Read idoma 2 USÁMUWƐ̄LU 16 Bible Online

2 USÁMUWƐ̄LU 16 - idoma bible

2 USÁMUWƐ̄LU 16

¹Eko nɛ̄ Udéfīdi le gla ɛyí ɛfu ā lígíii ā, ó gaá jīla Usíba, ɔ̄cocɛ̄hɔ̄ kú Umɛfíbōssɛti, nōo bī aíjakī alɛwa klla bī igbō ofigwó mɛ́mla ɛyí alɛwa kú īkpɔ̄cí mɛ́mla ɔjá kú ɔkpɛ́bɛ́ nɛ̄ ejé wɛ ōmōōmū nū ā kpó ce uwá igbīhi

²Anɔ́ɔ Udéfīdi, ɔcɛ́ ā, le ɔ̄kā da ka ɔdí nɛ̄ ɔ́ɔ gáā yá mla odúúdú ɔdā nɛ̄ ɔ́ɔ bī ā? Anɔ́ɔ Usíba tá ɔ ohi kahíníī, “Aíjakī ā wɛ ákú ɔcɛ́ mɛ́mla ācɛ ɔlɛ́ nū kéē ce. Aígbō mɛ́mla aíkpɔ̄cí ā kē wɛ ákú ācɛ ɔlɛ́ uwɔ kéē lé. Ejé ā kē wɛ ákú uwá kéē gwá eko nɛ̄ ɛ̄jɛ̄ le jē uwá ipú ígbíli.”

³Udéfīdi, ɔcɛ́ ā klla le ɔ̄kā da ɔ́ ka iní nɛ̄ Umɛfíbōssɛti, ɔyí kú ɔyí kú ɔkpáni uwɔ, Usɔ́ɔlu yɔ̄ āa? Anɔ́ɔ Usíba tá ɔ̄ ohi ka ɔ́ɔ yɔ̄ Ujerúsālɛm, ohígbū ka ɔ́ɔ kpéyīce ka ācɛ Ísrɛ̄lu ɛ́ɛ gáā je ajɔ̄ɔ̄cɛ́ kú ádā nū, Usɔ́ɔlu, ā lɛ ɔ́ ɛɛ́.

⁴Udéfīdi, ɔcɛ́ ā da Usíba ka ɔdā dóódu nɛ̄ ɔ́ɔ wɛ ákú Umɛfíbōssɛti ā, kwú pīya ákú anú nōo wɛ Usíba ā ɛɛ́. Anɔ́ɔ Usíba da ɔ́ kahíníī, “Ágábáidu, n wɛ ɔ̄cotɛ̄hɔ̄ kú uwɔ nɛ, ɛlā kú um kóō he uwɔ piyóó.”

⁵Eko nɛ̄ Udéfīdi ga Ubahúrim ā, ɔmáapú Usɔ́ɔlu éyi nēé hī ka Ussiméyi, ɔyí kú Ugéra ā gā ɛcɛ gaá jīla Udéfīdi ɔwɛ, yɔ̄ í cá Udéfīdi ɛcá, abɔ̄ ó yɔ̄ í wā ā.

⁶Ussímēyi gbɔɔ́ ō tá ɛcɔ̄ klá Udéfīdi mɛ́mla aígabɔ̄ kú nū nēe yɛ ɔ́ jīlatá ā.

⁷Ussímēyi gbɔɔ́ ō cílokwúlu tā ɔ̄ gē da ɔ́ ká ɔ̄ “Nyōō nyɔ̄ɔ̄, ɔ̄coŋmɔ́ɔcɛ mɛ́mla ɔ̄cɛ ɔdāhá”.

⁸Ó klla yɔ̄ gē da ɔ́ ka Óndú ā ɔ́ɔ yɔ̄ ī cíla ɔ́ ulé kú ācɛ ipɔ́ɔ́nū kú ɔlɛ́ Usɔ́ɔlu alɛwa nɛ̄ ɔ́ɔ kpó ŋmó ā ɛɛ́. Ussímēyi da ɔ́ ka Óndú ā ɔ́ɔ kwú ajɔɔ̄cɛ́ kú nū ú lɛ ɔyí nū, Ábsālɔm ɛɛ́. Ó da ɔ́ ka ífi ɔ́ɔ yɔ̄ ī yá ɔ̄ ohígbū ka ɔ́ɔ wɛ ɔ̄coŋmɔ́ɔcɛ.

⁹Anɔ́ɔ Abíssāyi, ɔyí kú Userūyah da Ágábáidu Udéfīdi ā, ka ɔdíyá nɛ̄ ɔ́ɔ cɛ̄ lɛ ɔ̄cɛ nɛ̄ ɔ́ tīle ŋ́ bɛ̄ɛka okwū ewō ā ka ɔ́ɔ̄ cá ɔ̄ ɛcá āa? Ká ɔ̄ lɛ ɛga je lɛ anúɔ, cɛ́ɛ́ kú anúɔ nyɔ̄ í lɛ ɔ́ īkpɛ̄yí hɛ́.

¹⁰Amáŋ ɔcɛ́ tá ɔ̄ ohi ka ɔ́ɔmā ɔ́ɔ í wɛ ɛlā nū ŋ́. Ohígbū ka abɔ̄ Óndú ā ɔ́ɔ da Ussímēyi ká ɔ̄ cá anúɔ ɛcá ā, ɔnyɛ ɔ́ɔ lɛ íkwu ō da ɔ́ ka ɔdíyá nɛ̄ ɔ́ɔ yá lɛ āa?

