Read idoma 2 USÁMUWƐ̄LU 23 Bible Online

2 USÁMUWƐ̄LU 23 - idoma bible

2 USÁMUWƐ̄LU 23

¹Udéfīdi, ɔyí kú Ujése wɛ ɔ̄cɛ nɛ̄ Ɔwɔicō je pīya ɔ̄cɛ nɛ̄hi. Anú wɛ ɔ̄cɛ nɛ̄ Ɔwɔicō kú Ujékɔ̄pu fu, ka ɔ́ɔ̄ wɛ ɔcɛ́ kú Ísrɛ̄lu á. Ó kē tá ije olɔnyɛ lɛ ācɛ kú Ísrɛ̄lu. Aɛ́nyā wɛ ɛlā ámōōmɛ kú Udéfīdi á.

²“Alelékwū kú Óndú ā le ɛlā nɛ̄ n géē ka ā da um ɛɛ́. Ɔkwɔ̄ɔ̄kwɛ̄yi, Ɔwɔicō da um ɛlā nɛ̄ n ka ā á.

³Ɔwɔicō kú Ísrɛ̄lu le ɛlā ka ɛɛ́. Anú nōo gē gbō Ísrɛ̄lu ā le ɛlā ka gā um kahíníī: ‘Eko nɛ̄ ɔcɛ́ lɛyítáajɛ lɛ Ɔwɔicō, anɔ́ɔ ó kē ī gbō ācɛ ɔlɛ́ nū kpaakpa,

⁴ɔcɛ́ ɔ́ɔmā lɛbɛ̄ɛka ɛnɔ o ŋmáajɛ ofúlɔ̄cī, nōo ī fíyáajɛ ɛ̄cī nɛ̄ ojuja í yɔ̄ ŋ́. Ó kē lɛbɛ̄ɛka ɛnɔ nōo gē cɛ̄ igbīhi eko nɛ̄ ɔwɔ le hɛ́ nōo ī cɛ̄ lɛ ácí ī gbɔɔ́ ō jɛ̄ ā.’

⁵Ɔkwɔ̄ɔ̄kwɛ̄yi nɛ, ɛ́gɔ́ɔmā nɛ̄ Ɔwɔicō hɔ́hā cɛ̄ ipɔ́ɔnū kú ɔlɛ́ um á. Ɔwɔicō le ɛka gbo ga um piyóó ɛɛ́. Odúúdú ɔdā dóódu kú nū le gwótū lɔhi, ó kē gáā bīya ɛka nōó gbo ā gbógbóō ŋ́. Ɔwɔicō géē tá um abɔ̄ piíí. Ó kē géē yá ka odúúdú aɔ́dā nyā nɛ̄ n kpéyīce ā kéē le yá.

⁶Amáŋ é gē kpó ācɛ o yá ɔdōbɔ̄bí nēé jé Ɔwɔicō ŋ́ mā ŋmó bónū, lɛbɛ̄ɛka ujē nōó tīile dúúmā ŋ́, nēé ī fu bónu ā. Amáŋ ācɛ í lɔfú lɛ abɔ̄ áncā kwu uwá glá ŋ́ bɛ̄ɛka ujē ā, ohígbū keé tūufi nɛ̄hi.

⁷Amáŋ ɔ̄cɛ dúúmā nōo géē lɛ abɔ̄ kwu uwá ā géē bī ɔdā ō bī yúklɔ́ kú oje ámāŋ ka ogbló kú óbō abɔ̄. É kē í kpó aújē ā yɔɔlá ŋmáajɛ dúúdú abáábɔ́ɔ.”

⁸Aɛ́nyā wɛ aícɔ́ɔja olɔfú nɛ̄ Udéfīdi lɛ á. Ɔ̄cɛ aflɛ́yí ā wɛ Ujósēbu Ubássébeti, nōo ŋmá Utácēmɔn ā. Anú wɛ otrɛ̄yí kú, ‘Aícɔ́ɔja ɛta ā’ á. Ó bī óbō le kpɛ́fú tá ācɛ úlā ɛpa (800), lɛ uwá kpó ŋmó dúúdú ɛ̄cī ékpónú.

⁹Ɔ̄cɛ nōo gboce ɔ́ ā wɛ Ɛlísaa, ɔyí kú Udódo nōo ŋmá ipɔ́ɔma kú Ahóhi ā. Ɛ̄cī éyi anú mɛ́mla Udéfīdi ōfōōfū uwā leyī méyī mɛ́mla ācɛ kú Ufilístiya nēe túbá kéē kpɛ́fú tū ācɛ Ísrɛ̄lu ā. Ācɛ Ísrɛ̄lu ohile le yɛ ɔkwɔɔkwu ŋmá ɔgbɛ́fú ā.

