Read idoma 1 AƆ́CƐ́ 19 Bible Online

1 AƆ́CƐ́ 19 - idoma bible

1 AƆ́CƐ́ 19

¹Áhābu gaá le odúúdú ɔdā nɛ̄ Ɛláyíja yá ɛyí ɛfu kú Ukámɛ̄lu ā mɛ́mla ɛ́gɛ́nɛ̄ ó bī ɔkpacaŋgelī je odúúdú ācogwɛ́ɛya kú ɔwɔ nēé hī ubáalu ā kpó ŋmó lɛ ā kpó ka lɛ Ujɛ́sēbɛlu, ɔnyā nū.

²Anɔ́ɔ Ujɛ́sēbɛlu lɛ ɛhɔ̄ tū fu Ɛláyíja kahíníī, “Aɔ́wɔ ā kéē lɛ um ŋmó, ɔ́dāŋ ka eko ɛ́gɛ́nyā oócí nɛ̄ ń yá uwɔ ɔdā nɛ̄ a yá ācogwɛ́ɛya kú ubáalu ā ŋ́.”

³Anɔ́ɔ Ɛláyíja gbɔɔ́ ō yúúfi, anɔ́ɔ ó kwú ɔ̄cocɛ̄hɔ̄ kú nū ā ú le kwu ohígbū oyēeyī kú nū ga Ubiyɛssɛ́ba ipú ajɛ kú Ujúda á. Anɔ́ɔ ó mabɔ̄ ɔ̄cocɛ̄hɔ̄ kú nū ā tá abɔ́ɔ á.

⁴Ɛ̄cī éyi Ɛláyíja le iyāwu kú ɛ̄cī odunkwulu yɛ ga ipú ígbíli ōfōōfūnū. Ó gaá cīce ɔkwu alī éyi. Eyī yá ɔ̄ ka ɔ́ɔ̄ gekwú. Anɔ́ɔ ó gbɔ̄ɔkɔ lɛ Óndú ā yɔ̄ ī ka kahíníī, “Unwalu kú um jɛ̄ ɛɛ́. Óndú, kwú oyēeyī kú um ú mɛ́ɛ̄. N gekwú mɛ́ɛ̄. Ń klla lɔhi fíyɛ́ aádáádā um nēe kwú ā ŋ́.”

⁵Anɔ́ɔ ó má gwutá ɔkwu alī gbɔɔ́ ō gbiyɔ̄lā. Anɔ́ɔ alelékwū-ōtɛ̄hɔ̄ kú Óndú ā gaá le abɔ̄ kwu ɔ́, da ɔ́ ka ɔ́ɔ̄ le héyī ka ɔ́ɔ̄ lé ɔdōlé.

⁶Ó pīyeyī, anɔ́ɔ ó má kéē le igbō yá ɛyí ɛcɔ̄ okwɔ́lá mɛ́mla ɔjá kú éŋkpɔ̄ kē háyi pīyɛ̄ ɔ̄. Ɛláyíja le igbō ā lé klla le éŋkpɔ̄ gwá, anɔ́ɔ ó má gwutá igbɔhá kpɔ́ á.

⁷Alelékwū-ōtɛ̄hɔ̄ kú Óndú ā klla gā ɛgiyí nū, igbo ɔ́mpa. Anɔ́ɔ ó gaá lɛ abɔ̄ kwu ɔ́ kpɔ́ klla da ɔ́ ká ɔ̄ cāŋjɛ ka ɔ́ɔ̄ lé ɔdōlé ohígbū ka iyāwu nɛ̄hi tá ɔbū lɛ ɔ́ kpɔ́ ɛɛ́.

⁸Anɔ́ɔ ó cāŋjɛ le ɔdōlé ā lé klla lɛ éŋkpɔ̄ gwá. Anɔ́ɔ ó bī ɔdōlé ɔ́ɔmā ipú klla yāwu ɛ̄cī ofɛpa ga ɛyí ɛfu kú Uhórebu, ɛyí ɛfu kú Ɔwɔicō ā á.

