Read idoma 1 AƆ́CƐ́ 2 Bible Online

1 AƆ́CƐ́ 2 - idoma bible

1 AƆ́CƐ́ 2

¹Eko nɛ̄ Udéfīdi gaá kwú ā, ó da Usólōmɔn, ɔyí nū ā kahíníī,

²“N gaá kwú ɛɛ́. Lɛ ɔfú tīiyē ká ā klla lɛ ɔtū lɛ bɛ̄ɛka ɔ̄cɛnyīlɔ ā.

³Bēē yá ɔdā nɛ̄ Óndú ā, nōo wɛ Ɔwɔicō kú uwɔ ā, da uwɔ ka ā yá ā. Lɛyítáajɛ lɛ aíne mɛ́mla ɔdā dúúmā nōó tū uwɔ ukɔ́ lɛyíkwu ɔ́ nēé tá tū ipú íne kú Umósīsi ā, cɛ́ɛ́ ká ā jɛ̄ gɔbū lɔhi ipú ɔdā dúúmā nɛ̄ a í yá ā mɛ́mla ɛga dúúmā nɛ̄ a í nyɔ̄ ā.

⁴Udéfīdi, ɔcɛ́ ā, da ɔ́ kahíníī, “Ɔ́dāŋ ka a lɛyítáajɛ lɛ Óndú ā, ó géē yá okónu nōó ce gā um ka ayááyí um géē yɔ̄ ī lé ɔcɛ́ ajɛ kú Ísrɛ̄lu piyóó, ɔ́dāŋ kéē leyí kwɛcɛ lɛyítáajɛ lɛ íne kú nū ŋmá ɔtū ékpónú kú uwā ā.

⁵Ó klla da Usólómɔ̄n kahíníī, “Ofíyɛ́ dúú ā, a jé ɔdā nɛ̄ Ujówābu, ɔyí kú Userúya yá um ā. Anú kpó aótrɛ̄yí kú aícɔ́ɔja kú Ísrɛ̄lu ɛpa, Ábna, ɔyí kú Unɛ́ɛ mɛ́mla Amása, ɔyí kú Ujɛ́ta ŋmó eko ɛbɔ́, yɔ̄ ī cílá óluma kú ɔ̄cɛ nēé ŋmó ɔgbɛ́fú āá. Ācɛ nōo yá ɔdōbɔ̄bí dúúmā ŋ́ nōó ŋmó á, [2] amáŋ abālɔbányā ɛfiyɛ kú ɔdā nōó yá ā ce um ɛyí.

⁶A jé ɔdā nɛ̄ a í bī íjéeyī kú uwɔ yá mla anú. Á cɛ̄ lɛ Ujówābu kwú ɛbɔ́ eko ókplícī kú nū ŋ́.”

⁷Ó klla da ɔ́ ka ɔ́ gbonɛnɛ lɛ ayí kú Ubasiláyi nōo ŋmá Ugílɛ̄di ā, cɛ́ɛ́ kú ɔ̄ leyīkwu uwá. Ó ka ohígbū kéē gbonɛnɛ lɛ anúɔ eko nɛ̄ anúɔ yɔ̄ í kwu ŋmá ɛgiyí Ábsālɔm, ɔyínɛ́ nū ā.

⁸Udéfīdi, ɔcɛ́ klla da ɔ́ ká ɔ́ɔ blakwu Ussímēyi, ɔyí kú Ugɛ́ra, nōo ŋmá Ubahúrim, ipɔ́ɔma kú Ubɛ́njamīn ā. Ó ka ɔ́ɔ cá anúɔ ɛcá nɛ̄hi ɛ̄cī nɛ̄ anúɔ ga Umahanayím ā. Ó ka amáŋ eko nɛ̄ ɔ́ɔ wā í jīla anúɔ ɔwɛ ísu kú Ujɔ́dan ā, anúɔ bī iyē kú Óndú ā le okónu ce lɛ ɔ́ ka anúɔ í gáā ŋmó ɔ̄ ŋ́.

⁹Ó ka ɔ́ lɛlá kwú ɔ́ɔ dúú ka ɔ́ɔ lɛ italā yá ɔ̄ piíí. Ó da ɔ́ ka ɔ́ɔ jé ɔdā nɛ̄ ɔ́ɔ cíkā ō yá mla anú. Ó da ɔ́ ka ɔ́ má kéē lɛ ɔ́ ŋmó piíí.

