Read idoma 1 AƆ́CƐ́ 16 Bible Online

1 AƆ́CƐ́ 16 - idoma bible

1 AƆ́CƐ́ 16

¹Ɔ̄comɛ́ɛbɛ éyi yɔ̄ abɔ́ɔ nōo lé ka Ujéhu, ɔyínɔ̄nyīlɔ kú Uhanáni. Ɛ̄cī éyi, Óndú ā gaá lɛ ɛlā ka lɛ ɔ́ lɛyíkwu Ubássa kóō le da ɔ́,

²kahíníī, “N je uwɔ eko nɛ̄ ā wɛ ɔdā dóódu ŋ́ mā, kwú uwɔ ú cɔcɛ́ kú ācɛ ɔlɛ́ um, Ísrɛ̄lu. Anɔ́ɔ a gbɔɔ́ ō bī ɔ́bíipú tū um ɛ́gɛ́nɛ̄ Ujérobōwam bī tū um ā ā? A klla le ācɛ ɔlɛ́ um ikpó kpó tū íne kú uwɔ nɛ̄ a bīya ā dúú. Íne kú um nēé bīya ā le um yá cɔ̄nū ɛɛ́.

³N géē je awɔ mɛ́mla ipɔ́ɔ́nū kú ɔlɛ́ uwɔ kpó yíífi bónū dúúdú ɛ́gɛ́nɛ̄ n yá ipɔ́ɔ́nū kú Ujérobōwam, ɔyínɔ̄nyīlɔ kú Unébati ífi dúúdú ā.”

⁴Óndú klla ka kpɔ́ ka ɔ̄cɛ ipɔ́ɔ́nū kú Ubássa dóódu nōo gekwú igelī nɛ̄hi ā, ewō géē je okwū kú nū lé. Ɔ̄cɛ ɔlɛ́ nū dóódu nōo gekwú ipácí aígbáanɔ nōo ī wu icō géē je okwū kú nū lé.

⁵Ɔdā ohile ɔhá nɛ̄ Ubássa yá ā mɛ́mla odúúdú úklɔ́ kú ɔtū ōlɛ kú nū mɛ́mla ɔdā ohile nōó yá ā, é lɛ ɔ́ tá tū ipú ɔkpá kú ígwú ō gbo kú aɔ́cɛ́ kú Ísrɛ̄lu.

⁶Ubássa gekwú, anɔ́ɔ é kwú ɔ ú nyi Utɛ́sa á. Anɔ́ɔ ɔyínɔ̄nyīlɔ kú nū, Ɛ́la le ɔcɛ́ lé kwɛyí nū á.

⁷Ujéhu, ɔ̄comɛ́ɛbɛ ā kɛlā kú Óndú ɔ́ɔmā lɛyíkwu Ubássa mɛ́mla ipɔ́ɔ́nū kú nū, ohígbū ɔ́bíipú nɛ̄ Ubássa bī tū Óndú ā. Ó cɛ̄ lɛ Óndú ā le cɔ̄nū. Ó wɛ ohígbū ɔ́bíipú nōó bī tū Óndú ā ɛ́gɛ́nɛ̄ Ujérobōwam bī ōfōōfūnū ŋ́, amáŋ ohígbū koó le odúúdú ipɔ́ɔ́nū kú ɔlɛ́ Ujérobōwam kpó ŋmó.

⁸Ipú iháyí ɔ́mofu ce ɛhīlī nɛ̄ Ása, lé ɔcɛ́ kú Ujúda ā, Ɛ́la, ɔyí kú Ubássa le ɔcɛ́ kú Ísrɛ̄lu lé. Ó gbō ācɛ kú Ísrɛ̄lu iháyí ɛpa, ajɛ kú Utɛ́sa.

⁹Usímri, éyi kú aígabɔ̄ kú nū nōo ge leyīkwu āyā éyi kú aúgbɔ́ɔnya o kpɛ́fú kú Ɛ́la, ɔcɛ́ ā, le ujɔ̄ tū tū Ɛ́la. Ɛ̄cī éyi, ejé yɔ̄ ī kwú Ɛ́la, ɔlɛ́ Asáa, nōo wɛ éyi kú aígabɔ̄ kú ɔlɛ́ ɔcɛ́ nōo gē leyīkwu agbla kú ɔlɛ́ ɔcɛ́ ā.

¹⁰Anɔ́ɔ Usímri le plla tá inu wɛɛlɛ le Ɛ́la ŋmó, anɔ́ɔ ó kwú pīya ɔcɛ́ kwɛyí nū á. Ɔdā nyā yá ipú iháyí ɔ́mofu cahāapa nɛ̄ Ása wɛ ɔcɛ́ kú Ujúda ā.