⁹Abɔ́ɔ ā ó le tá ipú ɔ̄gɛ̄cɔ̄ éyi gaá klá abɔ́ɔ otú ɔ́ɔma gbɔ́ɔcī. Anɔ́ɔ Ɔwɔicō gā abɔ́ɔ gaá da ɔ́ kahíníī, “Ɛláyíja, ɔdí nɛ̄ a yɔ̄ ī yá amānyā ā?”

¹⁰Anɔ́ɔ Ɛláyíja da ɔ́ kahíníī, “N húmáyī yúklɔ́ gā uwɔ, Óndú ā, awɔ nōo wɛ Ɔwɔicō nōo lɔfú fíyɛ́ dúú ā. Amáŋ ācɛ kú Ísrɛ̄lu kwúcē ŋmá ɛka nɛ̄ awɔ mɛ́mla uwá gbo ā, é klla le ede kú uwɔ ā catāajɛ. É klla bī ɔkpacaŋgelī le odúúdú ācomɛ́ɛbɛ kú uwɔ ā kpó ŋmó ɛɛ́. Ami ōfōōfū um nōo hile ā, é kē yɔ̄ ī tíne ō je um ŋmó dúú

¹¹Anɔ́ɔ Óndú ā da Ɛláyíja kahíníī, “Nyɔ̄ ga ɛyí ɛfu ká ā gaá háyi gbēyī um. Óndú ā yɔ̄ ī wā gaá yɛ, anɔ́ɔ ofúlutu nɛ̄hi nōo lɔfú nɛ̄hi ā le aɛ́fu nɛ̄ŋcɛ́ ā kpó yíla ɛpa klla le aɛ́pátɛ̄cɔ̄ kpó ca kɛ́tɛ̄kɛtɛ̄ á. Amáŋ Óndú ā í yɔ̄ ipú ofúlutu ā ŋ́. Eko nɛ̄ ofúlutu ā mɛ ā, ajɛ le jíliyē klla kwú hɛ́wulu, amáŋ Óndú ā í yɔ̄ ipú ajɛ ojīliyē mɛ́mla ohɛ́wulu ā ŋ́.

¹²Igbīhi kú ajɛ o jīliyē ā mɛ́mla ajɛ ohɛ́wulu ā, ɔlá wā í le yi gaá mɛ, amáŋ Óndú ā, í yɔ̄ ipú ɔlá ā ŋ́. Anɔ́ɔ eko nɛ̄ ɔlá ā mɛ tāajɛ ā, anɔ́ɔ Ɛláyíja pó ɔkɛlā lígíi nōo lɛbɛ̄ɛka ɛlā ō ka tū ɔ̄cɛ ahɔ̄ ā,

¹³anɔ́ɔ ó cāŋjɛ kwú úwé kú nū ú klá ēyī, gaá háyi okónu kú ɔgɛ̄cɔ̄ kú ɛfu ā. Anɔ́ɔ ɔkɔ nōó pó ā kɛlā lɛ ɔ́ kahíníī, “Ɔdí nɛ̄ a gē yá amānyā, Ɛláyíja?”

¹⁴Anɔ́ɔ Ɛláyíja tá ɔ̄ ohi kahíníī, “N húmáyī yúklɔ́ gā uwɔ, amáŋ ācɛ kú Ísrɛ̄lu kwúcē ŋmā ɛka nɛ̄ awɔ Óndú ā gbo mla uwá ā. É klla le ede kú awɔ nōo wɛ Óndú ā catāajɛ. É bī ɔkpacaŋgelī le odúúdú ācomɛ́ɛbɛ kú uwɔ ā kpó ŋmó. Ami ōfōōfū um nōo hile ā, é kē yɔ̄ ī tíne ō je um ŋmó dúú.”

