Read idoma 1 AƆ́CƐ́ 10 Bible Online

1 AƆ́CƐ́ 10 - idoma bible

1 AƆ́CƐ́ 10

¹Eko éyi,Ɔcányā kú Ussɛ́ba ā le ofu kú íjééyī kú Usólōmɔn ā pó, anɔ́ɔ ó wā Ujerúsālɛm kóō bī ɔ̄kā olɔnɔ le jé ɔ̄ má á.

²Ó wā Ujerúsālɛm mɛ́mla ɛwa nɛ̄hi kú ācocɛ̄hɔ̄ kú nū. Ó klla bī iyó, aɔ́dā oōlɛ ɔdōlé lɔnyɛ mɛ́mla oje ɔdɔ (ugóolu) kpó gbō cīgbīhi aínyankwūlumī kú nū. Eko nōó gā ā, ɛdɔ ɔ̄kā dóódu nōo yɔ̄ ipú ɔtū kú nū ā, ó le kpó da Usólōmɔn.

³Usólōmɔn kē lɛ ohi kú odúúdú ɔ̄kā kú nū ā kpó tá ɔ̄. Ɔ̄kā dúúmā nōó da ā, í lɔnɔ tū Usólōmɔn ō cīla ŋ́.

⁴Ɔcányā kú Ussɛ́ba ā lɛ íjééyī kú Usólōmɔn ā pó ahɔ̄ abɔ̄yi nū klla le agblɔ̄cɛ́ nōó gwó ā má.

⁵Ó klla le ɛdɔ kú ɔdōlé nēé gē kpó wā ɛyí ítēbulu ɛga nēé gē lé ɔdōlé kú ɔlɛ́ ɔcɛ́ ā má. Ɛga nɛ̄ aígabɔ̄ kú ɔlɛ́ nū lā ā, ɛ́gɛ́nɛ̄ é gē yúklɔ́ ɔlɛ́ ɔcɛ́ lɛ ā, ɛ́gɛ́nɛ̄ é lɛ īlī ɛdɔ ékpónú wiiyē ā, mɛ́mla ācocɛ̄hɔ̄ kú ɔlɛ́ nū mɛ́mla ɛya o yɔlá dúúdú nōó gē gwó ipú Agblīihɔ-nɛ̄hi kú Óndú ā. Ɛ́nyɔ́ le hɛ́ lɛ ɔ́ abɔ̄ ó lɛ ɛjɛ̄ɛ̄jī aɔ́dā ɔ́ɔmā má ā. Okónu í kōō hɛ́ ɔ̄ ɛɛ́, nōó gē má ɔdā dúúmā ka ŋ́.

⁶Anɔ́ɔ ó da Usólōmɔn kahíníī, “Ɔdā nɛ̄ n pó ɔlɛ́ um lɛyíkwu íjééyī kú uwɔ ā wɛ ɔkwɛ̄yi.

⁷Amáŋ, ń cɛ̄ ŋ́ jāā gbéeko nɛ̄ n wā í lɛ ɔ́ má abɔ̄yī um. Amáŋ ń kōō pó gaajɛ āyā kú ɔdā nɛ̄ um má ā ŋ́. Íjééyī mɛ́mla agbénú kú uwɔ ā fíyɛ́ ɔdā nɛ̄ n pó ā á.

⁸Ɛyí lɔhi lɛ anyā ɔlɛ́ uwɔ mɛ́mla aígabɔ̄ kú ɔlɛ́ uwɔ íbí. Uwá nēe gē bá iyɔ̄bū uwɔ gē pó ɛlā kú íjééyī kú uwɔ nyā eko dóódu ā.

⁹N cɛ̄tra Óndú ā, nōo wɛ Ɔwɔicō kú uwɔ, nɛ̄ a he ɔ́ ɔtū nōó je uwɔ cīce akpa kú ɔcɛ́ kú Ísrɛ̄lu nyā ā. Abɔ̄ Óndú gē yíhɔtū tá Ísrɛ̄lu piyóó ā, anɔ́ɔ ó kwú uwɔ ú ce ɔcɛ́ ká ā hɛ́pɔ̄ okpaakpa lɛ uwá á.”

