Read idoma 1 AƆ́CƐ́ 18 Bible Online

1 AƆ́CƐ́ 18 - idoma bible

1 AƆ́CƐ́ 18

¹Eko nɛ̄ ɛ̄cī alɛwa le gla ā, ipú iháyí ɛtá kú ɔwɔ ohɛ́ɛnɔ ā, Óndú ā le ɛlā ka lɛ Ɛláyíja kahíníī, “Nyɔ̄ gaá lɛ īyī uwɔ mafú lɛ Áhābu cɛ́ɛ́ ká n̄ lɛ ɔwɔ tɛ̄hɔ̄ wāajɛ.”

²Anɔ́ɔ Ɛláyíja gbɔɔ́ ō nyɔ̄ í ma īyī nū fú lɛ Áhābu á. Eko ɔ́ɔmā wɛ īkpɔ̄tū kú ɔkpɛtā ajɛ kú Usamérīya á.

³Anɔ́ɔ Áhābu lɛ Obadíya nōo gē leyīkwu ɔlɛ́ nū ā hīgwú. Obadíya wɛ ɔ̄cɛ o gbā Óndú ā ɛ̄gbā, nɛ̄hi.

⁴Eko nɛ̄ Ujɛ́sēbɛlu yɔ̄ gē kpó ācomɛ́ɛbɛ kú Óndú ā ŋmó ā, Obadíya le ofɛhɔ̄ kú ācomɛ́ɛbɛ kú Óndú ā, kpó tayínū ipú ɔ̄gɔ̄, lɛ uwá kɔ ígwíígwu, ofɛpa ce igwó ofɛpa ce igwó. Ó klla yɔ̄ gē je ɔdōlé mɛ́mla éŋkpɔ̄ lɛ uwá.

⁵Anɔ́ɔ Áhābu da ɔ́ kahíníī, “Alɔ nyɔ̄ ga ɔkpá mɛ́mla áyɔ́kpá dóódu kú ālɔ̄ gaá tíne ácí nɛ̄ aɔ́nyā kú alɔ géē lé. Ekōōhī, alɔ géē má ácí nɛ̄ aɛ́bɛ́ ā géē lé nɛ̄ ɛmiyɛ í gáā je uwá kpó ŋmó ŋ́.”

⁶É cɛ̄ ɛga nɛ̄ ɔnyɔɔnyɛ kú uwá géē yɛ ā, anɔ́ɔ é gbɔɔ́ lɛyíkwu ɛga ɛyɛ́ɛyɛ́yí á.

⁷Abɔ̄ Obadíya yɔ̄ í nyɔ̄ ā, ó lɛ Ɛláyíja má ɔwɛ, anɔ́ɔ ó lɛ ɔ́ jé á. Anɔ́ɔ ó gbo kláajɛ iyɔ̄bū nū da ɔ́ ɔ̄kā kahíníī, “Awɔ nɛɛ, Óndú um Ɛláyíja?”

⁸Anɔ́ɔ Ɛláyíja da ɔ́ kahíníī, “Ami nɛ. Nyɔ̄ gaá da Áhābu ɔkpáni uwɔ ka n yɔ̄ amānyā.”

⁹Anɔ́ɔ Obadíya da ɔ́ ɔ̄kā kahíníī, “Íne nyā nɛ̄ ɔ̄cocɛ̄hɔ̄ kú uwɔ bīyíne ɛ́ɛ́ nɛ̄ a gē je ɔ́ tá abɔ̄ kú Áhābu kóō je ɔ́ ŋmó āa?

¹⁰Ɔkwɔ̄ɔkwɛ̄yi kú Ɔwɔicō, ó lɛ éwo dúúmā nōo yɔ̄ ipu ɛcɛ nyā nɛ̄ Áhābu í tíne uwɔ nyɔ̄ ŋ́ nɛɛ ŋ́. Eko dúúmā nɛ̄ ɔcɛ́ kú éwo éyi le ka ka á yɔ̄ ɔlɛ́ anúɔ ŋ́ nɛɛ, Áhābu gē da ɔ́ ká ɔ̄ lɛ ɔkpá gbo kéē pīya uwɔ abɔ́ɔ ŋ́.”