¹⁰Amáŋ ó mahayí, kpɛ́fú tá ācɛ Ufílīstiya jāā gbéeko nɛ̄ abɔ̄ kú nū kwú gɔ́ bá ɔkpacaŋgelī kú nū nōó cɛ̄ lɛ ɔ́ nwūla abɔ̄ je ɔkpacaŋgelī ā táajɛ glá ŋ́. Óndú ā cɛ̄ le uwá le aólɛlā kú uwā yálé nɛ̄hi ɛ̄cī ɔ́ɔmā. Eko nɛ̄ ɛfú ā mɛ ā, ācɛ kú Ísrɛ̄lu kwúcē ga ɛgiyí Ɛlísaa gaá le iyɔ́fú mɛ́mla ɔkplɛ́fú kpó ŋmá iyē kú okwū nēe báajɛ ā.

¹¹Ɔ̄cɛ ɔmɛɛtá ā nōo gboce ɔ́ɔmā ā wɛ Ussáma, ɔyí kú Agíi, ɔ̄cɛ kú Uhára. Ācɛ kú Ufílīstiya le pɛ́ i jīla Uléhi, ɛga nɛ̄ ɛhɔ̄ kú eje yɔ̄ ā. Ācɛ kú Ísrɛ̄lu le inya kwu ŋmá ɛgiyí ācɛ kú Ufilístiya.

¹²Amáŋ Ussáma háyi ipú ɛhɔ̄ ā kli, anɔ́ɔ ó le ācɛ kú Ufilístiya ā kpó ŋmó á. Óndú ā klla cɛ̄ lɛ uwá le aólɛlā kú uwā yálé nɛ̄hi ɛ̄cī ɔ́ɔmā.

¹³Ɛ̄cī éyi eko nɛ̄ ācɛ ī gbɔɔ́ ō cē ɔdɛ̄hɔ̄ ā, ‘Aícɔ́ɔja ɛtá ā’ kú ipú ‘Aícɔ́ɔja ofu cigwó’ olɔfú ā, le yɛ wāajɛ í le tá ɔ̄gɛ̄cɔ̄ kú Adúlam. Udéfīdi yɔ̄ abɔ́ɔ eko ɔ́ɔmā ā. Aícɔ́ɔja kú ācɛ Ufilístiya kē le aáklɔ̄kpɛ kú ɛfú kú uwā ce kwu ɔpɛ́ kú Urefém.

¹⁴Eko ɔ́ɔmā, Udéfīdi klá ɛyí ɛfu, nēé le igá olɔfú hɛ́ tū ɔ̄. Anɔ́ɔ ígwu kú aícɔ́ɔja kú ācɛ Ufilístiya ōhī gaá mīyɛ Ubɛ́tlɛhɛ̄m tābɔ̄ á.

¹⁵Eyī ɔlɛ́ gbɔɔ́ ō ce Udéfīdi, anɔ́ɔ ó ka eyī ɔ́ɔ yá anúɔ kú ɔ̄cɛ éyi kóō lɛ éŋkpɔ̄ ō gwá bī gē lɛ anúɔ ŋmá obugā nɛ̄ ɔ́ɔ kwu pī okómpinu kú Ubɛ́tilɛhɛm ā kú anúɔ gwá.

¹⁶Anɔ́ɔ aícɔ́ɔja olɔfú ɛtá nyā ā nuunu bū ipú aáklɔ̄kpɛ kú ɛfú kú aícɔ́ɔja kú ācɛ Ufilístiya ā abɔ̄fú púúúlú gaá lɛ éŋkpɔ̄ hɛ́ ŋmá obugā ā gé lɛ Udéfīdi. Amáŋ Udéfīdi í gwá éŋkpɔ̄ ā ŋ́. Ikɔkɔ ɔ́ɔmā, ó kwú ɔ̄ ú pīya klá ajɛ kóō kwú pīya ɛya nōó gwó lɛ Óndú ā.

¹⁷Anɔ́ɔ ó kahíníī, “Óndú ā kóō tá. Ń gwá éŋkpɔ̄ ā glá ŋ́. Ohígbū koó géē lɛbɛ̄ɛka oyī kú ācɛ nēe lɛyícikwū nyɔ̄ í hɛ́ éŋkpɔ̄ ā gé um ā.” Anɔ́ɔ ó tá ō gwá éŋkpɔ̄ ā. Ɛ̄nyā wɛ úklɔ́ nɛ̄ aícɔ́ɔja ɛtá olɔfú ā yá á.

¹⁸Abíssāyi, ɔyínɛ́ Ujówābu, nɛ̄ ɛ́nɛ́ uwā lé ka Userúya ā, wɛ otrɛ̄yí kú ‘Aícɔ́ɔja olɔfú ofu cigwó ā’ á. Anú ōfōōfūnū bī óbō le kpɛ́fú tá aícɔ́ɔja ofu igwɛ́ɛhɔ̄ (300) le uwá kpó ŋmó dúúdú. Ɔ́ɔmā yá nōó lóofu ipú ‘Aícɔ́ɔja ofu cigwó ā’ á. [10]

¹⁹Anú lóofu fíyɛ́ dúú ipú ‘Aícɔ́ɔja ofu cigwó ā’ á. Ohígbū ɔ́ɔmā ó kwú pīya otrɛ̄yí kú uwā. Amáŋ ó lóofu gāajɛ ‘Aícɔ́ɔja ɛtá ā’ ŋ́.

