Read idoma 2 USÁMUWƐ̄LU 17 Bible Online

2 USÁMUWƐ̄LU 17 - idoma bible

2 USÁMUWƐ̄LU 17

¹Ó gbojī ŋ́, Ahítōfɛlu da Ábsālɔm kóō lɛ ɛga je lɛ anúɔ cɛ́ɛ́ kú anúɔ lɛ ācɛ úlā ofucigwó (12,000) kpó cɛ́ɛ́ kú anúɔ nū Udéfīdi inya otú ɔ́ɔmā.

²Ó ka anúɔ géē tū ɔ̄ iyē, eko nɛ̄ ɛ̄jɛ̄ ɔ́ɔ le jɛ̄ ɔ̄ nɛ̄ ɔtū kú nū ɔ́ɔ klla le gbenyi ā. Cɛ́ɛ́ ufi ɔ́ɔ lɛ́ ɔ́ kwú nɛ̄hi, cɛ́ɛ́ odúúdú ācɛ ɔlɛ́ nū le pɛ́ kwu. Ó ka anúɔ géē ŋmó Udéfīdi, ɔcɛ́ ā ōfōōfūnū.

³Cɛ́ɛ́ anúɔ lɛ odúúdú ācɛ ɔlɛ́ nū ā kpó gé lɛ anú nōo wɛ Ábsālɔm, ɛ́gɛ́nɛ̄ é gē bī ɔnyā ɛ̄yīpɛ̄ gē lɛ ɔbá nū āa[6] Ó ka abɔ̄ ɔ́ɔ gáā kwu ācɛ ohile ā ŋ́.

⁴Ɛlā kú Ahítōfɛlu ā le he Ábsālɔm mɛ́mla aótrɛ̄yí kú ācɛ Ísrɛ̄lu ā ɔtū.

⁵Anɔ́ɔ Ábsālɔm da uwá ka ɛ́ɛ̄ lɛ Uhússāyi hīgwú wā cɛ́ɛ́ kú aá kóō pó ɔdā nɛ̄ ɔ́ɔ géē ka ā.

⁶Eko nɛ̄ Uhússāyi gā ā, Ábsālɔm le ɛlā nɛ̄ Ahítōfɛlu nwū ā da ɔ́, anɔ́ɔ ó le ɔ̄kā da ɔ́ ka aá yɛce ɔ́ kɛ̄ɛ? Ó klla da ɔ́ ka ɔ́dāŋ ka ɔ́ɔ ka aá kóō yɛce ɔ́ ŋ́, ɔdí nɛ̄ ɔ́ɔ lɛ ō ka lɛ aá ā?

⁷Anɔ́ɔ Uhússāyi da ɔ́ kahíníī, “Ɛlā nɛ̄ Ahítōfɛl nwū uwɔ igbɛ́ɛ̄nyā í lɔhi ŋ́.

⁸A jé ka ádā uwɔ, Udéfīdi, ɔcɛ́ ā, mɛ́mla ācɛ ɔlɛ́ nū wɛ ācɛ nēe jé ō kpɛ́fú nɛ̄hi. É í nuunu bɛ̄ɛka ɔgwū nēé kwú ɔyí nū ú uwī ipácí ā. Ofíyɛ́ dúú ā, ádā uwɔ klla wɛ ícɔ́ɔja nōo wɛ ɔka kú ɛfú ō kpó nɛ̄hi. Ó gáā gbɔlā mɛ́mla ācɛ ɔlɛ́ nū otú mā ŋ́.

⁹Abālɔbányā, á jé ŋ́ ó tayínū ipú ɔ̄gɔ̄ éyi ámāŋ ka ɛga ɔhá. Ɔ́dāŋ ka Udéfīdi lɛ ɛfú kpó tá ācɛ ɔlɛ́ uwɔ, ɔ̄cɛ dúú nōo géē pó ā, géē ka ka Udéfīdi, ɔcɛ́ ā, lɛ ācɛ ɔlɛ́ uwɔ yálé.

¹⁰Cɛ́ɛ́ ó kōō wɛ ɔ̄cɛ Ísrɛ̄lu nōo lɔtū fíyɛ́ dúú nōó ī yúúfi ŋ́ bɛ̄ɛka ágábá ā, géē gbɔ́ɔ ō yúúfi, ohígbū ka ɛjɛ̄ɛ̄jī kú Ísrɛ̄lu jé ka ádā uwɔ wɛ āklōgō kú ícɔ́ɔja olɔfú nɛ̄hi. É klla kē jé ka ācɛ nēe bá pī ɔ̄ ā wɛ eŋīnīŋīnbī kú ācɛ o jé ō kpɛ́fú nɛ̄hi.

