Read idoma 2 USÁMUWƐ̄LU 2 Bible Online

2 USÁMUWƐ̄LU 2 - idoma bible

2 USÁMUWƐ̄LU 2

¹Eko nɛ̄ ɔdā ɔ́ɔmā le yá gaá yɛ ā, Udéfīdi lɛ ɔ̄kā da Óndú ā kahíníī, “N lɔfú kwúcē ga igelī kú Ujúda dúúmā mɛ́ nɛɛ?” Ɔwɔicō tá ɔ̄ ohi kahíníī, “A lɔfú nyɔ̄.” Anɔ́ɔ ó klla dɔɔ̄kā kahíníī, “Igelī nyā nɛ?” Anɔ́ɔ Óndú ā da ɔ́ kóō nyɔ̄ Uhɛ́brɔn á.

²Anɔ́ɔ Udéfīdi le tá abɔ́ɔ mɛ́mla anyā nū ɛpa ā. Iyē anyā ā wɛ Ahínōwam nōo ŋmá Ujɛsiríli ā, mɛ́mla Abígɛ̄ɛlu, ɔnyā ōkwūma Unábalu nōo ŋmá Ukámɛ̄lu ā.

³Ó lɛ ācɛ ɔlɛ́ nū mɛ́mla aíkonó kú uwá kpó dúú, anɔ́ɔ uwá nyɔ̄ í lā ipú igelī kú Uhɛ́brɔn á.

⁴Anɔ́ɔ ācɛ kú Ujúda ga Uhɛ́brɔn abɔ́ɔ gāa lɛ anɔ̄ tū Udéfīdi ɛyí kóō kwú pīya ɔcɛ́ kú Ujúda á. É le da Udéfīdi ka ācɛ kú igelī nēé hī ka Ujábessi ipú ajɛ Ugílɛ̄di ā, ɛ́ɛ nyi okwū kú Usɔ́ɔlu mɛ́mla ayí nū á.

⁵Anɔ́ɔ ó lɛ ācɛ tɛ̄hɔ̄ fu uwá kahíníī, “Óndú ā kóō lɛ ɔhá hɛ́ ce aá, ɛ́gɛ́nɛ̄ aá yíihɔtū lɛyítáajɛ lɛ ɔcɛ́ kú aá, nɛ̄ aá je ɔ́ nyi ā.

⁶Óndú ā kóō yíihɔtū tá aá piyóó klla gbonɛnɛ lɛ aá. Ami abɔ̄yī um kē í yá aá lɔhi ohígbū ɔdā nɛ̄ aá yá nyā.

⁷Aá lɛ abɔ̄ lɔfú, kú aá kē lɔtúlɛ. Usɔ́ɔlu, ɔcɛ́ kú aá gekwú ɛɛ́, ācɛ kú Ujúda kē lɛ anɔ̄ tū um ɛyí kwú um ú pīya ɔcɛ́ kú uwá ɛɛ́.”

⁸Ábna, ɔyí kú Unɛ́ɛ, nōo wɛ otrɛyí kú aícɔ́ɔja kú ɔlɛ́ Usɔ́ɔlu ā, le kwu mɛ́mla ɔyí kú Usɔ́ɔlu éyi, nōo lé ka Íssbɔ̄sseti ā, ŋmá ɔgbɛ́fú ā le bēhé Ujɔ́dan ga Umáhāneyim.

⁹Anɔ́ɔ Ábna kwú Íssbɔ̄ssɛti ú pīya ɔcɛ́ kú Ugílɛ̄di, Ássa, Ujɛsiríili, Ɛfrēm, Ubénjāmin mɛ́mla odúúdú ācɛ Ísrɛ̄lu.

¹⁰Íssbɔ̄ssɛti, ɔyí kú Usɔ́ɔlu, wɛ iháyí ofɛpa ɛ́ɛ́ nēé je ɔ́ pīya ɔcɛ́ kú Ísrɛ̄lu á. Ó gbō Ísrɛ̄lu iháyí ɛpa. Amáŋ ipɔ́ɔma kú Ujúda ā yɛce Udéfīdi.