¹⁰Udéfīdi gekwú, anɔ́ɔ é kwú ɔ̄ ú nyi igelī nɛ̄hi kú Udéfīdi ā.

¹¹Ó wɛ ɔcɛ́ kú Ísrɛ̄lu iháyí ofɛpa. Ó kē wɛ ɔcɛ́ ajɛ kú Uhɛ́brɔn iháyí ahāapa ce ɔyā ɛhīlī, ó klla kē wɛ ɔcɛ́ ipú Ujerúsālɛm iháyí ofu cigwɛ́ɛtá

¹²Anɔ́ɔ Usólōmɔn mīyɛ ɔkwu ɔcɛ́ kú ádā nū, Udéfīdi á. Ó kē kwú ikpó ú kwajɛ ipú ajɔ̄ɔ̄cɛ́ kú nū lɔfú lɔfú.

¹³Anɔ́ɔ ɛ̄cí éyi Adónīja, ɔyí kú Uhágiti le tá ɛgiyí Ubatisséba, ɛ́nɛ́ kú Usólōmɔn. Anɔ́ɔ ó da Adónīja ɔ̄kā ka ɔ́ɔ wā ɛbɔ́ nɛɛ? Anɔ́ɔ ó da ɔ́ ka anú wā ɛbɔ́ nɛ.

¹⁴Anɔ́ɔ Adónīja da ɔ́ ka anúɔ lɛ ɛlā éyi nɛ̄ anúɔ gáā ka lɛ ɔ́. Anɔ́ɔ Ubatissɛ́ba da ɔ́ ka ɔ́ɔ̄ ka mɛ́ɛnɛ.

¹⁵Anɔ́ɔ Adónīja da ɔ́ kahíníī, “A jé ka ami géē yɛ í lɛ́ ɔcɛ́ á, odúúdú Ísrɛ̄lu kōō leyīce lɛ ā dúú. Amáŋ ɛ́gɛ́nɛ̄ Óndú ā miya ɔ́ lɛ ā, ɔcɛ́ le pīya yɛ í ce ɔyínɛ́ um anɔ́ɔ ó kē lɛ ɔcɛ́ ā lé ɛɛ́.”

¹⁶Ó ka ɔ́ɔ lɛ ɔdā ékpónú nɛ̄ anúɔ í ba ŋmá ɛgiyí nū eko ɔ́ɔmā. Anɔ́ɔ ó da ɔ́ ka ɔ́ɔ̄ híī tá ɛ̄ba nɛ̄ anúɔ gáā ba ɔ́ ā ŋ́. Anɔ́ɔ Ubatsséba tá ɔ̄ ohi ka ɔ́ɔ̄ da anúɔ mɛ́ɛnɛ.

¹⁷Anɔ́ɔ ó da ɔ́ ka ɔ́ɔ̄ lɛ ɔkɔ gbā lɛ Usólómɔ̄n, ɔcɛ́ ā, lɛ anúɔ. Cɛ́ɛ́ ka ɔ́ɔ̄ kwú Abíssāgi, ɔyínɔ̄nyā kú Ussúnɛm ā ú lɛ anúɔ cɛ́ɛ́ ka ɔ́ɔ̄ kwú pīya ɔnyā anúɔ. Ó ka anúɔ jé ka Usólōmɔn ɔ́ɔ gáā tá ɛlā kú ɛ́nɛ́ nū ŋ́.

¹⁸Anɔ́ɔ Ubatisséba tá ɔ ohi ka ɔ́ɔ lɔhi, anúɔ géē kɛlā lɛ ɔcɛ́ kwɛyí nū.

¹⁹Anɔ́ɔ Ubatisséba le tá ɛgiyí Usólómɔ̄n, ɔcɛ́ ā, gaá le ɛlā ka lɛ ɔ́ kwɛyí Adónīja á. Ɔcɛ́ cāŋjɛ gaá jīla ɛ́nɛ́ nú ɔwɛ, tūkpɛɛ́ lɛ ɔ́. Anɔ́ɔ ó gaá má cīce akpa kú ɔcɛ́ kú nū. Anɔ́ɔ ó cɛ̄ lɛ ɔ̄cɛ éyi lɛ ɔdōcīce bī gé lɛ ɛ́nɛ́ nú á, anɔ́ɔ ó má cíce abɔ̄lɔ́ná kú ɔcɛ́ á.

