Read idoma 1 AƆ́CƐ́ 13 Bible Online

1 AƆ́CƐ́ 13 - idoma bible

1 AƆ́CƐ́ 13

¹Ɔwɔicō le ɔ́da je lɛ ɔ̄comɛ́ɛbɛ éyi ŋmá Ujúda kóō nyɔ̄ Ubɛ́tɛlu. Ɔ̄comɛ́ɛbɛ ā gā ajɛ abɔ eko nɛ̄ Ujérobōwam hāyi iyɔ̄bu ɛyí ede gáā gwɛ́ɛya ā.

²Anɔ́ɔ ɔ̄comɛ́ɛbɛ ā le ɛgbā dɛ̄ oŋmá lɛ ɔ́da nɛ̄ Ɔwɔicō je lɛ ɔ́ lɛyíkwu ede ā kahíníī, “Ede, ede, Óndú ā keé géē ma ɔyí éyi ipɔ́ɔ́nū kú Udéfīdi nɛ̄ iyē nū géē le ka Ujosíya. Ó géē kpó ācogwɛ́ɛya piíí nēe gē gwɛ́ɛya kú ɛcí ā ŋmó ɛyí uwɔ. Ó klla géē kpó aíkpokwú kú alɛɛcɛ yɔlá dúúdú ɛyí uwɔ.”

³Anɔ́ɔ ó klla le ɔdōcābɔ̄ je lɛ uwá ícíícɛ ɔ́ɔmā kahíníī, “Aá má ɔ̄, ede ā géē je ca kláajɛ, cɛ́ɛ́ ewo nōo yɔ̄ ɛyí nū ā géē je fíyákátá kláajɛ.”

⁴Eko nɛ̄ Ujérobōwam, ɔcɛ́ ā lɛ ɛlā kú ɔ̄cɛ kú Ɔwɔicō ā pó ā, ó le abɔ̄ miya kwu ɔ́ klla da ācɛ ɔlɛ́ nū kahíníī, “Aá lɛ ɔ̄cɛ ā kwú.” Anɔ́ɔ abɔ̄ nōó miya kwu ɔ̄cɛ kú Ɔwɔicō ā kwú ŋmɔ́cí kwu cíkáá, anɔ́ɔ ó klla je abɔ̄ ā cīgbīhi glá ɛ́ɛ́ gɛ ŋ́ má.

⁵Anɔ́ɔ igbeékpó ede ā kwú yíla ɛpa, anɔ́ɔ ewo nōo bá ɛyí nū ā kwú pīya kláajɛ, ɛ́gɛ́nɛ̄ ɔ̄comɛ́ɛbɛ kú Ɔwɔicō ā ka ā á.

⁶Anɔ́ɔ Ujérobōwam da ɔ̄comɛ́ɛbɛ kú Ɔwɔicō ā kahíníī, “Kóocōō le ɔkɔ gbā lɛ Ɔwɔicō kú uwɔ ā gā um, cɛ́ɛ́ kóō lɛ abɔ̄ kú um yá lɔhi iyínū. Anɔ́ɔ ɔ̄comɛ́ɛbɛ kú Ɔwɔicō ā le ɔkɔ gbā lɛ Ɔwɔicō, anɔ́ɔ abɔ̄ kú nū kwú yá ɛ́gɛ́nɛ̄ ó tɛtɛ lɛ ā á.

⁷Anɔ́ɔ ɔcɛ́ ā da ɔ̄comɛ́ɛbɛ kú Ɔwɔicō ā ka ɔ́ɔ wā ɔlɛ́ mɛ́mla anúɔ kóō gaá lɛ ɔdōlé lé, cɛ́ɛ́ ká anúɔ géē lɛ ulé kú ɔdā nɛ̄ ɔ́ɔ yá ā cíla anú.

⁸Anɔ́ɔ ɔ̄comɛ́ɛbɛ ā da ɔ́ kahíníī, “Ɔ́dāŋ ka a lɛ odúúdú agbénú kú uwɔ kɔ̄ ɛga ɛpa kwú āyā kú nū éyi ú gā um nááná, ń gáā nyɔ̄ mɛ́mla awɔ ɛ́ɛ́, nɛ̄ n kōō ī lé ɔdōlé ámāŋ gwá ɔdā dúúmā ɔlɛ́ uwɔ ŋ́.

⁹Óndú ā le da um ɛ́ɛ́ ka n lé ɔdā dúúmā ɛ́ɛ́ nɛ̄ n gē gwá ɔdā dúúmā ɛ́ɛ́ nɛ̄ n kōō pīyɛyí bū ɔwɛ nɛ̄ n bū wā ā ga ɔlɛ́ ŋ́.”

¹⁰Anɔ́ɔ ó kwú bū ɔwɛ ɔhá nyɛ̄ɛ̄ ŋmá abɔ́ɔ á. Ó klla kwúcē bū ɔwɛ nōó yɛ wā Ubɛ́tɛlu ā ɛ́ɛ́ gɛ ŋ́ má.