¹¹Obadíya klla da ɔ́ kpɔ́ ka ɔ́ɔ tíne kú anúɔ nyɔ̄ í da ɔ́ ka anú, Ɛláyíja ɔ́ɔ yɔ̄ abɔ́ɔ eko ɔ́ɔmā nɛɛ?

¹²Ó klla da ɔ́ kpɔ́ ka ɔ́dāŋ ka anúɔ kwú igbīhi í pīya kwu ɔ́, nɛ̄ alelékwū kú Óndú ā gaá kwú ɔ̄ ú ga ɛga nɛ̄ anúɔ í gáā jé ŋ́ bɛ́ɛ? Ka ɔ́dāŋ ka anúɔ gaá le ka lɛ Áhābu nɛ̄ ɔ́ɔ gā, nōó má ɔ̄ ŋ́, ka ɔ́ɔ géē je anúɔ ŋmó. Ó ka anúɔ gē yúúfi Ɔwɔicō klla í gbā ɔ̄ ɛ̄gbā ŋmá eko ɔyípɛ̄ kú anúɔ.

¹³Ó kahíníī, “Á pó ɔdā nɛ̄ n yá eko nɛ̄ Ujɛ́sēbɛlu yɔ̄ ī kpó ācomɛ́ɛbɛ kú Óndú ā ŋmó ā ŋ́ nɛɛ? N le ācomɛ́ɛbɛ kú Óndú ā ofɛhɔ̄ kpó tayínū ígwíígwu kú ofɛpa cigwó ofɛpa cigwo ipú ɔ̄gɛ̄cɔ̄. N klla ī je ɔdōlé mɛ́mla éŋkpɔ̄ lɛ uwá.”

¹⁴Obadíya klla da Ɛláyíja kahíníī, “Abālɔbányā, a gē da um ka amíyɔ̄ nyɔ̄ í da ɔkpani um Áhābu, ka anúɔ Ɛláyíja ɔ́ɔ yɔ̄ amānyā, ó géē je um ŋmó.”

¹⁵Anɔ́ɔ Ɛláyíja da ɔ́ kahíníī, “O ŋmá lɛ iyē kú Óndú ā, nōo wɛ Ɔwɔicō nōo lɔfú fíyɛ́ dúú, nɛ̄ n gē gbā ā, n géē ma īyī um fú lɛ Áhābu ícɛ.”

¹⁶Anɔ́ɔ Obadíya nyɔ̄ gaá le ka lɛ Áhābu, anɔ́ɔ Áhābu gbɔɔ́ ō nyɔ̄ gaá jīla mɛ́mla Ɛláyíja á.

¹⁷Eko nɛ̄ Áhābu le Ɛláyíja má ā, ó da ɔ́ ɔ̄kā kahíníī, “Awɔ nōo ī je unwalu lɛ Ísrɛ̄lu ā yɔ̄ á nɛɛ?”

¹⁸Anɔ́ɔ Ɛláyíja tá ɔ̄ ohi kahíníī, “Ń je unwalu lɛ Ísrɛ̄lu ŋ́. Amáŋ, awɔ mɛ́mla inu kú ɔlɛ́ ádā uwɔ gē je unwalu lɛ Ísrɛ̄lu á. Ohígbū ka aá kwúcē ŋmá íne kú Óndú ā, nōo wɛ Ɔwɔicō kú aá nyɔ̄ í gbā ubáalu ɛ̄gbā á.

¹⁹Lɛ ɛhɔ̄ tū gaá le odúúdú ójīla kú Ísrɛ̄lu hīgwú wā í jīla mɛ́mla um ɛyí ɛfu kú Ukámɛlu, mɛ́mla odúúdú ācogwɛ́ɛya úlā cofɛpa cigwó (450) kú ubáalu, mɛ́mla ācogwɛ́ɛya úlā (400) kú Ássɛ̄ra nēe gē lé ɔdōlé ɛyí ítēbulu kú Ujésēbɛlu ā.”

²⁰Anɔ́ɔ Áhābu le ɛhɔ̄ tū gaá le odúúdú ācɛ ā mɛ́mla ācogwɛ́ɛya kú ubáalu mɛ́mla ákú Ássɛ̄ra ā kpó hīgwú wā ɛyí ɛfu kú Ukámɛlu á.