²⁰Anɔ́ɔ ó da ɔ́ ka anúɔ lɛ ɛ̄ba éyi lígíi nɛ̄ anúɔ í ba ŋmá abɔ̄ nū. Ó da ka ɔ̄ híī nyá anúɔ ŋ́. Anɔ́ɔ ɔcɛ́ da ɔ́ ka ɔ́ɔ̄ ba ɛ̄ba kú nū ā, ka anúɔ í kē gáā nyá ɔ̄ ŋ́.

²¹Anɔ́ɔ ɛ́nɛ́ ɔcɛ́, Ubatisséba da Usólómɔ̄n, ɔyí nū nōo wɛ ɔcɛ́ ā ka ɔ́ɔ̄ kwú Abíssāgi, ɔyínɔ̄nyā kú Ussúnem ā ú le Adónīja, ɔyínɛ́ nū cɛ́ɛ́ kóó kwú pīya ɔnyā nū.

²²Anɔ́ɔ ɔcɛ́ ā tá ɛ́nɛ́ nū ohi ka ɔdíyá nɛ̄ ɔ́ɔ ba anúɔ ka anúɔ kwú Abíssāgi ú lɛ Adónīja ā? Usólómɔ̄n, ɔcɛ́ ā da ɛ́nɛ́ nū kóō kē í yɛ í le ba anúɔ cɛ́ɛ́ kú anúɔ kē kwú ɔcɛ́ ú lɛ Adónīja ka ɔ́ɔ̄ lɛ lé béekpóó dúú. Ó ka abɔ̄ aá kē ī ka nááná, anú ɔ́ɔ kōō wɛ ɔnyākwɔ́cɛ kú anúɔ á. Abíyata, ɔ̄cogwɛ́ɛya mɛ́mla Ujówābu ɛ́ɛ kē yɛce ɔ́.

²³Anɔ́ɔ Usólōmɔn, ɔcɛ́ ā, bī iyē kú Óndú ā lɛ ɔkpá gbo ce īyī nū ka Ɔwɔicō kóō lɛ anúɔ ŋmó, ɔ́dāŋ ka Adónīja ɔ́ɔ kwú ohígbū ɛ̄ba nōó ba ā ícíícɛ ɔ́ɔmā ŋ́.

²⁴Ó ka Óndú ā, nōo wɛ Ɔwɔicō ā, ɔ́ɔ kwú anúɔ ú cɔcɛ́ kwɛyí ádā anúɔ Udéfīdi. Ó ka Óndú ā ɔ́ɔ le okónu nɛ̄ ɔ́ɔ ce lɛ ádā anúɔ ā yá gaajɛ, anɔ́ɔ ɔ́ɔ kwú ajɔ̄ɔ̄cɛ́ ú lɛ anúɔ mɛ́mla ayááyí anúɔ á. Ó bī iyē kú Óndú ā le ɔkpá gbo ka Adónīja ɔ́ɔ í kwú ícíícɛ ɔ́ɔmā piíí.

²⁵Anɔ́ɔ Usólōmɔn lɛ ɔ́da je lɛ Ubenáya, anɔ́ɔ ó nyɔ̄ í lɛ Adónīja ŋmó á.

²⁶Anɔ́ɔ Usólómɔ̄n, ɔcɛ́ ā da Abíyāta, ɔ̄cogwɛ́ɛya ā ka ɔ́ɔ̄ nyɔ̄ ga ɔlɛ́ nū ajɛ kú Anátɔ̄tu. Ó da ɔ́ ka ɔ́ɔ cíkā ō gekwú, amáŋ anúɔ í gáā cɛ̄ lɛ uwá ŋmó ɔ̄ ícíícɛ ɔ́ɔmā ŋ́, ohígbū ka anú ɔ́ɔ leyīkwu ikpáti kú Ɛka kú Óndú ā eko nɛ̄ ɔ́ɔ yɔ̄ ɔlɛ́ ádā anúɔ Udéfīdi, ɔcɛ́ ā á. Ó klla da ɔ́ ka anú mɛ́mla ádā anúɔ má odúúdú ōwē tɔ̄há á.

²⁷Anɔ́ɔ Usólómɔ̄n, ɔcɛ́ ā le Abíyāta nū ŋmá úklɔ́ kú ɛya ō gwó lɛ Óndú á. Ɛ̄nyā le yá lɛ ā cɛ́ɛ́ kú ɛlā nɛ̄ Óndú ā ka Ussílo lɛyíkwu Ɛ́lāyi, ɔ̄cogwɛ́ɛya ā mɛ́mla ayááyí nū ā kóō le yá jīla ɔkwɛ̄yi.

