Read idoma 1 AƆ́CƐ́ 14 Bible Online

1 AƆ́CƐ́ 14 - idoma bible

1 AƆ́CƐ́ 14

¹Eko ɔ́ɔmā, Ábīja ɔyí kú Ujérobōwam gbɔɔ́ ō doōcē.

²Anɔ́ɔ Ujérobōwam da ɔnyā nū ka ɔ́ɔ le odée kpó tū iyē, nɛ̄ ɔ̄cɛ dúúmā í gáā jé ɔ̄ ŋ́, cɛ́ɛ́ ka ɔ́ɔ̄ ga Ussílo, ɛgiyí Ahíja, ɔ̄comɛ́ɛbɛ ā.

³Ó da ɔ́ ka ɔ́ɔ̄ lɛ igbo igwó kpó mɛ́mla owunā mɛ́mla ɔjá kú ɛnwú ka ɔ́ɔ̄ nyɔ̄ ɛgiyí nū. Ó ka ɔ́ɔ géē da ɔ́ ɔdā nōo géē yá ɔyí ā.

⁴Anɔ́ɔ ɔnyā kú Ujérobōwam le yá ɛ́gɛ́nɛ̄ ɔbá nū ka ā á. Ó le tá Ussílo, ɔlɛ́ kú Ahíja. Eko nyā, Ahíja í mɛ́ɛbɛ lɔhi ɛ́ɛ́ gɛ ŋ́, ohígbū koó le hīla ɛɛ́.

⁵Anɔ́ɔ Óndú ā da Ahíja kahíníī, “Mɔ́ɔ, ɔnyā kú Ujérobōwam yɔ̄ í wā ɛgiyí uwɔ, gaá da uwɔ ɔ̄kā lɛyíkwu ɔyí nū nōo gē doōcē ā. Ɛlā nyā mɛ́mla ɛ́gɛ́nyā nɛ̄ a géē ka lɛ ɔ́ á.” Eko nōó gā, ó yúula ka anúɔ wɛ ɔ̄cɛnyā ɔhá.

⁶Amáŋ, eko nɛ̄ Ahíja le uya kú ikpó kú nū pó yɔ̄ í wā inu ā, ó da ɔ́ ka ɔ́ɔ̄ wā inu mɛ́ɛnɛ, ɔnyā kú Ujérobōwam. Anɔ́ɔ ó le ɔ̄kā da ɔ́ ka ɔdíyá nɛ̄ ɔ́ɔ gē yá īyī nū bɛ̄ɛka ɔnyā ɔhá ā? Anɔ́ɔ ó da ɔ́ ka anúɔ lɛ ɔ̄kā obɔ̄bi nɛ̄hi ō ka mɛ́mla anú.

⁷Ó da ɔ́ kahíníī, “Nyɔ̄ gaá da Ujérobōwam ka Óndú ā, nōo wɛ Ɔwɔicō kú Ísrɛ̄lu ā, ɔ́ɔ ka lɛ ɔ́ ka anúɔ fu ɔ́ ŋmá ipú ācɛ ohile ā ɛ́ɛ́ nɛ̄ anúɔ je ɔ́ pīya ɔcɛ́ kú Ísrɛ̄lu á.

⁸Ó ka anúɔ mīyɛ ajɔ̄ɔ̄cɛ́ ŋmá ɛgiyí ipɔ́ɔma kú Udéfīdi kwú lɛ ɔ́. Ó ka amáŋ ɔ́ɔ lɛbɛ̄ɛka ɔ̄cocɛ̄hɔ̄ kú anúɔ, Udéfīdi nɛ̄ ɔ́ɔ lɛyítáajɛ lɛ anúɔ dúúdú, klla le odúúdú íne kú anúɔ tū ā ŋ́. Ka ɔ́ɔ klla yá ɔdā nōo he anúɔ ɔtū ā ŋ́.

⁹Ó ka anú ɔ́ɔ bīya íne kú Ɔwɔicō fíyɛ́ odúúdú aɔ́cɛ́ nēe tɛtɛ bá gbɔbū lɛ ɔ́ ā á. Ó ka ɔ́ɔ tá anúɔ, kwú anúɔ ú tá tónū. Anɔ́ɔ ɔ́ɔ nyɛ̄ɛ̄ gaá le aójibó mɛ́mla aɛ́cí kpó ma lɛ īyī nū, gbɔɔ́ ō pá ɛcí klla yɔ̄ í yá anúɔ cɔ̄nū á.

