Read idoma 2 USÁMUWƐ̄LU 15 Bible Online

2 USÁMUWƐ̄LU 15 - idoma bible

2 USÁMUWƐ̄LU 15

¹Igbīhi ɔdā nōo yá nyā, Ábsālɔm lɛ úgbɔ́ɔnya nɛ̄ aɔ́nya gē pi lā. Ó klla lɛ ācɛnyīlɔ ofɛpa cigwó nēe gē bá ī kwínya tū iyɔ̄bū úgbɔ́ɔnya kú nú.

²Ó gē cāŋjɛ ekeeko gaá háyi ɔwɛ nēe yɛ ga okónɔɔwɛ kú igá kú igelī ā. Cɛ́ɛ́ eko nɛ̄ ɔ̄cɛ dúúmā lɛ ɛpɔ̄ nōó tíne kú Ágábáidu Udéfīdi kóō ka uwá gwó nɛɛ, Ábsálɔm gē hī ɔ̄cɛ ɛ́gɔ́ɔmā igwú ga okónōgwu cɛ́ɛ́ ó gē da ɔ́ ɔ̄kā kú ɛga nōó ŋmá āa. Eko nɛ̄ ɔ̄cɛ ā le ipɔ́ɔma nōó ŋmá ā ka lɛ ɔ́ nɛɛ,

³ó da ɔ́ ka ɔ́ɔ í lɛ́pɔ̄hi ɛlā ā. Amáŋ Ágábáidu ɔ́ɔ fu ɔ̄cɛ dúúmā kóō pó ɔkɔ kú nū ŋ́.

⁴Ó klla da ɔ̄cɛ ɛ́gɔ́ɔmā ka eyī yá anúɔ ká anúɔ kwú pīya ɔ̄cohɛ́pɔ̄. Cɛ́ɛ́ ɔ̄cɛ dúúmā nɛ̄ ɔ́ɔ le ɛdɔ ikpɛ́lā dúúmā nɛɛ, anúɔ géē hɛ́pɔ̄hi lɛ ɔ́.

⁵Eko nɛ̄ ɔ̄cɛ ā le túblá Ábsālɔm kóō gaá túkpɛɛ́ lɛ ɔ́ nɛɛ, cɛ́ɛ́ Ábsālɔm gē wā ɛgiyí nū, cɛ́ɛ́ ó gaá lɛ ɔ̄cɛ ɔ́ɔmā kwú bá ɔtú.

⁶Ɛ́gɛ́nyā nɛ̄ Ábsālɔm gē yá mla odúúdú ācɛ nēe gē bī ɛpɔ̄ wā ɛgiyí Ágábáidu Udéfīdi ka ɔ́ɔ̄ hɛ́pɔ̄ lɛ uwá á. Ó bī ɔwɛ ɔ́ɔmā le ɔtū kú ācɛ Ísrɛ̄lu pi wā ɛgiyí nū.

⁷Igbīhi oŋmɛ́yí kú iháyí ɔ́mɛɛnɛ,[3] Ábsālɔm le ɔ́gbá tá Ágábáidu Udéfīdi ka ɔ́ɔ lɛ ɛga je lɛ anúɔ cɛ́ɛ́ kú anúɔ lɛ tá Uhɛ́brɔn gaá le okónu nɛ̄ anúɔ ce lɛ Óndú ā yá jīla.

⁸Ó da ɔ́ ka eko nɛ̄ anúɔ yɔ̄ Ugéssɔ ā, anúɔ le okónu ce lɛ Óndú ā ka anúɔ géē wā í gbā ɔ̄ ɛ̄gbā ipú ajɛ kú ācɛ Uhɛ́brɔn, ɔ́dāŋ ka ɔ́ɔ kwú anúɔ ú kwúcē wā Ujerúsālɛm.

⁹Udéfīdi, ɔcɛ́ ā, da ɔ́ ka ɔ́ɔ̄ nyɔ̄ ɛbɔ́. Anɔ́ɔ ó nyɛ̄ɛ̄ le tá Uhɛ́brɔn á.

