Read idoma 2 USÁMUWƐ̄LU 22 Bible Online

2 USÁMUWƐ̄LU 22 - idoma bible

2 USÁMUWƐ̄LU 22

¹Eko nɛ̄ Óndú ā le Udéfīdi, ɔcɛ́ ā, hɛ́tá ŋmá abɔ̄ kú Usɔ́ɔlu mɛ́mla abɔ̄ kú odúúdú aólɛlā kú nū ā, ó le ijē nyā gwó lɛ Óndú ā.

²“Óndú, a gē gbō um lɛbɛ̄ɛka ápátɛ́cɔ̄ ā. A klla gē hɛ́ um tá bɛ̄ɛka ɛga nɛ̄ n gē tayínū ā.

³Awɔ wɛ Ɔwɔicō kú um á, nōo gē gbō um á. Awɔ kē ī hɛ́ um tá á. A klla lɛbɛ̄ɛka ɔkplɛ́fú, nōo gē gbō um ɛyí ā. A klla ī nuunu ga um lɛbɛ̄ɛka iyɛ́fú olɔfú nɛ̄hi ā. A klla lɛbɛ̄ɛka ɛga nēé gwó lɔfú kú um nɛ̄ n gē kwu tayínū ipú nū. Awɔ klla wɛ ohɔ́nyɛtá kú um, nōo gē hɛ́ um tá ŋmá abɔ̄ ācɛ nēe tíne ō ŋmó um á.

⁴N cɛ̄tra Óndú ā. N hī Óndú ā igwú kóō tá um abɔ̄. Ó kē lɛ um hɛ́tá ŋmá abɔ̄ aólɛlā kú um.

⁵Ikwū le yɛjīla um tá biílí bɛ̄ɛka úgbagwú kú itekwú ā. Ó hile lígíí kóō kwú um mlɛ.

⁶Ɔlékwū bī um bɛ̄ɛka ɔ́ŋgbá nōo le jíla tū um ɔkɔ ā. Unóji kē tá iyɔ̄bū um bɛ̄ɛka ukpa nēé jē tá ɔwɛ ī gbēyī um ā.

⁷N hī Óndú ā igwú eko nɛ̄ um yɔ̄ ipú unwalu. N hī Ɔwɔicō igwú kóō wā í tá um abɔ̄. Ó kē lɛ ɔkɔ kú um pó ipú Agblīihɔ-nɛ̄hi kú nū. Ó le āhɔ̄ jē le ikwū nɛ̄ n je kóō wā í tá um abɔ̄ ā pó.

⁸Anɔ́ɔ ɛcɛ fīyégbúlú klla jīliyē. Aúpíla kú ɔkpáncō jīliyē yɔɔ́yɔɔ́ ga iyɔ̄bū ga igbīhi ohígbū ka Ɔwɔicō le cɔ̄nū.

⁹Ódūdū tá bɛ̄cɛ ŋmá ɛnwū kú nū, ígblɛ́nyī ɔlá nōo ī yi ɔdā tāajɛ mɛ́mla ahɔ̄lá ō cɔ̄lá le bɛ̄cɛ ŋmá okónu kú nū.

¹⁰Ó le ɔkpáncō kpó fáa ɛ́gɛ́nɛ̄ é gē kpó ukɔ́tin ŋmá ɔwɛ ā. Anɔ́ɔ ó gāajɛ, ɔwɔ kē le tū klá ɔ̄ ikpó kpímm.

¹¹Ó le wu wāajɛ fíyaa cɛɛyí ucérūbu kú nū. Owu je ɔ́ wāajɛ fíyaa ɛ́gɛ́nɛ̄ acá kú ígbáanɔ ī bī ɔ̄ wu ā.

¹²Ó lɛ obū pīya klá īyī nū juuu bɛ̄ɛka áklɔ̄kpɛ. Ɔwɔ le tū kpúmm klá ɔ̄ nōo tōō má ŋ́.

¹³Ɔwɔ nōo límanya iyɔ̄bū nū ā tá ahɔ̄lá wɛ̄ɛcɛ iyɔ̄bū nū kátáá.

¹⁴Anɔ́ɔ Óndú ā kɛlā ŋmá ɔkpáncō gblágádáá bɛ̄ɛka akpáabana ā. É kē le ɔkɔ kú Ɔwɔicō nōo fíyɛ́ dúú ā pó.

¹⁵Ó lɛ ɔyī kú nū tá, le aólɛlā kú nū pahīla. Ó bī ɔwɔ olímanya kú nū, le aólɛlā fíyákátā bá ī kwinya gicō gajɛ.