¹⁰Ó ka ohígbū ɛ̄nyā, ɛ́ɛ géē bī ɔdōbɔ̄bí wā í klá ipɔ́ɔ́nū kú Ujérobōwam. Ó ka ɛ́ɛ gēe je odúúdú ācɛnyīlɔ kú ipɔ́ɔ́nū kú Ujérobōwam ā kpó ŋmó, kwu aɔ́fiyɛ kwu ayí ajɛ. Ó klla ka anúɔ géē je ipɔ́ɔ́nū kú Ujérobōwam yíífi ŋmá ajɛ dúúdú, ɛ́gɛ́nɛ̄ ɔ̄cɛ gē je emī ɛna kpó yɔlá ŋmá ajɛ ā.

¹¹Ó klla ka ɔ̄cɛ ipɔ́ɔ́nū kú Ujérobōwam dúúmā, nɛ̄ ɔ́ɔ géē kwú igelī nɛ̄hi ā, ewō ɔ́ɔ géē je okwū kú nū lé á. Aɛ́nɛ̄ e kē í kwú ipácí ā, aígbáanɔ kú ɔkpáncō ɛ́ɛ géē je okwū kú uwā kpó lé. Ɛlā nɛ̄ Óndú ā ka ā yɔ̄ abɔ́ɔ á.”

¹²Anɔ́ɔ Ahíja da ɔnyā Ujérobōwam ka ɔ́ɔ̄ ga ɔlɛ́ ɛgiyí ɔbá nū. Ó klla da ɔ́ ka obōōbū nɛ̄ ikpó kú nū ɔ́ɔ gaá daajɛ ɔlɛ́ nū, ɔyí nū nɔ̄nyīla nɛ̄ ɔ́ɔ gē doōcē ā géē kwú.

¹³Ó ka odúúdú ācɛ Ísrɛ̄lu í jikwū klla í yēkwu kú nū, cɛ́ɛ́ ɛ́ɛ kwú ɔ̄ ú nyi. Ó ka anú ōfōōfūnū ɔ́ɔ géē ŋmá ipɔ́ɔma kú Ujérobōwam nēé géē nyi únóji á. Ó ka ohígbū ka anú ōfōōfūnū ɔ́ɔ yá ɔdā olɔhi éyi nōo he Óndú ā, nōo wɛ Ɔwɔicō kú Ísrɛ̄lu ɔtū ipɔ́ɔ́nū kú Ujérobōwam á.

¹⁴Ahíja klla da ɔ́ ka Óndú ā géē je ɔcɛ́ ɔhá ce, nōo géē je ipɔ́ɔma kú Ujérobōwam kpó yíífi dúúdú.

¹⁵Ó ka Óndú ā ɔ́ɔ géē yá ācɛ Ísrɛ̄lu italā klla í jīla uwá iyē bɛ̄ɛka ácí nōo kwu ipú enyi, nɛ̄ éŋkpɔ̄ gē jīla ɔ́ iyē ā. Ó ka ɔ́ɔ géē je ācɛ kú Ísrɛ̄lu kpó ŋmá ajɛ olɔhi, nɛ̄ Óndú ā ɔ́ɔ je lɛ aádáádā uwā klla í kpó uwā pahīla gla ogbeé kú ísu kú Uyúfarētīisi, ohígbū keé le Óndú ā yá cɔ̄nū oŋmá lɛ ojibó kú ɛcí nēé ma lɛ īyī uwā mɛ́mla ɛcí kú Ássɛ̄ra nēe yá lɛ iyī uwā ā.

¹⁶Ahíja ka Óndú ā géē cīgbīhi kwu ācɛ Ísrɛ̄lu, Ohígbū ka Ujérobōwam le íne kú nū bīya klla le ācɛ Ísrɛ̄lu ikpó tū íne nōó bīya ā.

¹⁷Ɔnyā kú Ujérobōwam ā kwúcē ga Utɛ́sa. Abɔ̄ ó le bēhé wā ɔlɛ́ bōōbū ā, ɔyí nū ā gekwú.

¹⁸Ācɛ kú Ísrɛ̄lu jikwú klla yēkwu kú nū. Anɔ́ɔ é kwú ɔ̄ ú nyi ɛ́gɛ́nɛ̄ Óndú ā ka lɛ ɔ́ bū okónu kú ɔ̄comɛ́ɛbɛ Ahíja ā.

¹⁹Ɔdā ohile dóódu nɛ̄ Ujérobōwam yá ā, é lɛ ɔ́ tá tū ipú ɔkpá kú ígwú ō gbo kú aɔ́cɛ́ kú Ísrɛ̄lu ā.

