Read idoma 2 USÁMUWƐ̄LU 3 Bible Online

2 USÁMUWƐ̄LU 3 - idoma bible

2 USÁMUWƐ̄LU 3

¹Ɛfú yɔ̄ ɔtāhɛ̄ kú ācɛ nēe bá ī yɛce ɔlɛ́ Usɔ́ɔlu ā mɛ́mla ācɛ nēe bá ī yɛce Udéfīdi ā gbojī ajɛ. Abɔ̄ Udéfīdi yɔ̄ í lɔfú tōotɔ̄ɔ̄ ā, nɛ̄ ɔfú kú inu kú ɔlɛ́ Usɔ́ɔlu yɔ̄ í mɛ tōōtɔ̄ɔ̄ á.

²Ayí ɛhīlī nēé ma lɛ Udéfīdi Uhɛ́brɔn ā bá ā. Iyē kú uwá wɛ ɛ́gɛ́nɛ̄ é ma uwá ɔgbɔɔgba lɛ ā. Ámnɔn, ɛ́nɛ́ nū wɛ Ahínōwam nōo ŋmá Ujɛsiríili ā,

³Ucílēyabu, ɛ́nɛ́ nū wɛ Abígɛ̄ɛlu, ɔ̄nyā okwūma Unábalu nōo ŋmá Ukámɛ̄lu ā. Ábsālɔm, ɛ́nɛ́ nū wɛ Umáaka, adá kú Utálmāyi, ɔcɛ́ kú Ugɛ́sɔ ā.

⁴Adónīja, ɛ́nɛ́ nū wɛ Uhágiti. Ussɛfatíya, ɛ́nɛ́ nū wɛ Abítalu.

⁵Ítrɛyám, ɛ́nɛ́ nū wɛ Égla, ɔnyā Udéfīdi ɔhá. É ma odúúdú ayí nēe bá nyā lɛ Udéfīdi Uhɛ́brɔn.

⁶Abɔ̄ ipɔ́ɔ́nū kú Usɔ́ɔlu mɛ́mla Udéfīdi bá ī kpɛ́fú gɔbū ā, Ábna yɔ̄ í lɔfú tōōtɔ̄ɔ̄, ipú ācɛ nēe ī yɛce Usɔ́ɔlu ā.

⁷Ɛ̄cī éyi Íssbɔ̄ssɛti da Ábna ka ɔ́ɔ gē cikpó Uríspa, ɔyínɔ̄nyā kú Áya, ɔnyā nɛ̄ Usɔ́ɔlu gē cikpó nū ā.

⁸Anɔ́ɔ Ábna kwú cɔ̄nū nɛ̄hi kahíníī, “A gbɛlá ka amíyɔ gē yá ibīyāajɛ tū Usɔ́ɔlu nɛɛ? Ka amīyɔ yɔ̄ ī yúklɔ́ lɛ ācɛ Ujúda bɛ̄ɛka éwo nēe ī tá ɔ̄cɛ ɔkwu ā? Ŋmá aflɛ́yí jāā kwu ícɛ, n húmáyī lɛyítáajɛ lɛ ádā uwɔ, Usɔ́ɔlu mɛ́mla ayínɛ́ nū mɛ́mla aóklóbīya nū. Ń klla cɛ̄ lɛ Udéfīdi yá aá lé ŋ́. Anɔ́ɔ ícɛ nyā, a gē kpɛ́lā ce um ohígbū ɔ̄cɛnyā á.

⁹Ɔwɔicō kóō lɛ um ŋmó ɔ́dāŋ ka ń yá ka okónu nɛ̄ Ɔwɔicō ce lɛ Udéfīdi ā kóō le yá jīla ŋ́.