¹¹Obōōbū nɛ̄ Usímri le ɔcɛ́ lé ā, ó lɛ odúúdú ācɛ kú ipɔ́ɔ́nū kú ɔlɛ́ Ubássa kpó ŋmó. Kwu odúúdú aɔ́máapú nū mɛ́mla aóklóbīya nū nɔnyīlɔ dóódu ā, ó lɛ uwá kpó ŋmó.

¹²Ɛ́gɛ́nɛ̄ Óndú ā ka bū okónu kú Ujéhu, ɔ̄comɛ́ɛbɛ ā, lɛyíkwu ipɔ́ɔ́nū kú Ubássa ā, Usímri le odúúdú ācɛ kú ipɔ́ɔ́nu kú Ubássa ā kpó ŋmó.

¹³Ohígbū ɛcí ōpā kú uwá mɛ́mla ɛ̄nɛ̄ é klla kpó ācɛ kú Ísrɛ̄lu ga ipú ɛcí ōpā mɛ́mla íne ō bīya ɔhá ā. Ubássa mɛ́mla ɔyí nū, Ɛ́la lɛ Óndú ā, nōo wɛ Ɔwɔicō kú Ísrɛ̄lu ā, ɔtū bīya nɛ̄hi.

¹⁴Ɔdā ohile ɔhá nɛ̄ Ɛ́la yá ā, é le ɔ́ tá tū ipú ɔkpá kú ígwú ō gbo kú aɔ́cɛ́ kú Ísrɛ̄lu.

¹⁵Ipú iháyí ɔ́mofu cahāapa nɛ̄ Ása lé ɔcɛ́ kú Ujúda ā, Usímri kwú pīya ɔcɛ́ kú Ísrɛ̄lu ajɛ kú Utɛ́sa. Ó gbō ācɛ kú Ísrɛ̄lu ɛ̄cī ahāapa. Ācɛ kú Ísrɛ̄lu bá ī cīíbɔm tū igelī nɛ̄hi kú Ugibɛ́tɔn ajɛ kú Ufilístiya ā, cɛ́ɛ́ kéē mīyɛ ɔlɛ́ ā.

¹⁶Eko nēé le pó abɔ́ɔ ka, Usímri ɔ́ɔ le ibīyājɛ yá tū ɔcɛ́ klla le ɔ́ ŋmó ā, anɔ́ɔ odúúdú uwá kwú Ómri, otrɛ̄yí kú aícɔ́ɔja kú uwá ú cɔcɛ́ á.

¹⁷Ómri mɛ́mla aícɔ́ɔja kú nū kwúcē ŋmá Ugibɛ́tɔn nyɔ̄ í mīyɛ Utɛ́sa.

¹⁸Eko nɛ̄ Usímri le má ka ɛ́ɛ́ mīyɛ igelī nɛ̄hi ā ɛɛ́ mā, ó le yɛ tá ipíinu eyīpú olɔfú kú agblɔ̄cɛ́ ā gaá lɛ ɔ́ tū ɔlá klá iyī nū. Anɔ́ɔ ɔlá ā kwú ɔ́ ú ŋmó tá abɔ́ɔ á.

¹⁹Ɔdā nōo yɔ̄ nyā, yá ohígbū ɔ́bíipú kú nū mɛ́mla ákú ádáádā nū nēé bī klla kpó ācɛ Ísrɛ̄lu ikpó tū ɔ̄ ā. Ɛ̄nɛ̄ o cɛ̄ le Óndú ā le cɔ̄nū ā.

²⁰Ɔdā ohile ɔhá nɛ̄ Usímri yá ā, kwu ɔ̄kā kú ibiyājɛ nōó yá ā, é le ɔ́ tá tū ipú ɔkpá kú ígwú ō gbo kú aɔ́cɛ́ kú Ísrɛ̄lu.

²¹Ācɛ kú Ísrɛ̄lu kwú kɔ̄ ɛpa. Āyā éyi tíne ō je Utíbīni, ɔyí kú Ugínāti ā cɔcɛ́, āyā ɔhá ā kē le yɛce Ómri.

²²Igbīhāajɛ ā ācɛ nēe yɛce Ómri ā le yálé. Utíbini gekwú anɔ́ɔ Ómri le ɔcɛ́ lé á.

