Read idoma 1 AƆ́CƐ́ 11 Bible Online

1 AƆ́CƐ́ 11 - idoma bible

1 AƆ́CƐ́ 11

¹Anyā kú aéwɔhá he Usólōmɔn ɔtū nɛ̄hi. Ó le ɔyínɔ̄nyā kú Uféro lɛ mɛ́mla anyā nōó lɛ ŋmá Umówābu, Ámɔn, Ɛ́dɔm mɛ́mla Usídɔn

²Ó lɛ anyā nēe bá nyā ŋmá aéwo nɛ̄ Óndú ā kɛlā lɛ ācɛ Ísrɛ̄lu lɛyíkwu uwā kahíníī, “Áá híī lɛ anyā ŋmá ɔlɛ́ uwā ɛ́ɛ́ nɛ̄ aá gē cɛ̄ lɛ uwá lɛ ɔnyā ŋmá ɔlɛ́ aá ŋ́. Ohígbū nɛ̄ é géē je ɔtū kú aá pīya ga ɛgiyí aɔ́wɔ kú uwá.” Amáŋ anyā aéwɔhá he Usólōmɔn ɔtū nɛ̄hi kpɔ́

³Usólōmɔn lɛ anyā úlā cofigwɛ́ɛhɔ̄ (700). Anyā ɔlɛ́ nū nōó ī cikpó uwā ā kē wɛ ofigwɛ́ɛhɔ̄. Anɔ́ɔ anyā nū ā lɛ ɔ́ ɔtū pīya ŋmá ɛgiyí Ɔwɔicō á.

⁴Eko nɛ̄ Usólōmɔn kwú hīla ā, anyā nū le ɔ́ ɔtū pīya kwu aɛ́cí kú aéwɔhá ō pā. Ó klla yɛce Óndú ā, nōo wɛ Ɔwɔicō kú nū ā kpaakpa bɛ̄ɛka ádā nū, Udéfīdi ā ɛ́ɛ́ gɛ ŋ́.

⁵Ohígbū ka, Usólōmɔn gbɔɔ́ ō gbā Ástārɔtu, ɛcí kú ācɛ kú Usídɔn ā, mɛ́mla Umílkom, ɛcí kú ācɛ kú Ámɔn ā, ɛ̄gbā.

⁶Anɔ́ɔ ó le íne kú Óndú ā bīya, ɔtū kú nū í kē wɛ ékpónú ɛgiyí ɔwɔicō ɛ́gɛ́nɛ̄ ákú ádā nū, Udéfīdi lɛ ā ŋ́.

⁷Usólōmɔn le ɛga éyi gwó lɛ Ukɛ́mɔ̄ssi, ɛcí icííci kú ācɛ Umówābu ā, kéē gbā ɔ̄ ɛ̄gbā. Ɛ́gɔ́ɔmā nōó gwó lɛ Umólɛ̄ki, ɛcí kú ācɛ Ámɔ̄ri ā, ɛnɔ̄ɔ̄cī kú ɛyí ɛfu kú Ujerúsālɛm ā dúú á.

⁸Usólōmɔn gwó inu ɛcí lɛ odúúdú anyā aéwɔhá nōó lɛ ā. Anyā ā kē í yi ɔtulalī ɔlá lɛ aɛ́cí kú uwá ā klla í gwɛ́ɛya lɛ uwá.

⁹Anɔ́ɔ Óndú ā kwú cɔ̄nū mla Usólōmɔn nɛ̄hi, ohígbū koó kwú ɔtū kú nū ú pīya ŋmá ɛgiyí anú nōo wɛ Óndú ā, nōo wɛ Ɔwɔicō kú Ísrɛ̄lu ā, nōo kē wā ɛgiyí nū igbo ɛpa ā.

¹⁰Anú klla je ɔ́da lɛ ɔ́ kóō híī gbā ɔwɔ amáŋ ɛcí kú aéwɔhá dúúmā ɛ̄gbā ŋ́ má. Usólōmɔn í lɛyítáajɛ lɛ ɛlā nɛ̄ Óndú ka ā ŋ́, amáŋ ó kwú ɔtū kú nū ú pīya ŋmá ɛgiyí nū.

¹¹Ohígbū ɔ́ɔmā, Óndú ā da Usólōmɔn kahíníī, “Ɛ́gɛ́nɛ̄ a kwú ɔtú kú uwɔ ú pīyabɔ̄ ɛɛ́ mā, nɛ̄ á kē lɛ okónu nɛ̄ n ce mla uwɔ ā tū ŋ́, nɛ̄ á klla lɛyítáajɛ le íne mɛ́mla ɔ́da kú um ŋ́ mā. N géē je ajɔ̄ɔ̄cɛ́ kú uwɔ ā ŋmá abɔ̄ uwɔ piíí. N klla í je ɔ́ lɛ ɔ̄cocɛ̄hɔ̄ kú uwɔ, nōo wɛ éyi kú aígabɔ̄ kú uwɔ ā.

