Read idoma 2 USÁMUWƐ̄LU 20 Bible Online

2 USÁMUWƐ̄LU 20 - idoma bible

2 USÁMUWƐ̄LU 20

¹Ɔ̄cɛ ɔdāhá éyi nōo ŋmá ipɔ́ɔma kú Ubénjāmin, nēé hī ka Usséba, ɔyí kú Ubíkiri, yɔ̄ abɔ́ɔ. Ó nyɔ̄ í lɛ opo tá klla kahíníī, “Ācɛ Ísrɛ̄lu, ɔdā dúú í wɛ ɛlā alɔ mɛ́mla Udéfīdi, ɔyí kú Ujése ŋ́. Alɔ í kē wɛ ācɛ ɔlɛ́ nū ŋ́. Ācɛ Ísrɛ̄lu, ɔnyɔɔnyɛ kóō ga ɔlɛ́ nū mɛ́ɛnɛ!”

²Anɔ́ɔ odúúdú ācɛ kú Ísrɛ̄lu le pɛ́ nyɛ̄ɛ̄ ŋmá ɛgiyí Udéfīdi, ɔcɛ́ ā, yɛce Usséba, ɔyí kú Ubíkiri, le pɛ́ i yɛ á. Amáŋ ācɛ kú Ujúda ā yɛce ɔcɛ́ kú uwá kpɔ́, ŋmá Ujɔ́dan jāā ga Ujerúsālɛm.

³Eko nɛ̄ Udéfīdi, ɔcɛ́ gā ipú agbla kú ɔcɛ́ kú nū ipú Ujerúsālɛm ā, ó le anyā ɔlɛ́ nū igwó nōó habɔ̄ uwā tá bá ipú agbla kú ɔcɛ́, cɛ́ɛ́ kéē leyīkwu ɔ́ ā, kpó tū ɛgéyi, anɔ́ɔ ó le ācogbāajɛ fu kéē gbō ūwā á. Ó gē yá ɛgbá kú uwá dóódu lɛ uwá, amáŋ ó gwutá kú ɔbá mɛ́mla ɔnyā mla odúúmā kú uwā ɛ́ɛ́ gɛ ŋ́. É bá bɛ̄ɛka anyōkwū ā jāā gbéeko ikwū kú uwā.

⁴Anɔ́ɔ Udéfīdi, ɔcɛ́ ā da Amása ka ɔ́ɔ̄ lɛ odúúdú ācɛ kú Ujúda hīgwú wā í jīla anúɔ eyī ɛ̄cīhɔ̄. Ó da Amása abɔ̄yīnū ka ɔ́ɔ̄ yɔ̄ abɔ́ɔ mɛ́mla uwá dúú.

⁵Anɔ́ɔ Amása le yɛ gáā hī ācɛ ā igwú, amáŋ ó le eko kpóbónū fíyɛ́ eko nɛ̄ ɔcɛ́ je lɛ ɔ́ ā.

⁶Abɔ̄ ó le lɛ ā, Udéfīdi da Abíssāyi kahíníī, “Usséba gáā yá alɔ ɔdōbɔ̄bí fíyɛ́ Ábsālɔm má n. Lɛ aícɔ́ɔja kú um kpó ká ā nū ɔ̄ nyɔ̄, ohígbū nɛ̄ ɔ̄cɛ í jé ŋ́ nōó nyɔ̄ í mīyɛ aígelī nēé le igá cē tū ɔ̄, nōó klla géē le hɛ́ alɔ abɔ̄.”

⁷Anɔ́ɔ Abíssāyi le Ujówābu mɛ́mla ācɛ ɔlɛ́ nū, mɛ́mla ācɛ nēe ī gbō ɔcɛ́ ɛyí ā mɛ́mla aícɔ́ɔja ohile ā kpó tɔ̄ɔkwu gbɔɔ́ ŋmá Ujerúsālɛm gbɔɔ́ ō nū Usséba á inya á.

⁸Eko nēé gā ɛgiyí ápátɛ́cɔ̄ nɛ̄hi nōo yɔ̄ Ugíbēyɔn ā, Amása wā í jīla mɛ́mla uwá. Ujówābu le gbō kú ícɔ́ɔ́ja lɛ ɔkpacaŋ́gelī kú nū wu apɛ́ bá ɛ́nyɔ́. Abɔ̄ ó yɔ̄ í wā iyɔbū ā, ɔkpacaŋ́gelī ā kwú plā ŋmá apɛ́ wā ajɛ.