¹⁰Amáŋ, Ábsālɔm lɛ ɛhɔ̄ tū wɛɛlɛ yɛ ipú odúúdú aípɔ́ɔma kú Ísrɛ̄lu ā ka eko dúú nɛ̄ ɛ́ɛ lɛ ɔkɔ kú opo pó ɛɛ́, ɛ́ɛ̄ ka ka Ábsālɔm ɔ́ɔ lɛ ɔcɛ́ lé ajɛ kú Uhɛ́brɔn ɛɛ́.

¹¹Eko nɛ̄ Ábsālɔm yɔ̄ í ga Uhɛ́brɔn ā, ó lɛ ācɛ ofu igwó plla kɛ́ɛ̄ nyɔ̄ mla anú. É kē le yɛ mla anú icííci, amáŋ é kē jé ɔdā dúúmā nōó yɔ̄ ī yá ā ŋ́.

¹²Anɔ́ɔ eko nɛ̄ Ábsālɔm yɔ̄ gē gwɛ́ɛya ā, ó le ɛhɔ̄ tū fu Ahítōfɛlu, ɔ̄cɛ Ugílo, nōo wɛ igabɔ̄ kú ɔlɛ́ Udéfīdi ā. Ibīyāajɛ nɛ̄ Ábsálɔm yá tú ɔcɛ́ ā le fāajɛ nɛ̄hi. Ɛ́gɔ́ɔmā nɛ̄ ācɛ nēe gē yɛce ɔ́ bá gē lɛwa tōōtɔ̄ɔ̄ lɛ ā á.

¹³Ɛ̄cī éyi, ɔ̄cōtɛ̄hɔ̄ éyi gaá le da Ágábáidu, Udéfīdi ka ācɛ Ísrɛ̄lu ɛ́ɛ le pɛ́ nyɔ̄ í yɛce Ábsālɔm ɛɛ́.

¹⁴Abɔ̄ ó le lɛ ā, Udéfīdi le da odúúdú aígabɔ̄ kú ɔlɛ́ nū nēe bá mla anú Ujerúsālɛm ā ka ɛ́ɛ̄ páápá cɛ́ɛ́ ká aá le pɛ́ kwu ŋmá ɛgiyí Ábsālɔm amáŋ ɔ́ɔ géē wā ɛga nɛ̄ aá ɔ́ɔ bá ā gaá lɛ ɛjɛ̄ɛ̄jī ācɛ nēe bá ipú igelī ā kpó ŋmó.

¹⁵Aígabɔ̄ kú ɔcɛ́ ā tá ɔ̄ ohi ka aá géē yá ɔdā dóódu nɛ̄ ɔ́ɔ ka lɛ aá.

¹⁶Anɔ́ɔ Udéfīdi mɛ́mla aíkonó kú ɔlɛ́ nū mɛ́mla aígabɔ̄ kú nū ā le pɛ́ nyɛ̄ɛ̄ á. Amáŋ ó habɔ̄ anyā ɔlɛ́ nū igwó tá bá ipú agbla kú ɔcɛ́ ā.

¹⁷Abɔ̄ Udéfīdi mɛ́mla ācɛ ɔlɛ́ nū bá gē bɛ̄cɛ ŋmá ipú igelī ā, é gaá háyi pī ɔlɛ́ ámōōmɛ ā.

¹⁸Anɔ́ɔ odúúdú ācocɛ̄hɔ̄ kú nū bá ī pɛ́ yɛ[4] gaá bū iyɔ̄bū ɔcɛ́ ā. Ācogbāajɛ kú ɔcɛ́ nēe wɛ aícɔ́ɔja úlā ce ofiigwó (600) nēe yɛce ɔ́ ŋmá Ugáti ā, pɛ́ wā gáā yɛ iyɔ̄bū nū, cɛ́ɛ́ kóō gaá gbɔbū uwā.

¹⁹Anɔ́ɔ ɔcɛ́ ā da Ítāyi, nēe wɛ otrɛ̄yí kú aícɔ́ɔja ā ɔ̄kā ka ɔdíyá nɛ̄ anú nɛ̄ ɔ́ɔ wɛ ɔ̄cɛ éwɔhá, nōo klla kwu ŋmá ajɛ kú ɔlɛ́ nū ā, ɔ́ɔ yɔ̄ gē nyɔ̄ mla aá ā. Anɔ́ɔ ó da ɔ́ ka ɔ́ɔ̄ nyɔ̄ í klá mɛ́mla ɔcɛ́ ɛ̄yīpɛ̄ ā.

