Read idoma 2 USÁMUWƐ̄LU 18 Bible Online

2 USÁMUWƐ̄LU 18 - idoma bible

2 USÁMUWƐ̄LU 18

¹Udéfīdi le odúúdú aícɔ́ɔja kú ɔlɛ́ nū túbá, klla le uwá hɛ́ bá ígwíígwu kú úlā ɛpa ce ofigwú (1,000) mɛ́mla ofɛhɔ̄ (100). Anɔ́ɔ ó lɛ aótrɛ̄yí je lɛ aígwíígwu ā á.

²Ó lɛ uwá tɛ̄hɔ̄ ipu ígwu ɛtá gɛɛcɛ ɛháajɛ kú Ujówābu, Abíssāyi, ɔyínɛ́ kú Ujówābu, mɛ́mla Ítāyi nōo ŋmá Ugáti ā. Ɔnyɔɔnyɛ kú uwā wɛ otrɛ̄yí kú ígwu éyééye. Anɔ́ɔ Udéfīdi da ācɛ ɔlɛ́ nū ka anúɔ géē nyɔ̄ mɛ́mla uwá dúú á.

³É da ɔ́ ka ɔ́ɔ gáā nyɔ̄ mɛ́mla aá ŋ́. Kóō wɛ ɔdā dúú tū olɛlā kú aá ɔ́dāŋ ka ācɛ ohile kú aá le igbihi pīya kwú pɛ́ kwu ŋmá ɔgbɛ́fú ámāŋ ka ɔ́dāŋ ka ɛ́ɛ kōō lɛ o kɔ̄ ɛga ɛpa kú aá kpó ŋmó nááná. Amáŋ oyēeyī kú nū ɔ́ɔ fíyɛ́ ācɛ úlā ofu cɛhɔ̄ (10,000) kú aá. Anɔ́ɔ é da ɔ́ ka ɔ́ɔ géē lɔhi fíyɛ́ kú ɔ́ɔ̄ klá ipú igelī, cɛ́ɛ́ kú ɔ́ɔ̄ tū ɔdā nōo í tá aá abɔ̄ ɛhɔ̄ gé lɛ aá ɔgbɛ́fú.

⁴Udéfīdi, ɔcɛ́ ā, tá uwá ohi ka ɔdā dúúmā nɛ̄ ɛ́ɛ ka ɔ́ɔ lɔhi fíyɛ́ ā nɛ̄ anúɔ géē yá á. Anɔ́ɔ ó māháyi okómpinu kú igá kú igelī nɛ̄hi abɔ̄ ācɛ ɔlɛ́ nū bá ī nɔwɔ ga ɔgbɛ́fú ígwíígwu kú úlā ɛpa cofigwó (1,000) mɛ́mla ígwíígwu kú ofɛhɔ̄ (100) ā.

⁵Anɔ́ɔ Ágábáidu Udéfīdi le ɔ́da je lɛ Ujówābu mɛ́mla Abíssāyi mɛ́mla Ítāyi kahíníī, “Ohígbū um ā, aá kóocōō, aá yá ɔyí um, Ábsālɔm, ɔdā dúúmā ŋ́.” Odúúdú aícɔ́ɔja ā kē pó ɔ́da nɛ̄ ɔcɛ́ je lɛ aótrɛ̄yí kú aícɔ́ɔja ā.

⁶Anɔ́ɔ aícɔ́ɔja kú ɔlɛ́ Udéfīdi ā le pɛ́ ga ɔgbɛ́fú nyɔ̄ í le ɛfú kpó tá aícɔ́ɔja kú Ísrɛ̄lu ipú ūpū kú Ɛ́frem á.

⁷Aícɔ́ɔja kú Udéfīdi lɛ ācɛ Ísrɛ̄lu yálé. É ŋmó ācɛ Ísrɛ̄lu úlā ofɛpa cigwó (20,000) ɛ̄cī ɔ́ɔmā.

⁸Ɛfú ā le nyīla kwu ɛga dóódu. Ācɛ nēe kwú ipú ūpū ā fíyɛ́ ācɛ nēe kwú ɔgbɛ́fú ā á.