⁹Anɔ́ɔ Ujówābu da Amása kahíníī, “A gbɛhiii, ɔmáapú um?” Anɔ́ɔ Ujówābu gaá le abɔ̄lɔ́ná bī ɔnwū agba kú Amása cɛ́ɛ́ kóō kwú ɔ̄ bá ɔtū á.

¹⁰Amáŋ Amása í má ɔkpacaŋ́gelī nɛ̄ Ujówābu le bī abɔ̄lúfīyē ā ŋ́. Anɔ́ɔ Ujówābu lɛ ɔkpacaŋ́gelī ā gwū ɔ̄ ipú plū. Ajīlīpú kú nū kwú pɛ́ wɛ̄ɛcɛ dúúdú, anɔ́ɔ ó gekwú ikpííkpó ɔ́ɔmā á. Ujówābu í klla cɛgbá ō gwū ɔ̄ ɔkpacaŋ́gelī ā igbɛpa gɛ ŋ́. Ujówābu mɛ́mla Abíssāyi, ɔyínɛ́ nū, nyɛ̄ɛ̄ gbɔ́ɔ ō nyɔ̄ í nū Usséba gɔbū.

¹¹Anɔ́ɔ éyi kú ācɛ ɔlɛ́ Ujówābu ā gaá háyi pī okwū kú Amása. Ó yɔ̄ ī ka tɛ́ɛcɛ ka ɔ̄cɛ dúúmā nɛ̄ ɔ́ɔ yɛce Ujówābu mɛ́mla Udéfīdi, ɔcɛ́ ā, ɛ́mba ɔ̄cɛ ɔ́ɔmā kóō yɛce Ujówābu nyɔ̄.

¹²Amáŋ okwū kú Amása nōo wɛ oyōōyī cɛnyi ā gwutá ɔtāhɛ̄ ɔwɛ kpɔ́. Ɔ̄cɛ ɔlɛ́ Ujówābu ā le má ka ɔ̄cɛ dóódu nōo má okwū ā gē māháyi pī ɔ̄ ā, ó le okwū ā pi ŋmá ɔwɛ gaá tá ipácí, anɔ́ɔ ó kwú áto ú tá klá anú á.

¹³Eko nōó kwú okwū ā ú pi ŋmá ɔwɛ ā, odúúdú ācɛ wā í le yɛce Ujówābu kéē nū Usséba, ɔyí kú Ubíkiri inya.

¹⁴Usséba le yɛ bū ipú odúúdú ipɔ́ɔma kú Ísrɛ̄lu ā, gaá le tá igelī nɛ̄hi kú Ébɛ̄l Ubɛt Umaáka. Odúúdú ācɛ ipɔ́ɔma kú Ubíkiri ā le jīla tɔ̄há anɔ́ɔ é kwūce ɔ́ le tá igelī nɛ̄hi ā á.

¹⁵Eko nɛ̄ Ujówābu le pó ka Usséba ɔ́ɔ yɔ̄ ipú igelī nɛ̄hi ɔ́ɔmā ā, é le pɛ́ i yɛ gaá le íbɔm cē tū igelī nɛ̄hi ā. É le ógbudu ma bá ɔdɔ kú igelī ā, anɔ́ɔ é gbɔɔ́ ō lɛ odée gɔ́ ɔdɔ ā cɛ́ɛ́ kéē lɛ ɔ́ wúla wāajɛ á. Ācɛ ohi kú uwá klla gbɔɔ́ ō bū ɔgɔ tá ikpo kú ɔdɔ kú igelī nɛ̄hi ā cɛ́ɛ́ kóō kwú wúla wāajɛ.

¹⁶Ɔnyā ojéeyī éyi yɔ̄ ipú igelī nɛ̄hi ā. Ó dɛ̄gba wɛ̄ɛcɛ ŋmá ɛyí ɔdɔ ā kahíníī “Aá jāhɔ̄! Aá jāhɔ! Aá da Ujówābu kóō gā amānyā. N tíne ō kɛlā mla anú.”

¹⁷Ujówābu le yɛ tá ɛgiyí ɔnyā ā, anɔ́ɔ ó da ɔ́ ɔ̄kā ka anú ɔ́ɔ wɛ Ujówābu āa? Ujówābu tá ɔ̄ ohi ka anúɔ nɛ. Ɔnyā ā da ɔ́ ká ɔ̄ jāhɔ̄ lɛ anúɔ, ɔkpani. Ujówābu klla tá ɔ̄ ohi ka anúɔ yɔ̄ ī jāhɔ̄ lɛ ɔ́ ɛɛ́.

