Read idoma 2 USÁMUWƐ̄LU 24 Bible Online

2 USÁMUWƐ̄LU 24 - idoma bible

2 USÁMUWƐ̄LU 24

¹Óndú ā le cɔ̄nū mɛ́mla ācɛ Ísrɛ̄lu igbɔhá kpɔ́. Anɔ́ɔ anú abɔ̄yīnū cɛ̄ lɛ Udéfīdi lɛ unwalu hɛ́ gé lɛ uwá á. Óhígbū ka Óndú ā da ɔ́ ka ɔ́ɔ nyɔ̄ í lɛ ācɛ kú Ísrɛ̄lu mɛ́mla ācɛ Ujúda gbaáluka á.

²Anɔ́ɔ Udéfīdi le ɔ́da je lɛ Ujówābu, otrɛ̄yí kú aícɔ́ɔja kú nū ā ka ɔ́ɔ̄ lɛ aígabɔ̄ kú nū kpó tɔ̄kwu cɛ́ɛ́ kéē nyɔ̄ ga odúúdú aípɔ́ɔma kú Ísrɛ̄lu, oŋmá igelī nēé hī ka Udáni, nōo yɔ̄ ɛhícō ā, jāā ga igelī nēé hī ka Ubiyɛssɛba, nōo yɔ̄ ɛháajɛ ā, cɛ́ɛ́ kéē lɛ uwá gbaáluka. Ó ka anúɔ tíne ō je ɛ́gɛ́nɛ̄ ɛ́ɛ lɛwa lɛ ā.

³Amáŋ Ujówābu da Ágábáidu Udéfīdi ka Óndú ā ka ɔ́ɔ̄ yá kú ācɛ Ísrɛ̄lu ka ɛ́ɛ̄ nyīla lɛwa ɛga ofɛhɔ̄ fíyɛ́ ɛ́gɛ́nɛ̄ é lɛ abālɔbányā ā. Ka ɔ́ɔ kē lɛ ɔcɛ́ ā tū kóō lɛ ɔ́ má. Ó klla le ɔ̄kā da ɔ́ ka amáŋ, ɔdí ɔ́ɔ yá ɛ́ɛ́ nɛ̄ Ágábáidu ɔ́ɔ tíne ō gbo ācɛ ā álūka ā?

⁴Amáŋ Udéfīdi, ɔcɛ́ lɛ abɔ̄ kwɔtū ka ɔ́ɔ̄ yá ɔdā nōó tíne ō yá ā. Anɔ́ɔ Ujówābu mɛ́mla aígabɔ̄ kú nū ā lɛ pɛ́ nyɔ̄ ŋmá ipéyī ɔcɛ́ ā gaá gbɔɔ́ ō gba ācɛ Ísrɛ̄lu álūka á.

⁵É le bēhé ísu kú Ujɔ́dan nyɔ̄ í gbɔga ɛháajɛ kú Árōwɛ, igelī nōo yɔ̄ ɔtāhɛ̄ ɔpɛ́ ipú ajɛ kú Ugádi ā. É ŋmá abɔ́ɔ le tá Ujása.

⁶É yɛ ŋmá abɔ́ɔ le tá Ugílɛ̄di mɛ́mla Ukádess ipú ajɛ kú ācɛ Uhɛ́ti[11] Anɔ́ɔ é le tá Udáni á. É ŋmá Udáni yɛ biílí ga Usídɔn.

⁷Anɔ́ɔ é le yɛ ga ɛháajɛ le tá ipú igelī nɛ̄hi nēé cē igá olɔfú tū ɔ̄ nēé hī ka Utáya ā. É klla yɛ ŋmá abɔ́ɔ le tá aígelī kú ācɛ Uhám mɛ́mla ákú ācɛ Ukénan. Anɔ́ɔ é gaá le iyāwu kú uwā ŋmɛ́yí ipú ajɛ kú Ubiyɛssɛ́ba, ɛháajɛ kú Ujúda á.

⁸Igbīhi nēé lɛ ɔyā ahāanɛ ce ɛ̄cī ofu yá ā, é pīyɛyí wā Ujerúsālɛm, abɔ̄ é le odúúdú ajɛ kú Ísrɛ̄lu ā kpó yɛ jīla āa.

⁹Anɔ́ɔ Ujówābu lɛ ohi kpó gé lɛ ɔcɛ́ ka áluka kú odúúdú ācɛnyīlɔ nēe ga ɔgbɛ́fú glá ipú ajɛ kú Ísrɛ̄lu ā wɛ úlā bá ɛgiyí úlā ɛhɔ̄ (800,000). Áluka kú ācɛ kú Ujúda ā wɛ úlā bá ɛgiyí úlā ɛtá ce ofɛpa cigwó (500,000).