¹⁰Ɔwɔicō cokónu lɛ Udéfīdi ka anúɔ géē mīyɛ ajɔ̄ɔ̄cɛ́ ā ŋmá ɛgiyí Usɔ́ɔlu mɛ́mla ipɔ́ɔma kú nū klla í je lɛ Udéfīdi, klla í je Udéfīdi yá ɔcɛ́ kú odúúdú Ísrɛ̄lu kwu ajɛ kwu icō. Ŋmá Udan jāā ga Ubiyɛssɛ́ba.”

¹¹Íssbɔ̄ssɛti í da Ábna ɔdā dúúmā glá gɛ ŋ́ ohígbū kóō gē yúúfi nū nɛ̄ɛ̄nɛ̄hi.

¹²Anɔ́ɔ Ábna lɛ ɛhɔ̄ tū fu Udéfīdi Uhɛ́brɔn kahíníī, “Awɔ cíkā ō wɛ ɔcɛ́ kú ajɛ nyā á. Lɛ okónu ce mɛ́mla um, ká n yá ká ā kwú pīya ɔcɛ́ kú odúúdú Ísrɛ̄lu.”

¹³Udéfīdi da ɔ́ kahíníī, “Ó lɔhi. N géē cokónu mɛ́mla uwɔ ɔwɛ ékpónú. A géē bī Umáyíkalu, ɔyínɔ̄nyā kú Usɔ́ɔlu ā gé um, eko nɛ̄ a géē wā í má um ā.”

¹⁴Anɔ́ɔ Udéfīdi lɛ ɛhɔ̄ tū fu Íssbɔ̄ssɛti kahíníī, “Kwú ɔnyā um, Umáyíkalu ú gā um. Ufíyé kú ācɛ Ufílīstiya ofɛhɔ̄ (100) nɛ̄ n bī cíla ulé nū le lɛ ɔ́ á.”

¹⁵Anɔ́ɔ Íssbɔ̄ssɛti mīyɛ Umáyíkalu ŋmá ɛgiyí ɔbá nū, Upáltīyɛlu, ɔyí kú Uláyiss ā.

¹⁶Abɔ̄ é bī ɔ̄ yɔ̄ í nyɔ̄ ā, Upáltīyɛlu yɛce ɔ́ yɔ̄ í jikwú jāā ga igelī nɛ̄ŋcɛ́ kú Ubahurím. Amáŋ eko nɛ̄ Ábna lɛ ɛgba dɛ̄ tū ɔ̄ kóō kwúcē ga ɔlɛ́ ā, ó kwúcē ga ɔlɛ́.

¹⁷Anɔ́ɔ Ábna le tá ɛgiyí anyākwɔ́cɛ kú Ísrɛ̄lu ā gaá da uwá kahíníī, “Ó gbojī ɛɛ́ nɛ̄ aá húmáyī tíne ka Udéfīdi kóō kwú pīya ɔcɛ́ kú aá.

¹⁸Ɛga nɛ̄ aá lɛ ā yɔ̄ mɛ̄ɛ á. Aá bla ka Óndú ā ka anúɔ géē bī ɔ̄cocɛ̄hɔ̄ kú anúɔ, Udéfīdi, le hɛ́ ācɛ ɔlɛ́ anúɔ, Ísrɛ̄lu, ā tá ŋmá abɔ̄ kú ācɛ Ufílīstiya mɛ́mla aólɛlā kú uwá.”

¹⁹Ábna lɛ ɛlā ka lɛ ācɛ ipɔ́ɔma kú Ubénjāmin dúú. Anɔ́ɔ ó le yɛ gáā nyɔ̄ í da Udéfīdi ɔdā nɛ̄ ācɛ Ísrɛ̄lu mɛ́mla ācɛ kú ipɔ́ɔma kú Ubénjāmin cɛ̄ ka aá ɔ́ɔ gáā yá ā á.

²⁰Eko nɛ̄ Ábna mɛ́mla ācɛ ofu gā ɛgiyí Udéfīdi ā, Udéfīdi lɛ ucɛ yá lɛ uwá.

