Read idoma 2 USÁMUWƐ̄LU 4 Bible Online

2 USÁMUWƐ̄LU 4 - idoma bible

2 USÁMUWƐ̄LU 4

¹Eko nɛ̄ Íssbɔ̄ssɛti, ɔyí kú Usɔ́ɔlu, le pó keé lɛ Ábna ŋmó Uhɛ́brɔn ā. Ɔtū kú nū kwú gbenyi. Ufi nɛ̄hi kē gbɔɔ́ ō yá odúúdú ācɛ Ísrɛ̄lu.

²Ɔyí kú Usɔ́ɔlu Issbɔ̄ssɛti ā lɛ ācɛ ɛpa nēe wɛ aótrɛ̄yí kú ācɛ nēe ī nyɔ̄ í kpɛ́fú tú aípɔ́lɛ́ ī yɛ. Iyē uwā lé ka Ubaána mɛ́mla Urécabu, ayí kú Urímɔn. É wɛ ācɛ igelī nēé hī ka Ubéerɔtu, ipú ajɛ kú ipɔ́ɔma kú Ubénjāmin ā. É ka Ubéerɔtu nyā tū ipú ajɛ kú ipɔ́ɔma kú Ubénjāmin.

³Ācɛ nēe tɛtɛ lā abɔ́ɔ aflɛ́yí ā le kwu gaá lā Ugítāyim. É kē lā aúgbɔga abɔ́ɔ kpɔ́ ɛ́.

⁴Ujonátan, ɔyí kú Usɔ́ɔlu, ma ɔyīnɔ̄nyīlɔ éyi nɛ̄ iyē nū wɛ Umefíbōssɛti. Ó wɛ iháyí ɛhɔ̄ ɛɛ́ nɛ̄ Usɔ́ɔlu mɛ́mla ádā nū, Ujonátan, kwú á. Eko nɛ̄ ɔ̄kā ikwu kú aádā nū ā ga ŋmá igelī kú Ujɛsiríili ā, ɔ̄cɛ nōo gē leyīkwu ɔ́ ā kwú ɔ̄ ú kpó kwu. Amáŋ eko nōó kwú ɔ̄ ú yɔ̄ í hápápá gē kwu ā, ɔyí ā hɛ́ ɔ̄ abɔ̄ wāajɛ. Anɔ́ɔ ó kwú nyɔ́nyí, í yāwu glá gɛ ŋ́ má.

⁵Ɛ̄cī éyi, Urécabu mɛ́mla Ubaána ɔ́ɔmā, nyɛ̄ɛ̄ le yɛ tá ɔlɛ́ Íssbɔ̄ssɛti. É faajɛ ɔlɛ́ ā eko nɛ̄ Íssbɔ̄ssɛti yɔ̄ í gbiyɔ̄lā ā.

⁶Ɔnyā nōo ī leyīkwu ɔwɛ ā yɔ̄ í tá igwu owu, amáŋ abɔ̄ ɛ̄jɛ̄ le jɛ̄ ɔ̄ ā, ó kwu iyɔ̄lā ú gbo. Anɔ́ɔ Urécabu mɛ́mla ɔyínɛ́ nū, Ubaána, le plā ga inu ā á.

⁷Abɔ̄ é le tá inu ā, é bōōbū le yɛ ga inu eyīpú, ɛga nɛ̄ Íssbɔ̄ssɛti yɔ̄ í gbiyɔ̄lā lipú lipú ā. É le ɛwa gwū ɔ̄ lɛ ɔ́ ŋmó, lɛ ɔ́ ikpɛ̄yí hɛ́. Anɔ́ɔ é kwú īkpɛ̄yí ā ú le yɛ otōōtú ɔ́ɔmā gaá bū ɔpɛ́ kú Ujɔ́dan jāā gbɔ́ɔ̄cī á.

⁸Anɔ́ɔ é le īkpɛ̄yí ā bī gē lɛ Udéfīdi Uhɛ́brɔn kahíníī, “Īkpɛ̄yí kú Íssbɔ̄ssɛti, ɔyí kú Usɔ́ɔlu nōo wɛ olɛlā kú uwɔ, nōo yá kóō ŋmó uwɔ ā, yɔ̄ á. Ágábáidu, ícɛ ā, Óndú ā le yá ká ā lɛ ɔ́ci gwō Usɔ́ɔlu mɛ́mla ipɔ́ɔ́nú kú ɔlɛ́ nū ɛɛ́.”

⁹Amáŋ Udéfīdi da uwá kahíníī, “N gbo Ɔwɔicō nōo nya um tá, ŋmá ipú unwalu dóódu ā.

¹⁰Ɔ̄cɛ nōo bī ɔ̄kā ikwū kú Usɔ́ɔlu gé um Usíkilāgi gbɛlá ka anúɔ gē bī ɔ̄kā olɔhi gé um nɛn, n lɛ ɔ́ kwú, lɛ ɔ́ ŋmó. Ɔ́ɔmā wɛ ulé kú ɔkā olɔhi kú nū á.

¹¹Ó lɛ ā, aá gbɛlá ka n géē yá ācobɔ̄bíipú bɛ̄ɛka ná italā nōo fíyɛ́ ŋ́ nɛɛ? Aá lɛ ɔ̄cɛ nōó yá ɔdōbɔ̄bí dúúmā ŋ́ ŋmó ipú eko nōó yɔ̄ ī gbiyɔ̄lā ɔlɛ́ nū. N géē gwō aá ɔ́ci kú ikwū kú nū, klla í jé aá yíífi ŋmá ipú ɛcɛ.”

¹²Anɔ́ɔ Udéfīdi lɛ ɔ́da je lɛ aícɔ́ɔja kú nū ā, anɔ́ɔ é lɛ Urécabu mɛ́mla Ubaána ŋmó á. É lɛ uwá aíkpó odajɛ mɛ́mla aábɔ̄ kpó hɛ́, kwú kpó pla icō okónu ɔkpá nōo yɔ̄ Uhɛ́brɔn ā. Anɔ́ɔ é kwú īkpɛ̄yí kú Íssbɔ̄ssɛti í gaá nyi únóji kú Ábna Uhɛ́brɔn abɔ́ɔ á.