¹⁰Amáŋ, eko nɛ̄ Udéfīdi cɛ̄ lɛ uwá le ācɛ gbaáluka kwɛyí ā, ɔtū kú nū gbɔɔ́ ō ŋmó ɔ̄ ɛpɔ̄bí, anɔ́ɔ ó da Óndú ā kahíníī, “N le ɔ́bíipú nɛ̄hi bī ipú ɔdā nɛ̄ n yá nyā ā. Kócōō kwú yá um ɛhi. Ucē kú olíla nɛ̄ n yá yɔ̄ á.”

¹¹Óndú ā da Ugádi, ɔ̄comɛ́ɛbɛ kú ɔlɛ́ Udéfīdi, kahíníī, “Nyɔ̄ gaá da Udéfīdi ka n géē kpó ɔwɛ ɛtá nɛ̄ um géē yá ɔ̄ italā bá lɛ ɔ́ kóō je éyi ŋmá ipú uwā. N géē yá ɔ́ ɔwɛ dúúmā nōó í je ā.” Ɔ̄cɔ̄ɔ̄cī kú oŋmɔ́cī nū, igbīhi nɛ̄ Udéfīdi cāŋjɛ ŋmá agōdō ā,

¹³anɔ́ɔ Ugádi le tá ɛgiyí nū gaá le ɛlā nɛ̄ Óndú ā ka ā da ɔ́ á. Ugádi le ɔ̄kā da Udéfīdi ka ɛ̄nyá kú ɔwɛ ɛtá nyā nɛ̄ ɔ́ɔ géē je ā? Iháyí ɛtá[12] kú ɔkpɛtā ipú ajɛ kú ɔlɛ́ nū. Ámāŋ ka aólɛlā kú nū kéē bá ī yá ɔ̄ lé ɔyā ɛtá. Kɛ̄ɛ ka ōcē obɔ̄bí kóō ŋmó ācɛ ipú ajɛ ɔlɛ́ nū ɛ̄cī ɛtá? Ó da ɔ́ Udéfīdi ka ɔ́ɔ̄ lɛ ɔ́ miya ipú odo kú nū cɛ́ɛ́ kú anúɔ jé ohi nɛ̄ anúɔ géē bī gē lɛ ɔ̄cɛ nōo tū anúɔ ɛhɔ̄ ā.

¹⁴Anɔ́ɔ Udéfīdi tá ɔ̄ ohi ka anúɔ í jé ɔdā ō yá ipú ɛlā ā ŋ́. Amáŋ ó ka anúɔ í tíne kú ɔlɛɛcɛ dúúmā ka ɔ́ɔ̄ yá anúɔ italā ŋ́. Ka Óndú ā abɔ̄yī nū ka ɔ́ɔ̄ yá anúɔ italā, ohígbū ka ɔ́ɔ gē méyīnyinyi ɔ̄cɛ.

¹⁵Anɔ́ɔ Óndú ā le ōcē obɔ̄bí tū klá ajɛ kú Ísrɛ̄lu á. Ōcē ā gbɔɔ́ ŋmá ɔ̄cɔ̄ɔ̄cī jāā gaá kwu eko nōó je ā. Ó yɔ̄ ɛbɛɛbɛ gbɔɔ́ ŋmá igelī nēé hī ka Udáni, nōo kwu oŋmɛ́yí kú ajɛ ā ɛhícō ā, jāā gaá kwu igelī kú Ubiyɛssɛ́ba nōo kwu oŋmɛ́yí kú nū ɛháajɛ ā. Ōcē obɔ̄bī ā le ācɛ úla ofu ahātá cē úlā igwɛ́ɛhɔ̄ (70,000) kpó ŋmó.

¹⁶Eko nɛ̄ alelékwū-ōtɛ̄hɔ̄ kú Óndú ā nōó tɛ̄hɔ̄ yɔ̄ ī ŋmó ācɛ ā gā Ujerúsālɛm kóō kpó ācɛ abɔ́ɔ ŋmó ā, Óndú ā le ɔtū kú nū pīyabɔ̄ lɛyíkwu italā ō yá ācɛ ā, anɔ́ɔ ó da alelékwū-ōtɛ̄hɔ̄ ā kahíníī, “Mā uwá tá. Ó jɛ̄ ɛɛ́.” Eko ɔ́ɔmā alelékwū-ōtɛ̄hɔ̄ ā klá ɛga nēé í wú igwu kú Arawúna, ɔ̄cɛ Ujɛ́būsi ā.

