Read idoma 1 AƆ́CƐ́ 15 Bible Online

1 AƆ́CƐ́ 15 - idoma bible

1 AƆ́CƐ́ 15

¹Igbīhi iháyí ɔ́migwáahātá nɛ̄ Ujérobōwam lé ɔcɛ́ kú Ísrɛ̄lu ā, Abíjam le ɔcɛ́ kú ācɛ Ujúda lé.

²Abíjam cɔcɛ́ kú Ujúda iháyí ɛtá Ujerúsālɛm. Ɛ́nɛ́ nū wɛ Umáaka, adá kú Ábsālɔm.

³Ó klla bī ɛdɔ kú ɔ́bíipú piíí nɛ̄ ádáádā nū tɛtɛ bī tū Óndú ā. Ɔtū kú nū í le kpaakpa mla Óndú, nōo wɛ Ɔwɔicō kú nū ā ŋ́. Ó yá ucē nōo he Ɔwɔicō ɔtū ā mla ɔtū ékpónú bɛ̄ɛka ádáádā nū, Udéfīdi á ŋ́.

⁴Amáŋ, ohígbū ádáádā nū, Udéfīdi ā, Óndú ā klla kwú Ábījam, éyi kú ayínɔ̄nyīlɔ kú nū ú cɔcɛ́ kú Ujúda igbīhi nū. Ó klla le Ujerúsālɛm tú kwaajɛ

⁵Óndú ā yá ɛ̄nyā ohígbū ɔdā nɛ̄ Udéfīdi yá, nōo he Óndú ā ɔtú nɛ̄hi ā. Udéfīdi lɛyítáajɛ lɛ ɔ́, ó klla bīya íne kú Óndú dúúmā ŋ́, ń táafú ŋ́ ayíka ɔ́bíipú nōó bī tá Uríya ā ōfōōfūnū nɛ n

⁶Ɛfú nɛ̄ Uréhobōwam mɛ́mla Ujérobōwam kpó ā klla yɔ̄ ī gɔbū eko kú Ábījam kpɔ́ jāā gbéeko nōó kwú.

⁷É tá ɛjɛ̄ɛ̄jī ɔdā ohile nɛ̄ Abíjam yá ā tū ipú ɔkpá kú ígwú ō gbo kú aɔ́cɛ́ kú Ujúda.

⁸Abíjam gekwú anɔ́ɔ é lɛ ɔ́ nyi ipú igelī nɛ̄hi kú Udéfīdi ā. Anɔ́ɔ ɔyí nū, Ása le ɔcɛ́ le kwɛyí nū á.

⁹Ipú iháyí ɔ́mofu kú eko nɛ̄ Ujérobōwam je pīya ɔcɛ́ kú Ísrɛ̄lu ā, Ása lɛ ɔcɛ́ kú Ujúda lé.

¹⁰Ó wɛ ɔcɛ́ Ujerúsālɛm iháyí ofɛpa ceéyi. Ɛ́nɛ́ nū nɛ̄hi lé ka Umáaka, ɔyínɔ̄nyā kú Ábsālɔm.

¹¹Ása yá ɔdā nōo he Óndú ā ɔtū bɛ̄ɛka ádáádā nū, Udéfīdi ā.

¹²Ó le odúúdú aákwuna nɔnyīlɔ mɛ́mla aákwuna nɔ̄nya kú aíkpɛ́cí ā kpó nū ŋmá ajɛ ā. Ó klla lɛ aójibó kú aɛ́cí nɛ̄ aádā nū ma kwu ajɛ Ujerúsālɛm ā kpó catāajɛ.

¹³Ó kwú ɛ́nɛ́ nū nɛ̄hi, Umáaka ú ŋmá āhɔ̄ kú ɛ́nɛ́ ɔcányā, ohígbū ka, ɛ́nɛ́ nū ā lɛ ojíbó kú Ássɛ̄ra ma lɛ iyīnū. Ása kwú ojibó kú ɛcí kú ɛ́nɛ́ nū ā ú wúlatāajɛ klla kwú ɔ́ ú kpó yɔlá ɔkpá kú Ukídrɔn.

¹⁴Abɔ̄ Ása í je ɛjɛ̄ɛ̄jī aíkpɛ́cí kú ācopɛ̄cí nēe bá ipú ajɛ ā kpó yíífi dúúdú ŋ́ náána ā, ó le lɛyítáajɛ lɛ Óndú ā klla ī yá ucē nōo ī he Óndú ā ɔtū ā kpaakpa odúúdú oyēeyī kú nū.