²¹Anɔ́ɔ Ábna da Udéfīdi kahíníī, “Ágábáidu,n géē nyɔ̄ ká n lɛ odúúdú ācɛ kú Ísrɛ̄lu ā kpó gé lɛ uwɔ. É géē gbɛka mɛ́mla uwɔ ká ā kwú pīya ɔcɛ́ kú uwā. Cɛ́ɛ́ a kwú pīya ɔcɛ́ kú odúúdú ajɛ kú Ísrɛ̄lu mɛ́mla Ujúda ɛ́gɛ́nɛ̄ a húmáyī tíne ā.” Udéfīdi le uŋmóōō tá Ábna ka ɔ́ɔ nyɔ̄ ɛbɔ́. Anɔ́ɔ Ábna kē nyɛ̄ɛ̄ ɛbɔ́ á.

²²Igbīhāajɛ eko kpiíí nɛ̄ Ábna nyɛ̄ɛ̄ ŋmá abɔ́ɔ ā, Ujówābu mɛ́mla aícɔ́ɔja ɔhá kú Udéfīdi ā pīyɛyí ŋmá ɔgbɛ́fú wā ɔlɛ́ bī iyó nɛ̄ é kpó ŋmá ɔgbɛ́fú ā. Ábna í yɔ̄ Uhɛ́brɔn eko ɔ́ɔmā ɛ́ɛ́ gɛ ŋ, ohígbū ka, Udéfīdi mā ɔ̄ tá le yɛ ɛbɔ́ ɛɛ́.

²³Eko nɛ̄ Ujówābu mɛ́mla ācɛ ɔlɛ́ nū pīyɛyí wā ɔlɛ́ ā, é le da ɔ́ ka Ábna ɔ́ɔ wā ɛgiyí Udéfīdi, Udéfīdi ɔ́ɔ kē mā ɔ̄ tá le yɛ ɛbɔ́ ɛɛ́.

²⁴Anɔ́ɔ Ujówābu le tá ɛgiyí Udéfīdi gaá da ɔ́ kahíníī, “Ɔdí nɛ̄ a yá yɔ̄ ā? Ábna gā ɛgiyí uwɔ, a kē mā ɔ̄ tá le yɛ áncā?

²⁵Ó wā í pla uwɔ, kóō má ɔdā nɛ a gēe yá mɛ́mla ɛga dóódu nɛ̄ a gē nyɔ̄ ā.”

²⁶Eko nɛ Ujówābu nyɛ̄ɛ̄ ŋmá ɛgiyí Udéfīdi ā, ó lɛ ɛhɔ̄ tū ka ɛ́ɛ gaá lɛ Ábna bī wā. Anɔ́ɔ é lɛ ɔ́ bī wā ŋmá ɛgiyí obugā kú Usíra á. Amáŋ Udéfīdi í jé ɔdā nōo yɔ̄ í yá ā ŋ́.

²⁷Eko nɛ̄ Ábna ga Uhɛ́brɔn ā, Ujówābu lɛ ɔ́ bī ga okónu igá kú igelī ā, bɛ̄ɛka ɔdā nōó gáā kɛlā ōtayínū mɛ́mla anú ā. Ó lɛ ɛ̄wā gwū ɔ̄ ipú, lɛ ɔ́ ŋmó. Ujówābu ŋmó ɔ̄ ohígbū ɔyínɛ́ nū Ásāhɛlu nɛ̄ Ábna tɛtɛ ŋmó ā.

²⁸Igbīhāajɛ nɛ̄ Udéfīdi lɛ ɔ̄kā kú ikwú kú Ábna pó ā, ó kahíníī, “Óndú ā jé ka ami mɛ́mla ācɛ ɔlɛ́ um ā í lɛ abɔ̄ ipú ikwū kú Ábna ŋ́.