¹⁶Eko nɛ̄ Óndú ā dɛ̄gba tū ísu ā, ó kwú ísu ā ú ŋmó ŋmá ajɛ klōōlō nɛ̄ ɛháajɛ kú nū gaá tɛ́ɛcɛ. Owu nɛ̄ Óndú ā fu bɛ̄cɛ ŋmá ɛnwū kú nū ā, etikpa kú ɛcɛ má tɛ́ɛcɛ áncā péee.

¹⁷Óndú ā le abɔ̄ nāŋ́daa ŋmá ɔkpáncō, anɔ́ɔ ó gaá lɛ um pi ŋmá ipú itekwú olipú nɛ̄hi ā.

¹⁸Ó lɛ um hɛ́tá ŋmá abɔ̄ kú aólɛlā olɔfú kú um, ŋmá abɔ̄ kú odúúdú ācɛ nēe gē wɔ́tu um ā. É kē le lɔfú fíyɛ́ um abɔ̄.

¹⁹Eko nɛ̄ n yɔ ipú unwalu ā, é nuunu tá um, amáŋ Óndú ā í cɛ̄ lɛ uwá le abɔ̄ kwu um ŋ́.

²⁰Ó lɛ um hɛ́tá ŋmá ipú ɔdā nōo ŋmó um glá ā. Ó hɛ́ um tá, ohígbū ka ɛlā um he ɔ́ ɔtū.

²¹Óndú ā cíla um ulé nyā ohígbū ka n gē yá ɔdā nōo le kpaakpa. Ó gē hɔ́hā cē um, ohígbū ka ń lɛpɔ̄bí ŋ́.

²²N gē lɛyítáajɛ lɛ íne kú Óndú ā, n kē cīgbīhi kwū Ɔwɔicō kú um nyɔ̄ í bɔ́bíipú ŋ́.

²³N gē lɛyítáajɛ lɛ odúúdú ɔdā nōó mafú ga um ka amíɔ̄ɔ̄ yá ā. N kē tá ɔdā nōó gē nwū um ka amíɔ̄ɔ̄ yá ā ŋ́.

²⁴Ó jé ka ń lɛ ɛnyá iyɔ̄bū nū ŋ́, n kē lɛ īyī um hɛ́ ŋmá ɔdōbɔ̄bí ō yá.

²⁵Ohígbū ɔ́ɔmā Óndú ā ī cíla um ulé olɔhi nyā, ohígbū koó jé ka ń lɛ́pɔ̄bí ŋ́.

²⁶Óndú, ācɛ nēe háyi kpaakpa ga uwɔ ā, a gē yá ɔdā okpaakpa lɛ uwá. A klla í yá ɔdā olɔhi nɛ̄hi lɛ ācɛ nēé lɛ ɛnyá dōōdu ŋ́ mā ā.

²⁷A gē gbonɛnɛ nɛ̄hi lɛ ācɛ nɛ̄ ɔtū kú uwā le yēŋēē ā. Amáŋ a gē gbūula tū ācɛ igbájí ā.

²⁸A gē nya ācɛ nēe tū īyī uwá wāajɛ ā tá. A kē ī tá ācɛ nēe ī yá ɔbɔ́ɔ̄cɛ ā wāajɛ.

²⁹Awɔ, Óndú ā wɛ ɔlá ō fíyáajɛ kú um á. A le fíyáajɛ ga um ipú obū.

³⁰Awɔ je ɔfú ga um ká n kpɛ́fú tú aólɛlā kú um á. Awɔ kē je ɔfú ga um ká n bū ɔdɔ kú igá kú ɔlɛ́ uwā bēhé á.

³¹Ɔwɔicō kú um nyā, í lɛ ɛnyá ipu ɔdā nōó gē yá ā ŋ́. Ɔ̄cɛ lɔfú lɛ ɔtū ce ɛlā kú nú kpɔ́ɔ́cíí. Ɔwɔicō lɛbɛ̄ɛka ɔ́kplɛ́fú ā lɛ ācɛ dóódu nēe tíne kóō gbō uwā.

³²Óndú ā ōfōōfūnū wɛ Ɔwɔicō á. Ɔwɔicō ōfōōfūnū gē gbō ɔ̄cɛ glá á.

³³Ɔwɔicō lɛbɛ̄ɛka ɛga olɔfú nɛ̄ n gē kwu tayínū ipú nū ā. Ó kē le yá ká n lā oyēeyī kú um ɛbɔ́ ɛɛ́.