¹⁵Ó kwú odúúdú ɔdā nɛ̄ ádā nū kpó le Ɔwɔicō ā í kwúcē ga ipú Agblīihɔ-nɛ̄hi ā, kwu oje ɔdɔ (ugóolu) mɛ́mla oje nɛ̄hɛ́ nɛ̄ anú abɔ̄yī nū je lɛ Óndú ā dúú ā.

¹⁶Ása, ɔcɛ́ kú Ujúda mɛ́mla Ubássa ɔcɛ́ kú Ísrɛ̄lu ā, kpɛ́fú tú īyī uwā jāā gbéeko nēé i pɛ kwú.

¹⁷Ubássa, ɔcɛ́ kú Ísrɛ̄lu le ɔfú kpó í kwu ācɛ kú Ujúda. Ó gbɔɔ́ ō tú Uráma gwó, yɔ̄ ī hɛ́ igá olɔfú tū ɔ̄. Ó klla le ɔwɛ nōo ī yɛ ga Ujúda klla ŋmá abɔ́ɔ ā ŋmó, o yá ɛ́ɛ́ kóō cɛ̄ lɛ ɔ̄cɛ dúúmā ga ipú Ujúda ámāŋ bɛ̄cɛ ŋmá anú ŋ́.

¹⁸Anɔ́ɔ Ása lɛ odúúdú oje ɔdɔ (ugóolu) nēe hile ɔlɛ́ ɔcɛ́ mɛ́mla Agblīihɔ-nɛ̄hi ā kpó, kwú uwá ú kpó lɛ éyi kú aígabɔ̄ kú nū, lɛ ɔ́ kpó tɛ̄hɔ̄ fu Ubɛnhádādi, ɔcɛ́ kú Udamáskɔ̄si mɛ́mla Usírīya ā. Ó tū uwā ɛhɔ̄ fu Ubɛnhádādi, ɔyí kú Utábrīmɔn, ɔyí kú ɔyí kú Uhɛ́siyɔn mɛ́mla olɛhɔ̄ nyā kahíníī,

¹⁹“Cɛ̄ ká ālɔ̄ wɛ aóklóbīya ɛ́gɛ́nɛ̄ aádā alɔ tɛtɛ wɛ ā. Oje nɛ̄hɛ́ mɛ́mla oje ɔdɔ̄ (ugóolu) nyā, n bī gaá yá uwɔ ɛhi. Ó lɛ ā, lɛ oklóbīya kú awɔ mɛ́mla Ubássa, ɔcɛ́ kú Ísrɛ̄lu ā hɛ́, cɛ́ɛ́ kóō lɛ aícɔ́ɔja kú nū kpó ŋmá ajɛ kú um.”

²⁰Anɔ́ɔ Ubenhádādi cɛ̄ɛ̄lā nɛ̄ Ása, ɔcɛ́ kú Ujúda ka ā. Anɔ́ɔ ó lɛ aícɔ́ɔja kú nū kpó gaá le ɛfú kpó tá aígelī nɛ̄hi kú Ísrɛ̄lu á. É lɛ Íjɔn, Udáni, Ébɛ̄lu Ubɛ̄timáka, mɛ́mla āyā kú ísu kú Ugálīli ā yálé klla mīyɛ odúúdú ajɛ ā mɛ́mla odúúdú ajɛ kú Unáfutāli ā.

²¹Eko nɛ̄ Ubássa lɛ ɔdā nōó yɔ̄ í yá nyā pó ā, anɔ́ɔ ó mā igá nōó yɔ̄ ī hɛ́ tū Uráma ā tá. Ánɔ́ɔ ó le yɛ tā Utɛ́sa á.

²²Anɔ́ɔ Ása, ɔcɛ́ kú Ujúda ā le ɔna tá lɛ odúúdú ācɛ kú Ujúda kéē nyɔ̄ ga Uráma kéē gaá lɛ ɛcɔ̄ mɛ́mla aɔ́cí mɛ́mla odúúdú iyó nɛ̄ Ubássa bī le hɛ́ igá tū Uráma ā kpó wā. Anɔ́ɔ é gaá le odúúdú iyó ā gwó wā ajɛ kú Ujúda á. Anɔ́ɔ Ása kwú iyó ā ú kpó ce igá tū Umíspa mɛ́mla Ugɛ́ba, aígelī nɛ̄hi kú ajɛ kú ipɔ́ɔma kú Ubɛ́njamīn ā á.

