Read idoma 1 AƆ́CƐ́ 12 Bible Online

1 AƆ́CƐ́ 12 - idoma bible

1 AƆ́CƐ́ 12

¹Uréhobōwam le tá Ussɛ́kɛm, ɛga nɛ̄ odúúdú ācɛ kú Ísrɛ̄lu jīla bá kéē je ɔ́ cɔcɛ́ ā.

²Eko nɛ̄ Ujérobōwam, ɔyí kú Unébati nōo kwu ŋmá ɛgiyí Usólōmɔn ga Íjīpiti ā le ɔ̄kā ā pó ā, ó kwúcē gā ɔlɛ́ ŋmá Íjīpiti.

³Odúúdú ācɛ kú aípɔ́ɔma kú ɛhícō ā le ɛhɔ̄ tū fu ɔ́, anɔ́ɔ odúúdú uwā le pɛ́ ga ɛgiyí Uréhobōwam gaá da ɔ́ kahíníī,

⁴“Ádā uwɔ, Usólōmɔn yá alɔ ōwē nɛ̄hi. Ó klla le iyō ogbɛnú nɛ̄hi gbōce alɔ. Ɔ́dāŋ́ ka a géē tū iyó ogbɛnú kú ádā uwɔ ā wāajɛ cɛ́ɛ́ kóō lɛ yá fékéé lɛ alɔ, nɛ̄ a klla í dēē yá oyēeyī kú alɔ kóō le tɔ́ɔtɛ́ lɛ alɔ, alɔ géē lɛyítáajɛ gā uwɔ, nɛ̄ a géē gbō alɔ piyóó.”

⁵Anɔ́ɔ Uréhobōwam tá uwá ohi kahíníī, “Aá nyɔ̄ ká aá wā ɛ̄cīhɔ̄. Cɛ́ɛ́ ká n tá áa ohi.”

⁶Anɔ́ɔ Uréhobōwam le yɛ tá ɛgiyí anyākwɔ́cɛ nēe gbā ádā nū eko nɛ̄ ádā nū yēeyī ā, gaá lɛ ɛlā ā miya mɛ́mla uwá á. Anɔ́ɔ ó gaá da uwá ɔ̄kā kahíníī, “Ohi nyá nɛ̄ n cíkā ō tá ācɛ āa?”

⁷Anɔ́ɔ é da ɔ́ kahíníī, “Ɔ́dāŋ ka a géē gbō ācɛ nēe bá nyā lɔhi, lɛ ɛlā olɔhi ka lɛ uwá, cɛ́ɛ́ é géē lɛyítáajɛ gā uwɔ klla í cɛ̄ uwɔ́ ɛ̄hɔ̄ piyóó.”

⁸Amáŋ ó leyī gwū ɛlā nɛ̄ anyākwɔ́cɛ nwū ɔ̄ ā bónū. Anɔ́ɔ ó gaá le ɛlā ā miya mɛ́mla aɛ́gɔ́ nū nōó jɛ̄ mɛ́mla uwá ā.

⁹Ó da uwá ɔ̄kā ka ɛdɔ ohi nyá nɛ̄ ɛ́ɛ tíne ká anúɔ tá ācɛ nēe wā gaá da anúɔ ka anúɔ lɛ iyó nɛ̄ ádā anúɔ gbōce uwá ā yá fékéé lɛ uwá ā?

¹⁰Anɔ́ɔ aɛ́gɔ́ nū nōó jɛ̄ mɛ́mla uwá ā da ɔ́ kóō da uwá kahíníī, “Ayíkābɔ̄ kú um jɔ̄kwū fíyɛ́ ohi kú ádā um á.

¹¹Ɔ́dāŋ́ ka ádā um le iyó ogbɛnú ce aá nɛɛ, n géē gbō iyó ogbɛnú fíyɛ́ ce aá. Ɔ́dāŋ́ ka itali ɔlamu nōó bī le gɔ́ aá á nɛɛ, ami ā géē bī itali nōo lɛ ujē le gɔ̄ aá.”

¹²Anɔ́ɔ Ujérobōwam mɛ́mla odúúdú ācɛ ohile kú aípɔ́ɔma kú ɛhícō ā kwúcē wā ɛgiyí Uréhobōwam ɛ̄cī ɔmɛtá nōó da uwá kéē wā ā.

¹³Anɔ́ɔ Uréhobōwam kwú eyī í gwū ɛlā nɛ̄ anyākwɔ́cɛ nwū ɔ̄ ā bónū, anɔ́ɔ ó le ohi obɔ̄bí tá uwá ā.

