Read idoma 1 AƆ́CƐ́ 17 Bible Online

1 AƆ́CƐ́ 17 - idoma bible

1 AƆ́CƐ́ 17

¹Ɔ̄comɛ́ɛbɛ éyi lé ka Ɛ́lāyija. Ó ŋmá Utíssbe, ipú ajɛ kú Ugílɛ̄di. Ɛ̄cī éyi ó gaá da Áhābu, ɔcɛ́ ā kahíníī, “Oŋmá lɛ iyē kú Óndú ā, nōo wɛ Ɔwɔicó kú Ísrɛ̄lu nōo yēeyī nɛ̄ n gē cɛ̄ ɔ̄ ɛhɔ̄ ā, ɔwɔ í gaá yá ajɛ kú Ísrɛ̄lu ɛ́ɛ nɛ̄ ébú gē cē ŋ́, iháyí ɛpa ámáŋ ka ɛtá nēe ī wā ā. Jāā gbéeko nɛ̄ n klla le ka ka ɔwɔ kóō yā mɛ́ɛnɛ.”

²Anɔ́ɔ Ɔwɔicō dā Ɛláyíja kahíníī,

³“Nyɛ̄ɛ̄ ŋmá amānyā ká ā gaá tayínū ɔkpá kú Ucérīti, ɛnɔ̄ɔ̄cī kú Ujɔ́dan ā.

⁴A géē gwá éŋkpɔ̄ ŋmá áyɔ́kpá ɔ́ɔmā ā. N kē í da aígbáanɔ kóō bēē bī ɔdōlé gé lɛ uwɔ.”

⁵Ɛ́lāyija nyɛ̄ɛ̄ gaá le yá ɛ́gɛ́nɛ̄ Óndú ā ka lɛ ɔ́ lɛ ā ā. Anɔ́ɔ ó nyɔ̄ gaá klá okónu áyɔ́kpá kú Ucérīti, ɛnɔ̄ɔ̄cī kú Ujɔ́dan ā.

⁶Aígbáanɔ gē bī igbo mɛ́mla ɛbɛ gé lɛ ɔ́ ɔ̄cɔ̄ɔcī mɛ́mla ɔ̄nɔ̄ɔ̄nɛ̄ dóódu. Ó gē gwá éŋkpɔ̄ ŋmá áyɔ́kpá ā.

⁷O yɔ̄ yɛɛ ā, áyɔ́kpá ā kwú ŋmó ohígbū ɔwɔ nōó yā tū ajɛ kú Ísrɛ̄lu ā gɛ ŋ́ mā.

⁸Anɔ́ɔ Óndú ā da Ɛláyíja kahíníī,

⁹“Cāŋjɛ ká ā ga Usárefāti, ajɛ kú ācɛ Usídɔn, ká ā nyɔ̄ í lā abɔ́ɔ. N le da ɔnyōkwū éyi nōo lā abɔ́ɔ kóō je ɔdōlé gā uwɔ ɛɛ́.”

¹⁰Ɛláyíja le tá Usárefāti, abɔ̄ ó gā okómpinu kú igá kú igelī nɛ̄ŋcɛ́ ā, ó má ɔnyōkwú éyi yɔ̄ í ce ɛfú. Anɔ́ɔ ó da ɔnyā ā kahíníī, “Lɛ éŋkpɔ̄ je ga um ká n̄ gwá.”

¹¹Abɔ̄ ɔnyā ā yɔ̄ í nyɔ̄ í hɛ́ éŋkpɔ̄ gé lɛ ɔ́ ā, ó klla da ɔ́ kahíníī, “Lɛ igbō amáŋ ka ɔdōlé dúúmā bī bá éŋkpɔ̄ ā gē um dúú.”

¹²Anɔ́ɔ ɔnyā ā tá ɔ̄ ohi kahíníī, “Kú ɛlā ɔkwɔ̄ɔ̄kwɛ̄yi kú Óndú ā, nōo wɛ Ɔwɔicō kú uwɔ, nōo yēeyī ā, ń lɛ igbō dúúmā gɛ ŋ́. N lɛ umu lígíi, mɛ́mla anɔ̄ lígíí kú ɔcí nēé hī ka ólīifu ā. Anú hile ipú oli kú anɔ̄ kú um mɛ́ɛ̄ á. N wā amānyā gaá cē ɛfú ká n̄ kwú ɔ̄ ú yá ɔdōlé, cɛ́ɛ́ kú ami mɛ́mla ɔyí um ká ālɔ̄ le lé, ɛ́ɛ́ kú ɛmiyɛ kóō géē je alɔ kpó ŋmó mɛ́ɛ́nɛ. Ohígbū ka ɔdōlé ámōōmɛ kú alɔ yɔ̄ abɔ́ɔ mɛ́ɛ̄ á.”