³⁴Ó le ikpó kú um yá kóō lɔfú inya ō kwu bɛ̄ɛka ákú īkpɛ̄ɛnu ā. Ó lɛ um tū ɛbɔ́ abɔ̄ n gē yɛ icō kú aɛ́fu ā.

³⁵Ó gē nwū um ɛ́gɛ́nɛ̄ n gē kpɛ́fú lɛ ā. Ofíyɛ́ dúú ā, ó klla yá ká n lɔfú bī ɔtā kú oje udɔ le kpɛ́fú.

³⁶Óndú, awɔ lɛbɛ̄ɛka ɔkplɛ́fú nōo ī gbō um klla hɛ́ um hɛ́tá á. A tá um abɔ̄ kwú um pīya ɔ̄cɛ nɛ̄hi.

³⁷A le ɛga yá ga um cɛ́ɛ́ kú aólɛlā kú um kéē kwú um ŋ́. Ń kē plla gwōnū jéjéē ɛ́ɛ́ ŋ́.

³⁸N gē nū aólɛlā kú um inya klla í yá uwá lé. Ń gē māháyi ŋ́ jāā gbéeko nɛ̄ n lɛ uwá kpó yíífi.

³⁹N lɛ uwá ŋmó báajɛ, le ɔkpacaŋ́gelī gwū uwā béhé, é kē cāŋjɛ glá gɛ ŋ́. N le uwá yálé, é kē bá ɛháajɛ ikpó kú um.

⁴⁰Awɔ kē je ɔfú gā um ká n kpɛ́fú, cɛ́ɛ́ ká n yá aólɛla kú um lé á.

⁴¹A yá ká aólɛlā kú um kéē kwinya ŋmá ɛgiyí um. N kē le ācɛ nēe ī wɔ́tū um ā kpó yíífi ŋmá ajɛ.

⁴²É tíne kéē tá uwā abɔ̄, amáŋ ɔ̄cɛ dúúmā í nya uwá tá ŋ́. É hī uwɔ igwú, amáŋ á tá uwā ohi ŋ́.

⁴³N le uwá gbā putu klá ajɛ bɛ̄ɛka úmúlá ā. N lɛ ikpó da uwá ɛyí báajɛ ɛ́gɛ́nɛ̄ é gē lɛ ikpó da ɔ́tɔ̄ kú úláyi báajɛ ā.

⁴⁴Óndú, a le um nyatá ŋmá ɛgiyí ācɛ nēe ī yá īkpɛ̄yí olɔfú tá um ā. A kē cɛ̄ ga um wɛ otrɛ̄yí kú aéwo alɛwa kpɔ́. Ācɛ nɛ̄ ń tɛtɛ jé ŋ́ mā, kwu pīya ācɛ nōo ī cɛ̄ um ɛhɔ̄ ɛɛ́.

⁴⁵Ācɛ aéwɔhá gē wā í tūkpɛɛ́ gā um. Eko nēé le ɔ̄kā kú um pó, é gē lɛyítáajɛ gā um.

⁴⁶Ɔtū kú ācɛ aéwɔhá kwú gbenyi, cɛ́ɛ́ é gē wā ɛgiyí um bá gē fīyégbúlú ŋmá ɛga nēé tayínū ā.

⁴⁷N jé ka Óndú ā yēeyī ɔkwɛ̄yi! N cɛ̄tra anú nōo gē gbō um ā! N gē ka tɛ́ɛcɛ ka Ɔwɔicō nōo ī nya um tá ā lɔfú nɛ̄ɛ̄nɛ̄hi.

⁴⁸Ó gē cɛ̄ gā um yá aólɛlā kú um lé. Ó le aéwo ā kpó bá ɛháajɛ ikpó kú um.

⁴⁹Ó klla ī nya um tá ŋmá abɔ̄ kú aólɛlā kú um. Óndú, a cɛ̄ ga um le lɔfú fíyɛ́ aólɛlā kú um. A klla gbō um ŋmá abɔ̄ ācɛ oŋmɔ́ɔ̄cɛ ā.

⁵⁰Ohígbū ɔ́ɔmā, n géē cɛ̄tra uwɔ ipú aéwo ā. N géē gwíijē í cɛ̄tra awɔ.

⁵¹Ɔwɔicō gē cɛ̄ lɛ ɔcɛ́ nōo fu ā gē yá aólɛlā kú nū lé nwunééné. Ó gē yíihɔtū tá Udéfīdi, ɔcɛ́ nōó fu ā, mɛ́mla ayááyí kú nū piyóó.