²³Ipú iháyí ofuciigwóléyi nɛ̄ Ása lé ɔcɛ́ kú Ujúda ā, Ómri kwú pīya ɔcɛ́ kú Ísrɛ̄lu. Ó gbō ācɛ kú Ísrɛ̄lu iháyí igwɛ́ɛpa. Iháyí ɛhīlī aflɛ́yí nōó lé ɔcɛ́ ā, ó wɛ ɔcɛ́ Utɛ́sa.

²⁴Anɔ́ɔ ó lɛ ɔlɛ́ kú ɛyí ɛfu kú Usamérīya lá ŋmá ɛgiyí ɔ̄cɛ éyi nēé hī ka Usséma mla ije nɛ̄hɛ́ úlā igwɛ́ɛhɔ̄ (6,000). Ómri le igá olɔfú cē tū ɛfu ā, anɔ́ɔ ó klla le igelī nɛ̄ŋcɛ́ éyi gwó abɔ́ɔ á. Anɔ́ɔ ó hī iyē kú nū ka, Usamérīya, iyē kú Usséma, ɔ̄cɛ nōo tɛtɛ lɛ ɛfu ā.

²⁵Ómri bī ɔ́bíipú tū Óndú ā fíyɛ́ odúúdú aɔ́cɛ́ nēe cɔcɛ́ gbɔbū lɛ ɔ́ ā á.

²⁶Ɛ́gɛ́nɛ̄ Ujérobōwam yá ā, ó lɛ Óndú ā, nōo wɛ Ɔwɔicō kú Ísrɛ̄lu ā, ɔtū bīya ohígbū íne nōó bīya mɛ́mla ɛ̄nɛ̄ ó kpó ācɛ kú Ísrɛ̄lu ikpó tū íne ō bīya mɛ́mla ɛcí ō pā ā.

²⁷Ɔdā ohile ɔhá dóódu nɛ̄ Ómri yá ā, é le ɔ́ tá tū ipú ɔkpá kú ígwú ō gbo kú aɔ́cɛ́ kú Ísrɛ̄lu.

²⁸Ómri gekwú, anɔ́ɔ é le ɔ́ nyi Usamérīya, anɔ́ɔ ɔyí nū Áhābu lɛ ɔcɛ́ le kwɛyí nū á.

²⁹Ipú iháyí ɔ́mofu cigwáahātá nɛ̄ Ása lé ɔcɛ́ kú Ujúda ā, Áhābu ɔyí kú Ómri kwú pīya ɔcɛ́ kú Ísrɛ̄lu. Ó gbō Ísrɛ̄lu Usamérīya iháyí ofu cɛpa.

³⁰Anú ā klla bɔ̄bíipú tū Óndú ā fíyɛ́ ódúúdú aɔ́cɛ́ nēe gbɔbū lɛ ɔ́ ā á.

³¹Íne nōó bīya ɛ́gɛ́nɛ̄ Ujérobōwam bīya ā í jē ɔ́ ɛ́ɛ́ ŋ́, ó klla nyɛ̄ɛ̄ gaá lɛ Ujésɛ̄bɛlu, ɔyínɔ̄nyā kú Etibáalu, ɔcɛ́ kú Usídɔn lɛ. Ó klla gbɔɔ́ ō gbā ɔwɔ nēé hī ka Ubáalu ā ɛ̄gbā.

³²Ó le agbla gwó lɛ Ubáalu ipú ajɛ kú Usamérīya. Ó klla le ede kú Ubáalu gwó klla kwú ɔ̄ ú gaá tá ipú agbla kú Ubáalu ā.

³³Áhābu klla le ojibó kú Ássɛ̄ra ma. Áhābu yá Óndú ā, nōo wɛ Ɔwɔicō kú Ísrɛ̄lu ā, ɔtūnōbí fíyɛ́ odúúdú aɔ́cɛ́ kú Ísrɛ̄lu á.

³⁴Eko kú ɔcɛ́ kú Áhābu ā, Uhíyɛ̄lu ŋmá Ubɛ́tɛlu gaá lɛ Ujérīko tū gwó. Ɛ́gɛ́nɛ̄ Óndú ā ka bū okónu kú Ujósuwa, ɔyí kú Unún lɛ ā, ɔ́kplá kú Uhíyɛ̄lu, Abiram gekwú eko nōó gaá le ikpíinu kú Ujérīko táajɛ ā. Ɔyí nū nɔ̄nyīlɔ ɔhɔ́ma ā klla gekwú, eko nōó le odūngwɔ́wɛ kú igelī nɛ̄hi kú Ujérīko gwó kwɛyí ā.