²⁰Ubenáya, ɔyí kú Ujehoyáda nōo ŋmá Ukábsíila ā, wɛ ícɔ́ɔ́ja olɔfú nɛ̄hi ɔhá dúú. Ó yá ɔdā kú ɔtū ō lɛ alɛwa. Ó ŋmó aícɔ́ɔja olɔfú nɛ̄hi ɛpa kú ācɛ Umówābu. Ó kōō ga ipú ɔ̄gɔ̄ éyi nyɔ̄ gaá le ágábá ŋmó ɛ̄cī éyi, eko nɛ̄ ofū gē ŋmó nɛ̄hi ā.

²¹Ó klla ŋmó ɔbáagwu nɛ̄hi éyi kú Íjīpiti nōo bī óbō. Ubenáya ga ɛgiyí nū bī ogbló abɔ̄, ó le ogbló fīyɛ̄ ɔ̄ óbō ā wāajɛ, anɔ́ɔ ó kwú óbō ā ú, bī óbō kú ɔ̄cɛ ā piíí le ɔ́ ŋmó á.

²²Ɛ̄nyā wɛ ɔdā kú ɔtū ō lɛ kú Ubenáya, éyi kú ipú ‘Aícɔ́ɔja ofu cigwó ā’ á.

²³Ó wɛ ɔ̄cɛ nōo kwɛcɛ péee kú ɔtū ō lɛ, amáŋ ó lɔfú bɛ̄ɛka ‘Aícɔ́ɔja ɛtá ā’ ŋ́. Udéfīdi kwú ɔ̄ ú pīya otrɛ̄yí kú aícɔ́ɔja nēe gē gbō anú abɔ̄yī nū ā.

²⁴Ācɛ ohile kú ‘Aícɔ́ɔja ofu cigwó ā’ bá yɔ̄ á. Ásāhɛlu, ɔyínɛ́ kú Ujówābu. Ɛlhánan, ɔyí kú Udódo nōo ŋmá Ubɛ́tilɛhɛ̄m ā.

²⁵Ussáma mɛ́mla Ɛlíka nēé ŋmá Uhárɔ̄du ā.

²⁶Uhélesi nōo ŋmá Upélēti ā. Íra,ɔyí kú Ikéssi nōo ŋmá Utékōwa ā.

²⁷Abíyɛ̄sa ŋmá Ánātɔ̄ɔtu ā. Umebúnāyi nōo ŋmá Uhússa ā.

²⁸Usálmɔ̄n nōo ŋmá Ahohi ā. Umahárīya nōo ŋmá Unetófa ā.

²⁹Uhélebu, ɔyí kú Ubaána ŋmá Unetófa ā. Ítāyi, ɔyí kú Uríbāyi nōo ŋmá Ugíbēya, ipú ajɛ kú Ubénjāmin ā.

³⁰Ubenáya nōo ŋmá Upírātɔn ā. Uhíddāyi nōo ŋmá ɔpɛ́ nōo kwu Ugáássi ā.

³¹Abiyálbɔn nōo ŋmá Ubɛt Arába. Asmáfɛ̄ti nōo ŋmá Ubáruhim ā.

³²Ɛlíyāba nōo ŋmá Ussaálbɔn ā. Ayínɔ̄nyīlɔ kú Ujássen. Ujonátan.

³³Ussáma nōo ŋmá Uhára ā. Ahíyam, ɔyí kú Ussára nōo ŋmá Uhára ā.

³⁴Ɛlífɛ̄lɛti, ɔyí kú Ahasbáyi nōo ŋmá Umáaka ā. Ɛlíyam, ɔyí kú Ahítōfɛlu nōo ŋmá Ugílo ā.

³⁵Uhɛ́sro nōo ŋmá Ukámɛ̄lu ā. Upaárāyi nōo ŋmá Árba ā.

³⁶Ígalu, ɔyí kú Unátan nōo ŋmá Usóba ā. Ubáni nōo ŋmá Ugádi ā.

³⁷Usɛ́lɛ̄ki nōo ŋmá Ámɔ̄ri ā. Unahárāyi nōo ŋmá Ubíírɔ̄ɔtu. Anú gē bī iyɛ́fú kú Ujówābu á.

³⁸Íra mɛ́mla Ugárebu nēe ŋmá Ujátɛ̄ ā.

³⁹Uríya nōo ŋmá Uhɛ́ti ā. Odúúdú aícɔ́ɔja olɔfú ā wɛ ofu cigwáahāapa.