¹⁵Anɔ́ɔ Óndú ā da ɔ́ kahíníī, “Kwúcē ga ígbíli kú Udamáskɔ̄si, cɛ́ɛ́ a lɛ bēhé ga ipú igelī nɛ̄hi ā, cɛ́ɛ́ a lɛ anɔ̄ tū Uhásɛ̄lu ɛyí kóō kwú pīya ɔcɛ́ kú Usiríya.”

¹⁶Ó klla da ɔ́ ka ɔ́ɔ í lɛ anɔ̄ tū Ujéhu, ɔyí kú Unímssi ɛyí kóō kwú pīya ɔcɛ́ kú Ísrɛ̄lu. Ó klla da ɔ́ ka ɔ́ɔ lɛ anɔ̄ tū Ɛláyíssa, ɔyí kú Ussáfati kú Ébɛ̄lu Umehóla ɛyí kóō wɛ ɔ̄comɛ́ɛbɛ kú aníɔ kwɛyí anú nōo wɛ Ɛláyíja ā.

¹⁷Óndú ā klla kahíníī, “Ɔ̄cɛ nōo le kwu ŋmá ɔkpacaŋgelī kú Uhásɛ̄lu, ɔkpacaŋgelī kú Ujéhu géē je ɔ́ ŋmó. Ɔ̄cɛ nōo kē le kwu ŋmá ɔkpacaŋgelī kú Ujéhu, Ɛláyíssa géē je ɔ́ ŋmó.”

¹⁸Ó klla kahíníī, “Amáŋ n géē mabɔ̄ ācɛ úlā igwɛ́ɛpa cofigwó (7,000) tá Ísrɛ̄lu, ācɛ nēé túkpɛɛ́ lɛ ubáalu ŋ́, ɛ́ɛ́ nēé gē gbā ɔ̄ ɛ̄gbā ŋ́ mā.”

¹⁹Anɔ́ɔ Ɛláyíja nyɛ̄ɛ̄ ŋmá abɔ́ɔ gaá le Ɛláyíssa, ɔyí kú Ussáfati má, abɔ̄ ó bī ɛna igwɛ́ɛpa yɔ̄ í hɛ́hɔ̄ ā. Anɔ́ɔ Ɛláyíja gā ɛgiyí nū, anɔ́ɔ ó le úwé kú ɛhícō plla kwú ɔ̄ ú kpó wu ɔ́ iyē á.

²⁰Anɔ́ɔ Ɛláyíssa habɔ̄ aɛ́na ā tá le inya kwu tá Ɛláyíja ɔkwu á. Ó klla da Ɛláyíja kahíníī, “Ń nyɔ̄ gaá lɛ úŋmóō tá ɛ́nɛ́ um mɛ́mla ádā um ɛ́ɛ́, ká n̄ géē wā í yɛce uwɔ.” Anɔ́ɔ Ɛláyíja da ɔ́ kahíníī, “A lɔfú kwúcē, amáŋ gbɛlá kwu ɔdā nɛ̄ n yá uwɔ ā.”

²¹Anɔ́ɔ Ɛláyíssa kwúcē ŋmá ɛgiyí Ɛláyíja á. Ó nyɛ̄ɛ̄ gaá le ɔdōhɛ́hɔ̄ ā wī ŋmá aɛ́na ā ɔkɔ, anɔ́ɔ ó le uwá kpó ŋmó. Ó kwú ɔcí kú ɔdōhɛ́hɔ̄ ā le ɔlá gwó, anɔ́ɔ ó le ɛbɛ́ kú aɛ́na ā he á. Ó le ɛbɛ́ kú aɛ́na ā kɔ̄ lɛ ācɛ, anɔ́ɔ é le lé á. Anɔ́ɔ ó nyɛ̄ɛ̄ gaá tá Ɛláyíja ɔkwu gbɔɔ́ ō cē ɔ̄ ɛhɔ̄ á.