¹¹Udéfīdi gbō Uhɛ́brɔn iháyí ahāapa ce ɔyā ɛhīlī.

¹²Ábna mɛ́mla aígabɔ̄ ɔhá kú Íssbɔ̄sseti, ɔyí kú Usɔ́ɔlu ā, ŋmá Umáhānēyim ga ipú igelī nɛ̄hi kú Ugíbēyɔn.

¹³Ujówābu, ɔyí kú Userūyah mɛ́mla aígabɔ̄ kú Udéfīdi le jīla mɛ́mla uwá abɔ́ɔ, okónu njɔlɔ kú Ugíbeyɔn ā. Ígwu éyi cīce ābɔ̄ éyi, ígwu ɔhá cīce ābɔ̄ ɔhá leyī pīya kwu īyī uwā.

¹⁴Ábna da Ujówābu kahíníī, “Ālɔ̄ lɛ ayípōklóbīya ōhī fu ŋmá āyā ɛplɛ́ɛpa kéē kweyī kú unu. Anɔ́ɔ Ujówābu cɛ̄ á.

¹⁵Anɔ́ɔ é lɛ ācɛ igwɛ́ɛpa fú ŋmá āyā kú Íssbɔ̄sseti mɛ́mla ipɔ́ɔma kú Ubénjāmin, kéē kweyī mɛ́mla ācɛ igwɛ́ɛpa ŋmá āyā kú Udéfīdi á.

¹⁶Ɔnyɔɔnyɛ kú ācɛ nēe bá nyā gaá bī ɔ́mpā nū ɛyí, lɛ ɛ̄wā gwū ɔ̄ áklō, anɔ́ɔ odúúdú ācɛ ofu ce ɛnɛ ā gā ajɛ le pɛ́ gekwú ā. Ohígbū ɔ́ɔmā nēé hī ajɛ kú Ugíbeyɔn abɔ́ɔ ā ka “Uhélkatásūrim (ɛyī nū wɛ ‘ɔgbɔ́ unu kú ɔkpacaŋ́gelī’).

¹⁷Anɔ́ɔ é gbɔɔ́ ō kpɛ́fú nɛ̄hi tú īyī uwá á. É lɛ Ábna mɛ́mla ācɛ kú Ísrɛ̄lu yálé.

¹⁸Ayínɔ̄nyīlɔ kú Userūyah ɛtá ā bá abɔ́ɔ. Iyē uwā lé ka Ujówābu, Abíssāyi mɛ́mla Ásāhɛlu. Ásāhɛl ī kwinya nɛ̄hi bɛ̄ɛka ɔ́wa ā.

¹⁹Anɔ́ɔ ó gbɔɔ́ ō nū Ábna inya. Ó yɔ̄ í nū ɔ kpaakpa, í klla nú ɔ̄cɛ ɔhá dúúmā ŋ́.

²⁰Ábna pīyeyī má igbīhi, anɔ́ɔ ó kahíníī, “Awɔ nɛɛ Ásāhɛlu?” Anɔ́ɔ Ásāhɛlu tá ɔ̄ ohi kahíníī, “Ami nɛ.”

²¹Ábna da ɔ́ kahíníī, “Ā nū um inya ŋ́. Nyɔ̄ í nū éyi kú aícɔ́ɔja ā inya, ka á mīyɛ ɔdā dóódu nɛ̄ uwá bī ā.” Amáŋ Ásāhɛlu yɔ̄ í nū ɔ̄ inya kpɔ́.

