ɛ́ɛ́ nɛ̄ Ujówābu ɔ́ɔ yá lɛ ā wɛ o yá kú anú nɛ̄ ɔ́ɔ wɛ ɔcɛ́ ā ka ɔ́ɔ̄ bī eyī ɔnyākwɔ́cɛ lɛ ɛlā má, cɛ́ɛ́ ka ɔ́ɔ lɛ ɔ́ yátū. Ó da ɔ́ ka ɔ́ɔ jééyī bɛ̄ɛka alelékwū-ōtɛ̄hɔ̄ kú Óndú ā, ɔ́ɔ klla jé ɔdā dóódu nōo gē yá ipú ajɛ āa.

²¹Anɔ́ɔ Ágábáidu Udéfīdi le ɛhɔ̄ tū fu Ujówābu ka anúɔ géē yá ɔdā nɛ̄ ɔ́ɔ tíne ā á. Ka ɔ́ɔ nyɔ̄ í lɛ Ábsālɔm bī wā ɔlɛ́.

²²Ujówābu wā gaá lɛ eyī pīya kla ajɛ iyɔ̄bū ɔcɛ́ le okónu hɛ́ tū ɔ̄. Anɔ́ɔ ó ka Ɔwɔicō ɔ́ɔ hɔ́hā ce anú nɛ̄ ɔ́ɔ wɛ Ágábáidu ā. Ó ka anúɔ le jé ŋmá eko ɔ́ɔmā ka ɔtū anúɔ ɔ́ɔ he ɔ́, ohígbū ka ɔ́ɔ cɛ̄ ɛ̄ba nɛ̄ anúɔ ɔ́ɔ ba ɔ́ ā.

²³Anɔ́ɔ ó cāŋjɛ le tá Ugéssɔ gaá lɛ Ábsālɔm bī wā Ujerúsālɛm á.

²⁴Amáŋ ɔcɛ́ le ɔ́da je ka Ábsālɔm ká ɔ̄ lā ɔlɛ́ abɔ̄yīnū, ka ɔ́ɔ̄ híī wā í lā ipú agbla kú ɔcɛ́ ŋ́, ohígbū ka anúɔ í tíne ká anúɔ má ɔ̄ ŋ́. Anɔ́ɔ Ábsālɔm nyɔ̄ í lā ɔlɛ́ nū, anɔ́ɔ ó wā ɛgiyí ɔcɛ́ ɛ́ɛ́ gɛ ŋ́ má.

²⁵Ɔ̄cɛ dúúmā í yɔ̄ Ísrɛ̄lu nōo jōklóbīya bɛ̄ɛka Ábsālɔm ā ɛ́ɛ́ gɛ ŋ́. Oŋmíicō kwaajɛ, ó lɛ ɛcá dúúmā ŋ́.

²⁶Īnyīlɛyí kú nū gwā nɛ̄hi. É gē wá ɔ̄ ɛyí igbeyí iháyí dóódu, eko nɛ̄ īnyīlɛ̄yí ā le gwā līkpō nɛ̄ɛ̄nɛ̄hi le doobū klla kwú gbɛnú nɛ̄hi. Īnyīlɛ̄yí ā gē gbɛnú bɛ̄ɛka ukílōgram ɛpa ɛ́gɛ́nɛ̄ é gē miya odée ɔlɛ́ ɔcɛ́ lɛ ā.

²⁷Ábsālɔm ma ayínɔ̄nyīlɔ ɛtá mɛ́mla ɔyínɔ̄nyā éyi. Ɔyínɔ̄nyā ā lé ka Utáma. Ó jɔ̄ɔ́ncɛ́nyā nɛ̄hi.

²⁸Ábsālɔm lā Ujerúsālɛm iháyí ɛpa, nōó bī ikpēyī kú nū le má ɔcɛ́, ádā nū ŋ́.

²⁹Anɔ́ɔ ó lɛ ɛhɔ̄ tū fu Ujówābu ka ɔ́ɔ le tá ɛgiyí Ágábáidu Udéfīdi ka ɔ́ɔ lɛ ɛlā ka lɛ ɔ́ kwɛyí anúɔ. Ámáŋ Ujówābu í wā ɛgiyí nū ŋ́. Ó klla lɛ ɛhɔ̄ tū fu Ujówābu igbɔhá kpɔ́, Ujówābu klla tá ō wā kpɔ́.

³⁰Anɔ́ɔ Ábsālɔm le ɛlā ka lɛ ācocɛ̄hɔ̄ kú ɔlɛ́ nū ka Ujówābu ɔ́ɔ hɛ́hɔ̄ gboce ákú anúɔ á. Ka ɔ́ɔ kē hí igwu nōo yɔ̄ ī jɛ̄ ipú nū. Ó da uwá ka ɛ́ɛ̄ nyɔ̄ í lɛ ɛhɔ̄ ā tɔ̄lá. Anɔ́ɔ é nyɔ̄ í lɛ ɔ́ tɔ̄lá á.

³¹Abɔ̄ ācɛ ā le yá lɛ ā, Ujówābu le tá ɔlɛ́ Ábsālɔm gaá le ɔ̄kā da ɔ́ ka ɔdíyá nɛ̄ ācɛ ɔlɛ́ nū nyɔ̄ gaá je igwu kú anúɔ tɔ̄ɔlá āa?

³²Anɔ́ɔ Ábsālɔm tá ɔ̄ ohi ka ohígbū ka ɔ́ɔ gē tá igwú kú anúɔ eko dúú nɛ̄ anúɔ le ɔ́ hīgwú. Ó da Ujówābu ka anúɔ tíne ka ɔ́ɔ̄ nyɔ̄ ɛgiyí Ágábáidu Udéfīdi kwɛyí anúɔ gaá lɛ ɔ̄kā da ɔ́ lɛ anúɔ ka, ɔdíyá nɛ̄ ɔ́ɔ cɛ̄ lɛ anúɔ kwúcē wā ɔlɛ́ ŋmá Ugéssɔ āa? Ka ɔ́ɔ í yɛ í lɔhi fíyɛ́ ka anúɔ klla abɔ́ɔ kpɔ́. Anɔ́ɔ ó da Ujówābu ka ɔ́ɔ̄ lɛ ɔ́ yá tɔ́ɔtɛ́ lɛ anúɔ cɛ́ɛ́ kú anúɔ lɛ Ágábáidu Udéfīdi má. Ka ɔ́dāŋ ka anúɔ lɛ ɛpɔ̄bí kú nū lé nɛɛ, ɛ́mba ɔ́ɔ lɛ anúɔ ŋmó.

³³Anɔ́ɔ Ujówābu le tá ɛgiyí ɔcɛ́, gaá lɛ ɛlā nɛ̄ Ábsālɔm ka ā ka lɛ Ágábáidu Udéfīdi á. Anɔ́ɔ Ágábáidu Udéfīdi lɛ ɛhɔ̄ tū fu Ábsālɔm á. Ó le tá ɛgiyí nū, anɔ́ɔ ó gaá gbo klá ajɛ iyɔ̄bū ɔcɛ́ á. Anɔ́ɔ ɔcɛ́ mīyɛ ɔ́ le ɔ́ kwú bá ɔtū á.