⁹Anɔ́ɔ acígilí, Ábsālɔm gaá jīla mɛ́mla aícɔ́ɔja kú Udéfīdi ōhī. Ábsālɔm yɔ̄ ī ce ɔnya kú nū. Anɔ́ɔ abɔ̄ ó yɔ̄ í kwu bū ɔkwu ɔcí éyi, nēé hī ka ɔcí kú óoku, ipú ūpū ā, īnyīlɛyí kú nū gaá kwú jíla tū ābɔ̄ kú ɔcí ā icō. Anɔ́ɔ ɔnya kú nū ā le inya kwu ī yɛ á. Anɔ́ɔ Ábsālɔm le jī playi icō ɔcí abɔ́ɔ á.

¹⁰Éyi kú aícɔ́ɔja kú Udéfīdi lɛ ɔ́ má, anɔ́ɔ ó gaá le ka lɛ Ujówābu ka anúɔ le Ábsālɔm má playicō ɔcí, nēé hī ka ɔcí kú óoku ā.

¹¹Ujówābu da ɔ́ ka ɔ́dāŋ ka ɔ́ɔ le ɔ́ɔ má ɔkwɛ̄yi, ɔdíyá nɛ̄ ɔ́ɔ lɛ ɔ́ ŋmó ɔkwɔɔkwu ɔ́ɔmā ŋ́ mā? Ó klla da ɔ́ ka anúɔ kē yɛ í lɛ ije nɛ̄hɛ́ igwó kpó lɛ ɔ́ mɛ́mla ɔkpá ōkwɛ́nyɔ́.

¹²Amáŋ ɔ̄cɛ ā tá ɔ̄ ohi ka ɔ́dāŋ ka ɔ́ɔ kōō lɛ ije nɛ̄hɛ́ ulá ɛpa ce ofigwó (1,000) kpó lɛ anúɔ nááná, anúɔ ɔ́ɔ gáā lɛ abɔ̄ kú anúɔ kwu ɔyínɔ̄nyīlɔ kú ɔcɛ́ ā glá ŋ́. Ohígbū ka odúúdú aá pó, eko nɛ̄ ɔcɛ́ ɔ́ɔ yɔ̄ gē da anú mɛ́mla Abíssāyi mɛ́mla Ítāyi ka ohígbū anúɔ ā ɛ́ɛ̄ yá Ábsālɔm ɔdā dúúmā ŋ́ mā.

¹³Ɔ́dāŋ ka anúɔ leyī gwɛ̄lā kú ɔcɛ́ ā bónū nɛ̄ anúɔ le Ábsālɔm ŋmó nɛɛ, ɔ̄cɛ éyi í yɛ í le ka lɛ ɔ́. (Ó ka ohígbū ka Udéfīdi ɔ́ɔ gē pó ɔdā dúúmā nōo gē yá ā). Ka anú nɛ̄ ɔ́ɔ wɛ Ujówābu ā ɔ́ɔ kē gáā cɛ̄pɔ̄ anúɔ eko ɔ́ɔmā ŋ́.

¹⁴Ujówābu da ɔ̄cɛ ā ka anúɔ í gáā kpó eko bónū ɛgiyí nū ɛ́ɛ́ gɛ ŋ́. Anɔ́ɔ ó le óbō ɛtá kpó, le uwá tá gwū Ábsālɔm ɔtū, eko nōó yēeyī playicō ɔcí, nēé hī ka ɔcí kú óoku ā á.

¹⁵Aícɔ́ɔja kú Ujówābu igwó ɔhá wā í lɛ Ábsālɔm tū ŋmó tōōtɔ̄ɔ̄.

¹⁶Ujówābu le ɔ́da je ka ɛ́ɛ̄ le opo tá, cɛ́ɛ́ ka ɛ́ɛ̄ híī kpɛ́fú gɛ ŋ́, anɔ́ɔ aícɔ́ɔja kú nū le cīgbīhi ŋmá ō nū ācɛ ā inya tá á.

¹⁷É kwú okwū kú Ábsālɔm ú tá ga ipú ɔ̄gɔ̄ éyi ipu ūpū, anɔ́ɔ é le ɛcɔ̄ tīkwū klá anú á. Anɔ́ɔ odúúdú ācɛ Ísrɛ̄lu ohile le pɛ́ kwu le pɛ́ ga ɔlɛ́ uwā á.