²⁹Oyī kú Ábna kóō ce Ujówābu mɛ́mla ācɛ ɔlɛ́ nū ɛyí. Ipɔ́ɔma kú Ujówābu kóō lɛ ācɛ nēe í lɛ ōcē ɛcí ɔnyā mɛ́mla agwú piyóó. Kéē lɛ ācɛnyīlɔ nēe í bá yúklɔ́ ācɛnyā mɛ́mla ācɛ nēe í kwú ɔgbɛ́fú mɛ́mla aɛ́nēe í kwú ɛhá piyóó.”

³⁰Ɛ́gɔ́ɔmā nɛ̄ Ujówābu mɛ́mla ɔyínɛ́ nū, Abíssāyi, ŋmó Ábna le gwū ɔ́ci ohígbū ɔyínɛ́ uwā, Ásáhɛlu nɛ̄ Ábna ŋmó ipú ɛfú nēé kpó Ugíbēyɔn āá.

³¹Anɔ́ɔ Udéfīdi da Ujówābu mɛ́mla odúúdú ācɛ ɔlɛ́ nū ā kahíníī, “Aá le īlī kú aá híla, ka aá lɛ īlī ekwu kpó wiiyē ka aá yɔ̄ ekwu kú Ábna.” Eko nēé gáā nyɔ̄ í je Ábna nyi ā, Udéfīdi abɔ̄yī nū tá ákplata kú okwū kú nū igbīhi.

³²Anɔ́ɔ é lɛ Ábna nyi Uhɛ́brɔn á. Udéfīdi nōo wɛ ɔcɛ́ ā jikwū gbōō nɛ̄hi okónu únóji kú Ábna, ācɛ ɔlɛ́ nū kē jikwū lɛ ā dúú.

³³Udéfīdi jikwū aidɔ kú Ábna kahíníī, “Ɔdí yá ɛɛ́ nɛ̄ Ábna cíkā ō kwú bɛ̄ɛka olíla ā?

³⁴É gbō uwɔ abɔ̄ ɛɛ́ nēé gbō uwɔ ikpó ŋ́, nááná ācobɔ̄bíipú nēe ī ŋmó ɔ̄cɛ kē le uwɔ ŋmó.” Ācɛ ā klla jikwū Ábna ɔhá kpɔ́.

³⁵Ɛ̄cī ɔ́ɔmā dúúdú ācɛ ā yá ka Udéfīdi kóō lɛ ɔdōlé lé, amáŋ Udéfīdi le ɛka gbo kahíníī, “Ɔwɔicō kóō lɛ um ŋmó ɔ́dāŋ ka n lɛ ɔdōlé lé gbɔbū ɛɛ́ ka ɛnɔ kóō ga ajɛ.”

³⁶Eko nēé lɛ ɛ̄nyā pó ā, ɔtū he uwá. Ɔdā dóódu nɛ̄ Udéfīdi nōo wɛ ɔcɛ́ ā yá ā he uwá ɔtū.

³⁷Anɔ́ɔ odúúdú ācɛ ɔlɛ́ Udéfīdi mɛ́mla ācɛ kú Ísrɛ̄lu ā kē le jé ka Udéfīdi nōo wɛ ɔcɛ́ ā ɔ́ɔ lɛ abɔ̄ dúúmā ipú ikwū kú Ábna ŋ́ má.

³⁸Anɔ́ɔ Udéfīdi da aígabɔ̄ kú nū kahíníī, “Aá jé ka otrɛ̄yí nɛ̄hi éyi kú Ísrɛ̄lu ɔ́ɔ kwú ícɛ yɔ̄ á ŋ́ nɛɛ?

³⁹N jé ka ami wɛ ɔcɛ́ nɛ̄ Ɔwɔicō fu ā nááná, abɔ̄ le hɛ́ um iyē ícɛ. Ayí kú Userúyah le lɔfú ikpo ce um abɔ̄ bá. Ɔwɔicō kóō yá ācobɔ̄bíipú ɔ́ɔmā italā ɛ́gɛ́nɛ̄ o cíkā lɛ uwá ā.”