¹⁷Udéfīdi le alelékwū-ōtɛ̄hɔ̄, nōo yɔ̄ í ŋmó ācɛ ā má, anɔ́ɔ ó da Óndú ā kahíníī, “Ami lɛ́pɔ̄bí á. Ami klla yá ɔdōbɔ̄bí á. Ācɛ nēe bá ā lɛbɛ̄ɛka aálá ā, nɛ̄ n kē wɛ ɔ̄cogbō uwā ó. É kē yá ɔdā dóódu ŋ́. Ami mɛ́mla ipɔ́ɔ́nū kú ɔlɛ́ um nɛ̄ a cíkā ō yá italā á.”

¹⁸Ícíícɛ ɔ́ɔmā Ugádi le tá ɛgiyí Udéfīdi gaá da ɔ́ ka ɔ́ɔ̄ nyɔ̄ ga ɛga nɛ̄ Arawúna gē wú igwu ā, cɛ́ɛ́ ka ɔ́ɔ lɛ ede gwó lɛ Óndú ā abɔ́ɔ.

¹⁹Udéfīdi le ɛlā nɛ̄ Óndú ā ka ā pó, anɔ́ɔ ó le yɛ ɛ́gɛ́nɛ̄ Ugádu da ɔ́ lɛ ā á.

²⁰Arawúna je eyī wāajɛ, anɔ́ɔ ó le Udéfīdi, ɔcɛ́ ā, mɛ́mla aígabɔ̄ kú nū má bā ī wā lɛyīkwu ɔ́ á. Arawúna má kwōkwū ajɛ iyɔ̄bu Udéfīdi,

²¹anɔ́ɔ ó da ɔ́ ɔ̄kā kahíníī, “Ágábáidu, ɔdíyá nɛ̄ a wā gaá ma ami nōo wɛ ɔ̄cocɛ̄hɔ̄ kú uwɔ gɛ? Udéfīdi tá ɔ̄ ohi ka anúɔ wā gaá lá ɛga owíigwu kú nū cɛ́ɛ́ ká anúɔ lɛ ede gwó lɛ Óndú ā, oyá ɛ́ɛ́ kú ōcē obɔ̄bí ā ka ɔ́ɔ̄ mɛ ŋmá ɛgiyí ācɛ ā.

²²Arawúna da ɔ́ kahíníī, “Ágábáidu ɔcɛ́, kwú ajɛ ā ú, cɛ́ɛ́ ká ā le yá ɔdā dóódu nōo he uwɔ ɔtū lɛ Óndú ā. Kwú aɔ́bɛ́ɛna nɛ̄ um gē le hɛ́hɔ̄ ā ká ā kwú gwɛ́ɛya kú ɛ̄gbā ō yɔlá dúúdú ɛyí ede ā. Kwú úkplākā mɛ́mla ápɔ́tɔ́cí nɛ̄ n le wu uwá ɔkɔ gē bī hɛ́hɔ̄ ā ú dúú ká ā le gwɔ́ɔlá ā.”

²³Arawúna kwú odúúdú aɔ́dā nēe bá í kpó lɛ Udéfīdi, ɔcɛ́ ā, anɔ́ɔ ó da ɔ́ kahíníī, “Óndú ā, nōo wɛ Ɔwɔicō kú uwɔ ā kóō mīyɛ ɛya nɛ̄ a í gwó āa.”

²⁴Amáŋ Udéfīdi, ɔcɛ́ ā, tá ohi da ɔ́ kahíníī, “N géē cíla ulé ajɛ ā. Ń gáā lɛ ɔdá dúúmā nɛ̄ ń lɛ ije kwu ɔ́ ŋ́ mā gwɛ́ɛya lɛ Óndú ā, nōo wɛ Ɔwɔicō kú um ā ŋ́.” Anɔ́ɔ ó bī ije nɛ̄hɛ́ ofɛpa cigwó lɛ ɛga o wú īkpɔ̄dā ā mɛ́mla aɔ́bɛ́ɛna ā kpó lá ŋmá ɛgiyí nū á.

²⁵Anɔ́ɔ Udéfīdi, ɔcɛ́ ā le ede gwó lɛ Óndú ā, anɔ́ɔ ó le ɛya kú ɛ̄gbā ō yɔlá dúúdú mɛ́mla ɛya kú ɛbɔ́ gwó lɛ Óndú ā á. Anɔ́ɔ Óndú ā le ɔkɔ nōó gbā ohígbū ajɛ ā pó, anɔ́ɔ ōcē obɔ̄bí á mɛ ŋmá ajɛ kú Ísrɛ̄lu á.