²⁸Eko nɛ̄ Ujówābu lɛ ɔdā nōo yá ā pó ā. (Ó yɛce Adónīja, nááná nōó yɛce Ábsālɔm ŋ́) Anɔ́ɔ ó le kwu ga ipú áklɔ̄kpɛ kú Óndú ā gaá bī aájī kú ɔ́kíkā kú ede ā á.

²⁹Eko nɛ̄ ɔ̄kā ā gā ɛgiyí Usólōmɔn, ɔcɛ́ ā, ka Ujówābu ɔ́ɔ le kwu ga ipú áklɔ̄kpɛ kú Óndú ā, Usólōmɔn le ɛhɔ̄ tū fu Ujówābu ka ɔdíyá nɛ̄ ɔ́ɔ kwu ga ɛgiyí ede kú Óndú ā. Anɔ́ɔ Adónīja tá Usólómɔ̄n, ɔcɛ́ ā, ohi ka ohígbū ka anɔ́ɔ gē yúúfi nú, Usólōmɔn, nōo wɛ ɔcɛ́ ā. Anɔ́ɔ Usólōmɔn, ɔcɛ́ ā, lɛ Ubenáya tɛ̄hɔ̄ kóō gaá lɛ ɔ́ ŋmó.

³⁰Anɔ́ɔ Ubenáya le tá ipú áklɔ̄kpɛ kú Óndú ā gaá da Ujówābu ka ɔcɛ́ ā le ɔ́da je ka ɔ́ɔ le bɛ̄cɛ. Anɔ́ɔ Ujówābu tá klla tá ɔ̄ ohi ka anúɔ géē kwú abɔ́ɔ. Anɔ́ɔ Ubenáya kwúcē ga ɛgiyí ɔcɛ́ gaá le ɔdā nɛ̄ Ujówābu ka ā ka lɛ ɔ́ á.

³¹Anɔ́ɔ Usólōmɔn tá ɔ̄ ohi ka ɔ́ɔ lɛ ɔdā nɛ̄ ɔ́ɔ ka ā yá ɔ̄. Ó ka ɔ́ɔ lɛ ɔ́ ŋmó cɛ́ɛ́ kóō lɛ ɔ́ nyī. Cɛ́ɛ́ kú ɛpɔ̄bí kú ācɛ nɛ̄ ɔ́ɔ ŋmó áncā ā kóō híī ce anúɔ mɛ́mla ācɛ ɔlɛ́ ádā anúɔ, Udéfīdi ɛyí ŋ́.

³²Ó ka Óndú ā ɔ́ɔ géē cíla Ujówābu óluma kú ācɛ nēe yá ɔdā okpaakpa fíyɛ́ ɔ̄ nōó kpó ŋmó ā. Ohígbū ka ádā anúɔ ɔ́ɔ jíkpó ikwū kú Ábna, ɔyínɔ̄nyīlɔ kú Unɛ́ɛ, otrɛ̄yí kú aícɔ́ɔja kú Ísrɛ̄lu mɛ́mla Amása, ɔyínɔ̄nyīlɔ kú Ujéta, otrɛ̄yí kú aícɔ́ɔja kú Ujúda nɛ̄ ɔ́ɔ kpó ŋmó áncā ā ŋ́.

³³Kéē géē yá Ujówābu mɛ́mla ipɔ́ɔma kú nū italā piyóó ohígbū ācɛ nōó kpó ŋmó ā. Amáŋ Óndú ā géē yɔ̄ ī yá ɔdā olɔhi lɛ ayááyí kú Udéfīdi nēe gē cīce akpa kú ɔcɛ́ kú nū ā piyóó.

³⁴Anɔ́ɔ Ubenáya le tá ipú Áklɔ̄kpīihɔ kú Óndú ā gaá le Ujówābu ŋmó abɔ́ɔ. Anɔ́ɔ é kwú ɔ̄ ú nyī ɔlɛ́ nū ipú ígbíli á.

³⁵Usólómɔ̄n, ɔcɛ́ ā, kwú Ubenáya ú yá otrɛ̄yí kú aícɔ́ɔja kwɛyí Ujówābu, anɔ́ɔ ó klla kwú Usádɔ̄ku ú pīya ɔ̄cogwɛ́ɛya kwɛyí Abíyāta, ɔ̄cogwɛ́ɛya ā á.