²¹Anɔ́ɔ Ɛláyíja le túblá ācɛ ā ajaajɛ, anɔ́ɔ ó da uwá ɔ̄kā kahíníī, “Eko nyá nɛ̄ ɔtū kú aá géē wɛ ɛpɛɛpa gaá kwu ā? Ɔ́dāŋ́ ka Óndú ā, wɛ Ɔwɔicō á nɛ, aá yɛce ɔ́, ɔ́dāŋ ka ubáalu nɛɛ, aá yɛce ɔ́.” Anɔ́ɔ ācɛ ā í tá ɔ̄ ohi dúúmā ŋ́.

²²Anɔ́ɔ Ɛláyíja klla da ācɛ ā kahíníī, “Ami ōfōōfū um hile nōo wɛ ɔ̄comɛ́ɛbɛ kú Óndú ā mɛ́ɛ̄ á. Amáŋ, ubáalu lɛ ācogwɛ́ɛya úlā cofɛpa cigwó.” (450).

²³Ó klla da uwá kéē lɛ aɔ́bá ɛna ɛpa kpó wā, cɛ́ɛ́ kéē kwú ɛna éyi ú lɛ ācogwɛ́ɛya kú Ubáalu kéē lɛ ɔ́ ŋmó, kéē lɛ ɔ́ wā. Cɛ́ɛ́ kéē kwú ɔ̄ ú kpó klá ɛyí ɛfú, amáŋ é híī lɛ ɔlá kwu ɛfú ā ŋ́. Anúɔ kē í ŋmó ɛna ɔhá ā, cɛ́ɛ́ anúɔ klla í wā ɔbá ɛna ákú anúɔ ā, kē í kpó ɔ̄ ce ɛyí ɛfú lɛ ā dúú. Anúɔ í gáā le ɔlá kwu ɛfú ā ŋ́ dúú.

²⁴Cɛ́ɛ́ kú ācogwɛ́ɛya kú Ubáalu kéē gbɔ̄ɔkɔ lɛ ɔwɔ kú uwā, cɛ́ɛ́ anúɔ kē gbɔ̄ɔkɔ lɛ Ɔwɔicō kú anúɔ. Ɛ̄nɛ̄ ɔ́ɔ í cīgwú mla ɔlá, nōo klla í wā í je ɛbɛ́ nyā kpó yɔlá ā, anú í wɛ Ɔwɔicō ɔkwɛ̄yi á. Anɔ́ɔ odúúdú ācɛ ā ka ɛlā nɛ̄ ɔ́ɔ ka ā lɔhi íbí.

²⁵Anɔ́ɔ Ɛláyíja da ācomɛ́ɛbɛ kú ubáalu ā ka abɔ̄ ɛ́ɛ lɛwa ā, ɛ́ɛ kwú ɛna éyi ú gbɔbū, cɛ́ɛ́ kéē lɛ ɔ́ ŋmó, lɛ ɔ́ wā kéē kwú ɔ̄ ú kpó ce ɛyí ɛfú ā. Ó da uwá kéē hɛ́ ɔlá kwu ɛfú ā ŋ́. Cɛ́ɛ́ kéē hī iyē kú ɔwɔ kú uwā kóō lɛ ɔlá tū wā í kwú ɛbɛ́ ā ú kpó yi.

²⁶Anɔ́ɔ uwá kwú ɛna éyi ú, lɛ ɔ́ tútū ɛ́gɔ́ɔmā, anɔ́ɔ é gbo ɔ́ ō hī iyē kú ɔwɔ kú uwá á. É hī iyē kú ubáalu ŋmá ɔ̄cɔ̄ɔ̄cī jāā kwu ɔlɛ́ɛnɔ, bá gē ka “Ubáalu, kóocōō, lɛ ohi tá alɔ.” Amáŋ é pó ɔkɔ dúúmā, ɛ́ɛ́ nēé gē pó ohi dúúmā ŋ́. É jījē klla tómbili gicō iyɔ̄bū ede kú ubáalu nēé gwó ā, amáŋ, ubáalu í tá uwá ohi dúúmā ŋ́.