¹²Amáŋ ohígbū ádā uwɔ Udéfīdi ā, ń gáā yá ɛ̄nyā eko nɛ̄ a yēeyī ā ŋ́. Amáŋ ó géē yá eko nɛ̄ ɔyí uwɔ wā í cɔcɛ́.

¹³Ń gáā mīyɛ odúúdú ajɔ̄ɔ̄cɛ́ ā ŋmá abɔ̄ nū dúúdú ŋ́. Ohígbū ɔ̄cocɛ̄hɔ̄ kú um, Udéfīdi mɛ́mla Ujerúsālɛm nōo wɛ igelī nɛ̄hi kú um ā. N géē je ipɔ́ɔma ékpónú lɛ ɔ́ kóō lé ɔcɛ́.

¹⁴Anɔ́ɔ Óndú ā cɛ̄ lɛ Uhádadi, ɔyí kú ipɔ́ɔ́nū ɔlɛ́ ɔcɛ́ kú Ɛ́dɔm cāŋjɛ lɛyíkwu Usólōmɔn á.

¹⁵Ohígbū ka eko nɛ̄ ádā nū, Udéfīdi mīyɛ Ɛ́dɔm ā, nɛ̄ Ujówābu, otrɛ̄yí kú aícɔ́ɔja kú nū ā nyɔ̄ gaá kpó okwū kú ācɛ nēe ŋmó ā nyi ā. Ó le odúúdú ācɛnyīlɔ kú igelī nɛ̄hi ā kpó ŋmó.

¹⁶Ujówābu mɛ́mla ɛjɛ̄ɛ̄jī ācɛ kú Ísrɛ̄lu bá abɔ́ɔ ɔyā ɛhīlī jāā gbéeko nēé lɛ ācɛnyīlɔ kú uwa kpó ŋmó.

¹⁷Uhádādi mɛ́mla ayí kú ācocɛ̄hɔ̄ kú ɔlɛ́ ádā nū nōo wɛ ɔ̄cɛ Ɛ́dɔm ā ōfōōfūwā nēé kpó ŋmó ŋ́ má. (Eko ɔ́ɔmā Uhadadi wɛ ɔyípɛ̄)

¹⁸É nyɛ̄ɛ̄ ŋmá Umídiyan le tá Upáran ɛga nɛ̄ ācɛnyīlɔ ōhī le pɛ́ tū ipú uwā. É klla ŋmá abɔ́ɔ le tá Íjīpiti, anɔ́ɔ é le pɛ́ ga ɛgiyí Uféro, ɔcɛ́ kú Íjīpiti. Ɔcɛ́ kú ācɛ Íjīpiti ā le ajɛ mɛ́mla ɔdōlé mɛ́mla ɔlɛ́ kpó lɛ Uhádādi.

¹⁹Uhádadi kwú pīya oklóbīya kú Uféro, anɔ́ɔ Uféro kwú ɔyínɛ́ ɔnyā nū ú lɛ ɔ́ kóō lɛ á. Anɔ́ɔ ɔyínɔnyā ā kwú pīya ɔnyā kú Uhádādi á. Ɔcányā nēé je ɔyínɛ́ nū lɛ Uhádādi ā le ka Utápénsi.

²⁰Ɔyínɛ́ ɔnyā ā le ɔyínɔ̄nyīlɔ éyi ma lɛ Uhádādi. É hi iyē kú ɔyínɔ̄nyīlɔ ā lé ka Ugɛ́nūbati. Ɔcányā ā lɛ ɔ́ fō klla le ɔ́ bī jɛ̄ ipɔ́ɔ́nū ɔlɛ́ Uféro, ɛga nōó lā mɛ́mla ayí kú Uféro ā.

²¹Uhádādi le pó ajɛ kú Íjīpiti ka Udéfīdi ɔ́ɔ gekwú ɛɛ́, Ujówābu, otrɛ̄yí kú aícɔ́ɔja ɔ́ɔ klla gekwú dúú ɛɛ́. Anɔ́ɔ Uhádādi le tá ɛgiyí Uféro, ɔcɛ́ ā, gaá da ɔ́ kahíníī, “Ká n kwúcē ga ɔlɛ́ um”

²²Uféro le ɔ̄kā da ɔ́ ka ɔdí ɔ́ɔ yá āa? Ó lɛ odée nɛ̄ anúɔ í je lɛ ɔ́ ŋ́ nɛɛ? Ó klla da ɔ́ ka ɔ́ɔmā yá ɛ́ɛ́ nɛ̄ ɔ́ɔ tíne ō kwúcē ga ɔlɛ́ nū á nɛɛ? Anɔ́ɔ ó da Uféro kóō mā anúɔ tá, ká anúɔ kwúcē ga ɔlɛ́ anúɔ. Anɔ́ɔ ó kwúcē ga ɔlɛ́ nū gaá kwú pīya ɔcɛ́ kú Ɛ́dɔm á. Ɔtú kú ācɛ Ísrɛ̄lu wú ɔ̄ nɛ̄hi.