²⁰Ujérobōwam wɛ ɔcɛ́ kú Ísrɛ̄lu iháyí ofu cɛpa. Ó gekwú, é lɛ ɔ́ nyi, anɔ́ɔ ɔyí nū Unádābu kwú pīya ɔcɛ́ kwɛyí nū á.

²¹Uréhobōwam, ɔyí kú Usólōmɔn wɛ iháyí ofɛpa ce éyi ɛ́ɛ́ nōó lé ɔcɛ́ kú Ujúda á. Ó wɛ ɔcɛ́ kú Ujúda iháyí igwáahāapa Ujerúsālɛm, igelī nɛ̄hi nɛ̄ Óndú ā fu ŋmá odúúdú aígelī nɛ̄hi ohile kú Ísrɛ̄lu á. Ɛga nōó ka ka anú ɔ́ɔ wɛ ɛga nɛ̄ ɛ́ɛ í gbā anúɔ ɛ̄gbā á. Ɛ́nɛ́ kú Uréhobōwam wɛ Unáama nōo ŋmá Ámɔn ā.

²²Anɔ́ɔ ācɛ kú Ujúda klla le ɔ́bíipú bī tū Ɔwɔicō. É yá ka Óndú ā kóō kwú cɔ̄nū, ohígbū ka ɔ́bíipú nēé bī tū Ɔwɔicō ā fíyɛ́ ɛ̄nɛ̄ ádáádā uwā tɛtɛ bī ā á.

²³É le aíkpɛ́cí gwó lɛ aɔ́wɔ ɛ̄kɛ̄mgbɛ̄ kwu ɛyí ɛfu dóódu. É klla le ɛcɔ̄ mɛ́mla ojibó kú Ássɛ̄ra kpó ma kwu ɔkwu ɔcí ɛ̄mɛ̄ɛ̄mɛ̄ dóódu, cɛ́ɛ́ ká ācɛ kéē gbā ɔ̄ ɛ̄gbā

²⁴Ācɛnyā mɛ́mla ācɛnyīlɔ kwú kpó pīya akwuna kú aɛ́cí ɔ́ɔmā aíkpɛ́cí kú uwā. Ācɛ kú Ujúda klla gbo odúúdú ucɛ obɔ̄bí mɛ́mla ucē kú uwēyī kú ācɛ kú aéwɔhá nɛ̄ Óndú ā nū bɛ̄cɛ hīla uwá ā.

²⁵Iháyí ɔ́mɛhɔ̄ nɛ̄ Uréhobōwam lé ɔcɛ́ ā, Ussíssāki, ɔcɛ́ kú Íjīpiti wā í le ɛ́fú kpó tú Ujerúsālɛm.

²⁶Anɔ́ɔ ó lɛ uwá yálé klla le odúúdú agbénú kú Agblīihɔ-nɛ̄hi mɛ́mla agblɔ̄cɛ́ ā kpó ga ɔlɛ́ nū á. Kwu aɔ́kplɛ́fú kú oje ɔdɔ (ugóolu) nɛ̄ Usólōmɔn, ɔcɛ́ ma ā.

²⁷Uréhobōwam le aɔ́kplɛ́fú kú oje udɔ ɔhá yá kwɛyí nū, klla kwú uwā í kpó lɛ ɔ̄cɛ nōo gē gbāajɛ okómpinu kú agblɔ̄cɛ́ ā.

²⁸Eko dúúmā nɛ̄ Uréhobōwam gē ga Agblīihɔ-nɛ̄hi, gaá gbā Óndú ā ɛ̄gbā ā, aídengéli ā géē kpó aɔ́kplɛ́fú tá ɔ̄ ɔkwu, cɛ́ɛ́ é kwú uwā í cīgbīhi nyɔ̄, eko nōo lɛ ɔkɔ gbā kwɛyí.

²⁹Ɔdā ohile dóódu nɛ̄ Uréhobōwam yá ā, é lɛ ɔ́ tá tū ipú ɔkpá kú ígwú ō gbo kú aɔ́cɛ́ kú Ujúda.

³⁰Uréhobōwam mɛ́mla Ujérobōwam bá yɔ̄ gē kpɛ́fú eko nēé cɔcɛ́ ā tú īyī uwā eko dóódu.

³¹Uréhobōwam gekwú, anɔ́ɔ é kwú ɔ̄ ú nyi únóji kú ɔcɛ́ ipú igelī nɛ̄hi kú Udéfīdi á. Ɛ́nɛ́ nū lé ka Unáamā nōo ŋmá Ámɔn ā. Anɔ́ɔ ɔyí kú Uréhobōwam, Ábīja kwú pīya ɔcɛ́ kú Ujúda kwɛyí ádā nū á.