¹⁴Anɔ́ɔ ó bī ɛlā nɛ̄ aɛ́gɔ́ nū nwū ɔ̄ ā le tá uwā ohi kahíníī, “Ɔ́dāŋ́ ka ádā um gbō iyó ogbɛnú ce aá nɛɛ, n géē je iyó tū ɔ̄ fíyɛ́ ɛ̄nɛ̄ ó gbō ce aá ā, ɔ́dāŋ ka ádā um bī itali ɔlamu gē gɔ́ aá nɛɛ, n géē bī itali nōo lɛ ujē le gɔ́ aá.”

¹⁵Anɔ́ɔ ɔcɛ́ a í jāhɔ̄ lɛ ɛlā nɛ̄ ācɛ ā ka lɛ ɔ́ ā ŋ́ má. Ohígbū ka Óndú ā yá kú ɛ̄nyā kóō le yá lɛ ā, cɛ́ɛ́ ká ɛlā nɛ̄ Óndú ā ka bū okónu kú Ahíja, ɔ̄comɛ́ɛbɛ ā lɛ Ujérobōwam, ɔyí kú Unébati ā kóō le yá jīla.

¹⁶Eko nɛ̄ odúúdú ācɛ ā má ka ɔcɛ́ ā í jāhɔ̄ lɛ uwá ŋ́ mā, ācɛ ā tá ɔcɛ́ ohi kahíníī, “Alɔ í lɛ ukpɛ̄ dúúmā ipú ipɔ́ɔma kú Udéfīdi ŋ́. Ālɔ̄ nyɛ̄ɛ̄ hɛ̄ ipɔ́ɔma kú ɔyí kú Ujɛ́se ā tá. Ācɛ Ísrɛ̄lu, ɔnyɔɔnyɛ kóō kwúcē ga ɔlɛ́ ádā nū, oo! Udéfīdi, leyīkwu ɔlɛ́ uwɔ mɛ́ɛ́ oó!” Anɔ́ɔ ācɛ kú Ísrɛ̄lu le yáwaa ga ɔlɛ́ uwā á.

¹⁷Amáŋ Uréhobōwam wɛ ɔcɛ́ kú ācɛ kú Ísrɛ̄lu, nēe lā ipú ajɛ kú Ujúda ā á.

¹⁸Anɔ́ɔ Uréhobōwam lɛ ɛhɔ̄ tū Adónīram, nōo wɛ otrɛ̄yí kú úklɔ́ abɔ̄fú ā, fu ācɛ Ísrɛ̄lu á. Odúúdú ācɛ Ísrɛ̄lu le ɛcɔ̄ tá fíyɛ́ ɔ̄ kwú ɔ ú ŋmó. Anɔ́ɔ Uréhobōwam le kwu gaá ce ɛyí úgbɔ́ɔnya kú nū le kwu ga Ujerúsālɛm á.

¹⁹Ŋmífī ɔ́ɔmā ācɛ kú ɛhícō kú Ísrɛ̄lu húmáyī bɛyíkwu ipɔ́ɔma kú Udéfīdi jāā kwu eko nēé tá ɔkpá nyā ā.

²⁰Eko nɛ̄ ācɛ kú Ísrɛ̄lu ā le pó ka Ujérobōwam ɔ́ɔ pīyɛyí wā ɔlɛ́ ŋmá ajɛ kú Íjīpiti ā, é le jīla le ɛhɔ̄ tū fu ɔ́, anɔ́ɔ é kwú ɔ̄ ú pīya ɔcɛ́ kú uwā á. Ɔ̄cɛ dúúmā í yɛce ipɔ́ɔma kú Udéfīdi ŋ́, ayíka ipɔ́ɔma kú Ujúda ōfōōfu uwá nɛ̄.

²¹Eko nɛ̄ Uréhobōwam ga Ujerúsālɛm ā, ó lɛ aícɔ́ɔja kú ipɔ́ɔma kú Ujúda mɛ́mla Ubɛ́njamīn nēe lɛ ɔtū fíyɛ́ dúú ā, úlā bá ɛga úlā ce úlā ofɛpa cigwó (180,000) hīgwú kéē nyɔ̄ í kpɛ́fú, kéē lɛ aípɔ́ɔma igwó kú ɛhícō ā kwúcē wā ɛháajɛ íkwu kú uwā.