²³Ɔwɔicō klla cɛ̄ lɛ Urésɔn, ɔyí kú Ɛlíyāda nōo kwu ŋmá ɛgiyí ɔkpani nū, Uhádādēsa, ɔcɛ́ kú Usóba ā, gbɔɔ́ ō bɛyíkwu Usólōmɔn.

²⁴Anɔ́ɔ ó kwu pīya otrɛ̄yí kú ācoyíkpala, nɛ̄ abɔ̄ í lɛ uwá ŋ́ mā á. Ɔdā nyā yá igbīhi eko nɛ̄ Udéfīdi le Uhádadésa yálé klla le ācɛ nēe tīīpú mɛ́mla anú ā kpó ŋmó ā. Anɔ́ɔ Urésɔn nyɛ̄ɛ̄ le tá Udamáskɔ̄si gaá lā abɔ́ɔ á. Anɔ́ɔ ācɛ ɔlɛ́ nū kwú ɔ̄ ú pīya ɔcɛ́ kú Usiríya á.

²⁵Ó wɛ olɛlā kú Ísrɛ̄lu odúúdú eko nɛ̄ Usólōmɔn yéeyī ā.

²⁶Ɔ̄cɛ ɔhá nōo bɛyíkwu Usólōmɔn ā wɛ éyi kú aígabɔ̄ kú nū, Ujérobōwam, ɔyí kú Unébāti nōo ŋmá Usérēda, ipɔ́ɔma kú Ɛ́frem ā. Ɛ́nɛ́ nū wɛ ɔnyōkwū éyi nēé hī ka Usérūwa ā.

²⁷Ɔdā nōo yá ɛ́ɛ nōó bɛyíkwu Usólōmɔn ā yɔ̄ á. Usólōmɔn yɔ̄ ī kpó ajɛ tū ipú ajɛ nōo yɔ̄ ɛnɔ̄ɔ̄cī kú Ujerúsālɛm ā klla yɔ̄ í tū ɔdɔ kú igelī nɛ̄hi kú ádā nū, Udéfīdi ā gllayá.

²⁸Ujérobōwam wɛ oklóbīya nōo lɔfú nɛ̄hi, abɔ̄ Usólōmɔn le má kóō lɔfú uklɔ́ ō yá ā, anɔ́ɔ ó kwú ɔ̄ ú yá otrɛ̄yí kú odúúdú ācoyúklɔ́ abɔ̄fú kú nū ipú ajɛ kú Ɛ́frem mɛ́mla Umanásɛ á.

²⁹Ɛ̄cī éyi, abɔ̄ Ujérobōwam yɔ̄ ī yɛ ŋmá Ujerúsālɛm gē ga iyāwu ā, anɔ́ɔ Ahíja, ɔ̄comɛ́ɛbɛ kú Óndú ā gaá le gbɛyí mɛ́mla anú ōfōōfūnū ɔwɛ á.

³⁰Anɔ́ɔ Ahíja lɛ úwé ɛ̄yīpɛ̄ kú nū nōó le wiyē ā plla, anɔ́ɔ ó le ɔ́ híla, le ɔ́ kɔ ɛga igwɛ́ɛpa á.

³¹Ó da Ujérobōwam kahíníī, “Lɛ ɛga igwó kpó lɛ īyī uwɔ. Ohígbū ka Óndú ā, nōo wɛ Ɔwɔicō kú Ísrɛ̄lu gē da uwɔ kahíníī, ‘N géē mīyɛ ajɔ̄ɔ̄cɛ́ ā ŋmá ɛgiyí Usólōmɔn, n kē í kpó aípɔ́ɔma igwó kú uwā gā uwɔ.

³²Usólōmɔn géē bī aípɔ́ɔma éyi ohígbū Udéfīdi, ɔ̄cocɛ̄hɔ̄ kú um, mɛ́mla ohígbū Ujerúsālɛm, igelī nɛ̄hi kú um nɛ̄ n fu ŋmá odúúdú ajɛ kú ācɛ Ísrɛ̄lu kóō wɛ ákú um ā.