¹⁸Eko nɛ̄ Ábsālɔm yēeyī ā, ó le ígbɛ́cɔ̄ éyi nēé géē bī lɛ bla kwu ɔ́ gbā kwaajɛ ipú ɔpɛ́ kú ɔcɛ́, nōo kwu Ujerúsālɛm ajaajɛ. Ó yá lɛ ā ohígbū koó lɛ ɔyínɔ̄nyīlɔ dúúmā nōo géē cɛ̄ lɛ ācɛ blakwiyē kú nū ŋ́. Anɔ́ɔ ó kwú iyē nū í ce ɔ́ á. Jāā kwu eko nēé yɔ̄ ī tá ɔkpá nyā, é gē hī ɛcɔ̄ ɔ́ɔmā ka, ɔdā ō bī le blakwu Ábsālɔm.

¹⁹Anɔ́ɔ Ahímāasi, ɔyí kú Usádɔ̄ku, ɔ̄cogwɛ́ɛya da Ujówābu ka ɔ́ɔ̄ lɛ ɛga je lɛ anúɔ, cɛ́ɛ́ kú anúɔ lɛ inya kwu nyɔ̄ í lɛ ɔ̄kā olɔhi ā kā ɔcɛ́, ka Óndú ā ɔ́ɔ le ɔ́ hɛ́tá ŋmá abɔ̄ kú aólɛlā kú nū ɛɛ́.

²⁰Anɔ́ɔ Ujówābu le ohi tá ɔ̄ ka anúɔ tá ka ɔ́ɔ̄ bī ɔ̄kā olɔhi dúúmā ga ɛga dúúmá ŋ́. Ó klla da ɔ́ ka ɔ́ɔ lɔfú bī ɔ̄kā nyɔ̄ gé lɛ ɔcɛ́ ɛ̄cī ɔhá dóódu glá, amáŋ ɔ́ɔ wɛ ícíícɛ ɔ́ɔmā ŋ́, ohígbū ka ɔyínɔ̄nyīlɔ kú ɔcɛ́ kwú á.

²¹Anɔ́ɔ Ujówābu le da ɔ̄cɛ Ukúss[8] nōo wɛ ɔ̄cocɛ̄hɔ̄ kú nū ā ka ɔ́ɔ̄ nyɔ̄ í lɛ ɔdā nɛ̄ ɔ́ɔ má ā ka lɛ ɔcɛ́. Ɔ̄cocɛ̄hɔ̄ ā le túkpɛɛ́ anɔ́ɔ ó le inya kwu le yɛ á.

²²Anɔ́ɔ Ahímāasi da Ujówābu ka ɔdā dúú nōo yá ā, ɔ́ɔ wɛ ɛlā anúɔ ŋ́, ka ɔ́ɔ lɛ ɛga je lɛ anúɔ cɛ́ɛ́ kú anúɔ lɛ ɔ̄kā bī nyɔ̄ dúú. Ujówābu le ɔ̄kā da ɔ́ ka ɔdíyá ɛ́ɛ́ nɛ̄ ɔ́ɔ tíne nyɔ̄ í cɛ̄hɔ̄ āa? Ka ɔ́ɔ kē gáā lɛ itene dúúmā ŋmá anú ŋ́.

²³Anɔ́ɔ Ahímāasi klla tá ɔ̄ ohi ka nááná anúɔ tíne ká anúɔ nyɔ̄. Anɔ́ɔ Ujówābu da ɔ́ ka ɔ́ɔ nyɔ̄ mɛ́ɛnɛ. Anɔ́ɔ Ahímāasi le inya kwu bū ɔwɛ nōo yɛ gaá bū ɔpɛ́ kú Ujɔ́dan ā. Ó kōō le inya kwu le gwú ɔ̄cɛ Ukúss ā.

²⁴Udéfīdi cīce ɛplá nōo tá ɔtāhɛ̄ kú okómpinu kú eyīyɛ̄ɛcɛ mɛ́mla okómpinu kú eyīpú kú igelī ā ā. Ɔ̄cɛ nōo ī gbāājɛ ā le yɛ tá icō ɔdɔ kú igá ā, anɔ́ɔ ó gaá háyi ajílɛyí kú okómpinu kú igelī ā á. Ó je eyī gicō, anɔ́ɔ ó má ɔ̄cɛ éyi yɔ̄ gē kwinya í wā ōfōōfūnū á.

²⁵Ɔ̄cɛ nōo ī gbāājɛ ā le ɔkɔ nā wāajɛ, anɔ́ɔ ó le ka lɛ Ágábáidu Udéfīdi á. Ɔcɛ́ da ɔ́ ka ɔ́dāŋ ka ɔ́ɔ yɔ̄ ōfōōfūnū, ɛ́mba ɔ́ɔ yɔ̄ ī bī ɔ̄kā olɔhi wā nɛ. Okwinya ā le tú wā ajaajɛ.