²⁷Eko ɔlɛ́ɛnɔ ā Ɛláyíja gbɔɔ́ ō yá uwā ɛbɛ́ yɔ̄ gē da uwá kéē dɛ̄gba gágá, ohígbū koó wɛ ɔwɔ nɛ. Ka ekōhī ɔ́ɔ yɔ̄ ī kɔ̄kā, ámāŋ ɔ́ɔ kē le tá iyāwu, ámāŋ ɔ́ɔ yɔ̄ í gbiyɔ̄lā, nɛ̄ ɔ́ cɛgbá kéē lɛ ɔ́ héyī.

²⁸Anɔ́ɔ é klla dɛ̄gba gágá fíyɛ́ á. É bī ɛ̄wā mla igwu o wɛ́yí le īyī uwā hɛ́ ɛ́gɛ́nɛ̄ uculo kóō yá kú ubáalu lɛ ā, jāā gbéeko nɛ̄ oyī gbɔɔ́ ō bū uwā iyē.

²⁹É dīíbá jāā gbéeko nɛ̄ ɛnɔ le ɔkɔ cē, amáŋ é pó ɔkɔ dúúmā ɛ́ɛ́ nēé gē pó ohi dúúmā ŋ́. É pó ɔkɔ kú ɔdā dúúmā ŋ́.

³⁰Anɔ́ɔ Ɛláyíja da odúúdú ācɛ ā kahíníī, “Áá túblá um.” Anɔ́ɔ é le túbla anú á. Anɔ́ɔ Ɛláyíja le ede kú Óndú nēé tɛtɛ je catāajɛ ā tū gwó á.

³¹Ó le ɛcɔ̄ igwɛ́ɛpa kpó, ɛ́gɛ́nɛ̄ áluka kú ayínɔ̄nyīlɔ éyééye kú Ujékɔ̄pu lɛ ā. Ɔ̄cɛ nɛ̄ Óndú ā je iyē kú nū pīya Ísrɛ̄lu ā.

³²Ó bī iyē kú Óndú ā bī ɛcɔ̄ igwɛ́ɛpa nyā lɛ ede gwó. Ó klla le ɔ́glɔ́ nōo géē bī ɔgālā kú éŋkpɔ̄ ɛnɛ glá bū jīla ede ā tá.

³³Ɛláyíja le ɛfú kpó ce ede ā, anɔ́ɔ ó le ɛna ā ŋmó, lɛ ɔ́ wā klla kwú ɛbɛ́ nū ú kpó ce ɛyí ɛfú ā á. Anɔ́ɔ ó da uwá kéē lɛ ɔgālā kú éŋkpɔ̄ ɛnɛ kpó wā í cē tū ɔdā kú ɛya ā mɛ́mla ɛfú ā. É le yá lɛ ā.

³⁴Ó klla da uwá kéē lɛ éŋkpɔ̄ kpó wā í pīya tū ɔ̄ kpɔ́. Ó klla da uwá kéē lɛ yá lɛ ā kpɔ́. É klla le yá ɛ́gɔ́ɔmā igbo ɔ́mɛtá kpɔ́.

³⁵Éŋkpɔ̄ ā le mu ede ā klla ī pɛ́ yɛ ɔ́glɔ́ nōó bū jīla ede ā tá ā.

³⁶Anɔ́ɔ eko nēé gē gwɛ́ɛya kú ɔlɛ́ɛnɔ ā, Ɛláyíja, ɔ̄comɛ́ɛbɛ ā, le túblá ede ā gáā gbɔɔ́ ō gbɔ̄ɔkɔ lɛ Óndú ā kahíníī, “Óndú, Ɔwɔicō kú Ébrahām, Áyísīki mɛ́mla Ísrɛ̄lu. kóocōō yá kéē le jé ícɛ nyā ka awɔ wɛ Ɔwɔicō kú Ísrɛ̄lu á. Ka amíyɔ̄ kē wɛ ɔ̄cocɛ̄hɔ̄ kú uwɔ á, ka n kē yá odúúdú aɔ́dā nēe bá nyā ŋmá lɛ ɔ́da nɛ̄ ā je ā nɛ.