²⁰Udéfīdi klla da ɔ́ ka ɔ́ɔ lā pī aá gbojī ɛ́ɛ́ ŋ́, ɔdíyá nɛ̄ anúɔ í cɛ̄ lɛ ɔ́ í yɔ̄ ī yɛ mla anúɔ bliíblií āa. Ó klla da ɔ́ ka anúɔ í kōō jé ɛga nɛ̄ anúɔ gē nyɔ̄ ā ɛ́ɛ́ ŋ́. Ó ka ohígbū ɔ́ɔmā ā ɔ́ɔ lɛ ācɛ ɔlɛ́ nū kpó tɔ̄ɔkwu cɛ́ɛ́ kéē lɛ cīgbīhi. Udéfīdi, ɔcɛ́ ā, da ɔ́ ka Óndú ā ka ɔ́ɔ̄ méyīnyinyi uwā klla yíihɔtū uwā eko dóódu.

²¹Amáŋ Ítāyi tá ɔ̄ ohi kahíníī, “N gbo Ɔwɔicō, mɛ́mla awɔ nōo wɛ Ágábáidu ā, n géē ga ɛga dóódu nɛ̄ a í nyɔ̄ ā mɛ́mla uwɔ. Ɔ́dāŋ kōō cɛ̄ ikwū nááná n le tútū ō kwú mɛ́mla uwɔ dúú.”

²²Udéfīdi ɔcɛ́ ā da Ítāyi ká ɔ̄ wā mɛ́mla anúɔ mɛ́ɛ́nɛ. Anɔ́ɔ Ítāyi mɛ́mla odúúdú ācɛ ɔlɛ́ nū wā í le pɛ́ i yɛ mla Udéfīdi, ɔcɛ́ ā á.

²³Odúúdú ācɛ Ujerúsālɛm jikwū gbōmgbōm abɔ̄ ācɛ ɔlɛ́ Udéfīdi bá ī pɛ́ nyɔ̄ ā. Ɔcɛ́ kwú bēhé ɔkpá kú Ukídrɔn, mɛ́mla ācɛ ɔlɛ́ nū yɛ lɛyíkwu ígbíli ā.

²⁴Usádɔ̄ku mɛ́mla Abíyāta ɔ̄cogwɛ́ɛya ā mɛ́mla odúúdú ayí kú Ulífāyi ā nēe bī Ikpati kú Ɛka kú Óndú ā, bá abɔ́ɔ pī Udéfīdi, ɔcɛ́ ā, dúú. Anɔ́ɔ é kwú Ikpáti kú Ɛka kú Óndú ā ú háyi ajɛ, jāā gbéeko nɛ̄ odúúdú ācɛ nēe tá ɔcɛ́ ɔkwu ā, le pɛ́ wā ɛcɛ ŋmá ipú igelī nɛ̄hi ā.

²⁵Anɔ́ɔ Udéfīdi, ɔcɛ́ ā, da Usádɔ̄ku ka ɔ́ɔ kwú Ikpáti kú Ɛka kú Óndú ā ú kwúcē ga ipú igelī nɛ̄hi ā. Ka ɔ́dāŋ ka ɛlā anúɔ ɔ́ɔ he Óndú ā ɔtū, ó géē je anúɔ kwúcē wā í má Ikpati kú Ɛka ā kpɔ́ ɛ́ɛ́.

²⁶Udéfīdi, ɔcɛ́ ā, klla ka kpɔ́ kahíníī, “Amáŋ ɔ́dāŋ ka ɛlā um í he ɔ́ ɔtū ŋ́, ɔdā dóódu nōo he ɔ́ ɔtū ā kóō le yá.”

²⁷Ɔcɛ́ ā klla da Usádɔ̄ku ɔ̄cogwɛ́ɛya ā kahíníī, “Má ɔ̄, [5] kwú ɔyí uwɔ Ahímāasi mɛ́mla ɔyínɔ̄nyīlɔ kú Abíyāta nōo lé ka Ujonátan ā ú ká aá kwúcē ga igelī nɛ̄hi ā ɛbɔ́.