³⁶Anɔ́ɔ Usólómɔ̄n, ɔcɛ́ ā le ɛhɔ̄ tū fu Ussímēyi kóō lɛ ɔlɛ́ gwó lɛ īyī nū ipú igelī nɛ̄hi kú Ujerúsālɛm abɔ́ɔ. Ó klla da ɔ́ kóō lā ipú inu ā cɛ́ɛ́ kóō híī nyɛ̄ɛ̄ ŋmá ipú igelī nɛ̄hi ā ŋ́.

³⁷Usólómɔ̄n, ɔcɛ́ ā da ɔ́ ka ɛ̄cī dúúmā nɛ̄ ɔ́ɔ le yɛ gla ɔkpá kú Ukídrɔn ā, ɔ́ɔ géē kwú, anú ɔ́ɔ kē yá iyī nū á.

³⁸Anɔ́ɔ Ussimēyi tá Ágábáidu ɔcɛ́ ohi ka ɔ́ɔ lɔhi, ɔdā dúúmā nōó ka ā, anúɔ géē yá ɔ̄. Anɔ́ɔ Ussímēyi má lā Ujerúsālɛm yɛɛ á.

³⁹Eko nɛ̄ iháyí ɛtá le gla ā, aɔ́fiyɛ ɛpa kú ɔlɛ́ Ussímēyi le pɛ́ kwu ŋmá ɔlɛ́ nū le tá ɛgiyí ɔcɛ́ kú Ugáti, Ákisi, ɔyí kú Umáaka. Eko nɛ̄ Ussimēyi le pó ka ɛ́ɛ bá Ugáti ā.

⁴⁰Ó le ɔdōcīce kpó ce ɛyí ijakī kú nū, anɔ́ɔ ó le tá ɛgiyí Ákisi, ɔcɛ́ kú Ugáti gaá tíne aɔ́fiyɛ kú nū á. Ó lɛ uwá má klla le uwá kpó kwúcē wā ɔlɛ́ nū.

⁴¹Eko nɛ̄ Usólōmɔn lɛ ɔdā nɛ̄ Usímēyi yá nyā pó ā,

⁴²ó le ɛhɔ̄ tū gaá da ɔ́ ɔ̄kā kahíníī, “N cɛ̄ gā awɔ le okónu ce ipéyī Óndú ā ka anúɔ ɔ́ɔ gáā nyɛ̄ɛ̄ ŋmá Ujerúsālɛm ŋ́. N klla pi uwɔ ahɔ̄ ka, ɛ̄cī dúú nɛ̄ a nyɛ̄ɛ̄ le bɛ̄cɛ, a géē kwú piíí. A kē cɛ̄ ka anúɔ géē lɛyítáajɛ gā um.”

⁴³Ó klla da ɔ́ ka ɔdíyá nɛ̄ ɔ́ɔ je okónu nɛ̄ ɔ́ɔ ce ā nyílá, nɛ̄ ɔ́ɔ lɛyítáajɛ lɛ anúɔ ŋ́ māa?

⁴⁴Usólómɔ̄n, ɔcɛ́ klla da ɔ́ ka ɔ́ɔ jé odúúdú ɔdōbɔ̄bí nɛ̄ ɔ́ɔ yá ádā anúɔ, Udéfīdi kpɛ́mm ā. Ó da ɔ́ ka Óndú ā ɔ́ɔ géē yá ɔ̄ italā ohígbū ɔdā nɛ̄ ɔ́ɔ yá ā.

⁴⁵Ka amáŋ Óndú ā ɔ́ɔ géē hɔ́hā ce anúɔ klla í yá ka ajɔ̄ɔ̄cɛ́ kú ádā anúɔ, Udéfīdi kóō yɔ̄ ɛbɔ́ piyóó ipú ɛcɛ nyā.

⁴⁶Anɔ́ɔ Usólómɔ̄n, ɔcɛ́ ā, lɛ ɔ́da je lɛ Ubenáya, anɔ́ɔ ó le yɛ gaá lɛ Ussímēyi ŋmó á. Anɔ́ɔ abɔ̄ kú Usólōmɔn lɛ ajɛ kú Ísrɛ̄lu ā kwú lɔɔlɔhi á.