¹¹Uhússāyi klla da ɔ́ kahíníī, “Ɛlā nɛ̄ n lɛ ká n ka gā uwɔ ā, lé ka ā lɛ odúúdú ācɛ kú Ísrɛ̄lu túbá ŋmá odúúdú ajɛ kú uwā ɛgéégée lɛwa bɛ̄ɛka ɔjɛ kú okónu ísu ā, cɛ́ɛ́ kú awɔ abɔ̄yī uwɔ kóō lɛ uwá kpó tɔ̄ɔkwu nyɔ̄ í kpɛ́fú tá ádā uwɔ.”

¹²Ó klla da ɔ́ ka ɛga dúúmā nɛ̄ Udéfīdi yɔ̄ ā, aá ɔ́ɔ géē tíne nū, cɛ́ɛ́ ka aá lɛ ɛfú kpó tú ɔ̄, cɛ́ɛ́ gbɔbū ka ɔ́ɔ̄ jé dúú ā, anú mɛ́mla ācɛ ɔlɛ́ nū dúúmā í gáā hile gɛ ŋ́.

¹³Uhússāyi da Ábsālɔm ka ɔ́dāŋ ka Udéfīdi ɔ́ɔ kōō le kwu ga ipú igelī nɛ̄hi dóódu nááná, ācɛ ɔlɛ́ aá ɔ́ɔ géē kpó ɔ́ŋgbá wā, cɛ́ɛ́ aá lɛ igá kú igelī ā pi wāajɛ ga[7] ipú ɔpɛ́. Ó ka ɛcɔ̄ dúúmā ɔ́ɔ kōō gáā ce iyī uwā icō ɛfu nɛ̄ igelī ɔ́ɔmā ɔ́ɔ kwu ā ŋ́.

¹⁴Anɔ́ɔ Ábsālɔm mɛ́mla ɛjɛ̄ɛ̄jī ācɛ kú Ísrɛ̄lu ā kahíníī, “Ɛlā nɛ̄ Uhússāyi, ɔ̄cɛ Ákī ā, nwū ā lɔhi fíyɛ́ ɛlā nɛ̄ Ahítōfɛlu nwū ā á.” Ɛ̄nyā lɛ ā ohígbū ka Óndú ā í cɛ̄ kéē mīyɛ ɛlā olɔhi nɛ̄ Ahítōfɛlu nwū ā ŋ́. Ó lɛ ā oyá kéē lɛ Ábsālɔm yíífi.

¹⁵Anɔ́ɔ Uhússāyi le ɛlā nōó nwū Ábsālɔm mɛ́mla aótrɛ̄yí kú Ísrɛ̄lu ā mɛ́mla ɛdɔ ɛlā nɛ̄ Ahítōfɛlu nwū ɔ̄ dúú ā kpó ka lɛ Usádɔ̄ku mɛ́mla Abíyāta ācogwɛ́ɛya ā á.

¹⁶Uhússāyi da uwá ka ɛ́ɛ̄ lɛ ɛhɔ̄ tū fu Udéfīdi fíyaa, cɛ́ɛ́ ka ɔ́ɔ̄ le bēhé ísu ā otōōtú ɔ́ɔmā. Ó klla da uwá ka ɛ́ɛ̄ le ka lɛ Ágábáidu Udéfīdi ka ɔ́ɔ̄ híī gbo ɛga ō bēhé ísu kú ipú ígbíli ā otú ɔ́ɔmā ŋ́. O yá ka ɛ́ɛ̄ híī lɛ anú mɛ́mla ācɛ ɔlɛ́ nū kpó kwú klla lɛ uwá kpó ŋmó ŋ́.

¹⁷Eko ɔ́ɔmā Ujonátan mɛ́mla Ahímāasi le pɛ́ tayínū okónu ɔkpá kú Enrōgɛlu, nōo yɔ̄ okónōgwu kú Ujerúsālɛm ā. É bɔ́tū tá īyī uwā wɛ̄ɛcɛ kú ɔ̄cɛ dúú ka ɔ́ɔ̄ lɛ uwá má yɔ̄ gē béhé ga ipú igelī nɛ̄hi ā ŋ́. Ó lɛ ɔ̄cocɛ̄hɔ̄ nɔ̄nyā éyi nōo gē bī ɔ̄kā kú ɔdā nōo yɔ̄ gē yá ā gé lɛ uwá ojigógó, cɛ́ɛ́ é gē nyɔ̄ ī ka lɛ Udéfīdi, ɔcɛ́ ā.

¹⁸Amáŋ ɛ̄cī éyi, ɔyípōklóbīya éyi lɛ uwá má. Anɔ́ɔ ó nyɔ̄ í le ka lɛ Ábsālɔm á. Anɔ́ɔ é kwú pɛ́ kwu gaá tayínū ɔlɛ́ ɔ̄cɛ éyi nōo yɔ̄ Ubahúrim á. Ɔ̄cɛ ā lɛ obugā éyi nōo kwu ɔlɛ́ nū ajaajɛ, anɔ́ɔ uwá nyɔ̄ í tayínū ipú nū á.