³⁷Tá um ohi, Óndú, tá um ohi, cɛ́ɛ́ ká ācɛ nēe bá nyā kéē jé ka, awɔ, Óndú ā, wɛ Ɔwɔicō á. A kē yɔ̄ ī kpó uwā cīgbīhi wā ɛgiyí uwɔ.”[5]

³⁸Anɔ́ɔ Óndú ā le ɔlá tɛ̄hɔ̄ wāajɛ gaá kwú iyɛ́ɛya ā, mɛ́mla ɛfú kú ɛyí ede ā, mɛ́mla ɛcɔ̄ kú ede ā, mɛ́mla ajɛ kú ede ā, mɛ́mla éŋkpɔ̄ kú ɔ́glɔ́ nēé bū tú ede ā biílí ā ú kpó yī ŋmáajɛ kēklēkē.

³⁹Eko nɛ̄ odúúdú ācɛ á lɛ ɔ́ má ā, é má gbo kláajɛ, le eyī kpó pīya kláajɛ. Anɔ́ɔ é ka kahíníī, “Óndú ā, wɛ Ɔwɔicō á. Anú Óndú ā ōfōōfūnū wɛ Ɔwɔicō á.”

⁴⁰Anɔ́ɔ Ɛláyíja da uwá kéē lɛ odúúdú ācogwɛ́ɛya kú ubáalu ā kpó kwú. Ó ka ɛ́ɛ híī cɛ̄ lɛ ɔ̄cɛ dúúmā kú uwá kwu ŋ́. Anɔ́ɔ é le uwá kpó kwú á. Anɔ́ɔ Ɛláyíja le uwá kpó wā ɔkpá kú Ukíssɔn gaá lɛ uwá kpó ŋmó abɔ́ɔ á.

⁴¹Anɔ́ɔ Ɛláyíja da Áhābu kóō nyɔ̄ gaá lé ɔdōlé mɛ́ɛnɛ, ohígbū ka anúɔ pó bā ɔwɔ nɛ̄hi ɔ́ɔ yɔ̄ í gwō.

⁴²Abɔ̄ Áhābu le yɛ kóō lé ɔdōlé cɛ́ɛ́ kóō kē gwá odée dúú ā, Ɛláyíja le tá icīīcō kú ɛfú kú Ukámɛlu ā. Anɔ́ɔ ó túkpɛɛ́ wāajɛ le eyī bū ɔtāhɛ̄ kú okwúukwu kú nū

⁴³Anɔ́ɔ ó da ɔ̄cocɛ̄hɔ̄ kú ɔlɛ́ nū ā kóō nyɔ̄ gaá pīyeyī má ɛga ísu ā. Ɔ̄cocɛ̄hɔ̄ ā le yɛ gaá lɛ ɔ́ má, anɔ́ɔ ó da ɔkpani nū ka ɔdā dúúmā ɔ́ yɔ̄ abɔ́ɔ ŋ́. Igbahāapa odumkwulu nɛ̄ Ɛláyíja da ɔ́ ka ɔ́ɔ nyɔ̄ í má abɔ́ɔ á.

⁴⁴Igbɔ́mahāapa ā, ó pīyɛyí wā í ka ka anúɔ má ojuja nōó nwuné fíyɛ́ abɔ̄ kú ɔ̄cɛ ŋ́, yɔ̄ ī bɛ̄cɛ wɛ̄ɛcɛ ŋmá ipú ísu. Anɔ́ɔ Ɛláyíja da ɔ́ kóō nyɔ̄ í da Áhābu kóō lɛ úgbɔ́ɔnya kú nū tútū, cɛ́ɛ́ kóō gbɔɔ́ ō nyɔ̄ ɔlɛ́ gbɔ̄bū ɛ́ɛ́ kú ɔwɔ ka ɔ́ɔ̄ hɛ́ ɔ̄ tū ɔwɛ.

⁴⁵Eko kpíii ā, ɔkpáncō kwú dobū kpímm mla ojuja. Owu gbɔɔ́ ō tá, anɔ́ɔ ɔwɔ nɛ̄hi gbɔɔ́ ō yā á. Áhābu le tá ipú úgbɔ́ɔnya kú nū anɔ́ɔ ó gbɔɔ́ ō ga Ujɛsiríili á.

⁴⁶Óndú ā wā í lɛ ɔfú tū Ɛláyíja iyē, anɔ́ɔ ó le úwé kú nū kwú wu ɛ́nyɔ́ anɔ́ɔ ó le inya kwu le hɛ́ Áhābu ɔbū, le tá Ujɛsríli á.