¹⁸Anɔ́ɔ ɔnyā ā da ɔ́ ka aádáádā aá da aá ka eko tɛtɛ ā, ɔ́dāŋ ka ɔ̄cɛ dúúmā ɔ́ɔ tíne ō jé odée olɔhi lɛyíkwu unwalu kú nū nɛɛ, ɛ́ɛ gē da ɔ́ kahíníī, “Ga ipú igelī nɛ̄hi kú Ébɛ̄lu ā gaá mīyɛ ɛlā ō nwū lɛyíkwu unwalu kú uwɔ.” Ó ka ɔwɛ ɛ́gɔ́ɔmā nɛ̄ ɛ́ɛ gē ka unwalu kú uwā gwó á.

¹⁹Ó ka igelī nɛ̄hi kú aá ɔ́ɔ wɛ ɔlɛ́ kú ācɛ ɛbɔ́ nēe kē háyi kpaakpa ipú ajɛ kú Ísrɛ̄lu á. Ka ɔ́ɔ yɔ̄ ī tíne ō je igelī nɛ̄ ɔ́ɔ lɛbɛ̄ɛka ɛ́nɛ́ ā ipu Ísrɛ̄lu yíífi. Ó klla da ɔ́ ka ɔ́ɔ tíne ō je ɔdā nōo wɛ ákú Óndú ā yíífi nɛ̄ɛ̄?

²⁰Anɔ́ɔ Ujówābu le ohi tá ɔ̄ kahíníī, “Ó lɛ ɔwɛ ŋ́, ń tíne ō kpó aá ŋmó bónū ámāŋ je igelī nɛ̄hi nyā yíífi ŋ́.”

²¹Anɔ́ɔ ó da ɔnyā ka ɔ́ɔmā ɔ́ yɔ̄ ipú ɔdā nɛ̄ aá ɔ́ɔ miya ā ŋ́. Amáŋ ka ɔ̄cɛ éyi nēé hī ka Usséba, ɔyí kú Ubíkiri, nōo ŋmá Ɛ́frem ā ɔ́ɔ le ācɛ kpó trɛ̄yí gē bɛ̄yíkwu Udéfīdi, ɔcɛ́ ā. Ujówābu klla da ɔ́ ka ɔ́dāŋ ka ɛ́ɛ kwú ɔ̄cɛ ékpónú ɔ́ɔmā ú lɛ aá, aá géē nyɛ̄ɛ̄ ŋmá ɔlɛ́ uwā ā. Anɔ́ɔ ɔnyā ā da Ujówābu ka aá ɔ́ɔ géē je īkpɛ̄yí kú ɔ̄cɛ ā tɛ́ɛcɔ̄ wā ajɛ gé lɛ ɔ́ á.

²²Anɔ́ɔ ɔnyā ā nyɔ̄ í le ojuju kú íjééyī kú nū ā ka lɛ ācɛ kú ipú igelī nɛ̄hi ā, anɔ́ɔ ācɛ kú igelī ā kwú Usséba í ŋmó le ɔ́ ɛyí hɛ́ á. É kwú ikpɛ̄yí ā ú tá wāajɛ ɛgiyí Ujówābu. Anɔ́ɔ Ujówābu lɛ opo tá lɛ ācɛ ɔlɛ́ nū kéē nyɛ̄ɛ̄ ŋmá igelī nɛ̄hi ā á. Anɔ́ɔ é nyɛ̄ɛ̄ le cīgbīhi le pɛ́ tá ɔlɛ́ uwā á. Ujówābu kwúcē le tá Ujerúsālɛm ɛgiyí ɔcɛ́ á.

²³Eko ɔ́ɔmā Ujówābu wɛ otrɛ̄yí kú odúúdú aícɔ́ɔja kú Ísrɛ̄lu á. Ubenáya, ɔyí kú Ujehóyāda ā, kē leyīkwú ācɛ nēe gē gbō Udéfīdi abɔ̄yī nū ɛyí á.

²⁴Adónīram kē leyīkwu úklɔ́ ō yá abɔ̄fú á. Ujɛhósāfāti, ɔyí kú Ahilúdu, kē lɛ úklɔ́ kú ɔdā ō tá tū ɔkpá á.

²⁵Ussɛ́fa wɛ ɔmálɛ otɔ́kpá kú agblɔ̄cɛ́ á. Usádɔ̄ku mɛ́mla Abíyāta wɛ ācogwɛ́ɛya á.

²⁶Íra nōo ŋmá igelī kú Ujɛ́ɛ ā kē wɛ éyi kú ācogwɛ́ɛya kú ɔlɛ́ Udéfīdi dúú á.