¹¹Eko ɔ́ɔmā okplícī ɔ̄comɛ́ɛbɛ éyi lā Ubɛ́tɛlu. Anɔ́ɔ ayí nū gā ɔlɛ́ gaá le ɔdā nɛ̄ ɔ̄comɛ́ɛbɛ éyi nōo ŋmá Ujúda wā í yá Ubɛ́tɛlu ā mɛ́mla ɛlā nōó ka lɛ Ujérobōwam, ɔcɛ́ ā kpó ka lɛ ɔ́ á.

¹²Anɔ́ɔ ó da ayí nū ā ɔ̄kā ka ɔwɛ nyá nɛ̄ ɔ́ɔ bū nyɔ̄ āa? Anɔ́ɔ é lɛ ɔwɛ nōó bū nyɔ̄ ā mafú lɛ ɔ́ á.

¹³Anɔ́ɔ ó da uwá kéē lɛ ijakī kú anɔ́ɔ tútū lɛ anúɔ. É le ijakī ā tútū lɛ ɔ́, anɔ́ɔ ó lɛ icō nū tū gbɔɔ́ ō nū ɔ̄comɛ́ɛbɛ kú Ujúda ā nyɔ̄ á.

¹⁴Ó gaá lɛ ɔ́ má cīce ɔkwu ɔcí nēé hī ka óoku ā. Anɔ́ɔ ó da ɔ́ ɔ̄kā ka anú wɛ ɔ̄comɛ́ɛbɛ nōo ŋmá Ujúda á nɛɛ? Anɔ́ɔ ó tá ɔ ohi ka, Īī, anúɔ nɛ.

¹⁵Anɔ́ɔ ó da ɔ́ ká ɔ̄ wā ɔlɛ́ mɛ́mla anúɔ kóō gaá lɛ ɔdōlé lé.

¹⁶Anɔ́ɔ ɔ̄comɛ́ɛbɛ kú Ujúda ā tá ɔ̄ ohi ka anúɔ í gáā nyɔ̄ mɛ́mla anú ɛ́ɛ́, nɛ̄ anúɔ gē kwúcē mɛ́mla anú ŋ́. Ɛ́ɛ́ nɛ̄ anúɔ gē lé klla ī gwá ɔdā dúúmā mɛ́mla anú abɔ́ɔ ŋ́.

¹⁷Ó ka ohígbū ka Óndú ā ɔ́ɔ le ɔ́da je lɛ anúɔ kā anúɔ híī lé ɔdā dúúmā ɛ́ɛ́, nɛ̄ anúɔ gē gwá ɔdā dúúmā ŋ́, ɛ́ɛ́ nɛ̄ anúɔ gē kwúcē bū ɔwɛ nɛ̄ anúɔ yɛ nyɔ̄ Ubɛ́tɛlu ā ŋ́.

¹⁸Anɔ́ɔ ɔ̄comɛ́ɛbɛ okplícī ā le ɛ̄kɛ̄mgbɛ̄ kā lɛ ɔ́ ka anúɔ abɔ̄yī anúɔ ā kōō wɛ ɔ̄comɛ́ɛbɛ kú Óndú ɛ́gɛ́nɛ̄ anú abɔ̄yī nū ɔ́ɔ kē wɛ ā dúú. Ka Óndú ā ɔ́ɔ le ɔ́da je lɛ alelékwū-ōtɛ̄hɔ̄ kú nū kóō da anúɔ ka anúɔ lɛ ɔ́ bī ga ɔlɛ́ anúɔ, cɛ́ɛ́ kóō lɛ ɔdōlé lé mɛ́mla anúɔ.

¹⁹Anɔ́ɔ ɔ̄comɛ́ɛbɛ nōo ŋmá Ujúda ā kwúcē mɛ́mla ɔ̄comɛ́ɛbɛ okplícī ā le tá ɔlɛ́ nū, nyɔ̄ í le ɔdōlé lé mɛ́mla anú á.

²⁰Abɔ̄ é cīce bā í lé ɔdōlé ā, ɛlā kú Óndú ā gā ɛgiyí ɔ̄comɛ́ɛbɛ okplícī ā.

²¹Anɔ́ɔ ó le ɛgba dɛ̄ wɛ̄ɛcɛ tū ɔ̄comɛ́ɛbɛ nōo ŋmá Ujúda ā ka Óndú ɔ́ɔ kóó lɛyítáajɛ lɛ anɔ́ɔ, ɛ́ɛ́ nɛ̄ ɔ́ɔ gē yá ɔdā nɛ̄ anúɔ ka ā ŋ́.

²²Ó klla da ɔ́ ka ikɔkɔ nɛ̄ ɔ́ɔ í yá ɔdā nɛ̄ Óndú ɔ́ɔ da ɔ́ ā, ɔ́ɔ kwúcē ga ɛga nēé da ɔ́ kóō híī lé ɔdā dúúmā, ɛ́ɛ́ nɛ̄ ɔ́ɔ gē gwá ɔdā dúúmā ŋ́ mā gaá le ɔdōlé lé klla le odée gwá dúú. Anɔ́ɔ ó klla da ɔ́ ka ohígbū ɔdā ɛ́gɛ́nyā nɛ̄ ɔ́ɔ yá ā, é géē je ɔ́ ŋmó. É kéē gáā nyi okwū kú nū ipú únóji kú ipɔ́ɔma kú ɔlɛ́ nū ŋ́.