¹¹Anɔ́ɔ Udéfīdi da Abíssāyi mɛ́mla odúúdú aígabɔ̄ kú ɔlɛ́ nū ka ɔyí abɔ̄ anúɔ ɔ́ɔ gē tíne ō ŋmó anúɔ yɔ̄ ɛ́ɛ́ má. Ó lɛ ā ɔdā nɛ̄ ɔ̄cɛ Ubénjāmin nyā yá ā ɔ́ɔ cíkā ō hɛ́ uwā idáagó ŋ́. Ó ka Óndú ā ɔ́ɔ da ɔ́ ka ɔ́ɔ̄ cá anúɔ ɛcá á, anɔ́ɔ ó da uwá ka ɛ́ɛ̄ mā ɔ̄ tá ká ɔ̄ cá anúɔ ɛcá á.

¹²Ó ka ekōhī Óndú ā ɔ́ɔ lɔfú lɛ eyīnyinyi anúɔ má lɛ ɔhā hɛ́ ce anúɔ kwɛyí ɛcá nɛ̄ Ussímēyi ɔ́ɔ cá anúɔ ā.

¹³Udéfīdi mɛ́mla ācɛ ɔlɛ́ nū kwu pīya tá ɔwɛ, anɔ́ɔ Ussímēyi bá ogwogwu kú ɛfu ā yɔ̄ ī cá uwā ɛcá klla yɔ̄ ī tá ɛcɔ̄ mɛ́mla úmúlá klla uwá á.

¹⁴Eko nɛ̄ ɔcɛ́ mɛ́mla ācɛ ɔlɛ́ nū ā wā Ujɔ́dan ā, ɛ̄jɛ̄ le jɛ̄ uwá. Anɔ́ɔ é le owu tú wāajɛ abɔ́ɔ á.

¹⁵Ɛpléeko ɔ́ɔmā, Ábsālɔm mɛ́mla odúúdú ācɛ nēe bá mɛ́mla anú ā gaajɛ Ujerúsālɛm ɛɛ́. Ahítōfɛlu yɔ̄ mɛ́mla anú dúú.

¹⁶Eko nɛ̄ Uhússāyi, ɔ̄cɛ kú Ááki, oklóbīya Udéfīdi ā gā ɛgiyí Ábsālɔm ā, ó le ágbá tá ɔ̄ kahíníī, “Ágábáidu, ɛyí kú uwɔ ka ɔ́ɔ̄ tápátɛ́cɔ̄, ɛyí kú uwɔ ka ɔ́ɔ̄ tápátɛ́cɔ̄!”

¹⁷Ábsālɔm le ɔ̄kā da ɔ́ ka iní nɛ̄ ihɔtū nɛ̄ ɔ́ɔ lɛ lɛ oklóbīya nū, Udéfīdi ā, ɔ́ɔ yɔ̄ gɛ? Ka ɔdíyá nɛ̄ ɔ́ nyɔ̄ mɛ́mla oklóbīya nū ŋ́ mā ā?

¹⁸Anɔ́ɔ Uhússāyi le ohi tá ɔ̄ kahíníī, “Ó lɛ ā ŋ́. Óndú ā mɛ́mla odúúdú ācɛ Ísrɛ̄lu le uwɔ fu ká ā wɛ ɔcɛ́ ɛɛ́. Ɔcɛ́ dúúmā nēé kē fu ā, nɛ̄ n géē klá pī uwɔ ká n̄ cɛ̄ ɔ́ ɛhɔ̄ á.”

¹⁹Ó klla da Ábsālɔm ka ɔ̄nyɛ ɔhá nɛ̄ anúɔ géē gbā ɛ́ɛ́ mā ā, ó wɛ anú nōo wɛ ɔyí ɔkpani anúɔ ā ŋ́ nɛɛ? Ɛ́gɛ́nɛ̄ nɛ̄ anúɔ gbā ádā nū ā, nɛ̄ anúɔ géē gbā ɔ̄ dúú á.

²⁰Anɔ́ɔ Ábsālɔm le ɔ̄kā da Ahítōfɛlu ka abɔ̄ aá gaajɛ ɛɛ́ mā ā, ɔ́ɔ̄ da anúɔ ɔdā nɛ̄ aá géē yá mɛ́ɛ̄ ā.

²¹Anɔ́ɔ Ahítōfɛlu da Ábsālɔm ka ɔ́ɔ nyɔ̄ gaá cikpó odúúdú anyā ɔlɛ́ ádā nū nɛ̄ ádā nū mā uwā tá ā. Cɛ́ɛ́ odúúdú Ísrɛ̄lu kéē le jé ka ádā nū ɔ́ɔ kwú ɔ̄ ú olɛlā kú nū. Cɛ́ɛ́ kú ācɛ nēe gē yɛce anú nōo wɛ Ábsālɔm ā, ɔɔ́ kwú lɔfú iyē.

²²Anɔ́ɔ é lɛ áklɔ̄kpɛ pi kwu icō agbla kú ɔcɛ́ ā lɛ Ábsālɔm. Anɔ́ɔ ɔlɛ́ɛnɔ péee ipéyī kú odúúdú ācɛ kú Ísrɛ̄lu ā, Ábsālɔm le tá ipú áklɔ̄kpɛ ā gaá le ikpó anyā ɔlɛ́ ádā nū kpó ce kpɛ́mm á.

²³Eko ɔ́ɔmā, ɛlā dúúmā nɛ̄ Ahítōfɛlu le nwū nɛɛ, é gē mīyɛ ɛlā ɔ́ɔmā bɛ̄ɛka ɛlā kú Ɔwɔicō abɔ̄yī nū ā. Kwu Udéfīdi mɛ́mla Ábsālɔm gē bī ɛlā kú Ahítōfɛlu le yúklɔ́ nɛ̄hi.