²³Ɔdā ohile ɔhá nɛ̄ Ása yá ā, é lɛ uwa kpó tá tū ipú ɔkpá kú ígwú ō gbo kú aɔ́cɛ́ kú Ujúda. Amáŋ eko nɛ̄ Ása kwú hīla ā, ōcē kwú ɔ́ ikpó ú cē klla kwú ɔ̄ ú nyɔ́nyí.

²⁴Ása gekwú anɔ́ɔ é kwú ɔ̄ ú nyi únóji kú aɔ́cɛ́, igelī kú Udéfīdi, Ujerúsālɛm ā. Anɔ́ɔ ɔyí nū Ujɛhóssāfati lɛ ɔcɛ́ lé kwɛyí nū á.

²⁵Ipú iháyí ɔ́mpa nɛ̄ Ása lé ɔcɛ́ kú Ujúda ā, Unádābu, ɔyí kú Ujérobōwam le ɔcɛ́ kú Ísrɛ̄lu lé. Ó cɔcɛ́ ā iháyí ɛpa.

²⁶Ó klla le ɔ́bíipú bī tū Óndú ā bɛ̄ɛka ádā nū ā. Ó klla cɛ̄ lɛ Ísrɛ̄lu lɛ ɔ́bíipú bī tū Óndú ā dúú.

²⁷Ubássa, ɔyí kú Ahíja kú ipɔ́ɔma kú Íssāka le ībīyājɛ yá tū Unádābu, anɔ́ɔ ó le ɔ́ ŋmó á, eko nɛ̄ Unádābu yɔ̄ í kpɛ́fu kóō mīyɛ igelī nɛ̄hi kú Ugibɛ́tɔn, ajɛ kú Ufilístiya ā.

²⁸Ó yá ɛ̄nyā ipú iháyí ɔ́mɛtá nɛ̄ Ása wɛ ɔcɛ́ kú Ujúda ā. Anɔ́ɔ Ubássa kwú pīya ɔcɛ́ kú Ísrɛ̄lu kwɛyí Unádābu á.

²⁹Ɔkwɔɔkwu nɛ̄ Ubássa lɛ ɔcɛ́ lé ā, ó gbɔɔ́ ō ŋmó odúúdú ācɛ ɔlɛ́ Ujérobōwam. Ó lɛ odúúdú ācɛ ɔlɛ́ Ujérobōwam ā kpó ŋmó jāā gbéeko nɛ̄ ɔ̄cɛ dúúmā kú uwā í hile gɛ ŋ́.

³⁰Ɔdā nyā yá lɛ ā ohígbū ka ɔlɛ́ kú Ujérobōwam lɛ Óndú ā, nōo wɛ Ɔwɔicō kú Ísrɛ̄lu ā, yá cɔ̄nū, o ŋmá lɛ íne nēé bīya ā. É klla le ācɛ kú Ísrɛ̄lu abɔ̄ kpó wu ipú íne nēé bīya ā dúú

³¹Ɔdā ohile ɔhá nɛ̄ Unádābu yá ā, é le ɔ́ tá tū ipú ɔkpá kú ígwú ō gbo kú aɔ́cɛ́ kú Ísrɛ̄lu.

³²Ása, ɔcɛ́ kú Ujúda, mɛ́mla Ubássa, ɔcɛ́ kú Ísrɛ̄lu ā, kpɛ́fú tá īyī uwā jāā gbéeko nɛ̄ uwá ɛpɛplɛ́ɛpa le pɛ́ gekwú.

³³Ipú iháyí ɔ́mɛtá nɛ̄ Ása lé ɔcɛ́ kú Ujúda ā, Ubássa, ɔyí kú Ahíja kwú pīya ɔcɛ́ kú Ísrɛ̄lu. Ó wɛ ɔcɛ́ Utɛ́sa iháyí ofu cɛnɛ.

³⁴Ó klla le ɔ́bíipú bī tū Óndú ā ɛ́gɛ́nɛ̄ Ujérobōwam, ádáádā nū bī tū Óndú ā. Ó klla le ācɛ kú Ísrɛ̄lu abɔ̄ kpó wu ipú ɔ́bíipú ā dúú.