¹⁰Anɔ́ɔ ó kwú aɔ́da kú ɛhi nōó bī gé lɛ ɔcɛ́ ā ú kpó lɛ ɔ́ á. Aɔ́dā ɛhi ā wɛ igbo ije ɔdɔ (ugóolu) ofɛhīlī (120) aɔ́dā ōlɛ ɔdōlé lɔnyɛ alɛwa nɛ̄hi, mɛ́mla ɛcɔ̄ ōgbɔɔ́lá nɛ̄hi. Ɔ̄cɛ dúúmā í kpó aɛ́dɔ kú aɔ́dā ōlɛ ɔdōlé lɔnyɛ nōó kpó lɛ ɔ́ ā, lɛ Usólōmɔn, ɔcɛ́ ā, jéjée ɛ́ɛ́ ŋ́.

¹¹Aúgbéenyi kú Uhíram nōo bī oje ɔdɔ (ugóolu) ŋmá Ófɛri ā klla bī ɔcí nēé hī ujúnīpa mɛ́mla ɛcɔ̄ ōgbɔɔ́lá nɛ̄hi wā dúú.

¹²Usólōmɔn bī ɔcí nyā le gbā ɔdōcīce kú Agblīihɔ-nɛ̄hi ā, klla bī le yá ɛ̄ngwū mɛ́mla úmōlō kú ācogwíjē ā. Ɛ̄nyā lɔhi fíyɛ́ odúúdú ɔcí nēé hī ujúnīpa nēé húmáyī kpó wā Ísrɛ̄lu á. Ɛdɔ nū dúúmā ɔhá í klla yɔ̄ ɛ́ɛ gɛ ŋ́.

¹³Ɔdā dóódu nɛ̄ ɔcányā kú Ussɛ́ba nyā dɔɔ̄kā ā, Usólōmɔn le kpó lɛ ɔ́, mɛ́mla ɛhi alɛwa ɔhá. Anɔ́ɔ anú mɛ́mla ācɛ ɔlɛ́ nū kwúcē ga Ussɛ́ba á.

¹⁴Iháyí dóódu, Usólōmɔn gē lɛ oje ɔdɔ (ugóolu) nɛ̄ ogbɛnú kú nū fíyɛ́ ígbó oje úlā éyi ce ofu igwɛ́ɛta ce ɛhīlī (666).

¹⁵Élí nēé gē tá lɛ ɔ́ ā, mɛ́mla itene nōó gē lɛ ŋmá ɔ́hi ā, mɛ́mla ɔdā nɛ̄ aígbómína kú ācɛ kú Árābu mɛ́mla ákú Ísrɛ̄lu gē gbā lɛ ɔ́ ā wɛ dúú.

¹⁶Usólōmɔn le aɔ́kplɛ́fú ofigwó yá. É kē le oje ɔdɔ (ugóolu) nōo gbɛnú kú nū wɛ ukílōgram ahāapa ā ma bá éyééye kú uwā iyē.

¹⁷Ó klla bī oje ɔdɔ ukílōgram ɛpa nēé ca báajɛ plɛ́kɛ́tɛ́ ā le ma bá aɔ́kplɛ́fú nɛ̄ŋcɛ́ ofigwɛ́ɛhɔ̄ (300) nōó yá ā. Ó kwú odúúdú uwā ú kpó ce Agbla kú Ūpū kú Ulébānɔn ā.

¹⁸Ó lɛ akpa kú ɔcɛ́ ɛtá kú aīnu adāgbá gbā klla lɛ oje ɔdɔ ma plá anú.

¹⁹Akpa nōo yɔ̄ nyā le úbɔ́ o lɛ ikpó ce ɔ́ ga icō ɛhīlī. É klla le īkpɛ̄yí kú ɔbá ɛna ma kwu igbīhi akpa ā icō. Ó klla lɛ ɛga ōlɛ abɔ̄ ce ɔ́ nēé yá ofu kú aágábá ɛpa háyi ɛgiyí nū ā.