²²Ábna klla da ɔ́ kahíníī, “Ā nū um inya ŋ́. Ā híī yá ká n̄ ŋmó uwɔ nóó. Ó le lɛ ā, n gáā leyīkwu Ujówābu, ɔyínɛ́ uwɔ eyī glá ŋ́”

²³Amáŋ Ásāhɛlu yɔ̄ í nū ɔ̄ inya kpɔ́. Anɔ́ɔ Ábna lɛ igbīhi kú óbō kú nū gwū ɔ̄ ipú bɛ̄cɛ igbīhi á. Anɔ́ɔ Ásāhɛlu ga ajɛ gekwú á. Ɔ̄cɛ dúúmā kú aícɔ́ɔja ā nōo ga ɛga nɛ̄ okwú kú nū gwutá ā, gē gaá māháyi abɔ́ɔ cíí.

²⁴Amáŋ Ujówābu mɛ́mla Abíssāyi gbɔɔ́ ō nū Ábna inya. Ɔ̄nɔɔ̄nɛ̄ ā, é ga ɛyí ɛfu kú Ámmah, nōo yɔ̄ ɛnɔ̄ɔ̄cī kú Ugíya, ɔwɛ nōo yɛ ga ígbíli kú Ugíbeyɔn ā.

²⁵Ācɛ nēe ŋmá ipɔ́ɔma kú Ubénjāmin ā māháyi le jīla tū Ábna ɛyí ɛfú abɔ́ɔ.

²⁶Anɔ́ɔ Ábna je ɔkɔ gicō da Ujówābu kahíníī, “Alɔ géē bá í kpɛ́fú gbóógbóō nɛ? A jé ka igbīhāajɛ kú nū, alɔ í gáā lɛ ile dúúmā ŋ́, ayíka ɛlā ō bī ɔtū lɛyíkwu īyī alɔ icíici nɛɛ. Alɔ wɛ ācɛ éwo ékpónú nɛ. Ó jɛ̄ nɛ̄ a gē da ācɛ ɔlɛ́ uwɔ kéē híī nū alɔ inya gɛ ŋ ɛɛ́ ŋ́?”

²⁷Anɔ́ɔ Ujówābu tá ɔ̄ ohi kahíníī, “Ákú ɛlā Ɔwɔicō ā ɔ́dāŋ ka á kɛlā nyā ŋ́ nɛɛ, ācɛ ɔlɛ́ um géē bá í nū aá inya jāā gbó oocí.”

²⁸Anɔ́ɔ Ujówābu le opo tá ka ācɛ ɔlɛ́ anúɔ ka ɛ́ɛ nū aícɔ́ɔja kú Ísrɛ̄lu inya ɛ́ɛ́ gɛ ŋ́ má. Anɔ́ɔ ɛfú ā mɛ á.

²⁹Ábna mɛ́mla ācɛ ɔlɛ nū yɛ gaá bū ɔpɛ́ kú Ujɔ́dan, gāa bēhé ísu kú Ujɔ́dan ā ɛjɛ̄ɛ̄jī otú ɔ́ɔmā. É yāwu jāā gbó ɔ̄cī, anɔ́ɔ é ga Umáhānéyim á.

³⁰Eko nɛ̄ Ujówābu mā ō nū ācɛ ɔhá ā inya ā, ó lɛ ācɛ ɔlɛ́ nū túbá lɛ uwá gbaáluka, anɔ́ɔ ó má ka, ācɛ igwáahāānɛ blā Ásāhɛlu nɛ̄ ɛfú ɔ́ɔ lé á.

³¹Ācɛ ɔlɛ́ Udéfīdi ā ŋmó ācɛ ofu igwáahātá (360) ŋmá ipú ācɛ ɔlɛ́ Ábna mɛ́mla ācɛ ipɔ́ɔma kú Ubénjāmin.

³²Ujówābu mɛ́mla ācɛ ɔlɛ́ nū ā kwú okwū kú Ásāhɛlu ú gaá nyī únóji kú ipɔ́ɔ́nū kú ɔlɛ́ uwā, Ubɛ́tilɛhɛ̄m. Anɔ́ɔ é yɛ otú ɔ́ɔmā jāā gbéeko nɛ̄ é ga Uhɛ́brɔn ɔ̄cɔ̄ɔ̄cī á.