²⁸N géē gbēyī lígíí ɛga nēé ī hɛ́ ɔkpá bēhé ga ígbíli ā, jāā gbéeko nɛ̄ n le ɔdā nōo gáā yá ā pó ŋmá ɛgiyí uwɔ.

²⁹Anɔ́ɔ Usádɔ̄ku mɛ́mla Abíyāta kwú Ikpáti kú Ɛka kú Óndú ā ú kwúcē ga Ujerúsālɛm, anɔ́ɔ é gaá bá abɔ́ɔ á.

³⁰Udéfīdi le tá ɛyí ɛfu nēé hī ka ɛfu kú Olīifu ā, yɔ̄ í jikwū. Ó lɛ ikpó bá ajɛ áncā klla lɛ īlī klá ɛyí, kóō cābɔ̄ ɔtūnōbí kú nū. Odúúdú ācɛ nēe yɛce ɔ́ ā lɛ īlī klá ɛyí kú uwá klla bá ī jikwū dúú.

³¹Eko nɛ̄ Udéfīdi, ɔcɛ́ ā le pó ka Ahítōfɛlu ɔ́ɔ yɔ̄ pi Ábsālɔm ā, ó le ɔkɔ gbā lɛ Óndú ā ka ɔ́ɔ̄ lɛ ɛlā nɛ̄ Ahítōfɛlu ɔ́ɔ í nwū ā pīya ɛflɛ́ɛfu.

³²Eko nɛ̄ Udéfīdi gā ɛyí ɛfu, ɛga nēé gē gbā Óndú ā ɛ̄gbā abɔ́ɔ ā, oklóbīya nú éyi nēé hī ka Uhússāyi, ɔ̄cɛ Ááki wā í tá ɔ̄, lɛ īlī kú nū híla klla lɛ ajɛ fú klá ɛyí.

³³Anɔ́ɔ Udéfīdi da ɔ́ ka ɔ́dāŋ ka ɔ́ɔ le yɛ mla anúɔ, ɔ́ɔ géē wɛ iyó lɛ anúɔ.

³⁴Anɔ́ɔ ó da ɔ́ ka ɔ́ɔ̄ kwúcē ga ipú igelī nɛ̄hi ā gaá tá Ábsālɔm, cɛ́ɛ́ ka ɔ́ɔ̄ da ɔ́ ka anúɔ géē cɛ̄ ɔ̄ ɛhɔ̄ ɛ́gɛ́nɛ̄ anúɔ cɛ̄ ádā nū ɛhɔ̄ ā. Cɛ́ɛ́ ka ɔ́ɔ̄ lɛ ɛlā dóódu nɛ̄ Ahítōfɛlu géē nwū Ábsɔ̄lɔm ā pīya tá ɔdā ɔhá.

³⁵Ɔcɛ́ ā klla da ɔ́ ka Usádɔ̄ku mɛ́mla Abíyāta ācogwɛ́ɛya ā, ɛ́ɛ géē bá abɔ́ɔ dúú. Anɔ́ɔ ó da ɔ́ ka ɔ́ɔ̄ lɛ ɛjɛ̄ɛ̄jī ɔdā dóódu nɛ̄ ɔ́ɔ í pó ipú agbla kú ɔcɛ́ ā kpó ka lɛ uwá.

³⁶Ó klla da ɔ́ ka Ahímāasi, ɔyínɔ̄nyīlɔ kú Usádɔ̄ku, mɛ́mla Ujonátan, ɔyínɔ̄yīlɔ kú Abíyāta bá mɛ́mla uwá. Ka ɔ́ɔ lɔfú tū uwā ɛhɔ̄ fu anúɔ ɔ́dāŋ ka ɔ́ɔ lɛ ɔdā dóódu pó ŋmá agbla kú ɔcɛ́ ā.

³⁷Anɔ́ɔ Uhússāyi oklóbīya Udéfīdi ā kwúcē ga ipú igelī ā, eko nɛ̄ Ábsālɔm yɔ̄ ī wā ipú igelī kú Ujerúsālɛm bōōbū ā á.