²⁶Ɔ̄cɛ nōo ī gbāajɛ ā klla le ɔ̄cɛ ɔhá má yɔ̄ ī kwinya wā kpɔ́ á, anɔ́ɔ ó klla da Udéfīdi ka ɔ̄cɛ ɔhá ɔ́ɔ klla yɔ̄ ī kwinya wā kpɔ́. Anɔ́ɔ ɔcɛ́ da ɔ́ ka ɔ̄cɛ ɔ́ɔmā ɔ́ɔ klla bī ɔ̄kā olɔhi wā kpɔ́.

²⁷Ɔ̄cɛ nōo ī gbāājɛ ā da ɔcɛ́ ka anúɔ má ka ɔ̄cɛ aflɛ́yī ā gē kwinya bɛ̄ɛka Ahímāasi, ɔyí kú Usádɔ̄ku ā. Anɔ́ɔ ɔcɛ́ da ɔ́ ka ɔ́ɔ wɛ ɔ̄cɛ olɔhi nɛ, ɔ́ɔ kē í bī ɔ̄kā olɔhi wā.

²⁸Ahímāasi le ɛgba dɛ̄ hī ɔcɛ́, ka ɔdā dóódu ɔ́ɔ le yɛ lɔhi. Anɔ́ɔ ó gaá gbo klá ajɛ iyɔ̄bū ɔcɛ́, lɛ ágbá tá ɔ̄, da ɔ́ kahíníī, “N tá Óndú ā, nōo wɛ Ɔwɔicō kú uwɔ ā ahínyá, o cɛ̄ ga uwɔ lɛ ācɛ nēe cāŋjɛ lɛyíkwu ɔ́ ā yálé ɛɛ́.”

²⁹Anɔ́ɔ ɔcɛ́ le ɔ̄kā da ɔ́ kahíníī, “Ɔyí um, Ábsālɔm, yɔ̄ lɔhi?” Anɔ́ɔ Ahímāasi le ohi tá ɔ̄ kahíníī, “Eko nɛ̄ Ujówābu tū um ɛhɔ̄ ā, ɛwa jīla bá abɔ́ɔ bá ī yúuya, amáŋ ń jé ɔdā nōó wɛ ā ŋ́.”

³⁰Udéfīdi, ɔcɛ́ ā, da ɔ́ ka ɔ́ɔ̄ māháyi abɔ́ɔ. Anɔ́ɔ ó gaá háyi abɔ́ɔ á.

³¹Anɔ́ɔ ɔ̄cɛ Ukúss ā kē gāajɛ, gaá da ɔcɛ́ kahíníī, “Ágábáidu, n bī ɔ̄kā olɔhi gé lɛ uwɔ. Ohígbū ka Óndú ā lɛ uwɔ hɛ́tá ícɛ nyā ŋmá abɔ̄ kú odúúdú ācɛ nēé cāŋjɛ lɛyíkwu uwɔ á ɛɛ́.”

³²Anɔ́ɔ Udéfīdi, ɔcɛ́ le ɔ̄kā da ɔ́ kahíníī, “Ɔyí um, Ábsālɔm, ā bɛ́ɛ, ó yɔ̄ lɔhi?” Anɔ́ɔ ó tá ɔcɛ́ ohi kahíníī, “Ágábáidu, Eyī yá um ka ɔdā nōo yá Ábsālɔm ā kóō yá odúúdú aólɛlā kú uwɔ, mɛ́mla odúúdú ācɛ nēe cāŋjɛ lɛyíkwu uwɔ ā.”

³³Anɔ́ɔ enyi gekwú tū ɔcɛ́ iyē á. Ó le tá icō kú inu nōo kwu īkpɛyí kú okómpinu kú igá kú igelī ā, anɔ́ɔ ó gbɔɔ́ ō jikwū á. Abɔ̄ ó yɔ̄ í ga icō inu ā, ó yɔ̄ í jikwū kahíníī, “Kpái, ɔyí um, Ábsālɔm! Ɔyí um, ɔyí um, Ábsālɔm. Ó kē í yɛ í wɛ ami kwú kwɛyí uwɔ á, Ábsālɔm ɔyí um! Kpéyīka, Ɔyí um.”