¹⁹Ɔnyā kú ɔ̄cɛ ɔ́ɔmā kwu odée ú pīya klá okónu obugā ā, anɔ́ɔ ó le īkpɔ̄dā pahīla klá ɛyí nū kóō ŋmó á. Ó yá ɛ̄nyā, cɛ́ɛ́ ka ɔ̄cɛ dúúmā kóō jé ka odée ɔ́ɔ yɔ̄ abɔ́ɔ ŋ́.

²⁰Anɔ́ɔ aígabɔ̄ kú Ábsālɔm le pɛ́ wā ɔlɛ́ ɔ̄cɛ ā gaá da ɔnyā ā ɔ̄kā ka iní nɛ̄ Ahímāasi mɛ́mla Ujonátan bá ā? Ɔnyā ā da uwá ka ɛ́ɛ le bēhé ísu le yɛ tá ipú ígbíli ɛɛ́. Anɔ́ɔ ācɛ ā dɔɔ̄kā uwá gbógbógbó. Abɔ̄ é má ayípóklóbīya ɛpa ā ŋ́ mā, é kwúcē le tá Ujerúsālɛm.

²¹Igbīhi nɛ̄ ācɛ ā le pɛ́ nyɛ̄ɛ̄ ā, Ahímāasi mɛ́mla Ujonátan le pɛ́ bɛ̄cɛ ŋmá ipú obugā ā, le yɛ gaá lɛ ɛlā ā kpó ka lɛ Udéfīdi, ɔcɛ́ ā. É le yɛ í le ɔdā nɛ̄ Ahítōfɛlu mīya lɛyíkwu ɔ́ ā, kpó ka lɛ ɔ́ kpɛ́mm. Anɔ́ɔ é klla da ɔ́ ka ɛ́ɛ le kwu fíyaa cɛ́ɛ́ kéē kwú bēhé ísu ā á.

²²Anɔ́ɔ ɛ́ɛ́ ká eyī kóō nyā dúú ā, Udéfīdi mɛ́mla odúúdú ācɛ ɔlɛ́ nū le pɛ́ bēhé ísu kú Ujɔ́dan á.

²³Eko nɛ̄ Ahítōfɛlu le má ka Ábsālɔm ɔ́ɔ tá ɛlā nōó nwū ɔ̄ ā, ó le odée kpóce ɛyí ijakī kú nū kóō cīce ɛyí nū, anɔ́ɔ ó kwúcē le tá ɔlɛ́ nū Ugílo á. Abɔ̄ ó le ɛlā ámōōmɛ kú nū kpó ka lɛ ācɛ ɔlɛ́ nū kwɛyí ā, anɔ́ɔ ó nyɛ̄ɛ̄ gaá le iyī nū tōōlī á. É kwú ɔ̄ ú nyi ipú únóji kú ipɔ́ɔ́nū kú nū.

²⁴Udéfīdi mɛ́mla ācɛ ɔlɛ́ nū gāajɛ igelī nɛ̄hi kú Umáhāneyím, ɛ́ɛ́ nɛ̄ Ábsālɔm mɛ́mla ācɛ kú Ísrɛ̄lu bēhé ísu kú Ujɔ́dan á.

²⁵Ábsālɔm kwú Amása ú pīya otrɛ̄yí kú aícɔ́ɔja kú nū kwɛyí Ujówābu, nōo nyɔ̄ mɛ́mla Udéfīdi, ɔcɛ́ á. Amása wɛ ɔyí kú Ujéta ɔ̄cɛ Íssmɛ̄lu ā. Ɛ́nɛ́ nū lé ka Abígɛ̄ɛlu, ɔyínɔ̄nyā kú Unáhāsi, ɔyínɛ́ kú Userúya, ɛ́nɛ́ Ujówābu.

²⁶Ábsālɔm mɛ́mla ācɛ ɔlɛ́ nū lɛ aáklɔ̄kpɛ kú ɛfú cē kwu Ugílɛ̄di.

²⁷Eko nɛ̄ Udéfīdi ga Umáhāneyím ā, ó gaá jīla Ussóbi, ɔyí kú Unáhāsi nōo ŋmá Urábba, igelī kú Ámɔn ā mɛ́mla Umákīyɛ, ɔyí kú Ámmīyēlu, nōo ŋmá Ulódēba mɛ́mla Ubásīlāyi nōo ŋmá Urogélim ipú ajɛ kú Ugílɛ̄di ā.

²⁸É le agōdō, ocíbú, aklɛ, īkpɔ̄dā nēé hī ka uwíiti ā, ubáli, umu mɛ́mla ejé kpó wā.

²⁹É klla kpó ɛnwú, ēpū, aálá, ijē kú ɛna, gē lɛ Udéfīdi ka anú mɛ́mla ācɛ ɔlɛ́ nū kéē lé. Anɔ́ɔ é da Udéfīdi ka aá jé ka ɛmiyɛ mɛ́mla ijēēnyi gē ŋmó ācɛ ā, ɛ̄jɛ̄ ɔ́ɔ klla le jē uwā ipú ígbíli ā.