¹³Anɔ́ɔ Ɛláyíja da ɔ́ɔ kahíníī, “Ā lɛ ɛlā wu ɔ́ ŋ́, nyɔ̄ gaá yá ɔdōlé kú uwɔ, amáŋ le igbō yá ŋmá umu ā gē um lígíi gbɔbū ɛ́ɛ́ ká ā géē nyɔ̄ í yá ákú uwɔ mɛ́mla ɔyí uwɔ, ká aá géē lé.

¹⁴Ohígbū ka Óndú ā, nōo wɛ Ɔwɔicō kú Ísrɛ̄lu ā kahíníī, “Oto kú umu ā í gáā mɛ ŋ́, ɛɛ́ nɛ̄ anɔ̄ kú ɔcí nēé hī ólīifu nōo yɔ̄ ipú oli ā gē ŋmó ŋ́, jāā gbɛ́ɛ̄cī nɛ̄ Óndú ā géē tū ɔwɔ wā í yā klá ɛcɛ.”

¹⁵Anɔ́ɔ ɔnyā ā le yɛ gaá le yá ɛ́gɛ́nɛ̄ Ɛláyíja ka lɛ ā. Anɔ́ɔ anú mɛ́mla ācɛ ɔlɛ́ ɔnyōkwū ā lé ɔdōlé ā ɛ̄cī alɛwa á.

¹⁶Umu ā í mɛ ŋmá oto ā ŋ́. Ɛ́ɛ́ nɛ̄ anɔ̄ gē mɛ ŋmá oli ā ŋ́. Ɛ́gɛ́nɛ̄ Ɛláyíja, ɔ̄comɛ́ɛbɛ kú Ɔwɔicō ā ka lɛ á.

¹⁷Igbīhi ɛ̄nyā ɔyí kú ɔnyōkwū, nōo yɔ̄ í lɛ ɛlá kwu Ɛláyíja ā, gbɔɔ́ ō doōcē. Ó doōcē ā jāā gbéeko nōó gekwú.

¹⁸Anɔ́ɔ ɔnyā ā da Ɛláyíja kahíníī, “Ɔdí nɛ̄ a bī lɛyíkwu um ā? A wā gaá bla Óndú ā íne nɛ̄ n bīya ā, cɛ́ɛ́ ká ɔyínɔ̄nyīlɔ kú um ā kóō gekwú nɛɛ?”

¹⁹Anɔ́ɔ Ɛláyíja da ɔ́ kóō kwú ɔyínɔ̄nyīlɔ kú nū ā ú gē lɛ anúɔ. Anɔ́ɔ ó mīyɛ ɔyí ā ŋmá abɔ̄ nū á. Ó kwú ɔyí ā ú bī ga inīīcō, ɛga nōó gbɔga ɔlɛ́ ɔnyā ā. Anɔ́ɔ ó kwú ɔyínɔ̄nyīlɔ ā ú gwutá agōdō.

²⁰Anɔ́ɔ ó gbɔ̄ɔkɔ tɛ́ɛcɛ gbōmgbōm kahíníī, “Woó, Óndú, Ɔwɔicō kú um, ɔdíyá nɛ̄ a yá ɔnyā nyā ɔdōbɔ̄bí nɛ̄hi ɛ́gɛ́nyā ā? Ɔnyā nyā húmáyī leyīkwu um á, a kē kwú ɔyí nū ú ŋmó.”

²¹Anɔ́ɔ Ɛláyíja lɛ īyī nū náŋdaa kwú ɔtū ú klá ɔyínɔ̄nyīlɔ ā igbɛɛtá. Ó klla gbɔ̄ɔkɔ kahíníī, “Kóocōō, Óndú, Ɔwɔicō kú um, kwú ɔyí nyā ú héyī ká ā kwú odo kú nū ú kwúcē gé lɛ ɔ́ kóō yēeyī igbɔhá ɛ́ɛ.”

²²Óndú ā lɛ ɔkɔ nɛ̄ Ɛláyíja gbā ā pó, anɔ́ɔ ɔyí ā gbɔɔ́ ō foowu á, anɔ́ɔ ó kwú héyī á.

²³Anɔ́ɔ Ɛláyíja kwú ɔyí ā ú wāajɛ ŋmá inīīcō ā gé lɛ ɔnyōkwū ā. Anɔ́ɔ ó da ɔ́ kahíníī, “Mɔ́ɔ̄, ɔyí uwɔ le héyī ɛɛ́.”

²⁴Anɔ́ɔ ɔnyā ā tá Ɛláyíja ohi kahíníī, “Abālɔbányā, ń le jé ka a wɛ ɔ̄cɛ kú Ɔwɔicō, Óndú kē ī kɛlā bū okónu kú uwɔ ɔkwɛ̄yi.”