²²Amáŋ Ɔwɔicō da ɔ̄comɛ́ɛbɛ Ussɛmáya kahíníī,

²³“Le ka lɛ Uréhobōwam mɛ́mla odúúdú ācɛ kú aípɔ́ɔma kú Ubɛ́njamīn mɛ́mla Ujúda ā kahíníī,

²⁴‘Áá híī nyɔ̄ í kpɛ́fú tá ayínɛ́ aá, ācɛ kú Ísrɛ̄lu ā ŋ́? Odúúdú aá kóō kwúcē ga ɔlɛ́, ohígbū ka ɔdā nōo yá ā ŋmá ɔtū mɛ́mla oōcɛ̄ kú um nɛ.’” Anɔ́ɔ odúúdú uwá lɛyítáajɛ lɛ Ɔwɔicō, anɔ́ɔ é kwúcē ga ɔlɛ́ á.

²⁵Ujérobōwam le igá hɛ́ tū igelī nɛ̄hi kú Ussɛ́kɛm, ajɛ ɛyí ɛfu kú Ɛfrēm ā. Ó lā abɔ́ɔ eko kpií ā, anɔ́ɔ ó nyɛ̄ɛ̄ gaá lɛ igá hɛ́ tū Upénūwɛlu á.

²⁶Ujérobōwam ka ipú ɔtū kú īyī nū kahíníī, “Ɛ́gɛ́nɛ̄ ó lɛ nyā ācɛ ɔlɛ́ um ā lɔfú kwúcē wā í tá ācɛ ɔlɛ́ Udéfīdi glá.

²⁷Ɔ́dāŋ keé gē nyɔ̄ í gwɛ́ɛya ipú Agblīihɔ-nɛ̄hi kú Óndú ā Ujerúsālɛm kpɔ́, ɔtū kú ācɛ ā í je pīyeyī ga ɛgiyí Uréhobōwam, ɔcɛ́ kú Ujúda. É í je um ŋmó cɛ́ɛ́ é kwúcē ga ɛgiyí Uréhobōwam, ɔcɛ́ kú Ujúda ā.”

²⁸Eko nōó lɛ ɛlá gbo tū ɔ kwɛyí ā, ó lɛ aɛ́na kú oje ɔdɔ (ugóolu) ɛpa ma, anɔ́ɔ ó da ācɛ ā kahíníī, “Aá húmáyī nyɔ̄ Ujerúsālɛm nyɔ̄ í gbā Óndú ā ɛ̄gbā gbojī jɛ̄ ɛɛ́. Ācɛ kú Ísrɛ̄lu, aá má aɔ́wɔ kú áa nēe kpo áa bɛ̄cɛ ŋmá Íjīpiti ā bá á.”

²⁹Ó kwú éyi kú aɛ́na kú oje ɔdɔ (ugóolu) ā ú ce Ubɛ́tɛlu, ó klla kwú ɔhá ú ce Udáni.

³⁰Anɔ́ɔ ācɛ ā lɛ íne bīya oŋmá lɛ o nyɔ̄ í gbɔ̄ɔkɔ lɛ aɛ́na nyā Ubɛ́tɛlu mɛ́mla Udáni á.

³¹Ujérobōwam klla le aíkpɛ́cí kpó gwó ɛyí aɛ́fu, anɔ́ɔ ó le ācogwɛ́ɛya kpó fu ŋmá aípɔ́ɔma, nēé wɛ ayí kú Ulífāyi ŋ́ má.

³²Anɔ́ɔ Ujérobōwam klla lɛ ucɛ kú ɛya éyi kwu ajɛ ɛ̄cī igwɛ́ɛhɔ̄ kú ɔyā ahātá, bɛ̄ɛka ɛdɔ ucɛ nēé gē yá Ujúda ā. Ó gē gwɛ́ɛya lɛ ɛna kú oje ɔdɔ (ugóolu) nōó yá ā ɛyí ede kú “Ubɛ́tɛlu ā. Ó klla le ācogwɛ́ɛya kpó bá Ubɛ́tɛlu ɛga nōó gwó, ɛga kú ɛ̄gbā ō gbā ā.

³³Anɔ́ɔ ɛ̄cī igwɛ́ɛhɔ̄ kú ɔyā ahātá ā, ɛ̄cī nɛ̄ anú abɔ̄yī nū le tū ā, ó gē ga Ubɛ́tɛlu gaá gwɛ́ɛya ɛyí ede ā, gáā ya ucɛ kú ɛcí nōó le kwu ajɛ lɛ ācɛ kú Ísrɛ̄lu nyā ā.