²⁰Aágábá igwɛ́ɛpa klla háyi abɔ́ɔ, éyééye ā háyi ɛyí íkpó, kú ɛga ōyɛ ga icō kú akpa ɛhīlī ā. É leyī kpó pīya kwu akpa ā. Ɛdɔ akpa nyā í yɔ̄ ajɔ̄ɔ̄cɛ́ ɔhá jéjée ɛ́ɛ ŋ́.

²¹Odúúdú íkókwū kú Usólōmɔn nōó gē gwá odée ŋmá anú kpɛ́mm ā wɛ ákú ugóolu (oje ɔdɔ). Oje ɔdɔ nēé bī le yá odúúdú ɔdā ōbī yá ɔdōlé mɛ́mla ole lé ɔdōlé kú Agbla kú Ūpū kú Ulébānɔn ā dúú á. Odúúmā kú nū í wɛ oje nɛ̄hɛ́ ŋ́, ohígbū ka eko kú Usólōmɔn ā, oje nɛ̄hɛ́ í wɛ ɔdá dúúmā ŋ́.

²²Aúgbéenyi kú nū í yɛ mɛ́mla ákú Uhíram. Iháyí ɛtɛ́ɛ́tá dóódu aúgbéenyi kú nū ī pīyɛyí gē bī iyó nēe bá ā gé lɛ ɔ́: oje ɔdɔ (ugóolu), oje nɛ̄hɛ́, aīnu adāgbá, afūlɔ mɛ́mla ɛkā.

²³Ɔcɛ́, Usólōmɔn lɛ agbénú klla jíjééyī fíyɛ́ odúúdú aɔ́cɛ́ ɔhá á.

²⁴Odúúdú ācɛ kú ɛcɛ ī tíne kéē wā í pó kéē klla má ɛdɔ íjéeyī nɛ̄ Ɔwɔicō je lɛ Usólōmɔn ā.

²⁵Ɔ̄cɛ dóódu nōo wā ā, ī bī ɛhi gé lɛ ɔ́. Aɔ́dā ɛhi bɛ̄ɛka, oje nɛ̄hɛ́, oje ɔdɔ (ugóolu), oje udɔ, iyɛ́fú, anɔ̄ ōkpóocu, aɔ́nya, aíjakī. É gē yá lɛ ā iháyí dóódu.

²⁶Usólōmɔn lɛ aúgbɔ́ɔnya ōkpɛ́fú úlā ɛtá cofigwó (1,400) mɛ́mla aɔ́nya kú ɛfú ulā ofu cigwó (12,000). Ó lɛ aóhī kú uwā kpó bá Ujerúsālɛm. Aóhī kú uwá ba aígelī ɛyɛ́ɛyɛ́yí kú ɔlɛ́ nū ā.

²⁷Eko nɛ̄ Usólōmɔn wɛ ɔcɛ́ ā, oje nɛ̄hɛ́ kpɔ bá bɛ̄ɛka ɛcɔ̄ ā. Ɔcí kú Usɛ́da kpɔ bá bɛ̄ɛka ɔcí ɔlamu kú usíkamɔ ŋmá Useféla ā.

²⁸Ācɛ ɔlɛ́ ɔcɛ́ ā gē lá aɔ́nya ŋmá Íjīpiti mɛ́mla Usilísīya. É kē í lá ɛ́gɛ́nɛ̄ ɔ́lá kú nū lɛ ā.

²⁹É gē lá aúgbɔ́ɔnya ŋmá Íjīpiti dúú. Ācɛ ɔlɛ́ Usólōmɔn gē kpó aúgbɔ́ɔnya mɛ́mla ɔnya ā í lá lɛ aɔ́cɛ́ kú Uhɛ́ti mɛ́mla Usiríya. É gē lá úgbɔ́ɔnya éyi ije nɛ́hɛ̄ úlā ɛpa cofigwó, ɔnya éyi kē wɛ ije nɛ̄hɛ́ ofaháapa cɛhɔ̄.