³³N yɔ̄ ī yá ɛ̄nyā ohígbū ka, Usólōmɔn tá um ɛɛ́[4] Ó klla gbɔɔ́ ō gbā aɔ́wɔ mɛ́mla ɛcí kú aéwɔhá. Ó gē gbā Asstórēti, ɛcí kú Usídɔn, Ukɛ́mɔ̄si, ɛcí kú Umówābu, mɛ́mla Umílkom, ɔwɔ kú Ámɔn. Usólōmɔn í lɛyítáajɛ ga um gɛ ŋ́. Ó klla le íne kú um tū ŋ́, ɛ́ɛ́ nōó kōō í yá ucē nōo ī hé um ɔtū ā, ɛ́gɛ́nɛ̄ ádā nū, Udéfīdi yá ā ŋ́.

³⁴Amáŋ ń gáā mīyɛ odúúdú ajɔ̄ɔ̄cɛ́ ā ŋmá ɛgiyí Usólōmɔn ŋ́. Ń klla gáā yá ɛ̄nyā eko nōó yēeyī nyā ŋ́, ohígbū Udéfīdi, ɔ̄cocɛ̄hɔ̄ kú um nɛ̄ um fu, nōo kē lɛyítáajɛ lɛ aíne kú um mɛ́mla ɔ́da kú um ā.

³⁵N géē mīyɛ ajɔ̄ɔ̄cɛ́ ā ŋmá ɛgiyí ɔyí kú Usólōmɔn, cɛ́ɛ́ n kwú aípɔ́ɔma igwó ú kpó gā uwɔ.

³⁶Amáŋ n géē cɛ̄ lɛ ɔyí kú Usólōmɔn kóō lɛ ipɔ́ɔma éyi tū, cɛ́ɛ́ ká n géē lɛ éyi kú ācɛ ipɔ́ɔma kú Udéfīdi, ɔ̄cocɛ̄hɔ̄ kú um, nōo géē wɛ ɔcɛ́ ipú Ujerúsālɛm, ɛga nɛ̄ ācɛ gē bá ī gbā um ɛ̄gbā ā.”

³⁷Ó klla da Ujérobōwam ka Óndú ɔ́ɔ ka anúɔ gēe je ɔ́ cɔcɛ́ kú ācɛ Ísrɛ̄lu, cɛ́ɛ́ kóō gbō ɛga dóódu nōo he ɔ́ ɔtū.

³⁸Ó klla da ɔ́ ka ɔ́dāŋ ka ɔ́ɔ lɛyítáajɛ lɛ anúɔ nɛ̄ ɔ́ɔ kē lɛ aíne mɛ́mla ɔ́da kú anúɔ tū eko dóódu ɛ́gɛ́nɛ̄ Udéfīdi, ɔ̄cocɛ̄hɔ̄ kú anúɔ ɔ́ɔ lɛ íne kú anúɔ tū, klla yá ucē nōo he anúɔ ɔtū ā, ka anúɔ géē yɔ̄ mla anú klla í gwó ɔlɛ́ ɔkwɛ̄yí lɛ ɔ́. Ó klla da ɔ́ ka anúɔ géē je ɔ́ cɔcɛ́ kú ācɛ Ísrɛ̄lu. Ó da ɔ́ ka anúɔ géē má ka ayááyí nū nɔ̄nyīlɔ géē bá ī lé ɔcɛ́ igbīhi nū, ɛ́gɛ́nɛ̄ Udéfīdi, ɔ̄cocɛ̄hɔ̄ kú anúɔ ɔ́ɔ yá ā.

³⁹Ó ka ohígbū íne nɛ̄ Usólōmɔn ɔ́ɔ bīya ā. Óndú ā ka anúɔ géē yá ipɔ́ɔma kú Udéfīdi italā, amáŋ ó ka ɔ́ɔ gáā yá uwā italā píyóó lɛ ā ŋ́.

⁴⁰Ohígbū ɔ́ɔmā, Usólōmɔn tíne kóō lɛ Ujérobōwam ŋmó, anɔ́ɔ Ujérōbōwam le kwu ga Íjīpiti, ɛgiyí ɔcɛ́ Ussíssāki kú Íjīpiti á. Ó gaá klá abɔ́ɔ jāā gbéeko nɛ̄ Usólōmɔn gekwú.

⁴¹Ɔdā ohile nɛ̄ Usólōmɔn yá kpɛ́mm ā, mɛ́mla íjééyī kú nū ā, é lɛ uwá kpó tá tū ipú ɔkpá ígwú ōgbo kú Usólōmɔn.

⁴²Usólōmɔn wɛ ɔcɛ́ kú Ísrɛ̄lu iháyí ofɛpa.

⁴³Usólōmɔn gekwú anɔ́ɔ é lɛ ɔ́ nyi igelī kú ádā nū, Udéfīdi á. Anɔ́ɔ ɔyí nū Úréhōbōwam kwú pīya ɔcɛ́ kwɛyí ádā nū, Usólōmɔn á.