²³Eko nōó le ɔdōlé lé klla le odée gwá kwɛyí ā, ɔ̄comɛ́ɛbɛ okplícī ā lɛ ijakī kú nū ā tútū lɛ ɔ̄comɛ́ɛbɛ nōo ŋmá Ujúda ā.

²⁴Anɔ́ɔ ó má ce ɛyí nū gbɔɔ́ ō nyɔ̄ á. Abɔ̄ ó yɔ̄ í nyɔ̄ ɔwɛ ā, ágábá gaá jīla anú ɔwɛ, le ɔ́ ŋmó. Anɔ́ɔ ágábá ā mɛ́mla ijakī kú nū ā má háyi pí okwu kú nū á.

²⁵Ācɛ éyi wā í yɛ, anɔ́ɔ é le okwú kú nū ā má tá ɔwɛ á. Ágábá mɛ́mla ijakī ā kē háyi pī ɔ̄. Anɔ́ɔ é le pɛ́ tá Ubɛ́tɛlu gaá le ɔdā nēé má ā ka lɛ uwá.

²⁶Eko nɛ̄ ɔ̄comɛ́ɛbɛ okplícī ā le ɛ̄nyā pó ā, ó ka ɔ̄cɛ ɔ́ɔmā ɔ́ɔ wɛ ɔ̄comɛ́ɛbɛ nōo tá kóō lɛyítáajɛ lɛ Óndú ā mɛ́mla ɔ́da kú Óndú ā nɛ. Ka Óndú ā ɔ́ɔ le ágábá tɛ̄hɔ̄ í lɛ ɔ́ ŋmó ɛ́gɛ́nɛ̄ ó ka lɛ ā ɛɛ́.

²⁷Anɔ́ɔ ó da ayí nū kéē lɛ ijakī kú anúɔ tútū lɛ anúɔ. É le ijakī ā tútū lɛ ɔ́.

²⁸Anɔ́ɔ ó le yɛ gaá le okwú kú ɔ̄comɛ́ɛbɛ, nōo ŋmá Ujúda ā má tá ɔwɛ á. Ijakī ā mɛ́mla ágábá ā kē háyi pī ɔ̄ kpɔ́. Ágábá ā í je okwú kú nū lé ɛ́ɛ́ nōó gē je ijakī ā ŋmó ŋ́.

²⁹Anɔ́ɔ ɔ̄comɛ́ɛbɛ, ɔkplícī ā kwú okwū ā ú ce ijakī kú nū. Anɔ́ɔ ó kwúcē wā Ubɛ́tɛlu á. Ó le ikwū nū je klla le ekwu kú nū yɔ̄. Anɔ́ɔ ó kwú okwu ā ú nyi Ubɛ́tɛlu abɔ́ɔ á.

³⁰Ó kwú ɔ̄ ú nyi únóji kú ipɔ́ɔ́nū kú ɔlɛ́ nū. Anɔ́ɔ anú mɛ́mla ayí nū klla jikwū nū gē ka kahíníī, “Kpái, ɔyínɛ́ um, ɔyínɛ́ um!”

³¹Eko nēé lɛ ɔ́ nyi kwɛyí ā, ɔ̄comɛ́ɛbɛ okplícī ā da ayí nū ka eko dúúmā nɛ̄ anúɔ gekwú, é kwú okwū kú anúɔ ú gwutá pī okwū kú nū, cɛ́ɛ́ é lɛ anúɔ nyi mɛ́mla anú ipú únóji éékpó.

³²Ka ɛlā nɛ̄ Óndú ā ka lɛyíkwu ede kú Ubɛ́tɛlu ā, mɛ́mla odúúdú ɛga nēé gē gwɛ́ɛya kú igelī kú Usamérīya ā géē yá jīla piíí.

³³Igbīhi ɛ̄nyā náána ā, Ujérobōwam í pīyabɔ̄ ŋmá ɔwɛ obɔ̄bí mɛ́mla ucē kú ɔ́bíipú kú nū ā ŋ́ kpɔ́. Amáŋ ó yɔ̄ í fu ācɛ nēé wɛ ayí kú Ulífāyi ŋ́ mā kéē nyɔ̄ í gwɛ́ɛya ɛyí ede nōo gwó ā kpɔ́. Ɔ̄cɛ ɔlamu dóódu nōo tíne kóō wɛ ɔ̄cogwɛ́ɛya, ó gē je ɔ́ klla í je ɔ́ pīya ɔ̄cogwɛ́ɛya, o ŋmá lɛ abɔ̄ ō le ce ɔ́ ɛyí.

³⁴Íne nōó bīya nyā cɛ̄ le ajɔ̄ɔcɛ́ mɛ́mla ɔgba kú ɔcɛ́ ō lé kú ipɔ́ɔ́nū kú Ujérobōwam gaá kwú ŋmɛ́yí mla ífi dúúdú.